Kopanong ya yona ka Laboraro la 15 Hlakola 2023, Kabinete e amogetše maloko ao a sa tšwago go thwalwa gomme ya ba lakaletša mahlatse ka maikarabelong a bona a maswa, gomme gape ya gatelela tlhokego ya gore Kabinete ka kakaretšo e phethagatše ditlapele tša mmušo ka tšhoganetšo.
A. Merero ye Bohlokwa Seemong sa Bjale
1. Mohlagase
1.1. Kabinete e amogetše go tsebagatšwa ga Sekhwama sa Kgoboketšo ya Methopo (RMF) ka Tona ya Mohlagase ka Kantorong ya Mopresidente, Ngaka Kgosientsho Ramokgopa. Tirišano ye magareng ga mmušo le Business Unity South Africa e nyaka go fana ka didirišwa le bokgoni go kgontšha mmušo go phethagatša Leanotiro la Enetši leo le tsebagaditšwego ke Mopresidente Cyril Ramaphosa ka Phupu 2022 le Polelo ya Maemo a Setšhaba (SoNA) ya 2023 bjalo ka mohlala wa leago le le šomago gabotse go ikopanya mmogo le go tšwetša pele tshepo go Afrika Borwa.
1.2. RMF e tla matlafatša mošomo wa Komiti ya Bosetšhaba ya Mathata a Enetši go fihlelela nepo ya yona ya go fediša kgaotšo ya mohlagase ka Afrika Borwa. Kabinete e dirile boipiletšo go bakgathatema ka moka go tsenya letsogo phethagatšong ya Leanotiro la Enetši ka nepo ya go lwa lebothata bja kgaotšo ya mohlagase go ikonomi.
1.3. Kabinete e lemogile dipelaelo tšeo di sa tšwago go tšweletšwa ke ba S&P Global Ratings tša gore kgolo ya ikonomi ya Afrika Borwa e lebane le kgatelelo dingangego tša mananeokgoparara, kudukudu tlhaelelo ye kgolo ya mohlagase. Go rarolla tlhohlo ye, mmušo ga e sa le go tloga fao o thomile lelokelelo la magato a mafelelo, ao a akaretšago go kopanya ditšhelete, dipeakanyoleswa tša ka pela tša ikonomi le magato a ka pela ao a akaretšago kopantšho ya ditšhelete, diphetogo tša ka pela tša ikonomi le magato a tšhoganetšo ao a nepilego phokotšong ya kgaotšo ya mohlagase mo nakong ya ka pela, gape le go fetoša lekala le ka diphetošo tša mebaraka go fihlelela tšhireletšo ya enetši ya lebaka le letelele.
1.4. Kabinete e amogetše gape go bulwa ga thendara ya bokgoni bja go lota dipetiri tša dimekawate (MW) tše 513 bjalo ka karolo ya go maatlafatša karabelo ya rena go tlhohlo ya enetši. Letšatšikgwedi la go tswalela kwalakwatšo ya thendara ke la 5 Mosegamanye 2023 ka 17:00, gomme bao ba nago le kgahlego ka moka ba ka tlatša foromo ya boingwadišo ya elektroniki ya inthanete yeo e hwetšagalago go: www.ipp-storage.co.za .
1.5. Kabinete e amogetše gape sephetho sa Tona ya Dithokgwa, Boreahlapi le Tikologo, Mme Barbara Creecy, sa go fa Eskom tokollo go tshepedišo ye telele ye e nyakegago go fetoša Laesense ya yona ya go Tupišetša Lefaufaung. Go ya ka Eskom, tokollo ye e tla e kgontšha go phethagatša tharollo ya nakwana go tshenyo yeo e lego Seteišeneng sa Mohlagase sa Kusile pele ga Dibatsela 2023, gomme ka go realo e dumelele seteišene se sa mohlagase go thoma gape ka tšweletšo ya dimekawate tše 2 100 (MW) tšeo di tlago fokotša kgaotšo ya mohlagase ka Afrika Borwa ka magato a mabedi.
