21 Nov 2013
1. Maemo a Kabinete ka ga merero ye e lego ditabeng ka seemong sa bjale
1.1. Kabinete e amogela palo ya godimo ya bakgethi ba ba kgotsofatšago dinyakwa tša go kgetha bao ba kwelego kgoeletšo ya go ngwadiša kgatong ya mathomo ya ngwadišo ka la 9 le 10 Dibatsela 2013. Bakgethi ba ba kgotsofatšago dinyakwa tša go kgetha bao ba sego ba ngwadiša ba gopotšwa gore lebaka la ngwadišo le tšwela pele go fihla go tsebišwa letšatšikgwedi la dikgetho tša go latela tša bosetšhaba.
Kabinete e leboga mošomo wa Khomišene ye e Ikemego ya Dikgetho, gomme e dira boipiletšo go maAfrika Borwa ka moka go phethagatša tokelo ya ona ya go kgetha, yeo tlilego ka lebaka la ntwa ya rena ya tokologo le temokrasi.
1.2. Lesolo la Matšatši a 16 a Twantšho ya Dikgaruru kgahlanong le Basadi le Bana le tla thoma ka la 25 Dibatsela go fihla ka la 10 Manthole 2013 ka fase ga kgwekgwe ya go re: “VIKELA MZANSI – Kwanele: Ditšhaba di kopane go thibela dikgaruru kgahlanong le basadi le bana.”
Kabinete e dira boipiletšo go maAfrika Borwa ka moka go šomiša sebaka se go tsošološa boineelo bja rena, go fediša maitshwaro a mašoro le nyenyefatšo ya batho ka batho ba bangwe setšhabeng sa rena le go neela leswa naga ya rena ditokelong tše di sa hlaolego basadi le bana.
1.3. Motlatšamopresidente Kgalema Motlanthe o tla eta pele keteko ya Letšatši la Lefase la AIDS go la Mkhondo, Seleteng sa Gert Sibande, Mpumalanga, ka la 1 Manthole 2013 ka fase ga kgwekgwe ya go re: “Hlalefa. Dira diteko. Bolla.”
Sebaka se tla šomišwa go tsebiša setšhaba ka dikgato tša mmušo tša go lwantšha leuba, go matlafatša lesolo, le go matlafatša dikgato go oketša magato a go fokotša leuba. Se se amantšhwa le Peakanyo ya Leano la Bosetšhaba ya HIV le AIDS 2012-2016.
Letšatši le la Lefase la AIDS gape le tla šomišwa go tsošološa lesolo la Diteko le Dithobamatswalo tša HIV (HTC) le go thakgola lesolo la Lebollo la Banna la Sebjalebjale.
Kabinete e dira boipiletšo go maAfrika Borwa ka moka go tsenela thobalano ya go bolokega; go dira diteko tša HIV bonnyane gatee ka ngwaga gore ba tšee diphetho ka kwešišo ka ga magato a thibelo, kalafo, tlhokomelo le thekgo; le go banna le bašemane go šomiša ditirelo tša lebollo la banna la sebjalebjale.
MaAfrika Borwa a swanetše go bapala karolo ya ona le go kopantšha leano la ABC (Kilo, tshepagala, šomiša khontomo) bjalo ka tsela ya bophelo.
1.4. Kabinete e boletše ka phethagatšo ya bogale ya melato ya sephethephethe bjalo ka karolo ya Lesolo la Sehla sa Keresemose – Fihla o Phela – ka fase ga kgwekgwe ya go re ‘Mmogo re ka Boloka Dimilione tša Maphelo,’ gomme e dira boipiletšo go bašomiši ba tsela ka moka go ba le maitshwaro a go kwešiša ka botlalo gore dikotsi tša dikoloi di senya maphelo.
1.5. Kabinete e leboga kgatelopele ye e dirilwego ka mokgwa wa tšhomišano ya dientšentshi wo o šomišitšwego go tšea magato bjalo ka ditsenogare tša Mopresidente ka Mopitlo 2013 kua Eldorado Park, go fediša dintwa tša digongwana le diokobatši, le ditlhohlo tša go ama leago le ekonomi.
