Kabinete e kopane ka Union Buildings ka Pretoria.
1. Merero ka seemong sa bjale
1.1. Ka ge re keteka Kgwedi ya Basadi, Kabinete e lakaletša Mohumagadi Getrude Shope gore a fole ge a keteka letšatši la gagwe la matswalo la go fetša mengwaga ye 92. MmaShope, ka ge a tsebja bjalo ke bao ba mo ratago, ke molwelatokologo yo a hlomphegago ebile o lwetše kudukudu tokollo ya basadi. O amogetše sefoka sa Isithwalandwe/Seaparankwe, e lego sefoka sa tlhompho sa maemo a godimodimo seo se fiwago ke African National Congress go bao ba bilego le seabe se segolo le go itima tše ntši ba lwela tokologo.
Kabinete e lebiša gape mahlatse le mahlogonolo go Mohumagadi Zondeni Veronica Sobukwe ge a keteka letšatši la gagwe la matswalo la go fetša mengwaga ye 90. Afrika Borwa ke naga ye kaone ka lebaka la maitapišo ao a dirilwego ke basadi ba mphato wa gagwe.
Ge naga e keteka Kgwedi ya Basadi ka fase ga morero wa “Ngwaga wa OR Tambo: Basadi ba Kopane go tšwetša pele Afrika Borwa”, Kabinete e ba le maAfrika Borwa ka moka ge ba hlompha basadi ba bogale bao ba ilego ba gwantela Union Buildings ka 1956 go dira ditšhupetšo kgahlanong le melao ya dipasa.
Ka moya wa lefokwana la ‘Matšoba a Ntwa ya Tokologo’ la OR Tambo, re keteka tema yeo e kgathilwego ke basadi bjalo ka baetapele ba lesolo la basadi ka mo nageng, re lemoga gore ge o maatlafatša mosadi, o maatlafatša setšhaba.
Bjalo ka basadi re fihleletše tše ntši ka lefapheng la maatlafatšo ya basadi. Pele ga 1994 Palamente e be e na le fela kemedi ya basadi ya 2,7%, gomme ka morago ga dikgetho tša mathomo tša temokrasi, kemedi ya basadi ka go Kopanokgothekgothe ya Maloko a Palamente e bile go 27,7%. Ka 1999 dipalopalo tšeo di ile tša hlatloga go ba 30% gomme ka morago ga fao tša ba go 32,7% ka 2004. Ka morago ga dikgetho tša bosetšhaba tša 2009 kemedi ya basadi e fihlile go 42%. Ditona tša Basadi bjalo di bopilwe ke 43% ya Kabinete.
Re na le basadi ba bantši bao ba lego maemong a boetapele gomme makala a mmušo a gare a kaonafatša maemo a basadi. Mo lebakeng le re na le Kantoro ya Tona ya Basadi ka Kantorong ya Mopresidente.
1.2. MaAfrika Borwa go ralala le makala ka moka a šomile gabotse go kgatha tema ka mo ketekong ye. Melawana ya mmušo ya kgatelopele e tšwela pele go bea pele maatlafatšo ya basadi, kudukudu bao ba dulago dinagamagaeng, bao gantši ba itemogelago seemo se boima sa bohloki.
1.3. Ge re dutše re keteka kgatelopele yeo re e dirilego ka go lokolleng ga basadi, Kabinete e gopotša naga ka ga yo mongwe wa basadi bao ba lwetšego tokologo yo a ilego a bolawa ka la 17 Phato 1982. Ruth First o ile a bolawa sehlogo ka pomo ya lengwalo leo a bego a rometšwe lona ka Mozambique. O ile a lefa ka setopo ge a be a sa tekateke go lwela tokologo ya batho ba Afrika Borwa.
Dikgaruru tša go Amana le Bong (GBV)
1.4. Kabinete e tsentše maikutlo a yona ka kgalemong ya seswantšho sa bidio seo se bego se bontšha mosetsana wa sekolo a hlaselwa ke mošemane wa sekolo ka sekolong sa KwaZulu-Natal gomme e amogela go golegwa ga mogononelwa yoo. Polao ye e sa tšwago go hlaga ya morutiši wa sekolo yo a thuntšwego pele ga barutwana ba gagwe ke molekane wa gagwe e re gopotša ka ga ditlhohlo tša tlaišo ya basadi tšeo re sa lebanego le tšona.