2. Mogwanto wa Mokgatlo wa Bosetšhaba wa Thuto, Maphelo le Bašomi ba Selekane (NEHAWU).
2.1. Mabapi le mogwanto wa NEHAWU, Kabinete e amogetše go saenwa ga Tumelelano ya Kwano ka Lekgotleng la Setšhaba la Ditherišano tša Merero ya Bašomi (PSCBC) yeo e rarollago ditherišano tša meputso ya 2022/23 le go fediša mogwanto gammogo le go bušetša makala ka moka ka Lekgotleng la Ditherišano bakeng sa ditherišano tša meputso tša 2023/24.
2.2. Kabinete e tšwetše pele go laetša ditebogo tša yona go mekgatlo yeo ya bašomi yeo e šetšego ka PSCBC go tšwela pele ka ditherišano. E bušeleditše boikgafo bja mmušo go tshepedišo ya ditherišano, le go šoma le makala ka moka a maleba go netefatša gore bohlokwa bja ditherišano tša kopanelo bo a šireletšwa ebile bo a hlompšha.
2.3. Re swanetše go laetša gore mokgwa wa GA GO NA MOPUTSO GE GO SA ŠONGWE o tla šoma go thoma go šoma ka pela gomme go ngwathwa ga meputso go tla dirwa mo dikgweding tše nne tše di tlago, bjalo ka karolo ya Tumelelano ya Kwano. Kgoro ya Tirelo ya Setšhaba le Taolo e tla bea leihlo phethagatšo ka botlalo ya diphetho tše.
2.4. Godimo ga fao, ditheo tša phethagatšo ya molao di tla lebelelana le ditiro tša bosenyi tšeo di dirilwego nakong ya mogwanto, mola balaodi ka go latelana ba tla lebelelana le ditiro tšeo di robilego Molao wa Maitshwaro wa Bašomi ba Mmušo.
3. Mogwanto wa go emiša naga
3.1. Kabinete e laeditše go tshwenyega mabapi le dipitšo tša mogwanto woo o rulagantšwego go tlo ba ka ka Mošupologo wa la 20 Hlakola 2023 gomme e bona dipitšo tše bjalo e le tša go hloka maikarabelo le go hloka šedi.
3.2. Legoro la tša Toka, Thibelo ya Bosenyi le Tšhireletšo (JCPS) le tsene fase go netefatša gore go robja ga molao ga go kgotlelelwe.
3.3. Dinyakwa tšeo go thwego di gona mabapi le go fedišwa ga kgaotšo ya mohlagase, go rotoga kudu ga ditheko mmogo le tlhokego ya mešomo di boletšwe ke Mopresidente Ramaphosa nakong ya SoNA ka la 9 Dibokwane 2023. Ge go etla tabeng ya go fediša kgaotšo ya mohlagase, Mopresidente o thwetše Tona ya Mohlagase, Ngaka Ramokgopa yoo mošomo wa gagwe o lebanego thwii le go fediša kgaotšo ya mohlagase. Phethagatšo ya Leanotiro la Enetši la Dintlha tše Hlano e tšwela pele ka go tia gomme Tona ya Mohlagase mo dibekeng tše di tlago o tla tsebagatša dinepo tša mokgwatšhomo wa Eskom tabeng ya go fediša kgaotšo ya mohlagase.
