Ho kenngwa tshebetsong ha mananeo a bohlokwa a mmuso
1.1. Kabinete e boeletsa kgoeletso ya Moporesidente Jacob Zuma ho makala kaofela a setjhaba ya ho sebetsa mmoho bakeng sa ho tshehetsa moruo le ho baballa mesebetsi tikolohong ya hajwale ya maemo a boima a moruo.
Tumellano pakeng tsa mmuso,beng ba merafo le mekgatlo ya basebetsi e bontsha boitlamo ho phatlalla le makala oohle ba ho baballa mesebetsi le ho fokotsa kgahlamelo ya tahlehelo ya mesebetsi.
Kabinete e ipiletsa ho maAforika Borwa oohle ho ema nokeng ho kenngwa tshebetsong ha tumellano ena. Tumellano e sebetsa jwaloka moralo ho makala oohle a tobaneng le ditshitiso bakeng sa ho baballa mesebetsi.
1.2. Kabinete e thotse Ditlaleho tsa Kotara ka nngwe tsa Diphetho bakeng sa nako ya la 1 Mmesa ho isa ka la 30 Phuptjane 2015.Kabinete e thabiswa ke kgatelopele e entsweng mme e lemohile le dibaka tse hlokang boitshunyako. Lefapha la Tsamaiso ya Dikgokahanyo le Tlhahisoleseding ya Mmuso (GCIS) le tla hokahanya dikopano le boraditaba bakeng sa ho arolelana tlhahisoleseding mabapi le ho kenngwa tshebetsong ha mananeo a mmuso. Lenaneo lena le tla tsebiswa ha mmamorao.
1.3. Kabinete e fumane tsebiso ka kopano ya G20 e neng e tshwaretswe Ankara, ho la Turkey ho tloha ka la 3 ho isa la 5 Loetse 2015. Kopano e ne e kenetswe ke Letona la Lefapha la Ditjhelete le la Lefapha la Mesebetsi le Molaodi wa Banka ya Resefe ya Aforika Borwa. Kopano e kopanetsweng ya Letona la Lefapha la Ditjhelete le la Lefapha la Mesebetsi e tshohlile mawa a ho fana ka mesebetsi e eketsehileng le e betere, ho fokotsa ho se lekalekane le ho tshehetsa kgolo e kenyeletsang.
1.4. Kopano ya Matona a Ditjhelete le Balaodi ba Dibanka tsa Resefe e ne e tsepamisitse maikutlo hodima, hara tse ding, moruo wa lefatshe; moralo bakeng sa kgolo ya moshwelella le e lekalekanang; matsete le meralo ya motheo; dintlha tsa matjhaba tsa lekgetho, tshehetso ka ditjhelete bakeng sa ntshetsopele, le ho fetofetoha ha tlelaemete. Kabinete e lemohile hore kgolo ya lefatshe e haellwa ke ditebello. Leha ho le jwalo, Kabinete e amohetse boinehelo bo botjha ba G20 ba ho tswela pele ho beha leihlo dintshetsopele, ho lekola tseo e ka nnang ho ba mathata a ka fetisetswang ho ba bang le ho sebetsana le dikotsi tse ka nnang tsa hlaha jwaloka ha ho hlokeha bakeng sa ho tiisetsa tshepo le botsitso ho tsa ditjhelete.
G20 hape e ananetse sephetho se kgabane sa Khonferense ya Addis Ababa ya tshethetso ya Ditjhelete bakeng sa Ntshetsopele moo Aforika Borwa e bapetseng karolo e hlokolosi jwaloka modulasetulo wa G77 le China.
1.5. Kabinete e amohela ho thakgolwa le ho hotetswa ha motlakase ha Polasi ya Motlakase o Fehlwang ka Moya ya Kouga Kapa Botjhabela ka la 4 Loetse 2015.
Polasi ya Motlakase ya Kouga e tla fana ka ho ka etsang dihora tse 300 tsa dikikawate tsa motlakase o hlwekileng selemo ka seng. Sena se, tla fana ka palohare ya malapa a 50 000. Ke karolo ya moralo wa naha wa ho fetoha ho isa ho phano e batlang e ba ya moshwelella ya eneji.
Pejana selemong sena, Lefapha la Eneji le atolositse menyetla bakeng sa lekala la poraefete ho nyehela bakeng sa tlhahiso ya motlakase ka ho tjhaella monwana Bahlahisi ba Ikemetseng ba Motlakase o ka hlabollwang botjha ba batjha ba 13 ba tla eketsa ka dimekawate tse 5 243 ho marangrang a naha.