1.5. Dikwešobohloko le dikotsi tše di tlišwago ke setlwaedi sa taolo ya banna go basadi tše di feletšago ka dikgaruru kgahlanong le basadi le bana di swanetše go lwantšhwa ke rena ka moka bjalo ka setšhaba. Ditheo tša tirišo ya molao le tshepedišo ya toka go bosenyi di swanetše go tšeela bao ba dirago ditiro tše magato.
Seboka sa Mokgatlo wa Dinaga tše di Hlabologago tša Borwa bja Afrika (SADC)
1.6. Afrika Borwa, bjalo ka modulasetulo yo moswa wa SADC, ke monggae wa Seboka sa Mehleng SADC sa bo 37 sa Dihlogo tša Dinaga le tša Mebušo go tloga ka la 9 go fihla ka la 20 Phato 2017 ka fase ga morero wa “Re dirišana le Lefapha la Phraebete go Hlabolla Intasteri ye e Hlabollogago le Mananeo a Kabo ya Ditirelo a ka Seleteng”.
Afrika Borwa e tla šomiša maemo a yona go tšwetša pele dikgahlego tša naga ye ka go diriša togamaano ka ge go laeditšwe ka go Leanotlhabollo la Bosetšhaba (NDP), ya tšwetša pele kago ya diintasteri le kopanyo ka seleteng le ka khonthinenteng ka nepo ya go thekga Lenaneo la Afrika la 2063 la Mokgatlo wa Selekane sa Afrika (AU). Lenaneo la 2063 ke tlhako ya togamaano ya phetošo ya ekonomi ya setšhaba ya ka khonthinenteng ye mo mengwageng ye e tlago ye 50. Le agwa go, ebile le nyaka go akgofiša phethagatšo ya masolo ao a fetilego le a bjale a ka khonthinenteng go tšwetša pele kgolo le tlhabollo ya go ya go ile.
Mananeo a mararo a kgonagalo ya go tliša kgolo ya ekonomi, e lego go šoma ditšweletšwa tša temo, tlhwekišo ya diminerale le mananeo a kabo ya ditirelo tša tlhwekišo meetse a dinoka, a hlaotšwe.
Seboka se gape se tla gopola Mopresidente yo a fologago setulo José Eduardo dos Santos wa Angola, yo a tla bego a fologa setulo ka morago ga mengwaga ye 37 e le Mopresidente gomme a etile pele naga ya gabo go tšwa ka ntweng ya bana ba thari.
1.7. Motlatšamopresidente Ramaphosa, ka maemo a gagwe bjalo ka Mokgokaganyi wa SADC ka Nageng ya Kgoši ya Lesotho, le yena o tla ala pego go Seboka sa SADC sa Double Troika seo se tlogo swarwa ka Pretoria ka la 18 Phato, fao Mmušo wa Lesotho le ona go emetšwego gore o tla ala peakanyo ya diphetogo tša ka nageng yeo. Se se tla ka morago ga ditherišano gareng ga Motlatšamopresidente le mmušo o moswa, le baetapele ba mekgatlo ya kganetšo, sehlopha sa dikgoši le bakgathatema ba setšhaba ka Nageng yeo, e le ge ba rerišana ka ga lenaneo la phethagatšo ka botlalo ya diphetho tša SADC mabapi le diphetošo tša molaotheo le tša lefapha la tšhireletšo.
1.8. Kabinete e amogela dipoelo go tšwa go kamogelo ya Mopresidente Jacob Zuma go Mopresidente Ellen Johnson Sirleaf wa Repabliki ya Liberia, ka nakong ya ketelo ya Semmušo ka mo nageng. Dinaga tše ka bobedi di dumelelane ka go lebeledišiša go kaonafatša seemo seo se kgontšhago go nolofatša mokgwa wa go dira kgwebo ka dinageng tša rena. Kabinete e hlohleletša dikhamphani tše ntši tša phraebete go beeletša ka Liberia.
Dipresidente tše ka bobedi di dumelelane ka go feleletša go saenela Tumelelano ya Go Etela Dinageng tše ka Bobedi ka ntle le Visa go bao ba nago le Diphasepote tša Setiplomate le tša Semmušo. Ba dumelelane gape ka go akgofiša dipoledišano le go feleletša ditumelelano tše dingwe tša dinaga tše ka bobedi mabapi le temo, boeti, maphelo, enetši, meetse le kelelatšhila gareng ga tše dingwe.
