1. Merero ye e lego ditabeng seemong sa bjale
1.1. Kabinete e amogetše Lekala la 6 la Seteše sa Mohlagase sa Medupi ka Lephalale, Limpopo ge le thomile go šoma bjalo ka la kgwebo ebile le eba le seabe sa mohlagase wa dimekawate tše 800 (MW) ka gare ga mothopo wa mohlagase maemong a bosetšhaba. Protšeke ya Seteše sa Mohlagase sa Medupi ke polante ye e hlokago mapheko ya mohlagase wa go fehlwa ka malahla ye e nago le makala a tshela ao a etšwego gore a na le palomoka ya bokgoni bja go tšweletša 4 764 MW. Mopresidente Jacob Zuma o tla thakgola semmušo lekala le ka la 30 Phato 2015.
Go agwa ga Seteše sa Mohlagase sa Medupi go thomilwe ka Mosegamanye 2007 gomme makala a sona ka moka a tshela go emetšwe gore a tla be a šoma ka seripagareng sa mathomo sa ngwaga wa 2019. Ge se phethilwe, se tla ba pholante ya bone ka bogolo go diteše tša mohlagse wo o fehlwago ka malahla le bjalo ka seteše se segolo kudu sa mohlagase sa go fodišwa ka moya lefaseng. Bophelo bja go šoma ga seteše se ke mengwaga ye 50.
Lekala la 6 le thomile go kopanywa le mothopo wa bosetšhaba wa mohlagase ka la 2 Mopitlo mo ngwageng wo gomme le abile mohlagase go mothopo wa mohlagase wa bosetšhaba ka dinako tše itšego ge le dutše le dirwa diteko tša go bona ge eba le tla kgona go šoma ka botlalo. Mo nakong ye Lekala la 6 le ile la kgona go fediša kgatelelo ye e bego e le gona go tshepedišo ya mohlagase ya bosetšhaba, go realo la thuša go efoga go wešwa ga mohlagase ka botlalo goba la fokotša seemo sa go goga boima kabong ya mohlagase. Go šoma ga lekala le bjalo ka la kgwebo go fihleletšwe, ebile go ka gare ga lebaka la nako ya setlwaedi ye e bewago ya dikgwedi tše tshela ka morago ga go kopanywa le mothopo wa bosetšhaba wa kabo ya mohlagase.
Go šoma ga Lekala la 6 la Seteše sa Mohlagase sa Medupi bjalo ka la kgwebo ke phihlelelo ye bohlokwa ka maitapišong a rena a go aga mothopo o moswa wa tšweletšo ya mohlagase.
1.2. Kabinete e tšwetše pele go lemoga mathata ao a lego gona mo lebakeng le ao naga e sa lebanego le ona ka kabong ya mohlagase. Le ge e le gore go wešwa ga mohlagase ke selo sa maswabi, Eskom e ikgafile go lokiša ka fao go hlokagalago ka nepo ya go kaonafatša go šoma ga dipolante tša rena lebaka le letelele gomme go na le go wešwa ga mohlagase fao go kwagalago. Mošupologo wa bekeng ye e tlago (ka la 31 Phato), Lekala la 2 la Seteše sa Mohlagase sa Koeberg ka Kapa Bodikela le tla tingwa go lokišwa go ya ka fao go rulagantšwego ka gona.
1.3. Lekala le go emetšwe gore le tla boela go šoma ka morago ga dikgwedi tše tharo. Go tima fao go rulagantšwego ga Lekala la 2 la Koeberg ke karolo ya lenaneo la Eskom la go lokiša molokoloko wa diteše tša yona. Dikgwedi tše dingwe le tše dingwe tše 16 go fihla go tše 18, le lengwe le le lengwe la makala a mabedi a Koeberg le a tingwa go tšhelwa makhura, go hlahlobja le go lokišwa. Go tingwa mo ga kgafetšakgafetša go rulagantšwe ka nepo ya go efoga gore makala a ka bobedi a se ke a šoma ka nako e tee le go efoga go tingwa ga mohlagase dikgweding tša marega ngwaga o mongwe le o mongwe.
1.4. Le ge re tšwela pele go ba le kgatelopele go kaonafatšeng ga mothopo wa tšweletšo ya mohlagase, Kabinete e ipiletša go MaAfrika Borwa go tšwela pele go šomiša mohlagase ka go o seketša.
