Ka fao o ka arabelago go dula nageng ka ntle le molao

Bobedi naga ya mmušo (naga ye e laolwago ke mmušo wa bosetšhaba goba wa profense goba masepala) le naga ye e lego ya phraebete go ka dulwa go tšona ka ntle le molao.

Mmušo o na le mošomo wa molaotheo go netefatša – fao go nyakegago le ka methopo ye e lego gona – gore badudi ka moka ba ipshine ka ditokelo tša bona tša motheo ka go hwetša naga le dintlo. Ge batho ba dula nageng ka bontši ka ntle le molao, mmušo o na gape le mošomo wa go thuša beng ba naga ya phraebete go šireletša naga ya bona.

Ge batho bao ba dulago nageng ka ntle le molao bao ditokelo tša bona tša motheo di sego kotsing ba swanetšego go tlošwa fao nageng, mong wa naga ya phraebete o swanetše, ka ntle le go senya nako, go ya kgorong ya tsheko go yo kgopela taelo ya go raka batho bao go latela Molao wa Naga wa Thibelo ya Go raka Batho le Go Dula Nageng mo go sego Molaong, wa 1998 (Molao wa 19 wa 1998). Molao wo mo lebakeng le o phethagatšwa ke Kgoro ya Madulo a Batho gomme o tla fetišetšwa go Kgoro ya Tlhabollo ya Dinagamagae le Peakanyoleswa ya Naga (DRDLR) mo lebakeng le le sa fetšego pelo.

Ge e le gore naga ya gago ya phraebete go dulwa go yona ka ntle le molao, o ka ya:

  • kgorotshekong ka ntle le go senya nako go yo kgopela taelo ya go raka batho bao go latela Molao wa Naga wa Thibelo ya Go raka Batho le Go Dula Nageng mo go sego Molaong, wa 1998.
  • kantorong efe goba efe ya Kgoro ya Tlhabollo ya Dinagamagae le Peakanyoleswa ya Naga (DRDLR) go hwetša thušo ge e le gore go dula nageng fao ka ntle le molao go dirilwe ka lebaka la ge batho bao ba dutšego fao nageng yeo ka ntle le molao ba nyaka phihlelelo ya naga ya temo.
  • masepaleng wa selegae wa lefelo leo goba, ge go hlokagala, Kgorong ya Bodulo bja Batho ya profense goba ya bosetšhaba go hwetša thušo ge e le gore batho bao ba dutšego fao ka ntle le molao ba hloka dintlo.

Kgoro ya Tlhabollo ya Dinagamagae le Peakanyoleswa ya Naga e tla:

  • thuša batho bao ba dutšego nageng efe goba efe ya mmušo goba ya phraebete ka ntle le molao bao ba nyakago goba bao ba se nago le naga ya temo go hwetša phihlelelo ya naga ya maleba ya temo
  • thuša balaodi ba bangwe ba mmušo go hweletša batho bao ba dutšego nageng ka ntle le molao bao ba hlokago dintlo naga ye nngwe ya maleba ya maswanedi
  • fao go nyakegago le fao go nago le mabaka ao a kgethegilego, e tla thuša beng ba naga ya phraebete ya temo bao naga ya bona batho ba dutšego go yona ka ntle le molao go hudušetša batho bao ba nyakago naga ya temo nageng ye nngwe ya maleba.

Batho bao ba sa kgonego go hwetša naga ya temo ba ka ya go Kgoro ya Tlhabollo ya Dinagamagae le Peakanyoleswa ya Naga go hwetša thušo ya mabapi le go hwetša naga ya temo ya maleba.

Batho bao ba nyakago dintlo ba ka ya masepaleng wa selegae goba, ge go hlokagala, ba ya Kgorong ya Bodulo bja Batho ya profense goba ya bosetšhaba go hwetša thušo.

Go hwetša dintlha ka botlalo mabapi le ka fao o ka arabelago go dula nageng ka ntle le molao ikgokaganye le Kgoro ya Tlhabollo ya Dinagamagae le Peakanyoleswa ya Naga.

 

Share this page