Sibonelelomali sekondla umntfwana welusiso

Ngesi

Yini lekumele uyente

Sikhatsi semsebenti

Ngabe kubita malini

Emafomu lagcwaliswako

Ngubani longamutsintsa

Mayelana nesibonelelomali sekondla umntfwana welusiso

Tfola sibonelelomali kute wondle umntfwanakho welusiso. Umntfwana welusiso ngumntfwana lonikwe yena yinkantolo kutsi umgcine ngenca yesizatfu sekutsi:

• uyintsandzane
• ushiyiwe/lahliwe 
• usebungotini 
• uhlukumetekile
• akanakekelwa

Ungati njani kutsi uyafaneleka?

Kute ufaneleke:

• kumele kutsi ube sakhamuti saseNingizimu Afrika, umhlali wesiphelane nome umkhoseliswa
• wena nalomntfwana kumele kutsi nihlale lapha eNingizimu Afrika
• lomntfwana welusiso kumele kutsi uniketwe yena ngekwemtsetfo futsi abhasojwe nguwe
• lomntfwana abe ngephasi kweminyaka le-18 budzala.

Utawutfola malini?

Utawutfola-R1 180 ngenyanga umntfwana ngamunye.

Utawukhokhelwa njani?

I-Ejensi yaseNingizimu Afrika Yesibonelelomali Setenhlalakahle (i-SASSA) itawukhokhela wena lesibonelelomali ngekusebentisa letindlela letilandzelako:

• ngekukunika kheshi endzaweni letsite yekuholela ngelusuku lolutsite
• ngekudiphozitha ngekwe-elekthroniki ebhange lakho nome ku-akhawunti yase-Postbank (libhange lingakukhokhisa ngekukusita kuloko)
• ngesikhungo lesisebenta kalawula leso sibonelelomali (sib. inhlangano yetenhlalakahle).

Caphela: Nangabe awukhoni kutilandzela wena ngekwakho lemali, ungakhetsa longakwentela loko losehhovisi laka-SASSA, nome unike lomunye emandla/ligunya  ekutsi akulandzele lesibonelelomali esikhundleni sakho.

Lesibonelelomali singabuketwa nini?    

Lesibonelelomali sitawubuketwa nakuphela sikhatsi semyalo wenkantolo. Kwanyalo loku kwenteka njalo ngeminyaka lemibili. Utakwatiswa kusasele tinyanga letintsatfu ngesidzingo sekubuketa lesibonelelomali.

Nangabe utfola imali yakho ebhange, ngesikhungo nome ngekusitwa ngumlawuli kutawudzingeka kutsi ugcwalise sitifiketi sekuphila (idokhumenti lefakazela kutsi solo usaphila) ehhovisi laka-SASSA minyaka yonkhe. 
    
Lesibonelomali salomntfwana singamiswa nini?    

Loku lokulandzelako kungaholela ekutseni sibonelomali simiswe:

• nangabe timo tekuphila takho tigucuka
• umphumela wekubuketa
• nangabe wehluleka kukhombisa kubambisana ngesikhatsi kubuketwa lesibonelelomali salomntfwana
• nangabe wenta inkhohlakalo nome ungammeli ngalokungiko lomntfwana
• nangabe kube neliphutsa ngesikhatsi kuvunywa lesibonelelomali salomntfwana

Ngabe lesibonelelomali sitawuphelelwa nini sikhatsi?    

Lesibonelelomali sitawuphelelwa sikhatsi nangabe:

•  lomntfwana andlula emhlabeni nome  umtali welusiso wekugcina lophilako kubatali
• lomntfwana amukelwa esikhungweni sembuso
• nangabe umbhasobhi angasitsatsi lesibonelelomali kute kube tinyanga letintsatfu letilandzelanako
•  wena ungekho kulelive
• lomntfwana akasabhasojwa nguwe njengemtali welusiso
• awusasuye umkhoseliswa.