2. Samiti ya Dihlogo tša Dinaga le Mebušo
2.1. Kabinete e amogetše dipoelo tša Samiti ya bo 35 ye e Tlwaelegilego ya Dihlogo tša Dinaga le Mebušo ya Dinaga tše di Hlabologago tša Borwa bja Afrika, ye ka go yona Mopresidente Zuma a ilego a etapele baemedi ba Afrika Borwa.
Samiti ye e amogetše Leanotlhabollo leo le Bušeleditšwego la Maanotaetši a Selete la 2015-2020. Samiti e tšwetše pele go saena ditumelelano/ditshepedišo tše tharo tve di tlago kgontšha selete se go rarolla mathata a sona a bohlokwa a go fediša tlhokego ya mešomo le bohloki ka mokgwa wa go ya go ile.
- Tumelelano ya go fetoša Tshepedišo ka ga Tirišano ka ga Dipolotiki, Tšhireletšo le Polokego (Tshepedišo) le Tumelelano ye e fetošago Kwano ya SADC (Kwano). Ditumelelano tše di tla dumelela Komiti ya Tšhireletšo le Polokego ya Magareng ga Dinaga ya Setheo sa Tirišano ka ga Dipolotiki, Tšhireletšo le Polokego go šoma bjalo ka sefala sa kgokaganyo go Balaodi ba Ditshokollo le Dikgolego ka Borwa bja Afrika.
- Kwano ka ga Tlhabollo le Maatlafatšo ya Bafsa e lebiša šedi go bohlokwa bja tlhabollo le maatlafatšo ya bafsa mabapi le tirišano ya ka seleteng, kopanyo, tlhabollo le khutšo, le tšhireletšo ka seleteng.
- Tshepedišo ka ga Ditirelo tša Kgwebišano go dira gore ditirelo tša kgwebošano ka gare ga dinaga tša SADC e lokologe ka nepo ya go hlama mmaraka o tee wa ditirelo ka mo seleteng. Kamogelo ya Leanotlhabollo leo le Bušeleditšwego la Maanotaetši a Selete la 2015-2020 e bile phihlelelo ye kgolo ka maitekelong a SADC a go kwalakwatša kgwebišano kgwebišano ya ka gare ga selete.
Kabinete e amogetše gape sephetho sa kopano ya SADC Double Troika, ye e bego e swerwe kgabagareng ya Samiti ya SADC yeo e tsenetšwego ke Motlatšamopresidente le Mosepediši wa SADC Cyril Ramaphosa, go tiišetša leswa melawana ya tšhupetšo ya bjale ya Khomišene ya Dinyakišišo ya SADC mabapi le Naga ya Kgoši ya Lesotho.
3. Ketelo ya Japan ka Motlatšamopresidente
3.1. Kabinete e amogetše ketelo ye e atlegilego ka Motlatšamopresidente Ramaphosa go la Japan. O be a felegeditšwe ke baromiwa ba maemo a godimo ba ditona le ba kgwebo go kwalakwatša Afrika Borwa bjalo ka lefelo leo le ratwago la go etelwa.
Motlatšamopresidente o netefaleditše babeeletši ba Japan gore Afrika Borwa e buletšwe kgwebo le go ba sedimoša ka ga seemo sa go hloka mathata sa ekonomi ye kgolo ya ka nageng le bjalo ka tikologo ye e loketšego kgwebo, kudukudu ka masolong ao a hlomago mešomo.
Motlatšamopresidente Ramaphosa o ile a kgopela gore ketelo yeo e hwetše boikgafo go Japan gore e dirišane le Afrika Borwa ka masolong a yona a go fediša leuba la HIV le AIDS, TB le Letadi.
4. Diphetho tše Bohlokwa tša Kabinete
4.1. Kabinete e dumeletše phenkgišano ya Afrika Borwa le Toropokgolo ya Durban ya go swara Dipapadi tša Commonwealth tša 2022. Se ke la mathomo fao Afrika e tlago swara Dipapadi tša Commonwealth gomme se tla bea Afrika Borwa bjalo ka lefelo leo le etelwago ke barati ba dipapadi le go fa gape dibaka go Team South Africa. Go swarwa ga dipapadi tše go tla šomiša gape mananeokgoparara ao a ilego a agwa ka 2010 FIFA World Cup™.
