A. Merero ye Bohlokwa Seemong sa Bjale
1. Ikonomi
1.1. Polelo ya Tekanyetšokabo ya Bosetšhaba
1.1.1. Kabinete e amogetše Tekanyetšokabo ya Bosetšhaba ya 2024, ye e amogelago ka atla tše pedi boitlamo bja mmušo bja go laola ikonomi ya naga ye ka tsela ya go se fetogefetoge le go tšea diphetho tše thatafilego tše lego maleba go lekalekanya tlhaelelo ikonoming mola di le gare di hlohleletša kgolo ya ikonomi.
1.1.2. Tekanyetšokabo ye ya Bosetšhaba e tšwelapele go šušumetša merero ye bohlokwahlokwa ye re e beilego pele le gape go thekga batho ba go se šireletšege mo setšhabeng sa gaborena. Tekanyetšokabo ye e fana ka thekgo ya leago go kaonafatša maemo a bophelo a bahloki, a bath oba go se šireletšege le MaAfrika Borwa ka moka ba ba hlokilego mahlatse a go atlega maphelong. Bona ba akaretša MaAfrika Borwa ba go se šome, gotee le bana ba ditšhiwana le ba go se šireletšege ba ba phelago ka malapeng a go etwa pele ke bana.
1.1.3. Teefatšo le go hlagišwa Palamenteng ga Tekanyetšokabo ya 2024 ke karolo ye bohlokwa ya peakanyo ya Afrika Borwa ya temokrasi ya go se ute selo le ya maikarabelo. Kabinete e tloga e nale tshepho ye tletšego ya gore ditseka tša Tekanyetšokabo ya Bosetšhaba di tla fetolelwa go ba diphenyo tša ikonomi tše di agago ka leswa boemo bja ikonomi ya gaborena.
1.2. Ditirišano tša Mmušo le tša Poraebete
1.2.1. Kabinete e amogetše tirišano ya mathomothomo ya moswananoši ya tirišano magareng ga mmušo le makala a poraebete magareng ga Sasol le Ditimela tša Merwalo tša Transnet go kaonafatša potego ya dinamelwa tša ditimela.
1.2.2. Ka fase ga kwano ya mengwaga ye mehlano, Khamphani ye ya Ditimela tša Merwalo tša Transnet e tla šomiša dinamelwa tša yona tše 128 tša dikepe tša ammonia go tsamaiša ammonia go tšwa dinolofatšing tša Sasol go ya bareking gomme Sasol yona e tla thekga ka ditšhelete leano la go lokiša dinamelwa tše.
1.2.3. Tirišano ye e tšwetšapele mošomo wo o lego mo Leanong la Dipeakanyo tša Thwalomerwalo go fetoša lefapha le ka tsela ye makatšago. Tirišano ye e laetša ka fao re ka fenyago ditlhotlo tše e lego tlhobaboroko ge re šomišana mmogo.
1.3. Dinyakišišokakaretšo tša Kotara ka Kotara tša Dipalo tša Bašomi (QLFS)
1.3.1. Pego ya malobanyana mo ya QLFS ya Dipalopalo tša Afrika Borwa e laeditše tlhatlogo ye nnyane ya palo ya batho ba go se šome kotareng ya bone ya 2023 go fihlela go 32.1% go tloga go 31.9% kotareng ya boraro, taetšo ye e re fa tlhohleletšo bjalo ka mmušo go ntšha ka ga tšhwene gore re menagantšhe matsapa a rena gabedi gore batho ba bantši ba hwetše menyetla ya mešomo.
1.3.2. Le ge ikonomi ya rena e tšwelapele go hlola mešomo, ga e dire bjalo mo maemong a mmušo o ikemišeditšego go a fihlelela ka nepo ya go šogašogana le tlhobaboroko ya tlhokego ya mešomo. Pego ya QLFS e laeditše gabotse gore mešomo ka lefapheng la go se lefišwe metšhelo e hlatlogetše godimo ka 124 000, lefapha la ditšhelete ka mešomo ye 128 000, lefapha la dinamelwa ka mešomo ye 57 000, lefapha la meepo ka mešomo ye 37 000 mola ka malapeng mešomo e hlatlogile ka 18 000.