3.4. Se sengwe gape, nakong ya polelo ya gagwe ya SoNA ya 2023, Mopresidente o ile a bolela ka magato ao a tlo tšewago go rarolla tlhokego e kgolo ya mešomo go baswa mmogo le go rotoga kudu ka ditheko. Ka fao, nyakego e nnoši yeo e lego motheo wa mogwanto wo ke leano la go tloša Mopresidente Ramaphosa setulong ka mekgwa yeo e sa sepelelanego le molaotheo. Re nyaka go tsebiša bohle gore PHETOGO YA MMUŠO KA MEKGWA YEO E SA SEPELELANEGO LE MOLAOTHEO E KA SE DIRAGALE KA AFRIKA BORWA. Mang le mang yo a nago le tumo ya go buša naga ye o swanetše go leta go phenkgišana dikgethong tša kakaretšo tša 2024. Maiteko a go hlola tlhakahlakano le tšhitišo ka nageng a tla kopana le maatla ka moka a molao. Re swanetše go hlakiša gape gore ga go na makatika afe goba afe a sepolotiki ao a swanetšego go šikinya MoAfrika Borwa ofe goba ofe.
3.5. Kabinete e lemogile gape go fafatla ga dihlopha tšeo di bolelago gore di file Kabinete matšatši a šupa go tswalela dikolo. Tšhupamabaka ya dikolo tša Afrika Borwa bobedi dikolo tša mmušo le tša praebete, yeo e ilego ya phatlalatšwa ka Hlakola 2022, e šetše e laeditše letšatši la 20 Hlakola 2023 bjalo ka letšatši la maikhutšo la dikolo le le ikgethilego. Go be go phela go hlakile gore go na le makatika a go nyaka go bonwa bjalo ka bagale. Go no swana le seo, ka nako ya maikhutšo a dikolo ao a lego magareng ga matšatši a mabedi a maikhutšo a setšhaba.
4. Lenaneo la Boetapele bja Baswa la Mopresidente
4.1. Kabinete e amogetše go tsebagatšwa ga Lenaneo la Boetapele bja Baswa la Mopresidente ka Mopresidente Ramaphosa ka la 10 Hlakola 2023, ka Yunibesithing ya Walter Sisulu go la Mthatha, yeo e bonego go hlongwa ga lenaneo la bogwera la Pan-African.
4.2. Se se bopile karolo ya kopano ya mathomo ya Poledišano ya Baswa ya Nelson Mandela ka fase ga moeno wa: “Boetapele bja maitshwaro le bja magareng ga meloko bakeng sa Afrika ye kaone”. Polatefomo ye ya boetapele bja magareng ga meloko e maatlafatša maano le ditumelelano tše di lego gona tša kontinente ka bophara tša go swana le African Union Agenda 2063, Tšhatha ya Baswa ya Afrika mmogo le Tumelelano ya Kgwebišano ye e Lokologilego ya Kontinente ya Afrika.
5. Tumelelano ya tlhako ya go aga difatanaga ka Afrika Borwa
5.1. Kabinete e amogetše ditaba tša gore khamphani ya difatanaga ya Stellantis South Africa e saenne memorandamo wa kwešišano le Koporase ya Tlhabollo ya Diindasteri mmogo le Kgoro ya Kgwebišano, Indasteri le Phadišano go hlabolla lefelo le leswa la tšweletšo ya difatanaga ka Afrika Borwa. Stellantis e rekiša difatanaga tša Jeep, Alfa Romeo, Fiat, Citroën, Opel le Peugeot ka Afrika Borwa.
6. Dikamano tša Afrika Borwa le Tanzania
6.1. Kabinete e amogetše Ketelo ya Semmušo ka Afrika Borwa ya Mopresidente Samia Suluhu Hassan wa United Republic of Tanzania ka Labone la 16 Hlakola 2023 ka taletšo ya mong-ka-yena, Mopresidente Ramaphosa. Ketelo ye e latela Khomišene ya Ditona tša Afrika Borwa le Tanzania (BNC) yeo e swerwego ka Pretoria ka Laborarola 15 Hlakola 2023 . Ketelo ye e tlo thomiša kopano ya bobedi ya BNC ya Afrika Borwa le Tanzania, yeo e bopilwego ke dikomiti tše nne: Sepolotiki le Botseta; Sešole le Tšhireletšo; Merero ya Ikonomi, le Merero ya Leago le Setšo.