Dipapadi tša Commonwealth tša 2022 go emetšwe gore di tla ba le seabe sa R20 pilione ka ekonoming, gomme se sa fetogela ka go Kgolo ya Palomoka ya Letseno la ka Nageng la R11 pilione.
4.2. Kabinete e dumeletše go phatlalatšwa ga Pego ya Mengwaga ye 5 ya Afrika Borwa (2009-2014) ka ga Phethagatšo ya Kwano ya Phedišo ya Mekgwa ka moka ya Kgethologanyo kgahlanong le Basadi ka gare ga Kuranta ya Mmušo, gore setšhaba se fe ditshwaotshwao ka ga yona. Pego ye e fa kakaretšo ka ga go šoma gabotse ga mehutahuta ya melao, melawana le mananeo ao a phethagaditšwego ka Afrika Borwa ebile e bolela ka ga diphihlelelo tšeo naga e di dirilego ka ga maatlafatšo ya basadi le tekatekano ya bong. Pego ye e lemoga gape mathata ao a sa felego le mapheko ao a šitišago go fediša tlhokego ya tekatekano le kgethologanyo ka nageng.
4.3. Kabinete e dumeletše gore Afrika Borwa e tsenele Lefelo la Keletšo ka ga Molao wa Mokgatlo wa Kgwebišano wa Lefase (WTO) ka Geneva. Wo ke mokgatlo wa boditšhabatšhaba wo o fago keletšo ya semolao ka ga molao wa WTO, go thekga ka ditshepedišong tša phedišo ya thulano le tlhahlo ka go WTO go dinaga tše di hlabologago le tšeo di sego tša hlabologa.
Bjalo ka leloko Afrika Borwa e tla kgona go hwetša keletšo ka ga go kgona go šoma gabotse ga magato a kgwebišano a dinaga tše dingwe ao a amanago diromelwantle le magato a kgwebišano a Afrika Borwa ao Afrika Borwa e nyakago go a tsebagatša. Lefelo le ka thuša gape Afrika Borwa ka go fediša ditiragalo tša dithulano ka go WTO.
4.4. Kabinete e ile ya sedimošwa gore Tona ya Kgoro ya Ditšhelete, Morena Nhlanhla Nene, o thomiša mošomo wa gagwe bjalo ka Mopresidente wa Lekgotla la Ditona la Sehlopha sa Twantšho ya Tshepedišo ya Ditšhelete ka fao go Sego Molaong sa Dinaga tša Bohlabela le Borwa bja Afrika, mo ngwageng o tee. Ka lebaka la se Tona o tla ba monggae wa kopano ya ngwaga ka ngwaga ya lekgotla le ka 2015. Setheo se sa mebušo ya ka dinageng tša ka seleteng se tšwetša pele phethagatšo ye e swanago ya magato a go fediša tshepedišo ya ditšhelete ye e sego molaong le go thekga botšhošetši ka seleteng sa ka borwa le bohlabela bja Afrika. Maikemišetšo a boleloko bja Afrika Borwa ka mo setheong se ke go maatlafatša magato a ka dileteng tše a go lwantšha go sepediša ditšhelete ka fao go sego molaong le go thekga ditiro tša botšhošetši, e lego seo se tšwetšago pele tšhireletšo ya bosetšhaba ka go bobedi ka nageng le ka seleteng.
4.5. Kabinete e tšwela pele go kgalema go bolawa ga maphodisa ka ntle le mabaka. Kabinete e ipiletša go maloko a setšhaba go šoma le maphodisa go thuša go golega batho bao ba dirago ditiro tše tša go bolaya maphodisa. Ditheo tša phethagatšo ya molao di šoma dinako ka moka go netefatša gore batho bao ba dirago ditiro tše tša bosenyi ba a golegwa. Kabinete e leboga maloko a setšhaba bao ba bilego le seabe go golegweng ga batho ba bararo bao ba amantšhwago le dipolao tša maphodisa.
