Tšhelete ya thušo ya kgodišo ya bana ba ditšhiwana

Ka ga

Seo o swanetšego go se dira

Lebaka

E dira tshenyagelo ya bokae

Diforomo tšeo di swanetšwego go tlatšwa

Dintlha tša boikopanyo

Mabapi le tšhelete ya thušo ya kgodišo ya bana ba ditšhiwana

Hwetša tšhelete ya thušo ya go hlokomela ngwana wa gago wa tšhiwana. Ngwana wa tšhiwana ke ngwana yo o filwego yena ke kgorotsheko gore o mo hlokomele ka lebaka la ge:

• a hlokofaletšwe ke batswadi
• a tlogetšwe a sa hlokomelwe 
• a le kotsing 
• a tlaišitšwe 
• a hlokomologilwe.

Naa o tseba bjang gore o na le maswanedi?

Go ba le maswanedi:

• o swanetše go ba modudi wa Afrika Borwa, modudi wa sa ruri wa ka nageng goba o le mofaladi
• wena le ngwana wo le swanetše go dula ka Afrika Borwa
• ngwana wa tšhiwana o swanetše go bewa ka fase ga tlhokomelo ya gago gomme ngwana o swanetše go dula a le ka fase ga tlhokomelo ya gago
• ngwana o swanetše go ba le mengwaga ya ka fase ga ye 18.

Naa o tla hwetša bokae?

O tla hwetša R1 180 ya ngwana o tee ka kgwedi.

Naa o tla lefša bjang?

Setheo sa Tšhireletšo ya Leago sa Afrika Borwa (SASSA) se tla go lefa tšhelete ye ya leago ka o mongwe wa mekgwa ye e latelago:

• ka kheše ka lefelong le itšego ka letšatši le itšego
• ka go teposita tšhelete yeo ka elektroniki ka akhaonteng ya gago ya panka goba ka akhaonteng ya Panka ya poso (panka e ka go lefiša tirelo ye) 
• go sehlongwa seo se šomago bjalo ka molaodi wa tšhelete ye ya leago (go fa mohlala, mokgatlo wa bobotlana).

Hlokomela: Ge e le gore ga o kgone go amogela tšhelete ka bowena, o ka thwala ramolao ka kantorong ya SASSA goba wa fa motho yo mongwe maatla a ramolao a gore a amogele tšhelete yeo legatong la gago

Naa tšhelete ye ya gago ya leago e tla lekodišišwa leswa neng?

Tšhelete ye ya leago e tla lekodišišwa ge taelo ya kgorotsheko e fela. Mo lebakeng le se se dirwa ka morago ga mengwaga ye mengwe le ye mengwe ye mebedi. O tla tsebišwa dikgwedi tše tharo pele ga nako ka ga tlhokego ya go lekodišiša tšhelete ye ya leago.

Ge o hwetša tšhelete ka pankeng, go sehlongwa goba go ramolao, o kgopelwa go tlatša setifikeiti sa bophelo (sengwalwa sa bohlatse bja gore o sa phela) ka kantorong ya SASSA ngwaga o mongwe le o mongwe.
Naa tšhelete ya gago ya thušo ya leago e ka fegwa neng?

Dilo tše di latelago di ka feletša ka go fegwa ga tšhelete ya gago ya thušo ya leago:

• ge maemo a gago a fetoga
• dipoelo tša tekodišišo
• ge o palelwa ke go dirišana ge tšhelete ya gago ya thušo ya leago e lekodišišwa leswa
• ge o dira bomenetša goba o bolela maaka ka ga wena

• ge e le gore go bile le phošo ge thušo ya leago ya ngwana e dumelelwa.

Naa tšhelete ya gago ya thušo ya leago e tla felelwa ke nako neng?

Tšhelete ya thušo ya leago e tla felelwa ke nako ge:

• ngwana a ka hlokofala goba ge go ka hlokofala motswadi wa mafelelo yo a hlokometšego ngwana wa tšhiwana
• ngwana a hlokometšwe sehlongweng sa mmušo
• ge tšhelete ya thušo ya leago e sa latwe mo dikgweding tše tharo tša go latelana
• ge o se gona ka nageng
• ge ngwana wa tšhiwana a sa hlwe a hlokometšwe ke wena

• ge o sa hlwe o le mofaladi.