1.6. Kabinete e lemohile diketsahalo tsa bofalli ho la Europe tse hlakisang ho rarahana ha taolo ya bofalli le kamano ya bona le maano a matjhaba a dinaha tse fapaneng.
Aforika Borwa esale e dula e leka ho sebetsana le dintlha tsa bofalli ka tsela e nang le botho kamoo e ka kgonang kateng. Koduwa ya bofalli Europe ke phephetso ya lebatowa e batlang mekutu e kopanetsweng ya dipuso ka bo mong. Ho nka karolo ka mafolofolo ha le tshebedisano e matla le ditjhaba, badudi le mekgatlo ya setjhaba ho a hlokeha bakeng sa ho sebetsana le dintlha tsa bofalli.
1.7. Kabinete e babatsa mosebetsi wa Boto ya Tsheho ya Meedi ya Bomasepala (MDB) eo haufinyane e phethetseng ho tiisetswa le ho tiisetswa botjha ha meedi e batlang e ba ka thoko ya bomasepala ka hara diporofense tse robedi ho phatlalla le naha.
MDB e e ntse mosebetsi wa yona ho ya ka thomo ya molao le ho sebedisa dipehelo tse ka hara matla a yona tsa ho etsa diqeto tsa ho qetela.
Kabinete e hlahisitse ngongoreho e tebileng mabapi le mekga e meng ya dipolotiki e thakgotseng tlhaselo ho MDB e batlang ho nyenyefatsa boikemelo le matla a yona a semolao mahlong a setjhaba.
Kabinete ipiletsa ho mekga yohle ya dipolotiki ho sutha tabeng ya ho nyenyefatsa mosebetsi wa setheo sa bohlokwa se ikemetseng se tshehetsang demokerasi. Ho na le metjha e meng e teng molaong bakeng sa ho phephetsa diqeto tsa MDB.
1.8. Sehla sa tlaleho sa Tekatekano Mesebetsing (EE) se butswe ka la 1 Loetse 2015 bakeng sa tlaleho ka ho ngola le ka inthanete, se kwalang ka la 1 Mphalane 2015 (ho ngola) le ka la 15 Pherekgong 2016 (inthanete) ka ho latelana.
Kabinete e hopotsa bahiri kaofela ho kenya ditlaleho tsa bona tsa EE ho Lefapha la Mesebetsi. Ditlaleho tse jwalo di thusa naha ho beha leihlo kgatelopele mabapi le ho tobana le kgethello le ho hloka tekano.
Lefapha la Mesebetsi le hlophisa matsholo a dipontsho tsa ho haola le naha tlasa mookotaba: “Phethoho – e etsa kelello kgwebong” ho matlafatsa ho kenngwa tshebetsong le ho netefatsa boimatahanyo.
2. Diqeto tsa Bohlokwa tsa Kabinete
2.1. Kabinete e ile ya tsebiswa ka Tlaleho ya ho Qetela ya Dipheo tsa Ntshetsopele tsa Dilemokete (di-MDG) bakeng sa Aforika Borwa. Kabinete e tjhaelletse monwana moralo wa tlaleho ya ho qetela mabapi le MDG e tla hlahiswa ho Lekgotla la Matjhaba a Kopaneng hamorao selemong sena.
Ho ya ka tlaleho, kamora dilemo tse 20 tsa ntshetsopele, kgatelopele ya bohlokwa e se e entswe bakeng sa phano ya ditshebeletso tsa bohlokwa ka hara naha le ho fokotsa maemo a mabe a bofuma. Leha ho le jwalo, Aforika Borwa e tswela pele ho tobana le diphephetso tse tharo tsa bofuma, ho se lekalekane le tlhokeho ya mesebetsi.
Tlaleho e kgatha tema bakeng sa lenaneo la kamora 2015 la ntshetsopele le batlang le le hlwahlwa le dipheo tse amehang tsa ntshetsopele ya moshwelella.
