1. Go hlokofala ga Tona Ohm Collins Chabane
1.1. Kabinete e nyamišitšwe ke go hlokofala fao go bego go se gwa emelwa ga Tona Chabane le bašireletši ba gagwe, Bosetšene Lesiba Samuel Sekele le Mareme Lawrence Lentsoane, bao ba hlokofetšego ka kotsing ya sefatanaga yeo e šiišago ka Lamorena, la 15 Hlakola 2015. Mmušo le batho ba Afrika Borwa ba tlo tloga ba hloka seabe seo se tšwago go mošomedi yo wa batho yo a tšwetšego pele go ikgafa go aga Afrika Borwa ye kaone go fihla a hlokofala.
Bjalo ka leloko la Khuduthamaga, mohu Tona ya Kgoro ya Ditirelo tša Setšhaba le Taolo o tla fiwa Tirelo ya Poloko ya Semmušo ya Legoro la 1. Tirelo ya poloko e tla swarwa ka Mokibelo wa la 21 Hlakola 2015 ka motseng wa Xikundu ka Malamulele, Limpopo. Kabinete e lebiša mahloko a yona go ba lapa le bagwera ba bahu Tona le ba bašireletši ba gagwe ba babedi.
2. Phethagatšo ya mananeo a bohlokwa a mmušo
2.1. Mopresidente Jacob Zuma o tla eta pele meketeko ya segopotšo sa mengwaga ye 50 ya go ba gona ka Afrika Borwa ga setlabelotaolo sa dinyakišišo tša nyutleliara ya SAFARI-1 yeo e šomišwago ke Molaodi wa Bosetšhaba wa Enetši wa Afrika Borwa (Nersa) ka Pelindaba kgauswi le Pretoria. Go tloga mola e dumelelwa go hlongwa ka la 18 Hlakola 1965, setlabelotaolo se, seo e lego motšweletši yo mogolo wa diaesothoupu tša kalafo le tša intasteri tšeo di šomišwago ka bobedi ka nageng le mafaseng a boditšhabatšhaba, se hweditše difoka tše ntši le tumelelo ya boditšhabatšhaba. Setlabelotaolo se se ralokile tema ye bohlokwa ka dinyakišišong tša nyutleliara, ka tlhabollong le ka thutong ebile se beile Afrika Borwa go ba ketapele ya dikgatelopele tša mahlale.
2.2. Kabinete e ipiletša go maAfrika Borwa go šišinya maina a batho bao ba nago le maswanedi a go šoma ka Khomišeneng ya Tlhabollo ya Bosetšhaba pele ga letšatši la go tswalela la 10 Moranang 2015. Nepišo ya khomišene ye mpsha e tla ba go tšwetša pele mmušo mabapi le ka fao o ka phethagatšago bokaone Leanotlhabollo la Bosetšhaba. Godimo ga fao e tla thuša gape go hlabolla maano ka botlalo ka mafapheng ao a kgethilwego ao a nyakago šedi ye e nepišišwego go hlohleletša kgolo ya ekonomi, phetošo ya ekonomi ye e tseneletšego le tlhabollo ya go ya go ile. Tshedimošo ka botlalo ka ga tshepedišo ya go šišinya maina e hwetšagala go: www.thepresidency.gov.za
3. Diphetho tše Bohlokwa tša Kabinete
3.1. Kabinete e dumeletše go romelwa ka Palamenteng ga Diphetošo tša Melao ye e ngwadilwego ya Kgorotsheko ya Bosenyi ya Boditšhabašhaba ka Roma go dumelelwa. Diphetošo tše di akaretša tlhalošo ya bosenyi bja dikgaruru le ditiro tša tlaleletšo tše di bopago bosenyi bja dintwa ka Molao wo o ngwadilwego ka Roma wo o amogetšwego ke Maloko a Mebušo (ka Kampala, Uganda ka la 11 Phupu 2010).