6.2. Go tlaleletša go botee bja yona le ntwa ya tokologo ya Afrika Borwa, Tanzania ke ye nngwe ya badirišanibagolo ba kgwebišano ba naga ye, fao palomoka ya kgwebišano magareng ga dinaga tše tše pedi e hlatlogilego go tloga go R6.89 bilione ka 2021 go fihla go R8.71 bilione ka 2022. Go na le dikhamphani tša Afrika Borwa tša go feta 250 ka makaleng a go fapafapana ka Tanzania.
7. Kopantšo ya Heineken le Distell
7.1. Kabinete e amogetše tumelelo ya Setheo sa Taolo ya Phadišano ya kopantšho ya boditšhabatšhaba ya motitiedi wa bjala wa Yuropa Heineken, le motšweletši wa bjala wa Afrika Borwa Distell Group Holdings.
7.2. Kopantšho ye, yeo e tlago hlola motšweletši yo mogolo wa saeda ka nageng, e laolwa ke maemo a fapafapanego a kgahlego ya setšhaba, ao a akaretšago tšweletšopele ya tlhabollo ya baabi, tlhokomelo ya theko ya go akaretša ya ka nageng, tšweletšopele ya dipeeletšo diphatišišong le tlhabollong, gape le bokgoni bjoo bo oketšegilego bja tšweletšontšhi ka nageng.
7.3. Setheo seo se kopantšwego se tla tšweletša pele gape go ba bengmošomo ga bašomi ka go hloma leano la bongdišere ka bašomi le go fa bašomi boemedi ka botong.
8. Peoleihlo ya Kgatelopele ya Kimollo ya Mafula a 2022
8.1. Kabinete e amogetše mošomo wo o dirilwego ke Tona ya Madulo a Batho, Mme Mmamoloko Kubayi le Maloko a MinMEC ya Madulo a Batho go bea leihlo kgatelopele ka khudušo ya go ya go ile le madulo a malapa ao a amilwego ke mafula a 2022 ka KwaZulu-Natal ge naga e batamela segopotšo sa mathomo sa masetlapelo a mafula a 2022 ao a ilego a wela naga ya borena.
9. Dipolelo tše di Fošagetšego Mabapi le Dikholego tša Ditona le Batlatšatona
9.1. Kabinete e laeditše go tshwenyega mabapi le dipolelo tše fošagetšego ka ga Dikholego tša Ditona le Batlatšatona tšeo di akareditšwego ka go Tlhahlo ya Maloko a Khuduthamaga yeo e hlalošago dikholego, didirišwa tša mošomo le diputseletšo tša gore Maloko a Khuduthamaga a kgone go phethagatša mešomo ya ona ka bokgoni.
9.2. Dipeakanyo tša Dintlo tša Ditona ke ditlamorago tša Tumelelano ya 1910 nakong ya go hlongwa ga Kopano ya Afrika Borwa yeo e beilego metsemošate ye meraro ya Afrika Borwa moo Pretoria e lego motsemošate wa Mmušo, Bloemfontein e lego motsemošate wa Boahlodi, gomme Cape Town e le motsemošate wa Palamente. Dintlo tšeo go thwego ke dirantlatla ka moka di hweditšwe pele ga 1994 gomme mmušo wo o latelanago wo o etilwego pele ke African National Congress o sa tšwa go netefatša gore di a hlokomelwa go boloka boleng bja tšona, gomme ka go realo go tla ba le kholego go tšwa tlhatlogong ya boleng bja dintlo tše.
9.3. Ditona le Batlatšatona bao ba šomišago dintlo tše ka bobedi tšeo ba di filwego ke Mmušo ba lefa rente ka mokgwa wo o swanago le wa maloko a palamente. E tla ba go hloka toka go letela gore Ditona le Batlatšatona bao ba se nago tšhireletšo ya mešomo maemong a bona a bjale go inyakela madulo ge ba le gare ba hlankela setšhaba.