2.2. Kabinete e tjhaelletse monwana kgothaletso ya Letona la Dipalangwang ya ho fana ka tumellano e potlakileng ya kgiriso ho Tag Yachts (PTY) Ltd. Sepheo sa yona ke ho qala ho hlahisa diketswana tsa maemo a hodimo Boemakepeng ba Port Elizabeth. Sena ke ho qala boikarabelo bakeng sa Yuniti ya Phano ya tlhahiso ya dikepe tlasa boikitlaetso ba Operation Phakisa ba ho theha Karolo ya Kaho ya Dikepe ka hara Kapa Botjhabela. Ho tjhaellwa monwana ke ho ya ka Karolo e Potlakileng ya 57 ya Molao wa Naha wa Maemakepe, 2005 (Molao 12 wa 2005);
2.3. Kabinete e tjhaelletse monwana ho kenngwa ha Tjhata ya Aforika ya Dipalopalo Palamenteng bakeng sa ho amohelwa.
Tjhata e ke moralo wa leano bakeng sa ntshetsopele ya dipalopalo ka hara Aforika, e totobatsang dipehelo tsa seporofeshenale tse laolang tlhahiso le bolaodi ba dipalopalo maemong a naha, a lebatowa le a dikontinente.
Dipalopalo ke motheo wa bodisa le tlhatlhobo tse hlwahlwa, le ho netefatsa hore diphihlello le diphetho di a fihlellwa. Tjhata e fana ka ditataiso bakeng sa tlhahiso ya dipalopalo tsa boleng bo lokileng tse hlokahalang bakeng sa ho beha leihlo Morero wa Ntshetsopele ya Naha (NDP), le mananeo a mmuso le dintlha tse ka sehloohong.
2.4. Kabinete e tjhaelletse monwana hore Lefapha la Merero, Bodisa le Tlhatlhobo ya Tshebetso (DPME) le ntshetsepele Lenaneo la Twende Mbele hore le tsetele ho tshebedisano-mmoho mabapi le bodisa le tlhatlhobo ho phatlalla le Aforika.
Lenaneo la Twende Mbele le tla thusa Aforika Borwa ho aha le ho tiisa semmuso bolekane bo teng bo e seng ba semmuso, bo ka kenyeletsang ditumellano tsa dinaha tse pedi. Sena se tshehetsa ntwa bakeng sa bophelo bo betere ka hara Aforika Borwa, e leng se tsamaelanang le ho tsitlallela Aforika e betere ka hara lefatshe le betere.
3. Dibili
3.1. Kabinete e tjhaelletse monwana ho kenngwa ha Bili ya Katoloso ya Polokeho ya Kgiro, 2015 Palamenteng. Bili e hlohamathisa Molao wa Katoloso ya Polokeho ya Kgiro, 1997 (Molao 62 wa 1997) bakeng sa ho matlafatsa, ho hlakisa le ho tshireletsa ditokelo tsa badudi.
Dihlomathiso tsena, tse tswang ho Maano a Polokeho ya Thuo ya Mobu le Difalliso Dibakeng tsa Borapolasi ba Kgwebo, di reretswe ho fumana tharollo ya ho se bolokehe ha thuo ka ho kopanya mekgwa ya tlhabollo ya mobu ka hara tshireletso e hlwahlwa ya semolao le ditsela tsa ho rarolla ho se dumellane.
Ditlhophiso tsa hajwale tsa ditheo le bokgoni ha di so lekane bakeng sa ho sebetsana le boleng le boholo ba dikgohlano tsa ditokelo tsa mobu le polokeho ya thuo tse teng dibakeng tsa mapolasi a kgwebo.
4. Diketsahalo tse tlang
4.1. Jwaloka karolo ya mekete ya Kgwedi ya Botjhaba ka Loetse, Moporesidente Jacob Zuma o tla bula Lejwe la Sehopotso la Matola le Setsi sa Dikutlwisiso Mozambique ka Labohlano la, 11 Loetse 2015, le Sefika sa Morena Bhambhatha Greytown, ho la KwaZulu-Natal ka la 22 Loetse 2015.
4.2. Moporesidente hape o tla fana ka puo ya sehlooho ka Letsatsi la Botjhaba Vleifontein Makhado ho la Limpopo ka la 24 Loetse 2015. Mookotaba wa Letsatsi la Botjhaba la selemong sena o re: “Tsebo ya rona ya lapeng, ke lefa rona: Re sebeletsa ho tseba, ho hodisa le paballo ya lefa la Aforika Borwa le phelang.”
MaAforika Borwa a kgothaletswa ho ithuta ka botjhaba ba rona ba tlhaho ka ho etela diphaka tsa naha tse tla beng di dumella batho ho kena mahala ho tloha ka la 14 ho isa la 18 Loetse 2015, jwaloka ka Beke ya Diphaka tsa Aforika Borwa ya bo-10 ya selemo ka seng.