1.9. Kabinete e lebogiša badudi ba Rwanda ge ba swere dikgetho tša khutšo tšeo go tšona go kgethilwego leswa Mopresidente Paul Kagame. Go phethwa ga dikgetho tše dingwe tšeo di atlegilego ka Afrika ke taetšo ya pepeneneng ya gore dikgatelopele tša temokrasi di a tšwela pele go ralala le khonthinetente.
1.10. Kabinete e bile gape le AU ge e lebogiša Kenya ge e swere dikgetho tše di atlegilego. Bjale go tšwa go badudi ba Kenya ka moka go amogela dipoelo tša dikgetho le go šomela botee bja naga.
BRICS
1.11. Mopresidente Zuma o tla re lehono, ka la 17 Phato 2017, a ba modulasetulo wa go tsebagatšwa semmušo ga Pankatlhabollo ye Mpsha (NDB) ya Lefelo la Selete sa Afrika la Brazil, Russia, India, China le Afrika Borwa (BRICS) ka Hoteleng ya Michelangelo, Sandton. Go tsebagatšwa semmušo ga Lefelo la Selete sa Afrika go tla bontšha kabo ya tirelo ya NDB, gwa laetša mošomo wa panka ye ka lefapheng la tlhabollo ya mananeokgoparara le ya go ya go ile ka dinageng tšeo di tšwelelago le tšeo di hlabologago.
1.12. Afrika Borwa e gare ga dinagamaloko tša BRICS tšeo di amogetšego Leano la Dintlha tše Šupa tšeo di lebeletšego kudu go katološa tirišano ya diintasteri, ka kopanong ya Ditona tša Diintasteri tša BRICS yeo e swerwego ka Hangzhou, China. Dinaga tše di tla tšwela pele go dirišana ka mafapheng a go swana le a tlhabollo ya mananeokgoparara a maswa a diintasteri, tlhabollo ya theknolotši le boithomelo, le dikgwebopotlana le dikgwebo tša magareng.
1.13. Ditona tša Dikgokagano go tšwa ka sehlopheng sa BRICS le tšona di kgathile tema ka dipoledišanong, gomme sehlopha seo sa phatlalatša Kwano ya Ditona ka ga Theknolotši ya Tshedimošo, ya gore dinaga tša BRICS di tla tsenya tirišong tirišano mabapi le tšhireletšego ya tshedimošo, ka ge theknolotši ya kgokagano ya titšithale e raloka tema yeo bohlokwa bja yona bo oketšegago go hlohleletša kgolo ya ekonomi.
1.14. Kabinete e leboga Mmušiši wa Peleng wa Panka ya Resefe ya Afrika Borwa, Morena Tito Mboweni, ka mošomo wa gagwe wa sephrofešenale le wa boikgafo mo lebakeng la mengwaga ye mebedi ge a be a šoma bjalo ka molaodi yo e sego wa khuduthamaga wa BRICS NDB. Molaodipharephare wa Kgoro ya Ditšhelete, Morena Dondo Mogajane, o tla tšea maemo a.
Tirišano ya setšhaba
1.15. Kabinete e kgalema ditiro tšeo di sa tšwago go hlaga tša semorafe tšeo di dirilwego ke batho ka setšhabeng sa rena. Maitshwaro a mohuta woo a thulana le maitshwaro a ditokelo tša rena tša molaotheo, maikarabelo le boleng, ebile ga a na le fao a beilwego gona ka setšhabeng sa rena sa temokrasi.
Kabinete e reta bolaodi bja dikhamphani tša phraebete tšeo di tšeelago ditiro tša semorafe magato, e le ge di laetša gore semorafe ke bothata ka setšhabeng sa rena, le gore bo swanetše go lwantšhwa ge re nyaka go phethagatša tirišano ya setšhaba le go fodiša dihlabi tša nakong ye e fetilego.
Re na le maikarabelo a go tšea magato a ka pela kae le kae fao semorafe le kgethologanyo di hlagago gona ka setšhabeng sa rena. Ka moka ga rena re na le maikarabelo a go aga setšhaba se seswa go ya ka fao go ukangwego ka morago ga dikgetho tša mathomo tša temokrasi.