9.4. Difatanaga tšeo di šomišwago ke Ditona le Batlatšatona ba tšona di sepelelana le Ministerial Handbook gomme mollwane wa theko o bewa ke Tona ya Ditšhelete ka therišano le Tona ya Maphodisa ka ga didirišwa tša tšhireletšo tšeo di lokelwago difatanageng. Didirišwa tša tšhireletšo ke karolo ye bohlokwa ge go etla go beweng ga mollwane wa theko, gomme ditiragalo tša gabjale tše bohloko tša Balekgotlaphethiši bao ba lahlegetšwego ke maphelo goba ba amegilego dikotsing tše kgolo tša difatanaga di gatelela bohlokwa bja taba ye gomme di swanetše go se amantšhe taba ye le go nyaka go holega ka sepolotiki.
9.5. Maloko ka moka a Palamente a na le maswanedi a go ba le bašomi bao ba a thušago go phethagatšeng mošomo wa bona. Diphapano tša palo ya bašomi ba thekgo ka dikantorong tša Ditona ke ditlamorago tša nako yeo Tona ye e itšego e thwetšwego, ka ge bašomi ka moka ba na le dikonteraka tša go sepelelana le nako ya go thwalwa ga Tona. Se se hlolwa ke gore Ministerial Handbook ke tokomane ye e šomago yeo e lekolwago kgafetšakgafetša.
9.6. Mopresidente o fetišeditše Ministerial Handbook ya gabjale go Khomišene ye e Ikemego ya Meputso ya Bahlankedi ba Setšhaba, yeo e šetšego e šomana le meputso ya bahlankedi ba mmušo yeo e swanetšego go lekolwa.
B. Diphetho tša Kabinete
1. Sethalwa sa Pholisi ya Basadi ka Dipapading
1.1. Kabinete e dumeletše go phatlalatšwa ga sethalwa sa Pholisi ya Basadi ka Dipapading gore setšhaba se fane ka ditshwayatshwayo go yona. Pholisi ye e hlaloša mekgwa yeo e tlo tšweletšago pele le go thekga basadi ka dipapading le go netefatša gore mananeo a go rarolla go se lekalekane ga bong ka dipapading tša go fapafapana le ka ditheong tša dipapadi a ba gona.
1.2. E lebelela gape mapheko a go thibela basadi go tsena ka dipapading a bjalo ka tlhlaelelo ya tšhelete ya thekgo, thekgo ya mašelengka dikhamphani gape le meputso ye e sa kgotsofatšego. Pholisi ye e šišintšwego e ikemišeditše go tšweletša pele koketšego ya go kgatha tema ka mafolofolo ga basadi ka dipapading le boetapeleng go swana le go ruta go ba mohlahli le go ba mohlankedi wa tshepedišo ya papadi.
1.3. Pholisi e lemoga gore go kgatha tema mo go oketšegilego ga basadi maemong a dipapadi le boetapele go tla fokotša kudu gomme mafelelong gwa fediša go se lekalekane ga bong le mehuta ye e fapafapanego ya kgethollo kgahlanong le basadi. E nyaka gape go tšweletša pele tekatekano le go netefatša gore basadi ba hwetša tlhompho goba temogo ka maemong a profešenale, go akaretšwa meputso ya go lekana le ya boradipapadi ba banna.
2. Go Swarwa ga Khonferentshe ya Boditšhabatšhaba ya Maphelo a Bomme le Masea a sa Tšwago Belegwa ya 2023
2.1. Kabinete e file tumelelo ya gore Afrika Borwa e sware Khonferentshe ya Boditšhabatšhaba ya Maphelo a Bomme le Masea a sa tšwago go belegwa, ka Cape Town go tloga ka la 8 go fihla ka la 11 Mopitlo 2023, moo bakgathatema ba go feta 1 000 go tšwa lefaseng ka bophara ba tlago kgobokana go akgofiša ditharollo tša go kaonafatša go phela ga bomma le masea ao a sa tšwago go belegwa, le thibelo ya go goma tseleng ga basadi.