4.3. Lefapha la Thuto ya Motheo le tla tsamaisa Ditekolo tsa Naha tsa Selemo ka seng (ANA) nakong ya Loetse 2015 ho lekola kgatelopele ya diphetho tsa ho ithuta ho litherasi le mmetse hara dikereiti tsa 1 ho ya ho 9.
ANA e hlahisa bopaki bo maemong bakeng sa ho beha leihlo kgatelopele ya boitshunyako ba mmuso mme hape e tataisa ntshetsopele ya boitshunyako bo lebeletsweng.
Batswadi le bahlokomedi ba kgothaletswa ho tshehetsa baithuti nakong ya tekolo le ho netefatsa hore diphetho di sebediswa ho tobana le dibaka tse hlokang ho ntshetswa pele. Lenaneo la ANA bakeng sa 2015 le a fumaneha ho: www.education.gov.za
Kabinete e ipiletsa ho matitjhere kaofela ho beha ditlhoko tsa baithuti pele ka ho netefatsa hore ANA e tswela pele ntle le ditshitiso.
4.4. Kabinete e leboha maAforika Borwa a nkileng karolo ho Letsatsi la Matjhaba la Ho Bala le neng le le ka la 8 Loetse 2015 ho kgothaletsa tlwaelo ya ho bala le ho hodisa bohlokwa ba ho tseba ho bala. Ditokomane tsa rona tsa motheo tsa Demokerasi e leng Tjhata ya Tokoloho e tsitlallela hore “mamati a ho ithuta a tla bulelwa bohle”.
Lefapha la Thuto ya Motheo le etsa boipiletso ho maAforika Borwa kaofela hore kgweding ena a nke karolo letsholong le batlang ho kgothaletsa ho bala ka hara metse ya rona. Kabinete e etsa kgoeletso ho mang kapa mang ho nyehela ka dibuka ho dilaeborari tsa dikolo, re nyehele ka nako ya rona ho ya balla bana ba rona ka hara metse ya rona.
4.5. Beke ya Naha ya Selemo ka seng ya Thusong Service Centre ho tloha ka la 13 ho isa la 18 Loetse 2015 e tla hlophisa ditshebeletso tsa ditsi le diyuniti tsa hloma-o-hlomolle bakeng sa ho tlisa ditshebeletso tsa mmuso haufi le maAforika Borwa. Sena ke karolo ya Kgwedi ya Ditshebeletso tsa Mmuso.
Kabinete e kgothaletsa maAforika Borwa ho sebedisa ditshebeletso tse fapafapaneng le tlhahisoleseding e fanwang ke Thusong Service Centres ho intshetsapele le ho imatlafatsa.
Kabinete e etsa kgoeletso ho maAforika Borwa kaofela ho hlompha basebeletsi ba mmuso ba ipabotseng ka makgabane ka ho ba kgetha kapa ditheo tsa mmuso tse jwalo pele ho la 30 Loetse 2015 bakeng sa Dikgau tsa Naha tsa Batho Pele tsa Boqhetseke tsa 2015 tsa boraro, tse tla tshwarwa tlasa mookotaba: “Batho Pele – Batho ba tla Pele”. Tlhahisoleseding e batsi e teng ho: www.dpsa.gov.za
4.6. Kabinete e lemohile hore ho dula ha bo-70 ho Tlwaelehileng ha Kopano Kakaretso ya UN (UNGA 70) ho tla bula ka la 15 Loetse 2015 Ntlokgolong ya UN New York. Ho tloha ka la 25-27 Loetse 2015 Seboka sa Kamohelo ya Lenaneo la Ntshetsopele ya kamora 2015 se tla dula.
Dingangisano tsa Kakaretso tsa ho dula ha bo-70 ha UNGA ho tla etsahala ho tloha ka la 28 Loetse - 6 Mphalane 2015. Seboka sa ho qetela sa AU se neng se tshwaretswe Aforika Borwa se ipileditse ho ditho tsohle tsa lepatlelo la dipuso tsa Kopano Kakaretso tsa UN ho kenyeletsa ntlha ya ho hlabolla botjha Lekgotla la Polokeho hara maano a ka sehloohong dipuisanong tsa bona le balekane bao e seng ba Aforika; haholoholo, ho kenyeletsa dipehelong tsa bona nakong ya dingangisano tsa Kopano Kakaretso ya Mokgotla wa Matjhaba a Kopaneng, tlhokeho ya ho lokisa nalane ya ho hloka toka hodima kontinente ya Aforika.