1.3.3. Kabinete e dirile boipiletšo go mafapha ka moka go thekga Leano la Kagolefswa ya Ikonomi le go Boetšwa Sekeng ga yona, le le thušago go fana ka menyetla ya mešomo le mekgwa ya batho ya go iphediša go dimilionelone tša MaAfrika Borwa.
1.4. Anibesari ya bo-20 ya Lenaneo la Mešomo ye e Katološitšwego ya Setšhaba (EPWP)
1.4.1. Ngwaga wa 2024 ke ngwaga wa bo-20 go tloga mola EPWP e bago gona, gomme se ke taetšo ya kanegelo ye nngwe ya dikatlego tša Afrika Borwa ya mananeo a go thwala batho ka bontši setšhabeng ebile ke le lengwe la masolo a magologolo a phedišo ya bohloki.
1.4.2. Kabinete e amogetše tshedimošetšo ka phethagatšo le diphenyo tša EPWP, lenaneo le le tšwago pele la mmušo le le hlotšego dimilionelone tša menyetla ya mešomo go MaAfrika Borwa ba go se šome go tloga mola le thomišwago.
1.4.3. Mo mengwageng ya go feta ye 20 EPWP e hlotše menyetla ya mešomo ya go feta 14 milione, gomme palo ye e dira gore e be lenaneo le legologolo la go se kgaotše la mešomo ya bohle lefaseng ka bophara. Phenyo ye e fihleletšwe ka ditirišano tša goyagoile le lefapha la porabete le mekgatlo ye lego setšhabeng. Menyetla ye ya mešomo e bile le seabe tlhabollong mabokgoni a bakgathatema ka gobane yona menyetla ye e hlolegile ka fase mehutahuta ya diprotšeke tša EPWP go tša boeti, temo, mananeokgoparara, diprotšeke tša leago le diprotšeke tše eteletšwego pele ke basadi.
1.4.4. Kabinete e tsebišitšwe gore menyetla ya mešomo ya go lekana
4 609 000 e hlotšwe nakong ya Kgato ya Bone ya paka ya magareng ya EPWP, ye e akaretšago paka ya 2019/2020 – 2022/23. Palo ye e laetša phenyo ya 92% ge go bapetšwa le nepo ye e theilwego ke Basepediši ba Mmušo ba Lekga la Boselela ya go hlola menyetla ya mešomo ya go lekana dimilione tše tlhano. Dithulaganyo di gona go fihlelela palo ye e šaletšego ya menyetla ya mešomo ye 390 973 pele ga Hlakola 2024.
1.4.5. Godimo ga menyetla ya mešomo ye 4 609 000, diprofense tše tharo tše lego godimo fao bontši bja menyetla ya mešomo e hlotšwego ke KwaZulu-Natal, ka menyetla ye
1 064 000 (23%), ya latelwa ke Kapa Bohlabela, ka 903 789 (20%) le Kapa Bodikela ka 508, 954 (11%).
1.4.6. Le ge e le gore bontši bja menyetla ye ke ya lebakanyana go fihla go ya magareng, pheletšo ya ye mengwe ya yona ebile ya mešomo ya goyagoile. Dipalo le tšona di laetša gore bakgathatema ba go feta 20% ba hweditše mešomo ya ka ntle ga lenaneo la EPWP.
1.4.7. Bakgathatema ba bantši ba kua morago ba EPWP ba phethagaditše go fihla mafelelong mangwalo a bona a diploma go magoro a thuto a go swana le boapei bja profešenale ebile ba bangwe ba thwetšwe goyagoile intastering ya kamogeloborutho. Godimo ga menyetla ya mešomo, EPWP e kgatha tema ye kgolo mabapi le kabo ya ditirelo, kaonafatšo ya dinolofatši setšhabeng le khwalithi ye e kaonafetšego ya bophelo.
