O swanetše go ngwadiša kgwebo ya gago bjalo ka yeo e lefago Motšhelo wo o Tsentšwego wa Hlwahlwa (VAT) ge e le gore palomoka ya hlwahlwa ya dithoto goba ditirelo tše ye e lefišwago motšhelo e feta R1 milione mo lebakeng la dikgwedi tše 12, goba go emetšwe gore e tla feta tšhelete ye.
Kgwebo le yona e ka ngwadišwa ka boithaopo ge e le gore letseno le le hweditšwego mo lebakeng le le fetilego la dikgwedi tše 12 le feta R50 000.
VAT ke motšhelo wo o sego wa thwii go tšhomišo ya dithoto le ditirelo ka ekonoming.
Romela foromo ya boingwadišo lekaleng la SARS la kgauswi le wena mo matšatšing a 21 go tloga ka letšatšikgwedi leo kgwebo e fetilego letseno la R1 milione.
VAT e lefša ka kelo ye e tlwaelegilego ya 15% go kabo ya dithoto le ditirelo ke barekiši bao ba ingwadišitšego. Go na le bontši bjo bo diretšwego mollwane bja dithoto le ditirelo tšeo di swanetšego go lefišwa VAT ka kelo ya lefeela goba tše di sa lefišwego VAT.
O ka dira kgopelo ya go phumola ngwadišo ya gago ya VAT ge e le gore hlwahlwa ya dikabo tše di lefišwago motšhelo e wela ka fase ga mollwane wa R1 milione, goba ge e le gore ditiragalo ka moka tša kgwebo di emišitše.
Ngwadišo ya gago ya VAT e tla phumolwa fela ge Mokhomišenare a kgotsofetše gore dikabo tša gago tše di lefišwago motšhelo ga di fete R1 milione goba gore o emišitše kgwebo.
O swanetše go tsebiša Tirelo ya Metšhelo ya Afrika Borwa (SARS) mo matšatšing a 21 ka ga go emiša ga kgwebo ya gago.
Kgwebo ya gago e tla tšwela pele go swanelwa ke go lefa dikoloto dife goba dife tše di šetšego tša VAT ka nako ye e bego e ngwadišitšwe bjalo ka morekiši.
Hwetša tše ntši ka ga ka fao o ka ingwadišetšago VAT goba go phumola ngwadišo ya gago goba ikgokaganye le SARS.