4.7. Kabinete e lemohile hore Aforika Borwa e tla tshwara Seboka sa bo-2 sa Foramo e mabapi le Tshebedisano-mmoho ya China-Africa (FOCAC) ka la 04-05 Tshitwe 2015. Mmuso wa Aforka Borwa o tla sebetsa ka kopanelo e atamelaneng le Mmuso wa China, le Moifo wa Baambasadara ba Aforika ba Beijing le Addis Ababa, le Khomishene ya AU e mabapi le boitokisetso bo lebisang ho Seboka sa FOCAC. Ho lebeletswe hore Seboka sa FOCAC se tla amohela Tumellano le Leano la Tshebetso la (2016-2018). Aforika Borwa hajwale e ntse e buisana le bohle ba amehang bakeng sa boitokisetso ba ditokomane tsena tse pedi tsa bohlokwa tsa sephetho.
Melaetsa ya ditakaletso tsa mahlohonolo
4.8. Kabinete e ananela phatlalatso ya Kopano Kakaretso ya Federeishene ya Dipapadi tsa Commonwealth ya hore Durban e tla tshwara Dipapadi tsa 2022 tsa Commonwealth, se etsang hore e be lekgetlo la pele hore ketsahalo ena ya maemo a hodimo e tla tshwarelwa mobung wa Aforika.
Durban e tla sebedisa meralo ya motheo ya Mohope wa Lefatshe wa FIFA 2010 ho tshwara ketsahalo ena, e lebeletsweng ho fana ka ho ka fihlang ho R20 bilione moruong, e tla fetohelang ho R11 bilione ya tlatsetso ho kgolo ya tlhahiso ya naha ka kakaretso.
4.9. Kabinete e thoholetsa baatlelete ba rona bakeng sa ho qetella e la ba bo-13 Bompoding ba Lefatshe ba Diatleletiki ba bo-15 Beijing, ho la China le ho hapa medale o le mong wa gauta le tse pedi tsa boronse.
4.10. Kabinete hape e thoholetsa Bafana Bafana bakeng sa ho hapa papadi ya bo-21 ya Mandela Challenge, ka ho shapa Senegal 1-0. Tlholo ena e latela ho hlolwa ke Mauritania mafelong a beke mme re tshepa hore sena se tla phahamisa boitshepo ba sehlopha hore se tle se tshwanelwe ke ho bapala ho Mohope wa Ditjhaba tsa Aforika.
Ka ho hapa Mandela Challenge, Mokgatlo wa Bolo wa Aforika Borwa o ekeditse nyehelo ya wona ho Letlole la Bana la Nelson Mandela ho tloha ho R1 milione ho ya ho R1, 5 milione.
4.11. Kabinete e lakaletsa sehlopha sa Springbok tse ntle ho Mohope wa Lefatshe wa Rakbi wa bo-8 o tla tshwarwa ke England ho tloha ka la 18 Loetse ho isa ho la 31 Mphalane 2015 le ho ipiletsa ho maAforika Borwa ho ipopa ho tshehetsa sehlopha sa rona sa naha.
4.12. Kabinete e kgema le Moporesidente mabapi le ho thoholetsa Yunivesithi ya Witwatersrand ka ditshibollo tse ntjha tsa difosile Maropeng ka hara Tulo ya Botjhaba ya Lefatshe ya Cradle of Humankind ho la Ranteng Bophirima, Gauteng.
Tshibollo ena e babatsehang e latela diphuputso tse tebileng ka borasaense tlasa bolaodi ba Lefapha la Saense le Thekenoloji le Setsi sa Motheo wa Diphuputso sa Boqhetseke Yunivesithing ya Witwatersrand.
4.13. Kabinete e kgema le Moporesidente mabapi le ho thoholetsa phutheho ya Kereke ya Roma bakeng sa ho ananela semmuso Monghadi Tshimangadzo Samuel Benedict Daswa jwaloka Mohalaledi wa pele ka hara Aforika Borwa. Mokete o tla tshwarwa ka la 13 Loetse 2015 Thohoyandou, ho la Limpopo. Kereke ya Roma e tla tshwara tshebeletso eo ho yona Monghadi Tshimangadzo Samuel Benedict Daswa a tla ntlafatswa. Daswa e ne e le mosuwe-hlooho Porofenseng ya Limpopo. O ile a otlwa, a tlepetswa ka majwe le ho tjheswa ho fihlelwa a shwa bakeng sa tumelo ya hae ya Katholiki ka Tlhakola 1990.
