Ka fao o ka dirago kgopelo ya pušetšo ya tšhelete ya Motšhelo wa Tlaleletšo (VAT)

Baeti ba dinaga tša ka ntle bao ba etetšego Afrika Borwa ba ka dira kgopelo ya go lefša VAT ye e lefelwago dilo tše ba tšwago le tšona ka nageng ge palomoka ya boleng bja tšona bo feta R250. Kgopelo ye ya go bušetšwa tšhelete e swanetše go dirwa dikantorong tša Mosepediši wa Dipušetšo tša VAT. Dikantoro tše di ka Maemafofaneng a Boditšhabatšhaba a Johannesburg le ka Cape Town, ka mafelong a mmalwa a boputlo a mellwane ya naga le maemakepe a kgwebo ao a filwego mošomo wo.

Ge o reka dithoto, o no itsebiša gabonolo bjalo ka moeti wa naga ya ka ntle go bathuši ba ka lebenkeleng, gomme o kgopele lenaneotefo la motšhelo. Lenaneotefo la motšhelo le swanetše go ba le tshedimošo ka moka ye e latelago:

• tšhelete ya VAT ye e lefišwago, goba setatamente seo VAT e tsenywago go sona ka go palomoka ya tshenyegelo ya dithoto
• tekano le tlhalošo ka botlalo ya dithoto tše di rekilwego
• nomoro ya moswananoši ya lenaneotefo la motšhelo ye e nago le seriale
• leina le aterese ya moreki
• tšhelete ya VAT ye e lefišwago, goba setatamente seo go sona VAT ka kelo ya 15% e akareditšwego ka go palomoka ya tshenyegelo ya dithoto.

O swanetše go tliša ditokumente tša pele gammogo le dilo tše di rekilwego.