5. Melaokakanywa
5.1. Kabinete e dumeletše go romelwa ga Molaokakanywa wa Tirelo ya Dinaga tša ka Ntle, wa 2015 ka Palamenteng. Molaokakanywa wo o bolela gore go swanetše go ba le tshepedišo e tee ya Tirelo ya Dinaga tša ka Ntle ebile o hloma motheo wa melao wo o kgontšhago wo ka ona Tirelo ya ka Ntle ya bjale e tlago laolwa le hlokomedišišwa ke Kgoro ya Dikamano le Tirišano tša Dinaga tša ka Ntle. Molaokakanywa wo o tla tsenywa tirišong o theilwe go Molaotheo go melao ye e šomago ka go Tirelo ya Setšhaba, ditirelo tša tšhireletšo ebile o amantšhitšwe le Leanotlhabollo la Bosetšhaba (NDP) go maatlafatša kabo ya ditirelo.
Se se tla maatlafatša bokgoni bja go dira mošomo, boikarabelo le go seketša mašeleng ge go dirišwa matlotlo ka dibakeng tša dinageng tša ka ntle go phethagatša molawana wa dinaga tša ka ntle wa Afrika Borwa le lenaneo la tlhabollo.
5.2. Kabinete e dumeletše go alwa ga Molaokakanywa wa Setšo le Boetapele bja MaKhoisan, wa 2015 ka Palamenteng. Molaokakanywa wo o tsenya letsogo ka go nepišo ye bohlokwa ya NDP ya mabapi le go katološa tirišano ya setšhaba le setee mola ka go le lengwe e rarolla tlhokego ya tekatekano ya mo nakong ye e fetilego ka go fa temogo ya semolao ya ditšhaba tša MaKhoisa le baetapele ba tšona.
E šišinya go hlongwa ga Komiti ya Keletšo ka ga metlagorero ya MaKhoisan yeo e tlago thuša mmušo go lemoga tshepedišo ya mabapi le ditšhaba tša MaKhoisan le baetapele ba tšona.
Molaokakanywa wo o tiišetša melao ye e lego gona ya boetapele bja setšo bja bosetšhaba gomme o tla feletša ka go fedišwa ga Molao wa Bosetšhaba wa Ntlo ya Magoši, ka 2009 (Molao wa 22 wa 2009) le Molao wa Tlhako ya Boetapele bja Setšo le Pušo, wa 2003 (Molao wa 41 wa 2003).
6. Ditiragalo tše di tlago
6.1. Mopresidente Zuma o tla tsebagatša semmušo Protšeke ya Twantšho ya go Dutla ga Meetse, yeo e tlago tsebagatšwao ka Polelong ya gagwe ya Maemo a Naga ya 2015, ka Port Elizabeth ka la 28 Phato 2015, bjalo ka karolo ya lenaneo la mmušo la go rarolla tahlegelo ya meetse ka lebaka la go dutla ga ona. Protšeke ye e tla hlahla bafsa ba 15 000 bjalo ka bašomi ba mešomo ya diatla bao ba nago le tsebo le dipholampara go lokiša go dutla ga meetse ka metseng ya bona; se se tla ba fa bokgoni bja go thoma dikgwebo tša bona goba go hwetša mošomo wa maleba. Go tšewa ga bafsa ba mathomo ba 3 000 go a dirwa mo ngwageng wo wa ditšhelete.
Go dutla ga meetse go bopa dipersente tše di nyakilego go ba tše 40 tša tahlego ya meets nageng ka bophara gomme go jela naga R7 pilione ka ngwaga.
6.2. Mopresidente Zuma o tla tsenela Moletlo wa Segopotšo sa bo 70 sa Mafelelo a go Tsena ga China le Ntwa ya Lefase ya Bobedi ka Repabliking ya China (PRC) go thoma ka la 2 go fihla ka la 4 Lewedi 2015, gomme o tla ba le ditherišano tša bobedi le Mopresidente Xi Jinping.
Dikamano tša Afrika Borwa le PRC di maemong a Selekane sa Togamaano ya Kakaretšo seo se thekgilwego ke Kwano ya Beijing ka ga Go Hlongwa ga Selekane sa Togamaano ya Kakaretšo, seo se akaretšago dikamano ka moka magareng ga dinaga ka bobedi.
6.3. Kabinete e ipiletša go MaAfrika Borwa ka moka go keteka histori ya rena le ditšo tša rena tše di fapafapanego ge naga e keteka Kgwedi ya Bohwa ka Lewedi ka fase ga morero wa: “Tsebo ya rena ya setlogo, bohwa bja rena: Re lebile go tsebo, go tšwetšo pele le go lota bohwa bjo bo phelago bja Afrika Borwa”.