1.4.8. Tšhelete ya go feta R52 bilione e lefetšwe bakgathatema ba EPWP bjalo ka meputso ka mošomo wo o dirilwego ka Kgato ya Bone.
1.4.9. Godimo ga mo, go hlotšwe dikgwebo tša go feta 600 ka lona lenaneo le.
2. Merero ya Mmušo
2.1. Dikgethokakaretšo tša 2024
2.1.1. Kabinete e amogetše tsebagatšo ka Mopresidente Cyril Ramaphosa ya Laboraro, 29 Mopitlo 2024 bjalo ka letšatši la Dikgethokakaretšo, morago ga go swara ditherišano le Khomišene ya Dikgetho ya Afrika Borwa gotee Ditonakgolo tša diprofense ka moka tše senyane ka fao di itokišeditšego ka gona go swara dikgetho tša bosetšhaba le tša diprofense.
2.1.2. Kabinete e dira boipiletšo go mang le mang, kudukudu baswa, go šomiša ditokelo tša bona go bouta. Mengwagangwaga ya maitemogelo a go ikuna tše ntši ao batho ba bantši ba sa tsebego ka ona le phenkgišano ya go lwela tokologo di dirile gore mafelelong re be le ditokelo tša go bouta go bontši bja MaAfrika Borwa ka 1994. Phenkgišano ya rena ya tokologo e šireleditše maloka a MoAfrika Borwa wo mongwe le wo mongwe go ba bakgathatema ba mafolofolo ka gare ga peakanyo ya rena ya temokrasi.
2.1.3. Dikgetho tša ngwaga wo di lebane le meketeko ya mengwaga ye 30 ya tokologo, ye e lego phenyo ye bohlokwa go Afrika Borwa ka ge e fa monyetla wa go lebelela dikatlego tša rena le go nyaka ditharollo go šogašogana le ditlhotlo tše di ka bago le ditharollo.
2.2. Sehlophatšhomo sa eThekwini sa Mopresidente
2.2.1. Kabinete e lemogile kopano ya Mopresidente Ramaphosa ka Labohlano, 23 Dibokwane 2024 gotee le Tšhempa ya Durban ya Dikgwebišano le Intasteri go rerišana ka masolo a go fapafapana ao a eteletšwego pele ke mmušo wa bosetšhaba go thuša Mmasepala wa Metsesetoropo wa eThekwini go šogašogana le ditlhotlo tša bjale tša meetse, mohlagase le mananeokgoparara.
2.2.2. Mopresidente o thomile Sehlophatšhomo sa eThekwini sa Mopresidente go potlakiša tharollo ya ka pejana ya mathata a go ama Mmasepala wa Metsesetoropo wa eThekwini. Sehlopha se – sa go bopša ke Ditona, Mmasepala wa Metsesetoropo wa eThekwini le bahlankedi ba tša kgwebo – se tla re nako le nako sa hlagišetša Mopresidente dipego tša go laetša gore mošomo o tla kae.
2.3. Foramo ya bo-14 ya Dipoledišano tša Pholisi (PDF) ya Sehlophatšhomo sa Boditšhabatšhaba ka Barutiši go Thuto
2.3.1. Kabinete e lemogile ka fao naga ye e atlegilego go ba monggae go swara PDF ya bo-14 ya Sehlophatšhomo sa Boditšhabatšhaba ka Barutiši go Thuto go la Sandton, Johannesburg, ka Mošupologo wa la 26 Dibokwane 2024. Tiragalo ye e kopantšhitše bakgathatema ba thuto go tšwa lefaseng ka bophara go hlohleletša thekgano, go fana tsebo le go bea leihlo kgatelopele ye fihleletšwego go lebeletšwe Nepo ya Bone ya Tlhabollo ye e Swarelelago mabapi le thuto ya makgonthe.