Go dumelela ga diphetošo tše tša Melao ye e ngwadilwego ka Roma ke Afrika Borwa go laetša boikgafo bja mmušo bja go lwantšha bosenyi bjo bo šiišago bjo bo dirwago kgahlanong le batho le bosenyi bja dikgaruru ge bo dirwa ka nageng ya rena goba ge bo dirwa ka ntle ga yona.
4. Maemo a Kabinete ka ga merero ye e lego ditabeng seemong sa bjale
4.1. Kabinete e lemoga diphetolo tša mabapi le kgato ya moragorago ya dikaroganyo tša mebasepala tše di šišintšwego tša moragorago gomme e dumela gore dingangišano tše di kwagalago ke karolo ye bohlokwa ya temokrasi ya rena. Ka ge go na le mebasepala ye mengwe yeo e swarago bothata go aba ditirelo ebile e tšwela pele go se kgone go tšwela pele go ya go ile ka lebaka la letseno leo le sa lekanego le pušo ye e sego maleba, mellwane ya mebasepala e fela e lekodišišwa kgafetšakgafetša.
Diphetošo tše di šišintšwego di thoma ka go lekodišišwa ke Lekgotla la Karoganyo ya Mebasepala (MDB), leo le filwego maatla a go dira mellwane ya mebasepala go latela Molao wa Mmušo wa Selegae wa mabapi le Karoganyo ya Mebasepala, wa 1998 (Molao wa bo 27 wa 1998) le Molaotheo wa Rephabliki ya Afrika Borwa wa 1996.
Bjalo ka lekgotla leo le ikemego, ditshepedišo tša MDB di bewa pepeneneng ebile setšhaba se kgatha tema ka go tšona. Kabinete e hlohleletša ditšhaba go kgatha tema ka mafolofolo ka mo ditshepedišong tše. Kabinete e kgalema tšhomišo ya ditšhupetšo tša dikgaruru bjalo ka mokgwa wa go rarolla dithulano tša mabapi le karoganyo ya mebasepala. Mošomo wa MDB ke karolo ye bohlokwa ya mokgwa wa mmušo wa Poelomorago go tša Motheo go netefatša gore go ba le kabo ye kaone ya ditirelo ka ditšhabeng.
4.2. Kabinete e lebogiša Basotho ka ga phetišetšo ya maatla ye e hlokilego mathata gomme e ipileditše go bona go šoma mmogo go tliša khutšo ya go ya go ile le tlhabollo ya ekonomi. Kabinete e lebogišitše gape Tonakgolo ye mpsha ya Naga ya Bogoši ya Lesotho, Mohlomphegimogolo Pakalitha Mosisili ka ge a kgethilwe ebile a hlomamišitšwe semmušo ka moletlong wo o swerwego ka Labobedi la 17 Hlakola 2015, wo o tsenetšwego ke Mohlomphegi Mopresidente Jacob Zuma le Motlatšamopresidente Cyril Ramaphosa.
Kabinete e lebogišitše Motlatšamopresidente ka ga tema ye e a kgathilego ye e feleditšego ka go swarweng ga dikgetho tše di atlagilego ka Nageng ya Bogoši ya Lesotho. E tšwetše pele go reta tema ye e kgathilwego ke Mokgatlo wa Dinaga tše di Hlabologago tša Borwa bja Afrika ge o sepedišitše maano a go tliša khutšo le go swarwa ga dikgetho tša go kgetha mmušo o moswa. Kabinete e bušeleditše boikgafo bja Afrika Borwa bja go tšwela pele go šoma le Naga ya Bogoši ya Lesotho go tšwela pele go maatlafatša dikamano tše di lego gona ka go lebelela kudu go maatlafatša tirišano ya tša ekonomi le tša leago tše di tlago feletša ka go kaonafatša ga maphelo a batho.