Moketeko wa ngwaga wo o tla ba ka mokgwa wa tiragalo ya setšo gomme ditšhaba di hlohleletšwa go šomiša bohwa bja tšona bjo bo phelago bja go swana le dijo, bokgabo, go bina le mmino go tšwetša pele pharologano ya setšo, ditokelo tša botho, kago ya setšhaba le tlhabollo ya ekonomi.
6.4. Afrika Borwa e tla keteka gape Kgwedi ya Boeti ka Lewedi, e lego nako ya maleba ya gore ba malapa ba etele mafelo a bohwa a ka nageng go kgokagana leswa le ditiragalo tše di fetilego. Ka Kgwedi ya Bohwa, Kgoro ya Bokgabo le Setšo e tla phetola mobu ka Lefelong la Bagale ba Ntwa la Bosetšhaba ka Pretoria go laetša go thomišwa ga go aga ga monyumente wa bosetšhaba wo o tlago laetša lebaka la nako ya pele ga bokoloniale, ntwa ya go lwela tokologo le bagale bao ba fapafapanego bao ba lwetšego kgatelopele ya setšhaba.
6.5. Letšatši la Bosetšhaba la Segopotšo sa Maphodisa ao a Hlokofetšego a le Mošomong la Tirelo ya Maphodisa ya Afrika Borwa (SAPS) ka la 6 Lewedi 2015 ka Union Buildings ka Pretoria le tla keteka go kgotlelela le boikgafo bja bahlankedi ba maphodisa bao ba hlokofetšego ba šireletša ditšhaba.
Ka lesolo la go thwala maphodisa la SAPS maloko a tlaleletšo a 6 252 a tla ngwadišwa ka ngwageng wa ditšhelete wa 2015/16 go maatlafatša ditirelo tša botseka, go bonagala ga maphodisa gohle, ka bohloding bja mabapi le bosenyi, ka ditirelong tša tlhahlobo ya ditopo, go akaretšwa ditirelo tša tšhireletšo le tša polokego.
Kabinete e ipiletša go bafsa gore ba nagane ka ga go šoma ka go SAPS, ye fago dibaka tša mehutahuta. Tshedimošo ka botlalo e ka hwetšwa go www.saps.gov.za.
6.6. Kgwedi ya Tirelo ya Setšhaba ya ngwaga ka ngwaga e tla swarwa ka Tirelong ya Setšhaba ka moka ka Lewedi ka fase ga morero wa “Re iša Afrika Borwa pele: Re iša Tirelo ya Setšhaba bathong”.
Kgwedi ye e tla lebelela kudu ditirelo tša mmušo, go ba le mafolofolo, boikgafo, le go šoma ka bokgoni ka kabong ya ditirelo tša setšhaba. Go tla fiwa poelo ka ga kgatelopele ye e dirilwego go latela dikopano tša ditherišano ka ga tirelo ya setšhaba tše di swerwego ka 2014 go boledišana le bašomi bao ba šomago kgauswi le setšhaba ka ga “go hlama leswa ka fao bašomi ba setšhaba ba šomago ka gona”.
Tirelo ya setšhaba ye e šomago ka bokgoni ke senyakwa se bohlokwa sa go aba NDP gomme Kabinete e ipiletša go bašomi ba setšhaba go ikgafa leswa go metheo ya Batho Pele ka go aba ditirelo tša maemo a godimo, tša go seketša tšhelete le tše kaone go MaAfrika Borwa ka moka.
6.7. Kabinete e sedimošitšwe ka ga kgatelopele ye e dirilwego ya mabapi le go swarwa ga Konkrese ya bo 14 ya Dithokgwa tša Lefase ya Mokgatlo wa Dijo le Bolemi ye e tlago swarwa go tloga ka la 7 go fihla ka la 11 Lewedi 2015 ka Inkosi Albert Luthuli Convention Centre, KwaZulu-Natal. Morero wa “Dithokgwa le Batho: Re beeletša go Bokamoso bja Go ya go ile” o laetša dithokgwa tše di theilwego go batho, tema ye e kgathwago ke dithokgwa ka tlhabollong ya ekonomi ya setšhaba, dinyakwa le dibaka tša peeletšo, le tema ye e kgathwago ke dithokgwa ka tlhabollong ya ekonomi. Se se amana thwii le dilo tše mmušo o di beilego pele ka ga go fediša bohloki, tlhabollo ya dinagamagae le tlhomo ya mešomo. Konkrese e tla rerišana gape ka ga tlhokego ya meetse le phetogo ya klaemete.