2.3.2. PDF e lokolotše Pego ya Sehlopha sa Maemo a Godimo ka Mošomo wa Borutiši le gape go tsebagatša Pego ya Lefase ka Bophara mabapi le tlhaelelo ya barutiši.
3. Twantšho ya bosenyi
3.1. Kabinete e reta ba Ditirelo tša Maphodisa a Afrika Borwa ka go šoma bošego le mosegare, go fihlela ba kgona go golega batho ba šupa mabapi le go bolawa ga 'AKA' Forbes le mogwera wa gagwe Tebello ‘Tibz’ Motsoane. Bagononelwa ba babedi ba golegilwe go la Eswatini ebile ba sa tlo tlišwa ka mo nageng.
3.2. Go golegwa ga bona go kgonagetše ka baka la mošomo wa dikgwedikgwedi wa maphodisa wa go hloka bosodi. Magareng ga bagononelwa ba ba golegilwego go akaretšwa motsamaiši, ba go mo thuntšha, wa go mo šupa, le motho yo tee yo a hirilego sefatanaga le dithunya.
4. Dikamano tša Boditšhabatšhaba
4.1. Samiti ya bo-37 ya Kopano ya Afrika (AU)
4.1.1. Kabinete e thabetše mošomo wo o dirilego kua Samiting ya bo-37 ya AU ya go swarelwa go la Addis Ababa, Ethiopia ka la 17 le 18 Dibokwane 2024, ye e hlatholotšego merero ya Afrika ye tlago pele go lebetšwe 2024 le mengwaga ya ka morago ya yona. Mopresidente Ramaphosa o be a nale baetapele ba bangwe ba Afrika go rerišana ka merero ye bohlokwa ye tlago pele kontinenteng go akaretšwa le khutšo le tšhireletšego, phetogo ya klaemete, tlhabollo ya ikonomi le tema ye e kgathwago ke Afrika go lebeletšwe mahlakore a mmalwa a seemo sa lefase ka bophara ka kakaretšo.
4.1.2. Samiti ye e amogetše Thulaganyo ya bobedi ya Mengwaga ye Lesome ya Phethagatšo ya Lenaneothero la 2063, le ka lona go tla bago le go potlakišwa ga diprotšeke tša maemo a godimodimo go swana le Tumelelano ya Kgwebišano yeo e Lokologilego ya Kontinente ya Afrika (AfCFTA), mo go yona Afrika Borwa e kgathago tema ya boetapele.
4.1.3. Mopresidente Ramaphosa o hlagišitše gape le pego ka magato ao a tšeerwego ke kontinente kgahlanong le leuba la Bolwetši bja Coronavirus (COVID-19) le ka fao kontinente e itokišeditšego ka gona kgahlanong le matšhošetši a maphelo ao a ka bago gona kamoso, mo maemong a gagwe bjalo ka Konokono ya magato a AU a COVID-19. Samiti ye e gateletše gape le bohlokwa bja go boela sekeng ga sebopego sa ikonomi maphelong a batho ka morago ga COVID-19, le tše batho re ithutilego tšona ge re be re itokišetša go lebana le leuba le, le magato ao re a tšeerego gotee le tšhireletšego ya kontinente.
4.1.4. Mopresidente o dirile boipiletšo go baetapele ba Afrika go tšwelapele go kaonafatša maemo a bona a go phafogela malwetši dinageng tša bona kgahlanong le mauba ao a ka bago gona kamoso le gape go hlohleletša kamogelo ya go se šišinyege ya Maemo ao a Swanago a Afrika ka Boitukišetšo le Magato a Leuba.