5. Ditiragalo tše di tlago
5.1. Motlatšamopresidente Ramaphosa o tla tsenela Moletlo wa Segopotšo sa mengwaga ye 25 ya Boipušo bja Rephabliki ya Namibi, go akaretšwa le go Hlomamiša semmušo ga Mopresidente Hage Geingob ka Windhoek ka la 21 Hlakola 2015. Kabinete e reta Namibia ka ga meletlo ya yona ya go keteka Mengwaga ye Masomepedihlano ya boipušo le Mopresidente Geingob ge a kgethilwe bjalo ka Hlogo ya boraro ya Mmušo wa naga yeo.
5.2. Mopresidente Zuma o tla amogela Mopresidente wa Zimbabwe Robert Mugabe go thoma ka la 8 go fihla ka la 9 Moranang 2015 ka Pretoria. Ketelo ye e tla feletša ka go swarweng ga Foramo ya tša Kgwebo magareng ga Afrika Borwa le Zimbabwe ye e rulagantšwego go tlo swarwa ka la 9 Moranang 2015, ye e ikemišeditšego go oketša kgwebišano le dipeeletšo magareng ga dinaga tše ka bobedi.
5.3. Mopresidente Zuma o tla re ka la 19 Hlakola 2015 a tsebagatša semmušo dihlogo tša ditimela tše 95 ka Pretoria tše di agilwego bjalo ka karolo ya lenaneo la peeletšo ya mananeokgoparara la Transnet ya R300 pilione go tsošološa mananeokgoparara a ka nageng a merwalo ya ditimela. Mo nakong ya lenaneo la peeletšo mešomo ye mmalwa ye meswa e tla hlongwa gomme dikgwebo tša kgauswi di tla holega ge go thwalwa badudi ba kgauswi, tlhabollo ya bokgoni le go phetišetšo ya theknolotši.
Ditimela tše mpsha di tla rarolla tšhalelomorago ya tshepedišo ya ditimela ka nageng ebile di tla thuša go kaonafatša tšweletšo le go šoma gabotse ga mananeo a tshepedišo ya ditimela tša rena. Go tsebagatša semmušo go laetša gape phetošo ya lefapha la Boentšeneere la Transnet go ba mohlami ka botlalo wa didirišwa tša mathomong tša ditimela ka ge tše 85 tša ditimela di tšweleditšwe ka lefelong la yona ka Koedoespoort, kgauswi le Pretoria.
5.4. Mopresidente Zuma o tla bula Kopano ya Bengdiintasteri ba Bathobaso ye e tlogo swarwa go thoma ka la 25 go fihla ka la 26 Hlakola 2015 ka Gallagher Convention Centre, ka Midrand, bjalo ka karolo ya boikgafo bja mmušo bja go hlabolla bengdiintasteri ba batho baso ka nageng. Kopano ye e tla dira gore go be le ditherišano magareng ga lefapha la setšhaba le la phraebete go tšwetša pele bengdiintasteri ba batho ba baso, le go fetoša kudu le go beakanya leswa ekonomi go fihlelela kgolo ye e akaretšago mang le mang.
5.5. Mopresidente Zuma o tla fa polelo ka go Kopanokgothekgothe ya Bosetšhaba ya Maloko (NMA) a Mokgatlo wa Pušo ya Selegae wa Afrika Borwa ye e tlogo swarwa ka Gallagher Convention Centre, ka Midrand go thoma ka la 24 go fihla ka la 26 Hlakola 2015. NMA e tla bolela ka ga seemo sa mmušo wa selegae ka morago ga mengwaga ye 15 le go ahlaahla mekgwa ya go šoma gabotse ka kabo ya ditirelo, kago ya bokgoni, bosenyi le merero ya mabapi le karoganyo ya mebasepala. Kopanokgothekgothe ye e tla swarwa ka fase ga morero wa: “Mengwaga ye 15 ya Mmušo wa Selegae wa Temokrasi – Re tiišetša le go Maatlafatša Temokrasi ya Selegae ya Mafolofolo, ye e Hlabollago le ye e Theilwego go Batho”.
