1. Diphetho tše bohlokwa tša Kabinete
1.1. Kabinete e lekodišišitše Dipego tša Kgatelopele ya Dipoelo tša Kotara ya Boraro tša lebaka la nako ya go thoma ka Diphalane go fihla ka Manthole 2015. Dipego tše di laetša kgatelopele ye kgolo ka phethagatšong ya mananeo a mmušo ao a nago le seabe sa thwii go kaonafatšeng maphelo a maAfrika Borwa.
Dipego tša Kgetelopele ya Dipoelo di fa bohlatse bja gore mmušo o bile le kgatelopele go fihlelela dinepo tšeo di beilwego ka go Tlhako ya Leanophethagatšo la Lebaka la Magareng (MTSF) ya 2014-2019. Gape di re iša kgauswi le go fihlelela Nepo ya 2030, ka ge go beilwe ka go Leanotlhabollo la Bosetšhaba (NDP), leo le ikemišeditšego go lwantšha bohloki, tlhokego ya mešomo le tlhokego ya tekatekano.
Kabinete e lemogile kgatelopele ye e kwagalago ye e dirilwego go fihlelela dinepo le ditšweletšo tše bohlokwa. Kabinete e lemogile gore le ge kgatelopele ye kgolo e dirilwe mabapi le bontši bja dilaetši, go sa na le mafapha ao a hlokago tsenogare ka mmušo ye e kgokagantšwego.
2. Phethagatšo ya mananeo a bohlokwa a mmušo
2.1. Kabinete e lebogile maAfrika Borwa ka moka ao a arabetšego boipiletšo bjo bo dirilwego ke Khomišene ye e Ikemego ya Dikgetho (IEC) bja gore batho ba ingwadiše, ba lekole maemo a bona go bona ge eba ba ingwadišitše le go mpshafatša dintlha tša bona lenaneong la bakgethi mafelelong a beke a la 5 le la 6 Hlakola 2016. Batho bao ba ka bago dimilione tše tharo ba ile ba etela mafelo a go boutela nageng ka bophara gomme ba 544 552 e bile bao ba bego ba ingwadiša la mathomo (78.6%) gomme ba na le mengwaga ya ka fase ga ye 30, e lego seo se laetšago gore maAfrika Borwa a nyaka go kgatha tema ka go ageng ga temokrasi ya rena.
Kabinete e ipiletša go maAfrika Borwa go phethagatša tokelo ya bona ya molaotheo ka go ingwadiša ebile e ipiletša go bao ba ingwadišitšego mo nakong ye e fetilego go tiišetša dintlha tša bona tša go bouta ka ge mabaka a mmalwa a dirile gore go be le diphetogo ka lenaneong la bakgethi.
2.2. Mafelelo a beke a mafelelo a go ingwadiša a tla ba ka la 9 le la 10 Moranang 2016 ge diteše tša go kgethela ka moka di tla be di bulwa gape go thoma ka 8:00 go fihla ka 17:00. Se e tla ba sebaka sa mafelelo go bakgethi go ingwadiša le go mpshafatša dintlha tša bona tša go ingwadiša ditešeng tša bona tša go kgethela. Le ge go le bjale, go ingwadiša go tšwela pele ka dikantorong tša kgauswi tša IEC ka dinako tša mošomo go tloga ka Mošupologo go fihla ka Labohlano, go fihla ge Lenaneo la bakgethi la Dikgetho tša Mebasepala tša 2016 le tswalelwa ka letšatši leo letšatšikgwedi la dikgetho di begwago ka lona.
Kabinete e kgalema dikgaruru tšeo di hlagago ka mafelong a mangwe tšeo di ilego tša šitiša boingwadišo mafelelong a beke a go ingwadiša ga setšhaba gomme e bušeletša gore ga go motho yo mongwe yo a ka thibelago moAfrika Borwa ofe goba ofe go phethagatša tokelo ya gagwe ya temokrasi ya go ingwadišetša go bouta. Kabinete e tšwela pele go ipiletša go bao ka moka ba rwelego maikarabelo go tlogela ditiro tšeo tša bosenyi le gore bao ba amegago ba bege ditiro tše go ditheo tša phethagatšo ya molao. Kabinete e ipiletša go ditheo ka moka tša phethagatšo ya molao go tšea magato a boima kgahlanong le bao ba tshelago molao.