Ka lebaka la se go swerwe batho ba 1 431, ba 1 098 ba emetše go šekišwa; ba 1 095 ba filwe peila, ba bararo ba sa le hlokomelong ya maphodisa gomme ba 289 bonwe molato wa bosenyi.
Kabinete e ipiletša go ditšhaba go tlogela setlwaedi sa go hlohleletša bosenyi goba go itšeela molao matsogong, gobane se ga se molaong ebile se kgatha tema maitshwarong a bosenyi. Kabinete e hlohleletša ditšhaba go šomišana le maphodisa go ntšha ka medu borakgwebo le barekiši ba diokobatši bao ba gakatšago mediro ya bosenyi.
1.6. Kabinete e rometše mantšu a hlobošo go malapa le bagwera ba bao ba hlokofetšego ka lebaka la go phuhlama ga moago go la Tongaat, KwaZulu-Natal; gomme e lakaletša bao ba gobetšego pholo ya ka pela.
Kabinete e gateletše gore go na le melao ya bašomi yeo e šireletšago ditokelo tša bašomi gomme e kgadile ka bogale bao ba rwelego maikarabelo a kotsi. Kabinete e phegeletše gore taba ye e šalwe morago ka šedi ye kgolo.
1.7. Kabinete e amogetše pulo ya Senthara ya Segopotšo ya Nelson Mandela. Senthara ye e swere tše dingwe tša methopo ya bohwa ye bohlokwa kudu yeo e lotilwego ka botlalo bophelo le dinako tša Tata Nelson Rolihlahla Mandela.
Methopo ye ke karolo ye bohlokwa ya bohwa bja rena bja setšhaba, kudu bohwa bja tokologo ya rena. Ke lehumo la naga ya rena gomme le swanelwa ke go babalelwa.
Mmušo o tla tšwela pele go hlompha Nelson Mandela le boetapele bja mehleng ya gagwe bakeng sa tema ye kgolokgolo ye ba e kgathilego tokologong ya rena.
1.8. Kabinete e leboga thakgolo ye e tšwelago pele ya lenaneo la mananeokgoparara a setšhaba la ditrilione tše ntši tša diranta ka Khomišene ya Mopresidente ya Peakanyo ya Mananeokgoparara ye e etilwego pele ke Mopresidente Jacob Zuma.
Pulo ya Letamo la Spring Grove ka Mopresidente e beakanyeditšwe go kgatha tema koketšong ya kabo ya meetse go mebasepala ye tshela, e bang wa Toropokgolo ya eThekwini, wa Selete sa uMgungundlovu, wa Selegae wa Msunduzi, wa Selegae wa Ugu, le Mebasepala ya Selegae ya Sisonke le iLembe.
Mmušo o beeleditše go feta R1 bilione ka protšekeng, yeo gape e beakanyeditšwego go hlola mešomo. Nakong ya kago ya letamo go thwetšwe palomoka ya batho ba 960.
1.9. Mopresidente Jacob Zuma o tla etela Mmasepala wa King Sabatha Dalindyebo, Profenseng ya Kapa Bohlabela, ka la 22 Dibatsela 2013 bjalo ka karolo ya Lenaneo la Bolekodi la Mopresidente la Siyahlola.
Le le tla akaretša ketelo ya Mthatha go lekola dikaonafatšo tša boemafofane le tše dingwe tša diprotšeke tša mananeokgoparara a mopresidente tikologong yeo. Mthatha e tsebišitšwe bjalo ka Lefelo la Kgato ya Mopresidente ya Khuetšo ya Godimo ya Lebelo ka 2009 gomme maikemišetšo a dikgato ke go šogana le ditšhalelomorago tša mananeokgoparara le ditlhohlo tša kabo ya ditirelo, go tsošološa Mthatha ka botlalo.
Gape Mopresidente o tla lekola ka sebele kgatelopele ye e dirilwego diprotšekeng tša mananeokgoparara a mmušo mabapi le kabo ya meetse, mohlagase le ditsela tikologong yeo.