2.2. Afrika Borwa e bile le kgatelopele ye kgolo tabeng ya go fihlelela diphetho tša Dinepo tša Tlhabollo ye e Swarelelago tša Ditšhabakopano (UN) tša maphelo a bomma le masea ao a sa tšwago go belegwa, le thibelo ya go goma tseleng. Naga e tla holega gape kudu ka ge baemedi ba khonferentshe ba tla abelana, gareng ga tše dingwe, maano a bona ao a šomago gabotse le dilo tše mpsha ka ga merero ya maphelo a bomma le masea ao a sa tšwago go belegwa.
3. Protšeke ya Tsela ya Bohwa bja Bolwalekgatelelo le Tokologo (RLHR).
3.1. Kabinete e amogetše pego ya kgatelopele ye e tletšego ka ga phethagatšo ya protšeke ya RLHR. Kabinete e dumeletše gape gore Tona ya Dikamano tša Boditšhabatšhaba le Tirišano, le ya Toka le Ditirelo tša Tshokollo gore ba be karolo ya Komiti ya Magareng ga Ditona (IMC) ge go etla go RLHR.
3.2. RLHR ke protšeke ya bosetšhaba yeo e lebanego le go gopola le go keteka tsela ya Afrika Borwa ya go ya tokologong. Kabinete e hlomile IMC go bea leihlo protšeke ye le go eta pele ka sepolotiki.
3.3. Protšeke ye e nyaka go akaretša mehuta ye e fapanego ya go gopola boikgafo bjo balwelatokologo ba bo dirilego gore Afrika Borwa e be ye e lokologilego ya demokrasi. E dumelela gape go agwa ga dimusiamo, mafelo a segopotšo, makgobapuku le mafelo a go lota, gomme e ikemišeditše go lemoga moya wa botee le tirišano gare ga MaAfrika. Yona e thekgilwe ke UN gomme e na le bokgoni bja go matlafatša tirišano ya batho ka go šomiša setšo le bohwa go ralala le kontinente.
3.4. Mešongwana e mmalwa yeo diregilego ka 2022 e akaretša diketelo tša Ditona ka Botswana le Zimbabwe gammogo le peakanyo ya dikopano le Angola le Tanzania.
3.5. Mešongwana ya protšeke ye e nepile go kgokaganya dinaga ka moka tša Borwa bja Afrika le go ruta baswa ka ga ntwa kgahlanong le bokoloniale le kgethollo ya semorafe. Pholisi ye gape e tla le ka tumelelo ya go bušetšwa ga mašaledi a balwelatokologo ba Afrika Borwa bao ba bolokilwego ka dinageng dišele. Mabitla a ka bago 11 ao a tsebegago e le a MaAfrika Borwa a hlathilwe ka Zambia, go akaretšwa le la molwelatokologo, Morena Duma Nokwe.
4. Pholisi ya Bosetšhaba ya go Fetolela Bokgabo, Setšo le Bohwa Ditšithaleng
4.1. Kabinete e dumeletše Pholisi ya Bosetšhaba ya go Fetolela Bokgabo, Setšo le Bohwa Ditšithaleng gore e phethagatšwe. Pholisi e fa maatla a mangwe go Pholisi ya Bosetšhaba ya go Fetolela Methopo ya Bohwa Ditšithaleng yeo e hlamilwego ke Kgoro ya Bokgabo le Setšo ya nako yeo ka 2011. Pholisi ye e lebeletše kudu go fetolela methopo ya bohwa ditšithaleng ka nepo ya go lota, phihlelelo le taolo ya go ba mong.
