Nkhaviso wa Mendi wa Vunhenha

Nkhaviso wa Mendi wa Xitiyanhlana

Nkhaviso lowu wu nyikiwa vaakatiko va Afrika-Dzonga lava va nga endla ntirho lowu nga tolovelekangiki wa xitiyanhlana lowu vekeke vutomi bya vona ekhombyeni lerikulu, kumbe lava va nga lahlekeriwa hi vutomi bya vona vini eka ku ringeta ku ponisa vutomi bya munhu un’wana, kumbe hi ku ponisa nhundzu, endzeni kumbe ehandle ka Rhiphabuliki ya Afrika-Dzonga.

Malulamiselo

Risiva leri ri nyikiwa eka mitlawa yinharhu:

• Ntlawa wa 1 = Nsuku
• Ntlawa wa 2 = Silivhere
• Ntlawa wa 3 = Koporo.

Vuyimeri/swiphemu swa dizayini

Xikhavisokulu/vuyimeri

Xitlhangu, lexi nga endliwa hi dzovo ra xiharhi, ngopfungopfu ra homu, ra tlhuvutsiwa kutani ri lukiwa ku va ximakiwa xa ovhali leyi nga na vuandlalo byo tiyela swinene kutani xi hetisisiwa hi xikhomo xa mhandzi. Xigiya na tlhari swi fambisana na xitlhangu leswi swi nyikiwaka vayeni lava va endzelaka tiko ra ka hina vo huma emisaveni hinkwayo tanihi nyiko ya vunene.

Swiphemu

Xitlhangu

1. SS Mendi – yi yimele vunhenha bya masocha ya Afrika-Dzonga vantima yo tala na vaofisirikulobye va vona va valungu lava va nga nwela va ri endzeni ka SS Mendi. Xikwekwetsu lexi xi nwele endzhaku ka ku tlumbiwa naswona katsongo xi phatluriwe hi le xikarhi hi SS Darro ematini yo titimela ya Chanele ya Manghezi ekusuhi na Isle of Wight hi 21 Nyenyanyana 1917. A va ri endleleni yo ya eFurwa ku ya pfuna Manghezi hi nkarhi wa Nyimpi ya Misava yo Sungula.
2. Mamfani – ku haha ka mamfani empfhukeni wa lwandle ehenhla ka SS Mendi swi yimela mimoya masocha ya xitiyanhlana lama nga nwela. Tinsiva ta mamfani hi ndhavuko a ti nyikiwa ku khavisa masocha ya xitiyanhlana hi mikarhi ya tinyimpi ta vakoloni.
3. Ribye ro n’wetsima ra rihlaza – mbilu leyi kusuka eka kona swikombo leswinharhu swi humelela swi yimela mpfhuka lowu nga emhlweni eka ku nyika mpfuno na lava va nga eku xanisekeni hi mikarhi ya timhangu ta ntumbuluko na ku tikeriwa kun’wana loku tlulaka mpimo vaka kona nkarhi na nkarhi ematikweni ya misava.

Xivumbeko xa xikhomo

4. Nghala – tanihi xiyimeri xa ku saseka, matimba na vunhenha, yi yimeriwile hi mikondzo ya yona ku rhendzeleka na makumu ya xivumbeko xo khoma. Leswi swi kombisa ku rindziwa ka mindzilakani endzeni na le handle ka tiko ra ka hina, hi maAfrika-Dzonga lava tinyiketeleke na ku va na xitiyanhlayana. Swikombo leswinharhu swa ntivomisava swi yimeriwile hi ku hlanganisiwa ka swiluva swa mhangani yo bava, ximila xa Afrika-Dzonga xa xintu, lexi xi yimelaka nsihalalo na nkondzelelo na nkoka wa vutshunguri.

Xigiya na tlhari – swi tatisa eka xitlhangu tanihi swiyimeri swa nsirhelelo na vuxiximeki.