Go tšhuma wo o tla dirwago ke Mopresidente Jacob Zuma kua setišing sa fasana sa Thornhill o tla aba maatla a mararankodi go šogana le tšhalelomorago ya malapa a 25 000.
1.10. Mopresidente Jacob Zuma o tla tšea Leeto la Semmušo go ya Accra, Ghana, go thoma ka la 26 go fihla ka la 27 Dibatsela 2013. Ketelo e tla tiišetša kamano ya dinaga tša rena ka bobedi ya go tia ye re nago nayo le Ghana le go godiša kgwebišano ya ka gare ga kontinente.
1.11. Mopresidente Jacob Zuma o be a laleditšwe go ba modulasetulo wa Khomišene ya Bosetšhaba ya Dinaga tše Pedi ya Afrika Borwa le Botswana (BNC) ka la 21 Dibatsela 2013.
Se se tla matlafatša tšhomišano le dikamano tša dinaga ka bobedi gare ga dinagabaagišani tše pedi. Kopano ye ya BNC ya ngwaga ka ngwaga maemong a Dihlogo tša Dipušo e hlomilwe ngwagola go godiša maemo a Khomišene ya Tšhomišano ya Moyagoile ya Mohlakanelwa le Khomišene ya Tšhomišano ya Moyagoile ya Mohlakanelwa ka ga Sešole le Tšhireletšo.
1.12. Kabinete e amogela go kgethwa ga Afrika Borwa ka go Lekgotla la Ditokelo tša Botho la Ditšhabakopano (ka la 12 Dibatsela 2013). Paka ya rena e thoma ka la 1 Pherekgong 2014 yeo e diregago ka nako e tee le moketeko wa naga wa Mengwaga ye 20 ya Tokologo. Se se tiišetša gape boineelo bja rena phihlelelong ya ditokelo tša botho sa badudi ba rena ka moka, badudi ba kontinente ya Afrika le badudi ba lefase.
1.13. Kabinete gotee le setšhaba sa boditšhabatšhaba e leboga gagolo Mekgatlo ye e sego ya Mmušo yeo e kgathilego tema kimollong ya thušo ya tšhoganetšo ya boditšhabtšhaba go bao ba amilwego ke Typhoon Haiyan go la Philippines.
Moya wa Botho o tla kgatha tema go fokotša masetlapelo a batho ba Phillipines nakong ye e boima.
1.14. Kabinete e amogela tsebišo ya katlego ye nngwe gape bophelong bja Protšeke ya Kaonafatšo ya Ditsela tša Maphefo tša Gauteng, tša go ba le dikgorwana tša tefišo dikarolong tše di kgethilwego tša Ditsela tša Maphefo tša Gauteng go thoma ka la 3 Manthole 2013.
Baotledi ba dikoloi bao ba sego ba ngwadišetša dikgorwana tša tefišo ba hlohleletšwa go dira bjalo, go netefatša gore ba kgotsofatša dinyawa tša ditefišo tše di fokoditšwego.
1.15. Kabinete e leboga Kgoro ya Saense le Theknolotši le ya Thuto le Tlhahlo ya Godimo gape le Yunibesithi ya Theknolotši ya Cape Peninsula ge di dirile histori ka go thakgola CubeSat ya mathomo ya naga, ka la 21 Dibatsela 2013, go la Russia.
Sathelaete, yeo e abago tshedimošo ya boso ya sekgoba se bohlokwa, e laetša bokgoni bja Afrika Borwa ka lekaleng la saense ya sekgoba le theknolotši.
1.16. Kabinete e amogetše go kgethwa ga Tona ya Thuto ya Motheo Angie Motshekga bjalo ka Modulasetulo wa Khosotiamo ya Bohlabela le Borwa bja Afrika ya Boleng bja Thuto ya Tekolo (SACMEQ) nakong ya Khonferense ya Kakaretšo ya UNESCO ya bo37; se se matlafatša tshepho go tshepetšo ya rena ya thuto le diinstitšhušene.
Morero wa SACMEQ ke go dira dinyakišišo tše di kopantšwego le mediro ya tlhahlo yeo e tlogo okeletša babeakanyi ba thuto le banyakišiši menyetla ya go amogela tlhahlo ka mabokgoni a sethekniki ao a nyakegago go lekola, sekaseka, le go bapetša dipeelano tša kakaretšo tša go tsena sekolo le boleng bja thuto ya motheo.