2.3. Mopresidente Jacob Zuma o tla etela Port Elizabeth ka la 8 Moranang 2016 go hlahloba kgatelopele ye e dirilwego go hloma mananeokgoparara a dikepe tša ka meetseng bjalo ka karolo ya lesolo la ka mo nageng la Ekonomi ya Lewatle. Lesolo la Ekonomi ya Lewatle ke le lengwe la makala a mararo a Operation Phakisa gomme le batametša naga go phethagatša bokgoni bja mawatle a Afrika Borwa, e lego seo se nago le bokgoni bja go ba le seabe sa go fihla go R177 pilione go palomoka ya letseno la ditšweletšwa ka moka tša ka nageng le go hloma mešomo ye e fetago milione o tee.
2.4. Kabinete e amogela go phethwa ka katlego ga Ketelo ya Mopresidente Zuma go la Repabliki ya Bofeterale ya Nigeria go thoma ka la seswai go fihla ka la senyane2016, gomme yona e maatlafaditše dikamano tša bjalo tša dinaga tše ka bobedi, tša ekonomi le tša leago. Ye nngwe ya dilo tše bohlokwa tša ketelo ye e bile go hlatlošwa ga Khomišene ya Dinaga tše ka bobedi go ya maemong a Hlogo ya Naga, yeo e beago pele tlhabollo ya ekonomi magareng ga Dinaga tše ka bobedi.
Kabinete e amogela go bulelwa dikhamphani tša Afrika Borwa ekonomi ya Nigeria ka mafapheng a mehutahuta a go swana le boentšeneere, mananeokgoparara a kgokagano, boagi, lenaneo la tshepedišo ya difofane, kgašo, kamogelo ya baeng, dipanka, boithabišo, dintlo, bogwebi, le ditirelo tša go utolla oli le gase. Kabinete e emetše koketšego ya dipeeletšo tša dikhamphani tša go tšwa ka Nigeria ka mo Afrika Borwa yeo e tlago tšwetša pele kgwebišano magareng ga dinaga tše ka bobedi.
Dipoelo go tšwa mo ditherišanong tše magareng ga diekonomi tše pedi tše kgolo kudu ka khonthinenteng di tla kopanya diekonomi tša ka dileteng, go realo e le go oketša mmaraka wo o tlwaelegilego le go hlatloša masolo ao a lego gona a kgolo ya ekonomi le go thwala batho mešomong ka Afrika. Se se laetša gore Afrika Borwa e tšwela pele go ba lefelo la dipeeletšo le ge ekonomi ya lefase ka bophara e le mathateng, gomme se se tla feletša ka dibaka tša mešomo le tlhabollo ya bokgoni go maAfrika Borwa.
2.5. Kabinete e lemogile gore Afrika Borwa e tlo kgatha tema ka Kopanong ya bo 60 ya Khomišene ka ga Maemo a Basadi (CSW60) ya Mokgatlo wa Dinagakopano yeo e tlogo swarwa ka New York, USA go thoma ka la 14 go fihla ka la 24 Hlakola 2016 ka fase ga morero wa: “Maatlafatšo ya Basadi le kamano ya yona le tlhabollo ya go ya go ile”. Kopano ye e swarwa ka ngwaga wo bohlokwa go Afrika Borwa ka ge e hloma metheo ye meraro ye bohlokwa, e lego Segopotšo sa bo 20 sa go hlangwa ga Molaotheo wa Repabliki ya Afrikia Borwa ka 1996, Segopotšo sa bo 40 sa Dikgaruru tša Bafsa ba ka Soweto le Segopotšo sa bo 60 sa mogwanto wa basadi ka 1956.
Afrika Borwa e hlagišitše pego go UN CSW60 gomme se se re fa sebaka sa go lebeledišiša kgatelopele yeo re bilego le yona mola go bago le temokrasi. Go bohlokwa go lemoga gore go tloga mola go bago le temokrasi, Afrika Borwa gareng ga tše dingwe, e kgathile tema ka Khonferentsheng ya Lefase ya bone ka ga Basadi ka 1995, gomme ya saena Kwano ya Beijing le Sefala sa Tiro wona ngwagong woo.