Ye ke Konkrese ya mathomo ka ga Dithokgwa tša Lefase ye e tlogo swarwa ka Afrika gomme e fa sebaka sa go hlaloša khonthinente sefaleng sa mabapi le dithokgwa maemong a boditšhabatšhaba. Lenaneo leo le lebišwago setšhabeng le tla tsebiša setšhaba, go akaretšwa dihlopha tše di lego kotsing, ka ga kgonagalo ya go kgatha tema. Konkrese e tla latela Beke ya Go bjala Mehlare ya Bosetšhaba (ya la pele go fihla ka la šupa Lewedi) ka fase ga morero wa “Mohlare o moswa šo” gomme o ipiletša go MaAfrika Borwa go bjala mohlare o tee fela lehono le go thuša go beeletša ka go bokamoso bja go ya go ile.
7. Molaetša wa ditebogišo
7.1. Kabinete e rata go lakaletša baraloki ba diatleletiki bao ba phadišanago ka Phadišanong ya Diatleletiki ya bo 15 ya Bonkgwete bja Lefase ye mo lebakeng le e swaretšwego ka Beijing, China le bao ba kgathago tema ka Dipapading tša bo 11 tša All-Africa magareng ga la 4 le la 19 Lewedi 2015 ka Brazzaville, Congo.
Kabinete e ipiletša go MaAfrika Borwa go kopana go thekga baraloki ba diatleletiki ge ba fofišetša folaga ya rena godimo le go dira gore setšhaba se ikgantšhe.
7.2. Kabinete e ba le Mopresidente Zuma go lebogiša bagaši ba SABC Dennis Tshetlhane le Sam Msibi ge ba thopile Legoro la Bogaši bja Thelebišene la Difoka tša Kgašo ya SADC, le moithuti wa sekolo se se phagamego Imbelani Matibe ge a thopile Phadišano ya SADC ya Legoro la Ditaodišo tša Sekolo.
7.3. Kabinete e leboga MaAfrika Borwa ka moka ao a tsenetšego meketeko ya Kgwedi ya Basadi. Meketeko ye e swerwe ke mekgatlo ya mehutahuta le mmušo gomme e ketikile katlego yeo re e fihleletšego go rarolla go se lekalekanele ga bong ka setšhabeng sa rena. Kgwedi ye e šomišitšwe go nagana ka ga mathata ao re sa lebanego le ona mabapi le tlaišo ya basadi le bana.
7.4. Kabinete e lakaletša Tona ya Kgoro ya Maphelo Aaron Motsoaledi, yo mo mafelelong a beke a ilego a amogelwa ka Sepetleleng sa Steve Biko Academic ka Pretoria, gore a fole ka pela. O lokollotšwe ebile o kokotlela ka gae.
8. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
8.1. Lekgotla la Ditirelo tša Boso la Afrika Borwa:
a) Mohumagadi Ntsoaki Mngomezulu – (o thwetšwe gape ebile ke Modulasetulo);
b) Ngaka Nolulamo Nobambiswano (Lulu) Gwagwa – (o thwetšwe gape ebile ke Motlatšamodulasetulo);
c) Morena Rowan Graham Nicholls – (o thwetšwe gape);
d) Morena Jonty Tshipa – (o thetšwe gape);
e) Moprofesara Elizabeth Mokotong – (o thwetšwe gape);
f) Mohumagadi Kea Modimoeng;
g) Moatbokheiti Derek Block;
h) Mohumagadi Sowbakiam Mudly-Padayachie;
i) Mohumagadi Nandipha Daphne Madiba;
j) Ngaka David Jasper Gilbert Rees;
k) Morena David Lefutso;
l) Mohumagadi Judy Beaumont – (moemedi wa Molaodipharephare (DG) wa Kgoro ya Merero ya Tikologo); le
m) Ngaka Linda Makuleni – (Mohlankedimogolophethiši (CEO)).