Se o swanetšego go se dira

1. Eya kantorong ya kgauswi le fao o dulago gona ya Setheo sa Tšhireletšo ya Leago sa Afrika Borwa (SASSA) o tle le tše di latelago:
   • Pukwana ya gago ya boitsebišo (ID) ya pakhoute ya dinomoro tše 13 le setifikeiti sa matswalo sa ngwana.
   • Ge e le gore o mofaladi, phemiti ya maemo a gago a bofaladi le Pukwana ya Boitsebišo ya bofaladi.
   • Ge e le gore ga o na le pukwana ya boitsebišo goba setifikeiti sa matswalo sa ngwana:
     • Tlatša abitabiti go fomete ya tlwaelo ye e tlwaelegilego ya SASSA go na le Mokhomišenare wa tša Boikano yo e sego mohlankedi wa SASSA.
     • Etla le setatamente sa boikano seo se saennwego ke motho wa seriti (go swana le mokhanselara, moetapele wa setšo, modirelaleago, moruti goba hlogo ya sekolo) yo a go tsebago le ngwana. 
     • Mohlankedi wa SASSA o tla tšea kgatišo ya menwana ya gago. O tla romelwa go Kgoro ya Merero ya Selegae go ya go dira kgopelo ya pukwana ya boitsebišo ge kgopelo ya gago e sa šongwa. Ge o sa hwetše pukwana ya boitsebišo, tšhelete ya gago ya thušo ya leago e tla fegwa.
     • Romela bohlatse bja gore o dirile kgopelo ya pukwana ya boitsebišo le/goba ya setifikeiti sa matswalo Kgorong ya Merero ya Selegae.
     • Romela pukwana ya boitsebišo ya lebakanyana ye e abilwego ke Kgoro ya merero ya Selegae (ge e le gona).
     • Tliša setifikeiti sa kolobetšo ge se le gona.
     • Romela karata ya go hlabela ngwana kliniking ge e le gona
     • Ge e le gore ngwana o tsena sekolo, tliša setifikeiti sa sekolo sa ngwana.
   • Setifikeiti/disetifikeiti tša matswalo tša ngwana/bana, goba dingwalwa tša boitsebišo tša bona go tšwa nageng yeo ba belegwego go yona
   • Taelo ya kgorotsheko yeo e beilego ngwana ka fase ga tlhokomelo ya gago
   • Bohlatse bja maemo a gago a lenyalo.
2. Tlatša fomo ya kgopelo go na le mohlankedi wa SASSA (hlokomela gore ke wena fela bjalo ka mokgopedi goba mohlankedi wa SASSA yo a ka tlatšago fomo ya kgopelo).
3. O tla fiwa selipi. Se beye bjalo ka bohlatse bja gore o dirile kgopelo.

Naa bjale ge kgopelo ya gago e ka se dumelelwe?

Ge kgopelo ya gago e ka se dumelelwe, SASSA e tla go tsebiša ka lengwalo gore ke ka lebaka la eng e se ya atlega.

Ge o sa dumelelane le sephetho se, o ka dira boipelaetšo go Tona ya Kgoro ya Tlhabollo ya Leago ka kantorong ya bosetšhaba ya Kgoro ya Tlhabollo ya Leago, o hlaloša gore ke ka lebaka la eng o sa dumelelane le sephetho se. O swanetše go dira boipelaetšo mo matšatšing a 90 ka morago ga ge o tsebišitšwe gore sephetho sa gago ga se sa atlega.

Go tšea lebaka le lekaakang

• Go ka tšea go fihla go dikgwedi tše tharo go šoma kgopelo ya gago.
• Ge kgopelo ya gago e dumelelwetšwe, o tla lefša go thoma ka letšatšikgwedi leo kgorotsheko e beilego ngwana ka fase ga tlhokomelo ya gago.

Go bitša bokae

Tirelo ye ga e lefelwe.

Difomo tše o ka di tlatšago

Fomo ya kgopelo ga e hwetšagale inthaneteng, eupša o ka e hwetša kantorong ya kgauswi le wena ya SASSA.

O ka ikgokaganya le mang

Setheo sa Tšhireletšo ya Leago sa Afrika Borwa (SASSA)