Go latela sephetho sa E/RES/2013/18 sa Lekgotla la mabapi le Ekonomi le Leago la UN, Afrika Borwa e ikgafile go tšwela pele go tsenya tirišong Kwano ya Beijing le Sefala sa Tiro, e lego motheo wa maatlafatšo le tšwetšopele ya basadi.
3. Melaokakanywa
3.1. Kabinete e dumeletše go tlišwa ga Molaokakanywaphetošwa wa Makala a Mebasepala wa Mebušo ya Selegae wa 2016 ka Palamenteng. Diphetošo di a dirwa go Molao wa Makala a Mebasepala wa Mebušo ya Selegae wa 1998 (Molao wa 117 wa 1998), wo o bego phethagaditšwego pele ga dikgetho tša temokrasi tša mathomo tša mebušoselegae tšeo di swerwego ka la 5 Manthole 2000.
Diphetošo di tla kaonafatša taolo ya mebušoselegae gomme gareng ga diphetošo tše dingwe, di nyaka go:
a) fetoša dinyakwa tša mebasepala ya Legoro la A;
b) tloša ditšhupetšo ka moka go mafelo a taolo a dilete;
c) hlatholla letšatšikgwedi la go thoma mošomo ga mokhanselara;
d) laela gore Mopresidente o swanetše go bea le go bolela letšatšikgwedi leo dikgetho tša mebasepala di tlago swarwa ka lona;
e) dumelela katološo ka go tsebišo ya dipoelo tša dikgetho;
f) kgopela molaodi wa masepala go tsebiša IEC ka ga dikgoba tša mešomo tše di bulegilego ka diwateng;
g) laela gore Molekgotlaphethiši a bitše le go bea letšatšikgwedi la dikgetho tša tlaleletšo;
h) fa dinyakwa tša go bopa khoramo ya kopano ya lekgotla;
i) fa mabaka a go boutela mokhanselara nakong ya kopano ya lekgotla;
j) oketša phapano ya palo ya bakgethi ka wateng ye nngwe le ye nngwe ka kopanong ya lekgotla; le
k) oketša phapano ya palo ya bakgethi ka wateng ye nngwe le ye nngwe nakong ya karoganyo ya mellwane ya mebasepala go hlatholla kabo ya ditulo tša tlaleletšo ka mebasepaleng ya selegae.
4. Ditiragalo tše di tlago
4.1. Mopresidente Zuma – bjalo ka modulasetulommogo le Mopresidente wa France François Hollande ba Khomišene ya Maemo a Godimo ka ga Go thwala Bašomi ba Maphelo Mešomong le Kgolo ya Ekonomi – ba tla tsenela go tsebagatšwa semmušo ga yona ka Lyon, ka France ka Laboraro la, 23 Hlakola 2016. Khomišene e lebeletše kudu tlhokego ya bašomi ba maphelo ba sephrofešenale ka dinageng tša letseno la magareng le la fase. Lesolo la UN go emetšwe gore le tla oketša tšhireletšo ya maphelo lefaseng ka bophara le go tšwetša pele kgolo ya ekonomi ye e akaretšago mang le mang, yeo e tsenyago letsogo go phethagatšo ya Leano la Tlhabollo ya go ya Go ile la 2030.
4.2. Mopresidente Zuma o tla Etela Nageng ya Bogoši ya Saudi Arabia go thoma ka la 27 go fihla ka la 28 Hlakola 2016, gomme se se tla maatlafatša dikamano tšeo di lego gona magareng ga dinaga tše ka bobedi.
4.3. Mopresidente o tla tsenela Samiti ya bo 4 ya Tšhireletšego ya Nyutleliara ka Washington, ka USA go thoma ka la 31 Hlakola go fihla ka la 1 Moranang 2016. Samiti e tla ahlaahla tšhošetšo ye e tšwelelago ya botšhošetšo bja mabapi le nyutleliara le go ahlaahla dikgato tšeo di ka tšewago ke setšhaba sa boditšhabatšhaba go fokotša tšhomišo ya yuraniamo ye e maatlafaditšwego kudu, go šireletša didirišwa tše di lego kotsing, go lwantšha go utswa ga nyutleliara le go nyefiša, go tseba le go šitiša maitekelo a botšhošetši bja mabapi le nyutleliara.