1.17. Kabinete e lebogile Tona ya Thuto le Tlhahlo ya Godimo, Blade Nzimande ge a etile pele kopano ya Ditona tša Thuto tša BRICS yeo e fihleletšego diphetho tša makgoraditsela.
Kopano e beakantšwe go ya ka dikwano tša Tulo ya bo37 ya khonferentshe ya Kakaretšo ya UNESCO. Ditaba tše go boledišanwego ka tšona di be di akaretša: Matlafatšo ya tšhomišano gare ga diyunibesithi tša BRICS, dikamano le neeletšano ya tsebo.
Ditona di kwane ka nyakego ya go hloma mokgwa maemong a godimodimo a sepolotiki le a sethekniki go rulaganya le go phethagatša mafelo ao a hlaotšwego a tšhomišano ao a tlogo rulaganywa ke Afrika Borwa bjalo ka Modulasetulo wa bjale wa BRICS. Gape go bile le kwano magareng ga dinagamaloko tše hlano ka moka ka ga bohlokwa bja go oketša tšhomišano gare ga BRICS le UNESCO go tša thuto.
1.18. Kabinete e amogetše pego ya naga ya Afrika Borwa go Unesco gore batho ba bagolo ba maAfrika Borwa ba dimilione tše 3,3 ba feditše dithuto tša Lesolo la go Bala le go Ngwala ka Bontsi la Kha Ri Gude. Se se batameta Afrika Borwa kgauswi le go fihlelela boineelo bja yona bja Ditšhabakopano: Thuto go Bohle boikgafo bja go fokotša palo ya ba ba sa kgonego go bala le go ngwala ka seripa ka 2015. Lesolo le thakgotšwe ka Dibokwane 2008, ka maikemišetšo a go thuša batho ba bagolo ba dimilione tše 4,7 ba ka godimo ga mengwaga ye 15 gore ba kgone go bala le go ngwala le tsebo ya dipalo ka le lengwe la maleme a semmušo a 11.
1.19. Kabinete e lebogišitše bathopasefoka ba Difoka tša Mathomo tša Bothakga tša Batho Pele tša Bosetšhaba tšeo di tiišetšago boprofešenale, tebogo, amogela le go hlohleletša bothakga ka Tirelong ya setšhaba le go netefatša gore e fihlelela maemo a godimo.
1.20. Kabinete e lebogile dipapadi tše di botse tša malobanyana ka Bafana Bafana, Proteas le Springbok gape e lebogišitše Itumeleng Khune yoo a tsebišitswego go ba Naletšana ya Dipapadi ya Afrika Borwa 2013. Go gatelela gore re setšhaba sa bathopasefoka, Kabinete e amogetše gore Afrika Borwa e tsogile e thabile mesong ya Laboraro morago ga phenyo ya 1-0 ya Bafana Bafana kgahlanong le Spain. Kabinete e dira boipiletšo go maAfrika Borwa ka moka go bapala karolo ya bona ya thekga dihlopha tša rena tša bosetšhaba.
1.21. Kabinete e filwe pego ke Sehlopha sa Tšhireletšo le Thibelo ya Bosenyi sa Toka (JCPS) ka pego ya Mošireletši wa Setšhaba ka ga magato a tšhireletšo legaeng la Mopresidente Jacob Zuma go la Nkandla. Kabinete e begetšwe gore kopano ya mmuso le Mošireletši wa Setšhaba ka ga taba ye e theilwe godimo ga tšhireletšo ya Hlogo ya Pušo. Gape Kabinete e begetšwe gore pego ya sehlophatšhomo sa mmušo ka ga dikaonafatšo tša tšhireletšo kua Nkandla e rometšwe go Komiti ya Nakwana ya Mohlakanelwa go tša Bohlodi yeo ka morago e gatišitšego Pego ya yona ya go Ikgetha godimo ga taba ye. Sehlophatšhomo sa mmušo se begetše Komiti ya Nakwana ya Mohlakanelwa go tša Bohlodi gore ga go na bohlatse bja gore Kgoro ya Mešomo ya Setšhaba e lefetše kago ya dintlo tša Mopresidente. Ditona go tšwa Sehlopheng sa JCPS di memilwe kopanong ye ya Kabinete gomme ba gona go araba dipotšišo godimo ga taba ye.
