Ka ga
Seo o swanetšego go se dira
Lebaka
E dira tshenyagelo ya bokae
Diforomo tšeo di swanetšwego go tlatšwa
Dintlha tša boikopanyo
Ka ga thušo ya batšofadi
O ka hwetša thušo yeo e tla go thušago botšofeng bja gago. Thušo ya botšofadi e lefelwa go basadi bao ba nago le mengwaga ye 60 goba go feta le banna bao ba nago le mengwaga ye 60 goba go feta. Thušo ye e be e bitšwa phenšene ya batšofadi peleng.
Ke tseba bjang gore ke a dumelelwa?
O swanetše:
- o be moagi wa Afrika Borwa goba modudi wa go ya go ile
- o dule ka Afrika Borwa
- e be ga o amogele thušo efe goba efe ya leago
- e be ga o hlokomelwe lefelong la mmušo
- e be ga o amogele R86 280 ka ngwaga . Ge eba o nyetše, ditseno tša gago ge di kopantšwe ga tša swanela go feta R 172 560 ka ngwaga
- dithoto tšeo e lego tša gago ga di fete R172 560 ge eba ga se wa nyala gomme wena le molekani wa gago ga la swanelwa go ba le dithoto tša go feta R2 455 200.
O tla hwetša bokae?
Tšhelete yeo o tlago e hwetša e tla ba R 2 180 ka kgwedi. Ge e le gore o na le mengwaga ya go feta 75, o tla hwetša R2 200.
O tla lefelwa bjang?
Tirelo ya Tšhireletšo ya Leago ya Afrika Borwa (SASSA) e tla lefela thušo go wena go ya ka ye nngwe ya ditsela tše di latelago:
- tšhelete lefelong leo le itšego la tefelo ka letšatši leo le itšego
- peo ya elektroniki ka gare ga akhaonte ya gago ya panka goba akhaonte ya panka ya poso (panka e ka go lefišetša tirelo ye)
- diinstithušene (mohlala legae la batšofadi).
Ela hloko: Ge eba o hlolega go amogela tšhelete ka bowena, o ka šupa mongwe bjalo ka moemedi go tšwa kantorong ya SASSA, goba wa fa mongwe maatla a semolao go amogela thušo legatong la gago.
Thušo ya gago e ka lekodišišwa gape neng?
SASSA e ka tšea sephetho ge eba thušo ya gago e swanetše e lekodišešwe. Letseno la gago go ya ka moo le tsebagaditšwego ge o dira kgopelo ya thušo e tla ba motheo wa sephetho se. O tla tsebišwa dikgwedi tše tharo pele ga nako ka ga letšatšikgwedi leo tekodišišo e tla dirwago ka lona goba letšatšikgwedi leo setifikeiti sa bophelo se nyakegago ka lona. Ge eba o amogela tšhelete ya gago ka pankeng, lefelo goba moemedi, o hloka gore o tlatše setifikeiti sa bophelo dikantorong tša SASSA ngwaga wo mongwe le wo mongwe.
Thušo ya gago e ka fegwa neng?
Tše di latelago di ka dira gore thušo ya gago e fegwe:
- ge maemo a gago a fetoga
- dipoelo tša tekodišišo
- ge o hlolega ke go dirišana ge thušo ya gago e lekodišišwa
- ge o dira botsotsi goba o sa ikemele bonneteng
- ge eba go bile le phošo ge thušo ya gago e dumelelwa.
Thušo ya gago e ka fetšišwa neng?
Thušo e tla fetšišwa ge o:
- hlokofala
- amogelwa lefelong la mmušo
- sa amogele thušo lebaka la dikgwedi tše tharo tša go latelana
- se gona ka mo nageng.
Ge mohlokomelwa a amogelwa institšušeneng ye e nago le kontraka le mmušo malebana le go hlokomela motho yoo, krante ya leago e fokotšwa go fihla 25% ya palomoka ya tšhelete ka moka go tloga ka kgwedi ya bone mola mohlokomelwa a amogelwago institšušeneng yeo. Krante ye e fokoditšwego e tlo oketšwa go tloga ka nako yeo mohlokomelwa a sa hlwego a dulago institšušeneng yeo.