1.16. Kabinete e tšweleditše tlhobaboroko ya yona mabapi le seemo sa tahlegelo ya mešomo ka mo nageng, kudukudu ka mafapheng a dikgwebo le a meepo. Le ge go le bjale, e amogetše maitapišo ao a dirilwego ke lefapha la meepo go tsenela dingangišano tšeo di nyakago go phološa mešomo. Go dumelelwa ga Kgopelo ya Lonmin ya go reka setseka sa Anglo Platinum sa 42,5% mo nakong ye e sa tšwago go feta ka Pandora – e lego lesolo la mohlakanelwa gareng ga Lonmin le Anglo Platinum – go amogetšwe. Lesolo le la mohlakanelwa le phološitše mešomo ya go feta ye 3 000 ebile ke kimollo, kudukudu ka seemong sa bjale sa ekonomi ya lefase ka bophara. Mmušo o tšwela pele go ikgafa go hloma seemo seo se loketšego kgolo ya ekonomi le tlhomo ya mešomo.
1.17. Kabinete e amogetše sephetho sa kgorotsheko seo se tiišeleditšego leswa tokelo ya go tšea diphetho ga mmušo mabapi le go bea melawana le ditaelo ka go ganetša kgopelo yeo e dirilwego ke Mokgatlo wa Badirišaleswa ba ditšhipi wa Afrika Borwa gomme ya laela gore mokgatlo wo o lefele ditshenyegelo tša tshepedišo ya tsheko. Kgorotsheko ya Molaotheo e ganeditše kgopelo yeo e dirilwego ke baromelantle ba ditšhipi tša maratha go dira boipelaetšo kgahlanong le kahlolo ya Kgorotsheko ya Godimo ya Afrika Borwa le Kgorotshekokgolo ya Boipelaetšo.
Kgorotsheko ye e laetše gore ditlhagišo tša thomelontle ya ditšhipi tša maratha tša Naga tšeo di tsebjago bjalo ka ditheko tše kaone tše beetšwego difeme tša go tšweletša ditšhipi, ditšhilo tše nnyane tša ditšhipi le disemelthara tše kgolwane tša ditšhipi tša maratha di tšwele pele go šoma. E hlagiša gore go be le theko ye e fokoditšwego ka 20% go ditheko tša boditšhabatšhaba pele ga ge feme e ka ba le maswanedi a go ba le maswanedi a go hwetša phemiti ya thomelontle. Molawana wo o tla thuša go hlohleletša kgolo ya ekonomi ya ka mo nageng le go hloma mešomo.
1.18. Kabinete e amogetše boikgafo bjo bo dirilwego ke Mmušo wa Canada bja go dirišana le Afrika Borwa ka taolong ya mellwane. Se se tlile ka morago ga ge Tona ya Merero ya Selegae, Moprofesara Hlengiwe Mkhize, a kopane le modirišani ka yena wa Canada e lego Tona ya tša Bofaladi, Badudi ba Dinaga tša ka ntle le Badudi ba ka nageng Morena Ahmed Hussen mo bekeng ye. Neelano ye e tla tšwela pele go maatlafatša kamano ye e lego gona gareng ga dinaga tše ka bobedi.
2. Diphetho tša Kabinete
2.1. Kabinete e dumeletše Sengwalwathomelo sa Ditekanyetšo tša 2018. Se se tla tšwela pele go tsenya tirišong NDP. Sengwalwa se se maatlafatša go nyalelanya ditekanyetšo le Tlhako ya Togamaano ya Lebaka la Magareng. Se hloma motheo wa tshepedišo wa go dira dikgetho gareng ga ditlhokwa tšeo di tlago pele tše di phenkgišanago ka go diriša methopo ye e sa lekanego. Tona ya Kantorong ya Mopresidente, Morena Jeff Radebe, o tla swara kopano le bagaši ba ditaba ka moragonyana.
