Kgoro ya Dikamano le Tšhomišano ya Boditšhabatšhaba (DIRCO) ka tirišano le batseta le dintlo tša yona tša botseta dinageng tša ka ntle, e aba thušo ya dikgokagantšho le keletšo go ba leloko la kgauswi lebakeng la ge modudi wa Afrika Borwa nageng ya ka ntle a ka hlokofala.
Thušo ye e akaretša go:
- hwetša lengwalo la tumelelo ya go bušetša setopo ka nageng go tšwa ka Kgorong ya Maphelo
- kgokaganya maloko a lapa le ba tirelo ya bahu bao ba hlomphegago ka nageng yeo lehu le hlagilego gona
- go hwetša dikhotheišene tša go sepetša setopo go tla ka nageng le/goba tša go tšhuma setopo le/goba tša go boloka mohu ka nageng ya gabo, ge go kgopelwa bjalo ke ba leloko la kgauswi
- go aba tshedimošo ka ga maemo le ditshepedišo tša ka nageng ya gabo tše di amago mohu. Go swanetše go lemogwa gore ka tsela yeo motho a hlokofalago ka gona go ka ama ka fao ba taolo ya ka nageng ba šomago taba yeo ka gona.
Ge e le gore mohu o na le inšorentshe ya leeto, thoma ka go ikgokaganya le moabi wa inšorentshe go tseba ge eba mohu o tla thušwa lebakeng la ge a hlokofetše. Mmušo wa Afrika Borwa ga o abe thušo efe goba efe ya ditšhelete mabapi le lehu la modudi wa Afrika Borwa nageng ya ka ntle.
Bala tše ntši ka ga thušo ye e fiwago ge moAfrika Borwa a hlokofala nageng ya ka ntle. O ka ikgokaganya gape le Moemedi wa Afrika Borwa nageng ya ka ntle goba le Kgoro ya Maphelo mo nomorong ya mogala ya 012 395 8000.