4.2. Go Swarelwa ka mo Afrika Borwa ga Samiti ya Seboka sa Dinaga tše 20 (G20) le Bopresidente bja Samiti ye ka 2025
4.2.1. Kabinete e amogetše le go lebelela pego ya ka fao Afrika Borwa e itokišeditšego ka gona go swarela Samiti ya G20 ka mo nageng le go tšea Bopresidente.Ye ke tiragalo ye bohlokwa kudu historing go Afrika Borwa ka ge e tlaba naga ya mathomothomo mo Afrika go swara tiragalo ya kgoparara ka tsela ye; tiragalo ya moswananoši e sego fela ka mašabašaba ao a letetšwego go goroga eupša le ka ditlamorago tša yona tša goyagoile tše di letetšwego go diragala.
4.2.2. Kabinete e nale tshepho ya gore Afrika Borwa e tla kgona go swara Samiti ye atlegilego ya G20, ka ge sale ya atlega ka ditiragalo tša kgoparara mengwageng ya kua morago go swana le ge e ile ya swara Samiti ya BRICS gotee le Foramo ya Kgolo ya Afrika le Magato a Menyetla. Bopresidente bja G20 bo fa Afrika Borwa monyetla wa go sekegela tsebe le go bea pele dihlologelo tša mebaraka ye e sa tšwelelago.
4.2.3. Ka ge e tlabe e swara G20, kgathotema ya Afrika Borwa ka gare ga foramo ye e tla tšwelapele go hlahlwa ke boitlamo bja naga ye go tšwetšapele dikgahlegelo tša bosetšhaba gotee le tša kontinente ya Afrika.
B. Diphetho tša Kabinete
1. Go Swarwa ga Kopano ya Bosenyane ya Ngwaga ka Ngwaga ya Pankatlhabollo ye Mpsha (NDB)
1.1. Kabinete e lebeletše le go dumelela go swarwa ga kopano ya ngwaga ka ngwaga ya NDB ka mo Afrika ka Phupu 2024.
1.2. E šetše e le mengwaga ye lesome ga e sale mola dinagaseboka tša BRICS di a saenelago Dipeelano tša Tumelelano ya NDB kua Samiting ya Boselela ya BRICS gola Fortaleza, Brazil ka la 15 le 16 Mosegamanye 2014. Magato a a hlomile setheo sa mathomothomo sa tlhabollo ya mahlakoremantši ka dinaga tše e le gona di tšwelelago le go hlabologa. Go fihla gabjale, Afrika Borwa e ntšhitše setseka sa go lekana R25 bilione se se ilego matlotlong a a lefetšwego a panka ye. Afrika Borwa e lebeletše go swara kopano ye mabapi le NDB le go itlama go šomišana le panka ye gotee le dinaga tše e lego maloko a yona go fihlelela tlhabollo ye e swarelelago le go hlola maemo a kaonakaone ka Kontinenteng ya Afrika.
2. Leanopeakanyo la go Thwalwa ga Ditsebi tša Ditirelo tša Leago (SSP)
2.1 Kabinete e dumeletše Leanopeakanyo la go Thwalwa ga di-SSP bjalo ka karolo ya go atiša mabokgoni a methopo ya batho a mmušo, mekgatlo ye e sego ya mmušo gotee le lefapha la poraebete go kgona go arabela ka bonako mafokodi a bophelo ao naga ye e lebaganego le ona.
2.2 Leanopeakanyo le ke boitlamo ba mohlakanelwa go bopa lefapha la ditirelo tša leago la go arabela dinyakwa tša batho ba gaborena setšhabeng le go fenya mafokodi a bophelo a go swana le bosenyi, dikgaruru tša go ikala ka bong le polao ya basadi, go ima ga basetsana ba ditšwamahlalading, bomphenyašilo, malapa a go etwa pele ke bana, tlhokomelo ya monagano le tšhomišompe ya diokobatši.
2.3 Leanopeakanyo le le nepile gape go ala motheo wa bokamoso ba go akaretša tšohle bophelong le ba go tielela gotee le setšhaba sa go kgathalelana.