8.2. Lekgotla la iSimangaliso:
a) Morena Paul Ndukuzempi Buyani Zwane – (o thwetšwe gape ebile ke Modulasetulo);
b) Mohumagadi Barbara Schreiner – (Motlatšamodulasetulo);
c) Moprofesara Antonia Thandi Nzama – (o thwetšwe gape);
d) Mohumagadi Poppy Senelisiwe Dlamini – (o thwetšwe gape);
e) Morena Zwelenzima Thwalizwe Gumede – (o thwetšwe gape);
f) Mohumagadi Thobile Etherfrida Mhlongo – (o thwetšwe gape);
g) Mohumagadi Sibongile Daphne Nene;
h) Morena Satish Roopa;
i) Mohumagadi Thumeka Sharon Ntloko – (moemedi wa Molaodipharephare wa Kgoro ya Merero ya Tikologo);
j) Morena Andrew Zaloumis – (Mohlankedimogolophethiši); le
k) Morena Bhekithemba Langalibalele – (moemedi wa Kgoro ya tša Boeti).
8.3. Balaodi bao ba sego ba khudumathaga ba Lekgotla la Setheo sa Dinamelwa tša Tseleng tša go Putla Mellwane:
a) Mohumagadi Reitumetse Masemola; le
b) Barend Christoffel Deysel.
8.4. Balaodi bao ba sego ba khudumathaga bao ba thwetšwego go Kantoro ya Molaodi wa Maemakepe:
a) Morena Thaba Mufamadi – (Modulasetulo);
b) Mohumagadi Anjue Hirachun;
c) Morena Riad Khan;
d) Morena Lindelwe Mabandla;
e) Mohumagadi Gerdileen Taylor;
f) Moatbokheiti Gugulethu Abigail Thimane;
g) Mohumagadi Patricia Ntombizodwa Mazibuko – (o thwetšwe gape);
h) Morena Aubrey Bongani Ngcobo – (o thwetšwe gape);
i) Mohumagadi Thato Abegail Tsautse – (o thwetšwe gape); le
j) Morena Andile Mahlalutye – (o thwetšwe gape).
8.5. Balaodi bao ba sego ba khudumathaga bao ba thwetšwego go Lekgotla la Ditirelo tša Tekodišišo ya Dinamelwa tša Lefaufaung:
a) Mohumagadi Phindile Riba – (Modulasetulo);
b) Morena President Qiniso Dhlamini;
c) Ngaka Bridget Ssamula;
d) Morena Bennet Phonthana Malebo;
e) Morena Isaac Nkama;
f) Mohumagadi Shaila Hari;
g) Morena Daniel Gray Mwanza;
h) Moatbokheiti Edwin Matane Mphahlele;
i) Morena Sfiso Norbert Buthelezi;
j) Mohumagadi Nwabisa Mtshali;
k) Morena Arthur James Bradshaw; le
l) Mohumagadi Hlengiwe Thandeka Makhathini – (o thwetšwe gape).
8.6. Balaodi bao ba sego ba khudumathaga bao ba thwetšwego go Lekgotla la Setheo sa Tlhabollo ya Dikgwebopotlana:
a) Mohumagadi Anjue Hirachund; le
b) Mohumagadi Zanele Monnakgotla.
8.7. Lekgotla la Setheotaolo sa Trans-Caledon Tunnel:
a) Mohumagadi MW Hlahla – (Modulasetulo);
b) Morena JRD Modise – (Motlatšamodulasetulo);
c) Morena SN Khondlo;
d) Ngaka MJ Ellman;
e) Mohumagadi ZP Manase;
f) Mohumagadi SFS Makhathini;
g) Mohumagadi M Nakene; le
h) Morena S Roopa.
8.8. Morena Ian van Niekerk – Mohlankedimogolo wa Ditšhelete wa Broadband Infraco.
8.9. Morena Zukile Christopher Mvalo – Motlatšamolaodipharephare: Tlhabollo ya Bokgoni ka go Kgoro ya Thuto le Tlhahlo tša Godingwana.
8.10. Mohumagadi Xolelwa Mlumbi-Peter – Motlatšamolaodipharephare: Tlhabollo ya Kgwebišano le Ekonomi tša Boditšhabatšhaba ka go Kgoro ya Kgwebišano le Diintasteri.
8.11. Morena Tshediso John Matona – Mongwaledi wa Peakanyo ya Bosetšhaba ka go Kgoro ya Dipeakanyo, Tlhokomedišišo le Tshekatsheko.
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