Seo o swanetšego go se dira
- E ya go kantoro ya Tirelo ya Tšhireletšo ya Leago ya Afrika Borwa (SASSA) kgauswi le moo o dulago gomme o tle le tše di latelago:
- Pukwana ya gago ya boitsebišo ya dinomoro tše 13. Ge eba ga o na pukwana ya boitsebišo:
- o swanetše o tlatše bohlatse godimo ga foromo ya semolao ya SASSA pele ga Mokomišinare wa Boikano yoo e sego mohlankedi wa SASSA
- o swanetše o tle le setatamente seo se netefaditšwego se saenilwego ke motho wa maleba (go swana le mokhanselara, moetapele wa setšo, modiredi wa leago, tonakgolo ya sedumedi goba hlogo ya sekolo) yoo a ka hlatselago leina le mengwaga ya gago
- mohlankedi wa SASSA o tla tšea dikgatišo tša menwana ya gago. O tla romelwa go Kgoro ya Merero ya Selegae go dira kgopelo ya ID le ge kgopelo ya gago e sepedišwa. Ge eba ga o hwetše pukwana ya boitsebišo, thušo ya gago e tla fegwa.
- bohlatse bja maemo a lenyalo (ge eba bo gona)
- bohlatse bja bodulo
- bohlatse bja letseno le/goba dikabelo (ge eba bo gona)
- bohlatse bja dithoto, go akaretšwa le boleng bja thoto yeo e lego ya gago
- bohlatse bja phenšene ya poraebete (ge eba bo gona)
- setatamente sa dikgwedi tše tharo sa panka ya gago
- ge eba o be o šoma, Sekhwama sa Inšorense ya go se šome (UIF) (‘plukhate’) goba setifikeiti sa tokollo go tšwa go modirelwa wa gago wa peleng
- ge eba molekane wa gago o hlokofetše mo mengwageng ye mehlano ya go feta, khopi ya wili le mekitlana ge eba e gona.
- Pukwana ya gago ya boitsebišo ya dinomoro tše 13. Ge eba ga o na pukwana ya boitsebišo:
Ela hloko: Ge eba o tšofetše kudu goba o lwala kudu go etela kantoro gore o dire kgopelo, moleloko goba mogwera a ka dira kgopelo legatong la gago. Motho yoo o swanetše a tšee lengwalo go tšwa go wena le/goba tsebišo ya ngaka yeo e rego o ka se kgone go etela kantoro.
- Tlatša foromo ya kgopelo pele ga mohlankedi wa SASSA (ela hloko gore ke wena fela bjalo ka mokgopedi goba mohlankedi wa SASSA bao le ka tlatšago foromo ya kgopelo). Mohlankedi o tla go botšolotša gomme a go botša ge eba o a dumelelwa go amogela thušo.
- O tla fiwa setlankana. Se boloke bjalo ka bohlatse bja gore o dirile kgopelo.
Go direga eng ge eba kgopelo ya gago ga se ya dumelelwa?
Ge eba kgopelo ya gago ga se ya dumelelwa, SASSA e tla go tsebiša ka lengwalo gore ke ka lebaka la eng e se ya dumelelwa.
Ge eba ga o dumelelane le sephetho, o ka lebiša ngongorego go Tonakgolo ya Tšwetšopele ya Leago go Kgoro ya Bosetšhaba ya Tšwetšopele ya Leago. O swanetše o dire ngongorego mo matšatšing a 90 ge o se no tsebišwa gore kgopelo ya gago ga se ya dumelelwa.
Lebaka
- E ka tšea dikgwedi tše tharo go sepediša kgopelo ya gago.
- Ge thušo ya gago e dumeletšwe, o tla lefelwa go tlogela ka letšatši leo o dirilego kgopelo ka lona.
Diforomo tšeo di swanetšwego go tlatšwa
Diforomo tša kgopelo ga di hwetšagale inthaneteng, eupša o ka di hwetša kantorong ya kgauswi le wena ya tšhireletšo ya leago (SASSA).
SASSA Toll free: 0800 60 10 11
Email: GrantEnquiries@sassa.gov.za