3. Molao wo o Akantšwego wa Tšhireletšego ya Leago ya go Iphetša
3.1. Kabinete e lebeletše le go dumelela phatlalatšo le go dira boipiletšo go setšhaba go fa ditshwayotshwayo tša sona ka ga phetleko ya Molao wo o Akantšwego wa Tšhireletšego ya Leago ya go Iphetša ya naga ye.
3.2. Sengwalwa se se nepile go tsebagatša peakanyo ya kgapeletšo ya phenšene ya tšhireletšego ya leago ye e fanago ka dipenefite tša go rola mošomo, tša bogolofadi le tša lehu go bašomedi ka moka. Batho ba go hwetša meputso ya fase ba tlo fokoletšwa dikgogelo tša bona ka go tsamaišana le dipeakanyetšo tše di lego gona Sengwalwa se se šišinya gape le go boelanywa ga mekgwa ye mebedi ya ka fao batho ba bagolo ba lefišwago motšhelo gabedi ka metšhelo ya setlwaedi le gape ka peakanyo ya thušo ya tšhelete ya leago go šogašogana le tshwaro ye ya go se lekalekane ya batho ba bagolo ka melao ye ye mebedi.
3.3. Godimo ga mo, sengwalwa se se šetšane le go šišinya peakanyoleswa ya ditheo go hlohleletša kwano ge go hlangwa pholisi ya tšhireletšego ya leago, kabo ya ditirelo ye kaonafetšego le go netefatša melao ya mohola, pušo le kakomelo go ralala le dipeakanyo ka moka tša tšhireletšego ya leago.
C. Bao ba thwetšwego mešomong
Batho ka moka ba ba thwetšwego mešomong mangwalo a bona thuto a tlo kgonthišišwa le go netefaletšwa ka tsela ye maleba.
1. Go thwalwa ga Ntate Snike Thulani Sibuyi bjalo ka Mongwaledi wa Ditirelo tša Maphodisa Kgorong ya Bongwaledi bja Bohle ya Ditirelo tša Sephodisa.
2. Go thwalwa ga Ntate Xolile Sizani bjalo ka Mohlankediphetišimogolwane (CEO) wa PetroSA.
3. Go thwalwa ga Mme Nombulelo Guliwe bjalo ka CEO ka Lefapheng la Afrika Borwa la tša Boeti.
4. Koketšo ya kontraka ya Mme Totsie Memela-Khambula bjalo ka CEO ya Etšensi ya Afrika Borwa ya Tšhireletšego ya Leago.
5. Go thwalwa ga Mme Mapatane Elizabeth Kgomo bjalo ka CEO ya Etšensi ya Thekgo ya Mananeokgoparara a Mmasepala.
6. Go thwalwa leboelela mo Botong ya Sekhwama sa Enetši sa Bogare (CEF) le go thwalwa ga Mme Ayanda Noah bjalo ka Modulasetulo.
7. Go thwalwa ga maloko a Boto ya Afrika Borwa ya Boeti:
7.1. Mme Makhosazana Khanyile (Modulasetulo);
7.2. Moatbokheiti Lizelle Dominique Jordaan (Motlatšamodulasetulo);
7.3. Ngaka Gregory J Davids;
7.4. Ntate Ikaneng Ephraim Pilane;
7.5. Moprofesara Motlhago Stella Bvuma;
7.6. Mme Nqabomzi Haya;
7.7. Ntate Rajesh Mahabeer;
7.8. Ntate Ayanda V Mazibuko;
7.9. Mme Maija de Rijk-Uys;
7.10. Ngaka Mzolisi Michael Toni; le
7.11. Mme Uveshnee Pillay bjalo ka Moemedi wa Kgoro ya Boeti.
8. Go thwalwa ga Modulasetulo le Motlatšamodulasetulo ba Boto ya Malokophethiši a Trasete ya go Ikema ya Tlhabollo:
8.1. Moatbokheiti Kwazikwenkosi Mshengu (Modulasetulo); le
8.2. Mme Karabo Siyila (Motlatšamodulasetulo).
D. Ditiragalo tše di tlago
1. Kgwedi ya Ditokelo tša Botho
1.1. Meketeko ya ngwaga wo ya Kgwedi ya Ditokelo tša Botho le ya Letšatši la Ditokelo tša Botho ka la 21 Hlakola e diragala letšatši pele ga meketeko ya bosetšhaba ya Mengwaga ye 30 ya Tokologo ka Moranang.