4.2. Le ge e le gore go fetolela ditšithaleng ke tshepedišo ya go fetolela diteng tša analoko go ya go diteng tša ditšithale, go akaretšwa direkhoto tša pampiri, maekrofitšhi le direkhoto tša theipi tšeo e sego tša ditšithale, pholisi e katološitše tlhalošo ye go methopo ya ditšithale yeo e hlagilego e le ya ditšithale ka tlhago go swana le tshedimošo yeo e tšweleditšwego ka ditšithale, yeo e ka se tsogego e fetotšwe go ba yeo e swaregago.
4.3. Phetolelo go ditšithale e tla ba le mehola ye megolo go naga ka ge e tla kgontšha phihlelelo ye bonolo ya methopo ya tshedimošo, kudukudu yeo e swerwego ke mafelo a go lota, makgobapuku le dimusiamo. Pholisi ye e tla phethagatšwa go ralala le mmušo le setšhaba.
C. Molaokakanywa
1. Molaokakanywaphetošo wa Merero ya Boahlodi wa 2023
1.1. Kabinete e dumeletše go romelwa ga Molaokakanywaphetošo wa Merero ya Boahlodi wa 2023 Palamenteng. Molaokakanywa wo o ikemišeditše go fetoša Melao ye mentšhi yeo e laolwago ke Kgoro ya Toka le Tlhabollo ya Molaotheo ka go rarolla ditaba tša sethekniki le merero yeo e amago phethagatšo ya Melao.
1.2. Molaokakanywa wo o na le d tše 37 tšeo di šišinyago diphetošo tša go lokiša diphošo tša molaotheo tša Melao ye e fapafapanego.
D. Ditiragalo tše di Tlago
1. Letšatši la Ditokelo tša Botho
1.1. Mopresidente Ramaphosa o tla fa polelokgolo mo tiragalong ya bosetšhaba ya Letšatši la Ditokelo tša Botho la 2023 ka Labobedi la 21 Hlakola 2023 kua Lepatlelong la De Aar West, ka Kapa Leboa.
1.2. Moeno wa ngwaga wo ke: “Go Tiiša le go Tšweletša Setšo sa Ditokelo tša Botho go ya Bokamoso”, ge re gopola dipolao tša Sharpeville le Langa, le megwanto ye mengwe yeo e diregilego ka la 21 Mopitlo 1960 nageng ka bophara.
1.3. Bjalo ka mmušo, re dula re ikgafile go maikarabelo a molaotheo a go šireletša ditokelo tša botho tša batho ka moka ka nageng. A re šomeng mmogo go netefatša gore ga re tlogele motho morago go dira gore dipeelano tša Molaotheo wa Repabliki ya Afrika Borwa wa 1996 le Molaokakanywa wa Ditokelo e be nnete ye e phetšwego go bohle.
2. Letšatši la Lefase la Meetse
2.1. Afrika Borwa e tla swaya Beke ya Bosetšhaba ya Meetse go tloga ka la 20 go fihla ka la 26 Jlakola 2023 ka fase ga morero wa: “Go akgofiša Phetogo”.
2.2. Beke ye e sepelelana le Letšatši la Lefase la Meetse ka la 22 Hlakola 2023, leo le laetšago bohlokwa bja meetse a hlwekilego. Go sa šetšwe dipula tša morago bjale tše matla dikarolong tša naga, Afrika Borwa e sa dutše e le naga yeo e hlaelelago meetse gomme e maemong a go ba ye nngwe ya dinaga tša bo 30 tše di omilego kudu lefaseng.
2.3. Kabinete e biditše badudi ka moka go šireletša methopo ya rena ya meetse ye bohlokwa go swana le mafelo a monola, ka ge tše di le bohlokwa kudu go tšhireletšo ya rena ya meetse ya lebaka le letelele. Ka moka ga rena re na le tema yeo re swanetšego go e kgatha go boloka meetse le go netefatša gore kabo ya rena ga e ome.
3. Letšatši la Lefase la Bolwetši bja Mafahla (TB).
3.1. Motlatšamopresidente Paul Mashatile o tla fa polelo ya motheo nakong ya segopotšo sa semmušo sa Letšatši la Lefase la TB ka la 24 Hlakola 2023 ka fase ga moeno wo o rego: “Ee! Nna le Wena Re ka Fediša TB”.