2. Dipoledišano le diphetho tša bohlokwa tša Kabinete
2.1. Kabinete e amogetše sengwalwa sa tšhišinywa sa Thuto le Tlhahlo tša ka morago ga go Tsena Sekolo: “Go aga Mokgwa wa Tlhahlo le Thuto ya ka Morago ga Sekolo ye e Kopantšwego ye Botse ya go Katološwa”.
Sengwalwa tšhišinywa se laetša maano a go oketša kabo ya bjale ya thuto le tlhahlo mo Afrika Borwa. E laetša go kaonafatša boleng, go kopanya dikgokaganyi tša go fapana tša mokgwa wa ka morago ga go tsena sekolo, gape le go laetša mekgwa yeo bengmošomo bobedi ka makaleng a praebete le a setšhaba ba ka bapalago karolo ya bohlokwa tlholong ya sehlopha sa bašomi ba go ba le bokgoni.
Pampiri e gatelela kgolo le mešomo ya kakaretšo yeo e lego bohlokwa go Leanotlhabollo la Bosetšhaba (NDP).
Kgoro ya Thuto le Tlhahlo ya Godimo e tla fa pego ya go tswela pele.
2.2. Kabinete e lebogilwe ka ga pego ya Komiti ya Ditona ka ga Tshekaseko ya Thekgo ya Diyunibesithi ka Matlotlo ebile e dumetše gore pego e lokollwe gore setšhaba se dire ditshwayotshwayo ka ga diyunibesithi.
Thekgo ya diyunibesithi ka matlotlo ga e fapane le ditlhohlo tše dingwe ka kakaretšo tše naga e lebanego natšo, gomme e akaretša go šogana le seemo sa diinstitšhušene tše di bego di sa fiwe menyetla peleng mola e netefatša gore diphetogo tše di dirwago dikabong tša ditlabakelo ga e thibele bokgoni bja diyunibesithi tše di nago le menyetla go dula di amogelwa maemong a boditšhabatšhaba ebile di kgona go phadišana.
2.3. Kabinete e amogetše Leano la Payo-Ekonomi la Afrika Borwa.
Leano la Payo-ekonomi ke leano le le theilwego godimo ga saense go bea payo ya boithomelo bjalo ka lekala la bohlokwa la dikgoro tša go fapana. Gape le dira boipiletša bja kamano ya kgauswi le intasteri go netefatša gore payotheknolotši le payo ya boithomelo di kgotsofatša kudu dinyakwa tša mmaraka le gore di hwetša tirišo ye bonolo ka mo Afrika Borwa.
Leano la Afrika Borwa la Payo-ekonomi le abela ekonomi ye mpsha maatla a ekonomi ao morago a tlogo aba motheo wa kgolo ya ka moso.
2.4. Kabinete e amogetše go phethagatšwa ga Tšhišinyo ya Kgato ya Godimo ya Lenaneo la Katološo ya Mešomo ya Setšhaba (EPWP) ya Kgato ya 3 (2014-2019). Thakete ya kakaretšo ya dimilione tše 7.5 tša dibaka tša mešomo mo lebakeng la mengwaga ye mehlano (2014/15 – 2018/19) e theilwe godimo ga thakete ya Mananeo a Setšhaba a Mešomo a a laeditšwego ka gare ga NDP.
Kabinete e amogetše go hlongwa ga Khomišene ya Mopresidente ya Thulaganyo ya Mešomo ya Setšhaba ya Mopresidente go rulaganya le go bega ka ga mananeo a setšhaba a mešomo. Se se tla kopanywa le Khomišene ya Thulaganyo ya Mananeokgoparara ya Mopresidente.