5.6. MaAfrika Borwa a tla keteka tiragalo ya Letšatši la Ditokelo tša Botho la Bosetšhaba ka la 21 Hlakola 2015 ka Uitenhage, Kapa Bohlabela ka fase ga morero wa: “Re Keteka Lengwalo la Tšhata ya Tokologo, Re Ipshina ka Ditokelo tša Botho tše di Lekalekanago go Bohle”. Ditiragalo tše di tla fa maAfrika Borwa ka moka sebaka sa go keteka go hlaka fao go bego go sepela le ntwa ya go lwela temokrasi le boikgafo bja rena bja go tšwetša pele ditokelo tša botho ka ge di beilwe ka gare ga Molaotheo.
Kabinete e ipiletša go maAfrika Borwa ka moka go keteka letšatši le le bohlokwa le ka go phethagatša tirišano ye kgolo ya setšhaba le kago ya setšhaba. Bjalo ka karolo ya kgwedi ya Ditokelo tša Botho, ditherišano tša setšhabeng di tla swarwa go ralala le diprofense go tšwetša pele tirišano magareng ga ditšhaba tše di fapanego ka setlogo. Se se tla feletša ka go swarwa ga Samiti ya Bosetšhaba ya Pegelomorago le Tlhokomedišišo ka ga Tirišano ya Setšhaba ye e tlago swarwa ka la 30 Hlakola 2015 ka Port Elizabeth.
5.7. Kgoro ya Tlhabollo ya Leago e tla ba monggae wa Kopano ya Bosetšhaba ya Badirelaleago go thoma ka la 24 go fihla ka la 26 Hlakola 2015 ka International Convention Centre ka Durban ka fase ga morero wa: “Re tsošološa mošomo wa bodirelaleago ka Afrika Borwa”.
Kopano ye e tla tla ka ditšhišinyo le ditsenogare tša go rarolla seabe go mošomo wa bodirelaleago le go amantšha thomo ya tlhabollo ya phrofešene ye go thekga phetošo ye e tseneletšego ya mmušo mabapi le ekonomi ya setšhaba. Go fihlelela se, kgoro e abile lenaneo la thušo ya mašeleng a dithuto go thuša baithuti bao ba ithutelago bodirelaleago ka diyunibesithi.
5.8. Kgoro ya Tlhabollo ya Leago e tla swara gape Khonferense ya bobedi ya Twantšho ya boradia le Bomenetša go thoma ka la 30 go fihla ka la 31 Hlakola 2015 ka Hoteleng ya St George, ka Centurion ka fase ga morero wa: “Re netefatša gore batho bohle ba ba le ditokelo tša botho ka go tirišo ya tshepedišo ya thušo ya ditšhelete tša mmušo ye e hlokagago boradia”. Khonferentshe ye e tla sekaseka magato a bjale a go fediša bomenetša ka gare ga tshepedišo ya thušo ya ditšhelete tša mmušo tše di abelwago setšhaba.
5.9. Kabinete e amogela go swarwa ga Phadišano ya mathomo ya Dinaga tše Nne ya Kgwelentlatlana ye e tlogo swarwa ka Lepatlelong la Wembley, ka Johannesburg go thoma ka la 19 go fihla ka 22 Hlakola 2015. Se se kopanya mmogo dihlopha tša godimo tša masogana tša Afrika Borwa, Nigeria, Mozambique le Kenya ka go seo go lebeletšwego gore e tla ba tiragalo ya ngwaga ka ngwaga.
5.10. Kabinete e lebogiša sehlopha sa rena sa khrikhete, seo se fihlilego go sekamakgaolakgang ka ge se fentše Sri Lanka ka diwikhete tše senyane ka papading ya bona ya Sebjana sa Lefase. Re lakaletša sehlopha se le mohlahli wa sona mahlatse le mahlogonolo ge se tšwela pele ka mo phadišano ye ka moka.
6. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
6.1. Kgorotsheko ya selegae ka ga Meetse:
a. Moatbokheiti Tintswalo Annah Nana Makhubele (Modulasetulo);
b. Mohumagadi Lindelwa Mbanjwa (Motlatšamodulasetulo);
c. Morena Pumezo Malik Mpumelelo Jonas;
d. Mohumagadi Maleho Margaret Nkomo;
e. Moprofesara Tumai Murombo, le
f. Morena Ferdinand Zondagh.
6.2. Lekgotlataolo la Kago ya Dintlo tša Setšhaba
a. Ahmed Essop Vawda (Modulasetulo ebile o thwetšwe leswa);
b. Shadrack Kabelo Ganda;
c. Itumeleng William Kotsoane;
d. Kelikile Elva Kwinana;
e. Maphuti Justine Lamola (o thwetšwe leswa);
f. Nontutuzelo Nomtandazo Mbiza (o thwetšwe leswa);
g. Mandla Mdludlu;
h. Rose Sessie Molokoane;
i. Manye Richard Moroka;
j. Zolile Thando Ngcakani;
k. Zikiswa Zandile Ntlangula, le
l. Phakamile Worrel Weekes Ximiya.
6.3. Sehlongwa sa Bosetšhaba sa Kgašo ya Elektroniki sa Afrika Borwa (NEMISA)
Go thwalwa leswa ga Balaodi bao e sego ba Khuduthamaga go Lekgotla la NEMISA:
a. Morena Thami ka Plaatjie
b. Ngaka Molatelo Maloka.
6.4. Komitikeletšo ya Tirelo ya Metšhelo ya Afrika Borwa
a. Moahlodi Frank Kroon (Modulasetulo);
b. Moatbokheiti Selby Mfanelo Mbenenge (Motlatšamodulasetulo);
c. Moatbokheiti Roedolf Mastenbroek;
d. Morena Lazarus Docter Mokoena, le
e. Mohumagadi Mmakgolo Meta Maponya.
6.5. Lekgotlataolo la Lefapha la Mmušo la Thuto le Tlhahlo.
Mohumagadi Gugu Dlamini bjalo ka Mohlankedimogolophethiši (CEO)
6.6. Sehlongwa sa Bosetšhaba sa Kgašo ya Elektroniki sa Afrika Borwa (NEMISA)
Ngaka Ndivhoniswani Aaron Tshidzumba bjalo ka CEO.
6.7. Setheo sa Theknolotši ya Tshedimošo ya Mmušo (SITA)
Ngaka Setumo Mohapi bjalo ka CEO
6.8. Kgoro ya Mahlale le Theknolotši
Mohumagadi Mohlago Flora Mokgohloa bjalo ka Motlatšamolaodipharephare: Peakanyo le Thekgo ya Dihlongwa
6.9. Foramo ya Bosetšhaba ka ga Phrofešene ya Molao:
a) Morena Max Boqwana;
b) Morena Krish Govender;
c) Morena Jan Maree;
d) Mohumagadi Martha Mbhele;
e) Mohumagadi Janine Myburgh;
f) Morena Richard Scott;
g) Morena Lutendo Sigogo;
h) Morena Jan Stemmett;
i) Moatbokheiti Willem van der Linde SC;
j) Moatbokheiti Ismail Jamie SC;
k) Moatbokheiti Greg Harpur SC;
l) Moatbokheiti Thami Ncongwane SC;
m) Moatbokheiti Dali Mpofu SC;
n) Moprofesara Managay Reddi;
o) Moatbokheiti M A Hawyes;
p) Moatbokheiti Samuel Mgiba;
q) Moatbokheiti D Ntsebeza SC;
r) Moatbokheiti Kgomotso Ditsebe Moroka
s) Mohumagadi Namhla Thina Siwendu
t) Moatbokheiti Brian Nair, le
u) Morena Uys Mathebula.
Dipotšišo
Phumla Williams, Seboleledi sa Kabinete sa Motšwaoswere
Mogala: 083 501 0139
