UmHlangano oKhethekileko weKhabinethi ngethungelelwano levidiyo ubanjwe namhlanje, mhlana ali-15 kuSihlabantangana wee-2020, ngomnqopho wokubonisana ngehlelo lokuvuselelwa komnotho ngemva kokuQinteliswa Kweminye Imisebenzi Namakhambo ngonobangela we-COVID-19.
Lokhu kulandela isimemezelo esenziwa nguMengameli u-Cyril Ramaphosa eemvekeni ezimbili ezidlulileko, bonyana iKhabinethi izakuba nemikhulumiswano epheleleko yokwakha iqhinga lokuvuselela umnotho welizwe lekhethu.
Kwethulwe izethulo ezihlanu ezivela eenqhemeni zeminyango namkha amatlasta: (1) AmaKoro WezomNotho, AmaSiso, UkuThuthukiswa KwemiSebenzi NomThangalasisekelo; (2) UkuPhatha, AMandla WomBuso kunye nokuThuthukiswa KwamaZiko WomBuso; (3) UkuVikeleka KwezeHlalakuhle, UkuThuthukiswa KomPhakathi NabaNtu; (4) ITjhebiswano LamaZwe NgamaZwe, IRhwebo NokuVikeleka; kunye (5) nezoBulungiswa, UkuKhandelwa KobuLelesi NokuVikeleka.
Lezizethulo bezimphumela womsebenzi owenziwe ziinqhema zoke zeKhabinethi, ngokuqalana nokuvuselelwa komnotho ofadalaliswe yi-COVID-19, kunye nokwehliselwa ezingeni eliphasi komnotho weSewula Afrika ziinhlangano ezilinganisa umnotho namandla welizwe wokukghona ukujamelana neenkolodo zalo, i-Moody’s ne-Fitch.
IKhabinethi ivumelene ngokuthi kusafuneka kubanjwe eminye imikhulumiswano nokubonisana ngaphambi kokuphasiswa kweqhinga lokuphela elihlanganisiweko elizakubikelwa isitjhaba seSewula Afrika.
Zoke iinqhema zeKhabinethi zikhonjelwe ukusebenzisana ukobana kwethulwe umtlolo munye ngamaqalontanzi aphambili wehlelo lokuvuselelwa komnotho welizwe, ekufuze uphele ngaphambi komHlangano weKhabinethi obekelwe ukubanjwa ngoMvulo mhlana ama-20 kuSihlabantangana wee-2020.
IKhabinethi ibuye yalayela uNgqongqotjhe wezamaBhizinisi womBuso u-Pravin Gordhan bonyana alungise umbiko okhitjelelweko ngeKampani yeemPhaphamtjhini yeSewula Afrika (i-SAA), ekuzakukhulunyisanwa ngawo emhlanganweni olandelako. Ngemva kwalokho-ke, iKhabinethi izakuqedelela ihlelo lokuvuselelwa komnotho welizwe.
IKhabinethi ithokoza boke abantu elizweni lokeli ngokuhlala kwabo ekhaya ngesikhathi sokuqinteliswa kweminye imisebenzi namakhambo.
Imibuzo Ingathunyelwa:
uMma uPhumla Williams – UmJaphethe womKhulumeli weKhabinethi
INomboro Kafunjathwako: 083 501 0139