2.2. Kabinete e dumeletše Leanophethagatšo la Boeti bja Mabopong a Lewatle le bja ka Lewatleng, leo le hlamilwego ka fase ga tshepedišo ya Ekonomi ya Mawatleng ya Operation Phakisa. Leano le le tla thekga boeti ka ekonoming ya mawatleng. Le tla godiša lefelo la boeti bja mabopong a lewatle le bja ka lewatleng la maemo a godimo lefaseng ka bophara le la go ya go ile leo le šomišago kudu menyetla ya bokgoni ya Afrika Borwa mabapi le tlhago, setšo le bohwa. Tona ya Boeti, Mohumagadi Tokozile Xasa, o tla sedimoša bagaši ba ditaba ka ga leano le.
2.3. Kabinete e dumeletše go kgatha tema ga Afrika Borwa ka go Pontšho ya Mawatle ya Bobedi ya Boditšhabatšhaba ya 2017 – 2020. Go kgatha tema mo go tla thekga Bodulasetulo bja Afrika Borwa bja Mokgatlo wa Lebopo la Lewatle la India ka 2017/18.
Afrika Borwa e tla šomiša sekepe sa yona sa dinyakišišo seo se bitšwago SA Agulhas II go dira dinyakišišo tša ka lewatleng mola ka go le lengwe se hlahla le go agela Afrika Borwa le seboka sa dinaga tša bohlabela bja Afrika bokgoni bja tša mahlale.
Go kgoboketšwa mo ga datha le tshedimošo ya motheo ya lebaka le letelele ka ga tikologo go tla bea dinaga tše di hlabologago tša Lebopo la Lewatle le India maemong a makaone a go lota seriti sa lewatle la tšona le go hwetša mekgwa ya go utolla bokgoni bja tšona bja ekonomi ya mawatle ka nepo ya go kaonafatša maphelo a badudi ba tšona.
2.4. Kabinete e sedimošitšwe ka ga lesolo la Ekonomi ya Dikhemikhale le ya Dilahlwa la Phakisa Labs, leo le rulagantšwego gore le tla thomišwa ka Phato 2017. Se se bopa karolo ya tsenogare ya naga ye go laola ditšhošetšo go tikologo le go maphelo a batho tšeo di bakwago ke dikhemikhale le dilahlwa.
Le tla fana ka sebaka se sengwe go intasteri ya dikhemikhale ya Afrika Borwa gore e tsebe mebaraka ya tšweletšo yeo e amantšhwago le Khemistri ye e nago le segwera go Tikologo (go hlama ga ditšweletšwa tša dikhemikhale le ditshepedišo tše di fokotšago goba di tlošago tšweletšo ya dilo tše kotsi).
2.5. Kabinete e sedimošitšwe ka ga dikgopelo tše mmalwa tša go bea leswa mellwane ya diprofense go tšwa metseng ka diprofenseng tša mehutahuta. Gareng ga mafelo ao a amegilego ke Masepala wa Selegae wa Elias Motsoaled, Masepala wa Selegae wa Marblehall le Masepala wa Selegae wa Matatiele.
Ditšhaba tše di file mabaka a mmalwa ao a dirilego gore go be le dikgopelo tše, a go swana le fao lefelo le lego gona le phihlelelo ya ditirelo. Dikgopelo di amogetšwe ke Lekgotla la Karoganyo ya Mellwane le Kgoro ya Tirišano ya Makala a Mmušo le Merero ya Setšo (COGTA).
Mellwane ya diprofense e hlagišitšwe ka gare ga Molaotheo. Sephetho sefe goba sefe mabapi le dikgopelo tša mohuta wo se swanetše go tšewa go lebeletšwe ditlhagišo tša molaotheo.
Kabinete e dumetše gore tshepedišo ya go bea mellwane leswa, yeo e akaretšago Matatiele, e thomišwe. Tshepedišo ye ya palamente le yona e tla akaretša go kgatha tema ga setšhaba ka ge go nyakwa ke Molaotheo le molao.
3. Ditiragalo tše di tlago
3.1. Kabinete e bušeletša boipiletšo bja Mopresidente Zuma bjo bo gopotšago maloko a setšhaba go šišinya maina a batho go tšwa mafapheng ka moka bao ba nago le maswanedi a go hwetša ditlhompho tša maemo a godimodimo tša ka nageng, e lego Difoka tša Tlhompho tša Bosetšhaba, ka Moranang ngwaga wo o tlago.
Moletlo wo o hlompha maAfrika Borwa le badudi ba dinaga tša ka ntle bao ba tsebegago bao ba šomilego gabotse kudu ka mafapheng a mehutahuta.