Maikemišetšo a EPWP ke go oketša seabe sa yona go šogana le ditlhohlo tše di menaganego gararo tša bohloki, bohlokatiro le go se lekane. Phuhlamo ya bjale ya ekonomi e hueditše gampe mešomo ya ka mo nageng gomme e okeditše bohlokwa bja EPWP bjalo ka protšeke ye kgolo ya mmušo ya go kgatha tema hlabollong le phokotšong ya bohlokatiro.
2.5. Kabinete e amogetše go hlagišwa ga Sedirišwa sa Phetošo ya Molaotheo wa Mokgatlo wa Mešomo wa Boditšhabatšhaba, 1986, ka Palamenteng e tiišeletšwa.
Maikemišetšomagolo a Phetošo ye e šišintšwego ke go dira gore boleloko bja Lekgotlakemedi la Mokgatlo wa Mešomo wa Boditšhabatšhaba bo akaretše le go feta ka go aba mokgwa wa go thwala woo o šetšago dikgahlego tša tšeokrafi, ekonomi le leago tša dihlopha tša yona.
Go ya ka tšwetšo pele ya morero wa Afrika le gore ge Phetošo ya Molaotheo ya 1986 e ka thoma go šoma, Afrika Borwa e ba seemong se se botse go ya ka dika tša go ikgetha bjalo ka ge go laeditšwe ka gare ga sedirišwa, go kgethwa setulong sa moyagoile.
2.6. Kabinete e hlokomedišitše kamogelo ya Dikeletšo ka ga Lebato la Tšhireletšo ya Leago ka Mokgatlo wa Mešomo wa Boditšhabatshaba ebile e amogetše le tlhagišo ya Dikeletšo ka Palamenteng gore di tiišeletšwe.
Mokgwa wa Lebato la Tšhireletšo ya Leago ke sehlopha se se kopantšewego sa dipholisi tša leago tše di ngwadilwego go tiišetša tšhireletšo ya letseno le phihlelelo ya ditirelo tša leago tša bohlokwa ka bohle, le beile šedi ye kgolo go dihlopha tše di ka angwago gampe le go šireletša le go matlafatša batho go kgabaganya saekele ya bophelo.
2.7. Kabinete e dumeletše Afrika Borwa go ba monggae wa Khonferentshe ya Phadišano ya Boditšhabatšhaba ya BRICS ya bo4 ka 2015
Khonferentshe e fa foramo sebaka sa go abelana dikgopolo magareng ga dientšentšhi tša phadišano le baeletši ba ba e sego ba mmušo go tšwa dinageng tša BRICS. Se se matlafatša dikamano tša seintitšhušene tšeo di išago go tšhomišano ya boditšhabatšhaba ye kaone gare ga maloko a. E ba gona mengwaga ye mengwe le ye mengwe ye mebedi gomme e swarwa ke Baetapele ba Phadišano ba dipušo tša maloko a BRICS.
2.8. Kabinete e amogetše go hlagišwa ga Pholisi ya Thwalo ya Bahlankedi ba Phatlalatšo ya Dithoto ka Maseterata wa Kgorotsheko ya Godimo Palamenteng le kgatišo ka gare ga Kuranta ya Mmušo.
Šedi ya Pholisi ke go godiša go se fetoge, toka, go se ute le phihlelelo ya tekano ya batho ba bego ba sa fiwe dibaka peleng ke kgethollo ye e bego e se ya loka. Maseterata wa Kgorotsheko ya Godimo ka dikantorong tša go fapana tša Maseterata pele di be di na le maatla a go tšea sephetho di le letee go ya ka tlhathollo ya molao phethagatšong le tshepedišong ye e tlago latelwa ka dikantorong tša bona.
2.9. Kabinete e amogetše tiišetšo ya 3 Dibatsela go fihla ka la 3 Manthole bjalo ka Kgwedi ya Lesolo la Ditokelo tša Bagolofadi la Bosetšhaba gomme e tsebišitše semmušo 3 Manthole go ba Letšatši la Bosetšhaba la Batho ba go ba le Bogolofadi.