4.4. Mopresidente Zuma o tla eta pele meletlo ya Letšatši la Ditokelo tša Botho ka Lepatlelong la Moses Mabhida ka KwaZulu-Natal ka Mošupologo wa la 21 Hlakola 2016 ka fase ga morero wa: “Afrika Borwa e kopane kgahlanong le semorafe.” Ka ge go tsebišitšwe ka Polelong ya Maemo a Setšhaba ya 2016, Letšatši la Ditokelo tša Botho la ngwaga wo le tla bea motheo wa lenaneo la lebaka le letelele la go aga setšhaba seo se hlokago semorafe. Kabinete e ipiletša go maAfrika Borwa ka moka go kopana kgahlanong le semorafe le go se kgalema phatlalatša – e ka ba ka dintlong tša rena, ditšhabeng, dikopanong tša setšhaba, mešomong goba le kgašong ya setšhaba. Ka moka ga rena re swanetše go šoma mmogo go fihlelela setšhaba sa temokrasi seo se kopanego, seo se hlokago semorafe le seo se hlokago kgethologanyo ya bong.
4.5. Malokophethiši a tla boledišana le maAfrika Borwa nageng ka bophara ka nakong ya Beke ya Nepišo ya Imbizo ya Bosetšhaba magareng ga la 4 le la 10 Moranang 2016, ka fase ga morero wa: “Mmogo re tšwetša pele Afrika Borwa: Godišang Afrika Borwa.” Beke ye e sepelelana le Beke ya Bakgethi ba Palamente le Kgwedi ya go keteka Tokologo.
Kabinete e hlohleletša maAfrika Borwa go kgatha tema ka mafolofolo ka mo ditiragalong tše le go rerišana le dihlogo tša sepolotiki. Beke ya Nepišo ya Imbizo e tla bolela ka ga phethagatšo ya Leano la Dintlha tše Senyane leo le ikemišeditšego go thuša kgolo ya ekonomi le go hloma mešomo ye e hlokegago kudu. E tla ahlaahla gape dikatlego tša mebušoselegae, go akaretšwa diphihlelelo tšeo di fihleletšwego ka go diriša leano la tsošološo ya mmušo wa selegae – mokgwa wa Re boela Morago go Metheo.
Beke ye e tla sepelelana le mafelelo a beke a boingwadišo go emetšwe Dikgetho tša Mebasepala tša 2016, go tšwela pele go aba sebaka go dihlogo tša sepolotiki go hlohleletša le go kgokgoetša maAfrika Borwa ka go diriša masolo a thuto ya dikgetho gore ba ingwadiše le go tiišetša dintlha tša bona tša go bouta.
4.6. Motlatšamopresidente Cyril Ramaphosa o tla bula Samiti ya Bobedi ya Lekgotla la Tlhabollo ya Merero ya Bašomi leo le tlago swarwa ka Gallagher Convention Centre ka Midrand ka la 29 le la 30 Hlakola 2016 ka fase ga morero wa: “Selekane sa go hlola bokgoni – Boipiletšo bja go Tšea Dikgato”. Samiti e kopanya mmogo bakgathatema go ralala le lefapha la thuto ya godingwana go thuša ka tlhabollong ya yona le go hloma dilekane tšeo di hlomago dihlongwa tša thuto ya godingwana tše maatla tšeo di loketšego go tšweletša baithuti bao ba tlago šoma ka diintastering.
4.7. Beke ya Meetse ya Bosetšhaba ya 2016 e tla swarwa go thoma ka la 14 go fihla ka la 22 Hlakola ka fase ga morero wa: “Meetse a batho, meetse ka batho”. Beke ye e tla bolela ka ga meetse bjalo ka tokelo ya batho ka go tšweletša temošo ya seriti sa batho bao ba se nago phihlelelo go meetse a go nwa ao a hlwekilwego.
Kgoro ya Meetse le Kelelatšhila e sa le gare ka Tshepedišo ya go fediša dintlwana tša boithomelo tša go diriša dipakete gomme go fihla mo lebakeng le e fedišitše 78.8% ya dintlwna tša boithomelo tša go šomiša dipakete ka mafelong a mekhukhung ka Afrika Borwa. Diprofense tše šupa di šomile gabotse kudu gomme tšona di fedišitše dintlwana tše tša boithomelo ka palogare ga 90%. Tšeo di kgonnego go di fediša ka botlalo ka mafelong a mekhukhung ke ya KwaZulu-Natal, Leboa Bodikela, Mpumalanga le Gauteng. Profense ya Kapa Bodikela yona e kgonne go di fediša ka 99.8%. Go tloga go nepišo ya tše 26 120 ya Kapa Leboa, Kapa Bohlabela, Leboa Bodikela le Foreisetata, dintlwana tša boithomelo tše di ka bago tše 11 650 di phethilwe go fihla mo lebakeng le.