Diforomo tša go šišinya maina di hwetšagala wepsaeteng ya kantoro ya Mopresidente (www.thepresidency.gov.za), Mafelo a Thusong Service Centres, dikantorong tša mebasepala le dikantorong tša badudi. Lebaka le lekopana leo le fiwago ka ga motho yo leina la gagwe le šišinywago le swanetše go sepela le foromo yeo. Ditšhišinyo tša maina a batho bao ba tlogo hwetša Difoka tša Tlhompho tša Bosetšhaba tša 2018 di tla tswalelwa ka la 31 Phato 2017.
3.2. Kgoro ya Mahlale le Theknolotši e tla swara moletlo wa Difoka tša Basadi ba Afrika Borwa go tša Mahlale (WISA) tša 2017. Difoka tše di lemoga diphihlelelo tša bašomi ba tša mahlale bao ba tumilego le go hloma sefala sa go hlohleletša basadi bao ba šomago ka tša mahlale bao ba kgathago tema ka dinyakišišong.
WISA e tla swarwa ka fase ga morero wa: “Maatlafatšo ya ekonomi ya basadi ka lefaseng leo le fetogago la mošomo”, e lego seo se sepelelanago le Khomišene ya Mokgatlo wa Dinagakopano ka ga morero wo o tlago pele wa Maemo a Basadi wa 2017.
3.3. Kabinete e leboga maloko a Ntlo ya Bosetšhaba ya Bohlano ya Baetapele ba Setšo (NHTL) bao nako ya bona ya mošomo e fihlilego mafelelong. NHTL ke sehlongwa seo se bopilwego ke baetapele ba setšo bao e lego baromiwa go tšwa Dintlong tša Baetapele ba Setšo ba ka diprofenseng tša Afrika Borwa, bao ba emetšego dintlo tša baetapele ba setšo tša ka diprofenseng maemong a bosetšhaba. Sehlopha se se bopilwe ke bobedi maloko ao a rolago modiro a NHTL le maloko ao a kgethilwego leswa go šoma pakatirong ye nngwe ye tee. Ba emetše baetapele ba setšo le ditšhaba tša bona ebile ba tšwetša pele mošomo wa baetapele ba setšo ka gare ga molaotheo wa bjale.
Kabinete e bile le Mopresidente Zuma ge a leboga Kgoši PP Maubane (Modulasetulo), Kgoši SE Mahlangu (Motlatšamodulasetulo) le maloko ka moka a Ntlo ya Baetapele ba Setšo. Kabinete e lebiša kamogelo ye borutho go maloko a maswa a NHTL ya boselela le a dintlo tša baetapele ba setšo go tšwa diprofenseng tše šupa.
4. Melaetša
4.1. Kabinete e lebogiša Mohumagadi Senamile Masango yo a bilego mosadi wa mathomo wa moAfrika go dira boitekelo bja mathomo bjo bo etilwego pele ke moAfrika ka laporathoring ya Mokgatlong wa Yuropa wa Dinyakišišo tša Nyutleleara (CERN) ka Switzerland. O bile karolo ya sehlopha sa baithuti bao ba nyakišišago go tšwa ka Yunibesithing ya Kapa Bodikela bao ba ithutelago isotope selenium-70 ka nepo ya go kwešiša bokaone ka fao sebopego sa nyutleleara se amanago le maemo a enetši.
4.2. Kabinete e lebogiša mokgatlo wa People Opposing Women Abuse (POWA), wo o tšweleditšego lenaneotirišo la khomphutha (App) leo le thušago batšwasehlabelo ba dikgaruru tšeo di theilwego go bong, bao ba nago le kgatelelo ye kgolo ya menagano goba bao ba lego kotsing yeo e lego kgauswi le go hlaga, go fihlelela ditirelo tšeo di kopantšwego le tšeo di kgokagantšwego. Ka ge e na le kgokagano le Lefelo la Taelo la Kgoro ya Tlhabollo ya Leago, App ye e kgona go kgokagana le ditirelo tše dingwe tša go swana le maphodisa le badirelaleago, bao ba ka kgonago go tseba fao molaetša o tšwago gona.