Kgwedi ya Lesolo la Ditokelo tša Bagolofadi la Bosetšhaba, le le felelago ka Letšatši la Bosetšhaba la Batho ba ba nago le Bogolofadi, le abela naga sebaka sa go laetša le go keteka kgatelo pele ye e dirilwego ka go fa bagolofadi sebaka sa go swana sa go fihlelela thuto, mošomo wa mokaone, maphelo, tlhabollo ya metsemagae le tikologo ya go bolokega le go šireletšega, magareng a tše dingwe.
2.10. Kabinete e amogetše tlhamo ya khoine ya Khamphani ya Minti ya Afrika Borwa ya keteko ya kgoboketšo ya khoine ya 2013 le phatlalatšo ya khoine tša R2
a) Khoine ya Phatlalatšo ya R2: “Segopotšo sa Mengwaga ye 100 ya Union Buildings”
b) Khoine ya Keteko ya Kgare ya Silibere ya R2: “Segopotšo sa Mengwaga ye 100 ya Union Buildings”
c) Molokeloke wa Dikhoine tša Protea wa 2013: “Bophelo bja Mogale: NR Mandela” (bobjana).
2.11. Gape Kabinete e amogetše ditlhamo tša keteko ya kgoboketšo ya dikhoine ya 2014 le ditlhamo tša dikhoine tša phatlalatšo:
a) Molokeloke wa Dikhoine tša Protea : “Bophelo bja Mogale: NR Mandela” (thuto)
b) Molokeloke wa Dikhoine tša Tlhago: “Batsomi ba Bošego”
c) Molokeloke wa Dikhoine tša Gauta tša R1: “ Bommamodula ba Afrika Borwa”
d) Molokeloke wa Dikhoine tša Gauta tša R2: “Kutullo ya Gauta mo Afrika Borwa”
e) Molokeloke wa Dikhoine tša Silibera tša Teke le Kgare: “Ditimela tša Afrika Borwa”
f) Molokeloke wa Dikhoine tša Silibera tša Seteling: “Mafelo a Lewatle ao a Šireleditšwego a Afrika Borwa”
g) Khoine ya Segopotšo ya Gauta ya R200: “Mengwaga ye 20 ya Tokologo”
h) Khoine ya Kgare ya Segiopotšo ya Silibera ya Seteling ya R2: “Mengwaga ye 20 ya Tokologo”
i) Khoine ya phatlalatšo ya R5: “Mengwaga ye 20 ya Tokologo”.
Ditlhamo tša dikhoine gotee le Dipego tša tšona di tla gatišwa ka gare ga Kuranta ya mmušo. Morago ga fao dikhoine di tla tšweletšwa le go rekišwa ka mokgwa wa setlwaedi.
3. Bao ba thwetšwego mošomong
3.1. Kabinete e amogetše go thwalwa mošomong Mohumagadi Gugulethu Brightness Nokukhanya Khoza maemong a Molaodi wa Lekala la Difofane tša Selegae la Afrika Borwa.
3.2. Kabinete e amogetše go thwalwa ga batho ba ba latelago mošomong go Boto ya Koporase ya Dipeeletšo tša Setšhaba (PIC):
a) Morena Roshan Morar (thwalo ya bobedi)
b) Morena Sebenzile Patrick Mngconkola (thwalo ya bobedi)
c) Mohumagadi Dudu Hlatshwayo
d) Mohumagadi Sibusisiwe Nkosinomusa Ngubane
e) Morena Trueman Tandabantu Goba.
3.3. Kabinete e amogetše go thwalwa mošomong ga batho ba ba latelago go Boto ya Koporase ya Inšorense ya Diromelwantle tša Afrika Borwa:
a) Morena Motshoanedi Johannes Lesejane (Modulasetulo wo a thwetšwego gape)
b) Mohumagadi Vuyelwa Viola Matsiliza (Balaodibagolo ba e sego ba phethiši)
c) Mohumagadi Fagmeedah Petersen (Balaodibagolo ba e sego ba phethiši)
d) Mohumagadi Siobhain O’Mahony (Balaodibagolo ba e sego ba phethiši).
Dipotšišo:
Phumla Williams (Seboleledi sa Kabinete sa Motšwaoswere)
Mogala: 083 501 0139
Issued by: Government Communications