Yini lekufanele kutsi ukwente

1. Hamba uye emahhovisi e-Ejensi yaseNingizimu Afrika Yesibonelelomali Setenhlalakahle (i-SASSA) lasedvute nalapho uhlala khona ute uphetse loku lokulandzelako:
   • matisi wakho lonebhakhodi yemadijithi la-13 (i-ID) kanye nesitifiketi sekutalwa salomntfwana
   • nangabe ungumkhoseliswa, imvume yesimo sakhe namatisi wakho wekuba ngumkhoseliswa.
   • nangabe ute matisi nome sitifiketi sekutalwa salomntfwana:
     • Gcwalisa lifomu le-afidavithi laka-SASSA embikwaKhomishina Wekufungisa longasiso siphatsimandla saka-SASSA.
     • Letsa sitatimende lesifungelwe lesisayinwe ngumuntfu lowatiwako (njengelikhansela, umholi wendzabuko, sisebenti setenhlalakahle, umholi wetenkholo nome thishelanhloko) lowati wena lofaka lesicelo kanye nalomntfwana
     • Siphatsimandla saka-SASSA sitawutsatsa emavengevenge emino yakho. Utawubese-ke wendluliselwa kuLitiko Letasekhaya kute lapho  utawufike ufake khona sicelo samatisi njengaloku-ke sicelo sakho sisasetjentwa. Nangabe ungamtfoli matisi, sibonelelomali sakho sitawumiswa.
     • Bufakazi bekutsi usifakile sicelo samatisi kanye/nome sitifiketi sekutalwa kuLitiko Letasekhaya.
     • Matisi wesikhashana lokhishwe Litiko Letasekhaya (nangabe akhona).
     • Sitifiketi sekubhabhadiswa nangabe sikhona.
     • Likhadi lekuya emtfolamphilo nalikhona.
     • Nangabe lomntfwana usasesikolweni, sitifiketi sesikolo salomntfwana
   • Si(ti)tifiketi se(te)kutalwa semntfwana/ sebantfwana, nome bomatisi babo balelo live labadzabuka kulo
   • Umyalo wenkantolo lotsi lomntfwana ubhasojwa nguwe
   • Bufakazi besimo sakho semshado.
2. Gcwalisa lifomu lesicelo embikwesisebenti saka-SASSA (caphela kutsi nguwe kuphela njengalofaka sicelo nome siphatsimandla saka-SASSA lesingagcwalisa lelo fomu).
3. Utawunikwa siliphi. Sigcine njengebufakazi bekutsi ufake sicelo.

Kwentekani nangabe sicelo sakho asivunywa?

Nangabe sicelo sakho asivunywa, i-SASSA itakwatisa ngekukubhalela incwadzi ikuchazele kutsi kungani singakaphumeleli sicelo sakho.

Nangabe ungavumelani nalesincumo, ungafaka sicelosikhalo eNdvuneni Yetekutfutfukiswa Kwenhlalakahle ehhovisi lavelonkhe leLitiko Letekutfutfukiswa Kwetenhlalakahle, uchaze kutsi kungani ungavumelani nalesincumo. Sicelosikhalo sakho kufanele kutsi usente kungakapheli tinsuku letinge-90 watisiwe kutsi sicelo sakho asikaphumeleli.

Kutsatsa sikhatsi lesingakanani

• Kungatsatsa tinyanga letintsatfu kusebenta sicelo sakho.
• Nangabe sibonelelomali sakho sivunyiwe, utawukhokhelwa ngelusuku inkantolo leyakhipha ngalo umyalo wekutsi lomntfwana abhasojwe nguwe.

Kubita malini

Kumahhala

Emafomu lekumele kutsi agcwaliswe

Lifomu lekufaka lesicelo alitfolakali ku-inthanethi, kodvwa ungalitfola ehhovisi laka(SASSA) lelisedvute.

Ungatsintsa bani

I-Ejensi yaseNingizimu Afrika Yesibonelelomali Setenhlalakahle (i-SASSA)