Ka go kgotla konope ya temošo sellathekeng, motšwasehlabelo o tla kgokaganywa le Lefelo la Taelo. Tirišano ye ya gareng ga mmušo le mekgatlo ye e sego ya mmušo e tla dira ka fao go lekanego go lwantšha bothata bjo bogolo bja tlaišo.
4.3. Kabinete e lebogiša Team South Africa ka ga diphihlelelo tša sona tše botse ka diphadišanong tša dipapadi tša mabelo le tša ka lepatlelong ka Diphadišanong tša Bonkgwete bja Lefase tša Fetereišene ya Mokgatlo wa Diatleletiki wa Boditšhabatšhaba ka London.
Caster Semenya o thopile lebelo la dimetara tše 800 le porontshe ka lebelong la basadi la dimetara tše 1 500, gomme gona fao a roba rekhote ya gagwe ye kaone. Semenya o dirile gore naga e ikgantšhe ka yena go sa kgathale ka seemo sa tsholo seo a lebanego le sona, o tšwela pele go tia maatleng le go kgotlelela. O latela seo se dirilwego ke Zola Budd, Natalie du Toit, wa dipharalimphiki, le Penny Heyns, wa moruthi. Wayde van Niekerk o thopile gauta ka lebelong la banna la dimetara tše 400 le silibera ka lebelong la dimetara tše 200. Mantšu ao a kgethegilego a ditebogo a lebišwa go mohlahli wa gagwe, Mohumagadi Anna Botha. Luvo Manyonga o thopile metale wa gauta ka go tabogeng ga gagwe ga dimetara tše 8.34 ka go makgaolakgang a phadišano ya go tabogela kgole ya banna, Ruswahl Samaai o thopile porontshe ka phadišanong ya go tabogela kgole ya banna, gomme Akani Simbine o tšwile maemong a bohlano ka lebelong la makgaolakgang la banna la dimetara tše 100.
Go šoma gabotse ga bona go bontšhitše bokgoni bja dipapadi bja naga ya rena, e lego go fa mafolofolo le tlhohleletšo go maAfrika Borwa ka moka, kudukudu bafsa bao ba ralokago diatleletiki bao ba sa tšwelelago.
Baraloki ba ba diatleletiki ba dirile gore naga ya rena e ikgantšhe gomme ba emišetša godimo folaga ya rena ya bosetšhaba ka bothakga bjo bogolo. Re ipiletša go maAfrika Borwa ka moka go tšwela pele go thekga dihlopha tša rena tša bosetšhaba ka moka, gammogo le banna le basadi bao ba ralokago dipapadi. Ke baemedi ba naga ya rena ye botse, gomme ga re na le pelaelo ka ge ba tlo hlohleletša bafsa ba bangwe go latela mešomo ya bona ye mebotse.
5. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
5.1. Morena AD Matseke bjalo ka Mohlankedimogolophethiši (CEO) wa Broadband Infraco, go thoma ka la 1 Lewedi 2017 go fihla ka la 30 Phato 2022.
5.2. Katološo ya konteraka ya nako ya go se fetoge ya CEO ya bjale ya Broadband Infraco, Mohumagadi PV Kwele, ka dikgwedi tše tharo, go thoma ka la 1 Lewedi go fihla ka la 30 Dibatsela 2017.
5.3. Go thwalwa leswa ga Morena Ian van Niekerk bjalo ka Mohlankedimogolo wa Ditšhelete wa Broadband Infraco.
5.4. Ngaka Moshibudi Priscilla Rampedi bjalo ka CEO ya Sehlongwa sa Bosetšhaba sa Phedišano ya Diphoofolo tša Mehutahuta sa Afrika Borwa.
5.5. Mohumagadi IL Mathenjwa bjalo ka Motlatšamolaodipharephare (DDG): Tlhokomedišišo le Tshekatsheko ka Kantorong ya Khomišene ya Tirelo ya Setšhaba (OPSC).
5.6. Mohumagadi Wilhemina Reshoketswe Tshabalala bjalo ka DDG: Phetošo ya tša Leago le Phetošo ya Ekonomi ka Kgorong ya Basadi.
5.7. Morena Matome Emmanuel Malatsi bjalo ka DDG: Seriti le Bomenetša ka go OPSC.
Dipotšišo:
Mohumagadi Phumla Williams – Molaodipharephare wa Motšwaoswere (GCIS)
Mogala: 083 501 0139