1.2. Ka fase ga morero wo: “Mengwaga ye Masometharo ya Tlhompho le Tlhohleletšo ya Ditokelo tša Botho”, Kabinete e dira boipiletšo go mang le mang go kgatha tema ya gagwe gore go matlafatšwe ditokelo tša rena tša botho, le gape go hlakelela tokologo le temokrasi ya rena, tše re di fihleletšego ka go ikuna tše ntši.
2. Imbizo ya Mopresidente ya Sekao sa Tlhabollo ya Dilete (DDM)
2.1. Mopresidente o tla swara Imbizo ya bo-12 ya DDM ya Mopresidente ka Labone,
7 Hlakola 2024 kua Mmasepaleng wa Selete wa Nkangala go la Mpumalanga.
2.2. Imbizo ye e kopantšha mmogo baetapele ba go tšwa didikong ka moka tše tharo tša mmušo go tlo boledišana le badudi mabapi le ditlhotlo tša kabo ya ditirelo le go hlama dithulaganyo tša kaonafalo ya kabo ya ditirelo le tlhabollo ya badudi mo lefelong leo.
2.3. Imbizo ya Mopresidente ya DDM le diketelo tša go ukamela mošomo wo o dirilwego di phethagetše diprofenseng ka moka tše senyane bjalo ka karolo ya maitekelo a go gatelela mošomo wo o kgatlampanago wa go kaonafatša maphelo a badudi.
2.4. Kabinete e dira boipiletšo baduding ba Mmasepala wa Selete wa Nkangala le ba mafelomabapi go ba gona Imbizong le go tlo boledišana le baetapele ba bona ba setšhaba ka mathata a go ba ama.
3. Kopanokgolo ya 2024 ya Afrika Borwa ya Tlhabollo ya Mananeokgoparara a go Swarelela (SIDSSA)
3.1. Dilo ka moka di lokile go tlo swara kopanokgolo ya SIDSSA ya 2024, ye e tlo swarelwago go la Motsekapa go thoma ka la 17 go fihla ka la 19 Hlakola 2024. SIDSSA e kopantšha mmogo bakgathatema ba bohlokwa ka lefapheng la mananeokgoparara ba ba lego bohlokwa go potlakišo dipeeletšo tša mananeokgoparara ka mo nageng.
3.2. Tlhabollo ya mananeokgoparara ke morero wo tlago pele wa mmušo le wa Basepediši ba Mmušo ba Lekga la Boselela, ka ge e nale seabe godimo ga kgolo ya ikonomi le tlholego ya mešomo. SIDSSA e tlo laetša tše dingwe tša dikgatelopele tša phethagatšo ya Thulaganyo ya Dipeeletšo tša Mananeokgoparara ye e dumeletšwego ke Kabinete ka Mopitlo 2020.
4. Khonferense ya Bobedi ya Bahlomi ba Dikgwebo ba Bathobaso le ya Baromelathoto Dinageng tša ka ntle
4.1. Khonferense ya bobedi ya Bahlomi ba Dikgwebo ba Bathobaso le Baromelathoto dinageng tša ka ntle e tlo swarelwa go la Sandton Convention Centre kua Johannesburg ka Laboraro, 20 Hlakola 2024.