5. Maemo a Kabinete Mabapi le Dintlha tsa Bohlokwa Maemong a Hajwale
5.1. Kabinete e amohetse maikemisetso a sisintsweng pakeng tsa Koporasi ya Taolo ya Sephethephethe le ba ka Bolaoding ba sephethephethe ba diporofense ho hlahisa tjhifi ya dihora tse 24 bakeng sa bahlanka ba sephethephethe ho shebana le koduwa ya dikotsi mebileng ya rona.
Kabinete e hopotsa basebedisi bohle ba mebila hore boipaballo mebileng ke boikarabelo ba e mong le e mong mme katleho ya matsholo a boipaballo mebileng e itshetlehile hodima batho bohle ba bolokang melao ya tsela. Jwaloka ha re tla kena sehleng sa matsatsi a phomolo a dikolo, Lefapha la Dipalangwang le tla matlafatsa letsholo la boipaballo mebileng.
Kabinete e ipiletsa ho bakganni ho emisa ka dikotsi mebileng ya rona ka ho hlompha matshwao a tsela, hore bakganni ba se kganne ba le tlasa tshutshumetso ya tahi, makoloi a sa lokelang tsela ha a ya tshwanela ho ba teng mebileng ya rona.
5.2. Kabinete e ananetse Kopano ya Lefatshe ya tsa Meru XIV eo hajwale e tswelang pele Durban le ho kenelwa ke baemedi ba 3 200. Kopano ena, ya pele ya ho tshwarelwa ka hara Aforika, e kenyeletsa batho ba emetseng makala a fapaneng a jwaloka mmuso, mekgatlo eo e seng ya mmuso, lekala la poraefete, le ditheo tsa saense le tsa seporofeshenale. Bonkakarolo bo phatlaletseng le dipuisano tse kenyeletsang ka dintlha tsa meru di tla thusa bakeng sa tshebedisano e kopanetsweng ho mananeo a lefatshe a mabapi le ntshetsopele ya moshwelella le ho aha bolekane bo botjha.
5.3. Kabinete e lemohile pehelo e ntshitsweng ke Morero wa US wa Sedipolomate wa Aforika Borwa e lemosang hore baferekanyi ba ka nna ba hlasela dibaka tsa dikgahlehelo tsa Amerika tse ka hara Aforika Borwa.
Kabinete e boeletsa maikutlo a Letona la Lefapha la Tshireletso ya Puso a ho netefaletsa setjhaba hore polokeho ya maAforika Borwa oohle e dula e le taba e ka sehloohong. Makala a rona a tiisetso ya molao a dula a fadimehile bakeng sa ho tshireletsa badudi le thepa ya bona.
Matshediso
5.4. Kabinete e kgema le Moporesident Zuma bakeng sa ho fetisetsa matshediso ho lelapa, metswalle le basebetsi mmoho ka ho hlokahala ha Moahlodi Thembile Lewis Skweyiya.
O entse nyehelo e matla ho naha jwaloka leqwetha le neng le le kgahlanong le mmuso wa kgethollo, molwanedi wa ditokelo tsa botho, Moahlodi wa Lekgotla le Phahameng la Dinyewe le Moahlodi wa Lekgotla la Dinyewe tsa Molaotheo.
5.5. Kabinete hape e romela matshediso a yona ho lelapa le setjhaba sa Mohlomphehi, Morena Lekunutu Cavendish Mota wa Batlokwa ba Mota ho la Foreisetata.
6. Dithonyo
Dithonyo kaofela di tla lokelwa ke ho netefatswa ha mangolo a thuto le tumellano e amehang.
6.1. Mofumahadi Mmabatho Ramagoshi – Motlatsi wa Motsamaisi e Moholo: Kgokahanyo ya Maano le Bolaodi ba Tsebo ho Lefapha la Basadi.
6.2. Hlooho ya Naha: Botsamaisi bakeng sa Bofuputsi ba Dinyewe tsa Botlokotsebe tse ka Sehloohong. Letona la Sepolesa le tla etsa phatlalatso thapameng ena.
Dipotso:
Mofumahadi Phumla Williams
(Sebueledi sa Kabinete se Tshwereng Mokobobo)
Mohala: 083 501 0139