Le ge e le gore pula ye e sa tšwago go na e tlišitše kimollo, seabe sa komelelo se tšwela pele go ba le seabe ka dikarolong tše dingwe tša naga. MaAfrika Borwa a swanetše go tšwela pele go šomiša meetse ka go a seketša le go tsenya tirišong magato a go seketša meetse. Mmušo o ile wa aba R1 pilione go rarolla mathata a komelelo.
Kabinete e amogela kgatelopele ye e dirilwego ke lenaneo la Twantšho ya go Dutla ga Meetse la mengwaga ye mehlano ka fase ga morero wa: “Lerothi le lengwe le le lengwe le bohlokwa”. Lenaneo le le ikemišeditše go goketša, go hlahla le go thwala bafsa ba 15 000 bao ba nago le mangwalo a dithuto tša fasefase tša Kreiti ya 12 goba tša N3 bjalo ka dipholampara, bašomi ba diatla le badiredi ba merero ya meetse.
5. Maemo a Kabinete ka ga ditaba tša bjale tše bohlokwa
5.1. Kabinete e ipiletša go badiraditšhupetšo go dira ka fao ba ka kgonago ka gona go tlogela go dira dikgaruru gomme ba tšweletše dingongorego tša bona ka fase ga tshepedišo ya molao le Molaotheo. Ditiro tša go pšhatla le tshenyo ya thoto di tshela mellwane ya tokelo ya go dira ditšhupetšo gomme ke mošomo wa batho bao ba dirago bosenyi bao ba tšwelego tseleng. Ditheo tša phethagatšo ya molao di tla phethagatša molao ka go golega le go phara bao ba senyago thoto ka molato ka diyunibesithing, ka dihlongweng tše dingwe tša thuto ya godingwana, ka ditšhabeng le nakong ya ge ba dira ditšhupetšo.
5.2. Tona ya Kgoro ya Ditšhelete e sedimošitše Kabinete ka ga masolo a go theta le dinaga ao a sa tšwago go dirwa a go leba US le United Kingdom le bakgathatema bao ba fapafapanego, go akaretšwa baetapele ba kgwebo. Kabinete e ikgafile go netefatša gore naga e šoma mmogo go netefatša gore maemo a rena a tša ekonomi ga a theošetšwe fase.
Ketelo ye e fa mmušo sebaka sa go bolela ka ga masolo a mmalwa ao a tsentšwego tirišong go šomana le ditlhohlo tše. Wona a akaretša ditiro tša tirišano go akgofiša kgolo ye e akaretšago mang le mang, magato a go akgofiša tiišetša ya ditšhelete, go akgofiša go tsenywa tirišong ga Lenaneo la rena la Peeletšo go Mananeokgoparara la R870 pilione le ka ga kgatelopele ye e dirilwego go rarolla mathata a mohlagase, go akaretšwa ka go diriša mohlagase wa go dirišwa leswa.
Kabinete e ipiletša go mafapha ka moka go boledišana ka ga mananeo ka moka a makaone le ditsenogare tše di dirilwego go šireletša ekonomi. Go bohlokwa go mafapha ka moka go netefatša gore ekonomi ya naga e ba le kgotlelelo. Mabapi le se, Kabinete e laetše gape Komiti ya Ditona ka ga Peeletšo go akgofiša diphetho tše bohlokwa ka moka tše di amanago le ekonomi. Kabinete e bušeletša gore go kgotlelela ga ekonomi ya Afrika Borwa go agilwe go methopo ye e kwagalago ya ekonomi le melaotshepetšo ye e ka phethagatšwago.