4.2. Khonferense ye e tla lemoga bothakga bja kgwebo le go rolela kefa dikgwebo tše di šikerego moya wa katlego le boihlamelo, le go laetša tlholego ya mešomo, maitshwaro a maleba a kgwebo le khwalithi. Difeme tša diintasteri tša go feta 600 tše di hlomilwego ke Bathobaso ebile di thekgilwe ke Kgoro ya Kgwebišano, Intasteri le Phenkgišano di fihleletše letseno la go balelwa R80 bilione ka ngwaga wa ditšhelete wa 2023/24, le go laetša dipoelo tše lego molaleng go gokagoketša bahlomadikgwebo ba bangwe ba Bathobaso ka gare ga ikonomi ya intasteri ye.
E. Melaetša
1. Ditebogišo
Kabinete e lebišitše ditebogišo tša yona le go lakaletša bao ba latelago mahlogonolo:
1.1. Mme Michelle Phillips ge a thwetšwe bjalo ka Group CEO ya Sehlopha ya Transnet le Mme Nosipho Maphumulo bjalo ka Mohlankedimogolwane wa Ditšhelete wa Sehlopha wa Transnet. Dithwalo tše di tloga di le bohlokwa mošomong wo o tšwelago pele wa go agaleswa mabokgoni ka gare ga Transnet bjalo ka karolo ya mošomo wa go bušetšasekeng thwalothoto ya naga ye, ditimela le mabokgoni a dinamelwa.
1.2. Ntate Wamkele Mene, ge a thwetšwe leboelela bjalo ka Mongwaledipharephare wa Tumelelano ya Kgwebišano yeo e Lokologilego ya Kontinente ya Afrika (AfCFTA)
1.3. Ntate Sibusiso Ngalwa, yo e lego Modulasetulo wa bjale wa Foramo ya Afrika Borwa ya Barulaganyi ba Bosetšhaba (SANEF), ge a thwetšwe bjalo ka Moleloko wa Komitiphethiši ya Foramo ya Afrika ya Barulaganyi.
1.4. Banyana Banyana, sehlopha sa bosetšhaba sa basadi sa kgwele ya dinao, ge ba fentše seripeng sa bobedi sa go Khwalifaela Diolimpiki tša Basadi tša CAF. Sehlopha se se thopile phenkgišano ya magareng ga dihlopha tše pedi ka seno sa 4-0, ebile ba tla nkgišetšana mahwafa le Nigeria seripeng sa mafelelo ka Moranang 2024.
2. Mahloko
Kabinete e lebišitše mahloko a yona go ba malapa, bagwera le bašomimmogo ba:
2.1. Mokhaptheni Simon Mkhulu Bobe le Lance Corporal Irven Thabang Semono wa Lebotho la Bosetšhaba la Sešole sa Afrika Borwa, bao ba bolailwego go la Democratic Republic of Congo (DRC) ka la 14 Dibokwane 2024. E be le karolo ya Morero wa Dinaga tše di Hlabologago tša Borwa bja Afrika go la DRC, ya go tsebega ka leina la go tlwaelelega la SAMIDRC, bao ba bego ba rometšwe fao go bušetša sekeng tšhireletšego, khutšo le tielelo ka go tsamaišana le Morerokgolo wa AU wa go ‘‘Fediša Methuntšhano pele ga 2030’’. Kabinete e lakaleditše mašole a mararo bao ba gobetšego ka nako ya tlhaselo pholo ya ka pejana.
2.2. Batho ba bane go tšwa Mpumalanga ba ba lobilego maphelo a bona kotsing ya go šiiša ya pese go la Paulpietersburg, KwaZulu-Natal ge ba be ba boela morago ba e tšwa kgobokanong ya African National Congress go la eThekwini.
Dinyakišišo:
Mme Nomonde Mnukwa
Seboleledi sa Mmušo sa Motšwaoswere
Mogala: 083 653 7485
E lokolotšwe ke: Tshepetšo ya Tshedimošo le Dikgokagano tša Mmušo (GCIS)
Letšatšikgwedi: Labone, 29 Dibokwane 2024
www.gcis.gov.za; www.gov.za