3.2. Tiragalo ya semmušo ka Lepatlelong la Tlhabane ka Leboa Bodikela e tla bona gape Lekgotla la Bosetšhaba la AIDS la Afrika Borwa le Kgoro ya Maphelo ba tsebagatša Leano la Togamaano la Bosetšhaba la TB, HIV le Diphetetšo tša Thobalano la 2023 go fihla ka 2028. Se se aga godimo ga kgatelopele ye bohlokwa yeo e fihleletšwego ka nepo ye mpshafaditšwego go thibelo, kalafo, go amogelwa, khupetšo le go kgomarela, le go fediša kgethollo le kgethollo.
D. Melaetša
1. Ditebogišo
- Kabinete e rometše ditebogišo le go akela mahlatse le mahlogonolo go:Sehlopha sa di-Proteas seo gabjale se ralokago le sa West Indies mo ketelong ya dithaloko tša go fapafapana. Kabinete e ipiletša go maAfrika Borwa ka moka go thekga Proteas ge e tšwela pele go fofiša folaga ya rena godimo.
2. Matshidišo
Kabinete e rometše matshidišo go ba lapa le bagwera ba:
- Molekgotlaphethiši wa Thuto ka Freistata, Tate Makgoe (60), yo a bilego le seabe se segolo kudu ka lekaleng la thuto gomme a eta pele Freistata ka katlego go fihlelela dipoelo tša godimodimo tša marematlou mengwaga ye mene ka go latelana.
- Mme Maurencia Gillion , yo a emetšego Kapa Bodikela ka Lekgotleng la Bosetšhaba la Diprofense, gomme a šoma ka Komiting ya Nakwana ya Maphelo le Ditirelo tša Leago. Yena e be e le molwelatokologo yo a tsebegago kudu gomme o hlanketše batho ba Kapa Bodikela, kudukudu ka dinagamagaeng tša profense, mengwaga ye mentšhi.
- Morena John Wills (66), ramolao wa go tuma wa ditokelo tša botho ebile e le molweladitokelo tša botho yoo a kilego a emela baetapele ba bantšhi ba dipolotiki, go akaretšwa Mopresidente wa peleng Nelson Mandela.
- Morena Mark Pilgrim (54), raditaba yo a hlohleleditšego le go huetša batho ba bantšhi ka indasetering ya bobegaditaba.
- Mme Gloria Bosman (50), seopedi seo se thopilego difoka sa mmino wa jazz ebile e le mohlami wa dikoša wa Afrika Borwa.
E. Go Thwalwa
Batho ka moka bao ba thwetšwego mešomong mangwalo a bona a thuto a tlo tiišetšwa le go netefatšwa ka tsela ya maleba.
1. Maloko a Lekgotla la Boeletši la Taolo ya Dithaetlele tša Meagokabelano:
(a) Moadfokeiti Boyce Mkhize (Modulasetulo);
(b) Kgoši Pheni Cypraim Ngove (Motlatšamodulasetulo);
(c) Mme Kagisho Mmaseleke Choenyana;
(d) Morena Pieter Jacobus De Beer;
(e) Moadfokeiti Nomonde Nokuthula January;
(f) Morena Iqbal Mohamed Motala; le
(g) Ngaka Vuyisani Moss.
2. Maloko a Khomišene ya Bomaseterata:
(i) Mme Nomzamo Zondo;
(ii) Morena Hanif Vally, le yena;
(iii) Ngaka Cornelia September;
(iv) Morena Makgabhana Mokoena (o thwalwa leswa); le
(v) Moprofesa Estelle Hurter (o thwalwa leswa).
Dipotšišo: Morena Michael Currin
Seboleledi sa Kabinete sa Motšwaoswere
Mogala: 082 462 7896