5.3. Kabinete e lemogile ka ga molato wa kgorotsheko wo o tsentšwego ke Lekgotla la Meepo la Tšhata ya Meepo gore o bonwe bjalo ka wo o sa sepelelanego le molaotheo le gore o se šome. Kabinete e bušeletša gore melawana ya Tšhata ya Meepo e ikemišeditše go fetoša intasteri ya meepo go rarolla go se lekalekane ga nakong ye e fetilego fao go hlohleleditšwego ke kgethologanyo gore intasteri ye e sepelelane le diphetogo tša phetošo ya Afrika Borwa ka kakaretšo mabapi le seemo sa setšhaba, sa dipolotiki le ekonomi. Tlhatlošo ya setšhaba gape ke lefapha la nepišo le bohlokwa go netefatša gore tlhabollo ya meepo ga e phaele thoko ditšhaba tše di amegago.
5.4. Kabinete e ipiletša go bašomiši ba ditsela ka moka, kudukudu bao ba tla bego ba swere maeto mo nakong ya maikhutšo ye e tlago, go raloka tema ya bona ka go rwala maikarabelo go polokego ya bona le a bašomiši ba bangwe ba tsela. Go fediša dikotsi tša mebileng go tšwela pele go ba selo se bohlokwa maemong a bosetšhaba. Baotledi ba swanetše go ntšha mahlo dinameng, ba obamele melao ya tsela, ba se ke ba otlela ba nwele, ba obamele mabelo a o a beilwego ditseleng le go netefatša gore difatanaga tša bona di loketše tsela.
5.5. Kabinete e lebogiša bathopasefoka ka moka ba Difoka tša Bosetšhaba tša Ditokelo tša Bagolofadi tše di swerwego ka la 11 Hlakola 2016. Difoka tše di lemoga batho bao ba golofetšego le ditokelo tša bagolofadi bao ba šomilego gabotse kudu ka ngwaga wa 2015.
5.6. Kabinete e reta bathopasefoka ka moka ba Difoka tša Boraro tša Bosetšhaba tša Ngwaga ka Ngwaga tša Mešomo ye Mekaone tša Tirelo ya Maphodisa ya Afrika Borwa (SAPS), tšeo di hlomphago bokgoni bjo bo dirwago ke maloko a SAPS, maphodisa a maresefe le maloko a diforamo tša tlhapetšo ya setšhaba.
5.7. Kabinete e reta bangwadimmogo Mandla Dube le Leon Otto ba Pambili Media ka go filimi ya bona ya Kalushi: The Story of Solomon Mahlangu. MaAfrika Borwa a hlohleletšwa go bogela filimi ye e kgahlišago ye ya sepolotiki ye e bolelago ka ga phetogo ya mofsa wa mošemane wa mengwaga ye 19 go tšwa ka Mamelodi, Bohlabela bja Pretoria, go ba mogale wa Ntwa ya go lwela Tokologo. Kabinete e bušeletša gore mmušo o tla tšwela pele ka go diriša Kgoro ya Kgwebišano le Diintasteri le ya Bokgabo le Setšo, go tšwela pele go thekga kgolo ya intasteri ya bokgabo ka go keteka le go anega kanegelo ya Afrika Borwa.
5.8. Kabinete e lebogiša molwelatoka ya setšhaba Moruti Michael Lapsley ge a amogetše Sefoka sa Boditšhabatšhaba sa Khutšo Setšhabeng sa 2016 ka legorong la ‘Khutšo ya Lefase ka Bophara le Poelano – Modirakhutšo yo a Hlomphegago Maemong a Boditšhabatšhaba’.
5.9. Kabinete e reta Pieter du Preez ge leina la gagwe le šišintšwe go Difoka tša Mogolofadi wa Lefase yo a Ralokago Dipapadi wa Ngwaga tša Laureus, go latela ge a ralokile gabotse kudu ka 2015.
5.10. Kabinete e lebogiša Wayde van Niekerk yo a dirilego histori mabelong a go kitima ka lebelo ka go ba monna wa mathomo mo historing go kitima mabelo ka moka a mararo: la dimetara tše 100 ka afse ga metsotswana ye 10‚ la dimetara tše 200 ka fase ga metsotswana ye 20 le la dimetara tše 400 ka fase ga metsotswana ye 44‚ ka ge go tiišeditšwe ke Mokgatlo wa Boditšhabatšhaba wa Lekgotla la Diatleletiki.
6. Bao ba thwetšwego mešomong
6.1. Ga go batho bao ba thwetšwego mešomong bao ba begilwego ka mo kopanong ye ya Kabinete.
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
