Kabinete e kopane ka Laboraro la 10 Mopitlo 2017, ka Tuynhuys, Cape Town.
1. Seboka sa tša Ekonomi sa Lefase ka ga Afrika
1.1. Kabinete e amogela go swarwa fao go atlegilego ga Seboka sa bo 27 sa tša Ekonomi sa Lefase seo go sona Mopresidente Jacob Zuma a etilego pele Team South Africa, Dihlogo tša Dinaga le Mebušo go tšwa ka khonthinenteng ya Afrika, baetapele ba diintasteri ba lefaseng ka bophara le baetapele ba dikgwebo le ba setšhaba. Khonferentshe e swerwe ka fase ga morero wa: “Re fihlelela kgolo ya mang le mang: boetapele bjo bo arabelago le bja maikarabelo”.
1.2. Kopano ye ya bo 27 ya Seboka sa tša Ekonomi sa Lefase ka ga Afrika e tiišeleditše leswa go lefase gore Afrika Borwa e tšwela pele go ba karolo ya lefelo leo go nago le kgonagalo ya gore le ka ba la dipeeletšo ka khonthinenteng ya Afrika. Barulaganyi ba yona ba tiišeditše gore baromiwa ba go feta ba 1 000 ba tsenetše tiragalo ye, e lego palo yeo e sego ya ka ya bonwa peleng ge e bapetšwa le Seboka seo se fetilego sa tša Ekonomi sa lefase ka ga Afrika.
1.3. Moya wo o tiilego wa boetapele gareng ga mmušo le ba kgwebo ka nakong ya WEFA o be o le o mokaone kudu. Dipoledišano tše di humilego di file Afrika Borwa sebaka sa go laetša kgatelopele yeo e e dirago go fihleleleng ga kgolo ya ekonomi le go laetša gore Afrika Borwa e buletše kgwebo. Afrika Borwa e tšwela pele go ikgafa go dula e šoma go phethagatšeng ga Leanotlhabollo la Bosetšhaba (NDP) go fokotša maemo a bohloki, tlhokego ya tekatekano le tlhokego ya mešomo.
2. Dinamelwa
2.1 Go tsebagatšwa semmušo ga ditimela tše diswa tša Setheo sa Ditimela tša Banamedi sa Afrika Borwa (PRASA) le tirelo ya ditimela, ka Mopresidente Jacob Zuma ka la 9 Mopitlo 2017 ka Seteišeneng sa Pretoria ke karolo ya boikgafo bjo bo tšwelago pele bja mmušo bja go netefatša gore go ba le dinamelwa tša setšhaba tša go se ture le tšeo di tshephagalago, le go thekga mananeokgoparara a ka nageng.
2.2 Ditimela tše diswa tša Metrorail (tšeo di rwalago Batho) ke karolo ya dinamelwa tše diswa tšeo di tlago abja ke mmušo mo mengwageng ye e tlago ye 10 go fihla go ye 15 bjalo ka karolo ya Lenaneo la Tirišo ya Sebjalebjale la PRASA. Lesolo le le tla hloma mešomo le dibaka tša mešomo tše diketekete tša go ya go ile, fao e lego gore pholante ya tšweletšo ya ditimela tše diswa e a agwa ka Nigel, Ekurhuleni. Ke mathomo a tsenyotirišong ya tumelelano ya France le Brazil yeo e saennwego gareng ga PRASA le Alstom
2.3 Ditimela tše diswa tša maemo a godimo tša Metrorail (tšeo di rwalago Batho) di tla fetoša maitemogelo a boeti a banamedi a go se bapetšwe a boiketlo le tirelo. Ke karolo ya tlhabollo ya ekonomi ka mmušo ka go diriša tlhabollo ye kgolo ya mananeokgoparara ebile a kgona go dirišwa gabonolo ke bagolofadi.
2.4 Kabinete e dirile boipiletšo go maAfrika Borwa ka moka gore a ikgantšhe le go šireletša ditimela tše diswa kgahlanong le ditiro tša tshenyo.
3. Ditšhupetšo Tša Ka Vuwani
3.1 Kabinete e amogela tsenogare ye e atlegilego yeo e dirilwego ke Mopresidente Zuma ka Vuwani, Limpopo. Mopresidente o kopane le Mohlomphegi Kgoši Toni Mphephu Ramabulana wa MaVenda, le bakgathatema ba bangwe ba setšhaba go hwetša ditharollo tše kaone go mathata ao a tšweleditšwego.
3.2 Kopano e amogetše tšhišinyo ya Kgoši ya gore Masepala wa Selete wa Vhembe o swanetše go abela batho ba Vuwani ditirelo mola e le gore tharollo ya go ya go ile ka ga bothata bja mellwane e a hwetšwa. Tharollo ye e šišintšwego e sepelelana le melao ye e amegago yeo e laolago mebasepala.
3.3 Go ile gwa tšwela pele gwa tšewa sephetho sa gore dikgoro tša mmušo tša bosetšhaba le tša profense tša maleba di swanetše go fa masepala wo wa selete thekgo gore o phethagatše mošomo wa ona. Le ge go le bjale kopano ye e gateletše gore sephetho se ga se re gore masepala o moswa (wa LIM 345) o a fedišwa. Sephetho se ke karolo ya boikgafo bja mmušo bja go hwetša tharollo yeo e akaretšago mang le mang.
3.4 Go rerišana le Mopresidente le bakgathatema ka moka go feleleditše ka gore dikolo le dikgwebo di boele di tsene le go gweba ka fao go tlwaelegilego. Kabinete e reta bakgathatema go phethagatša ditumelelano tšeo di rulagantšwego ke Kgoši. Mopresidente o ikgafile gore o tla boa setšhabeng sa Vuwani go rerišana le setšhaba ka letšatšikgwedi leo le sa tlogo bewa le Mohlomphegi Kgoši Toni Mphephu Ramabulana le bakgathatema ka moka ba maleba ka lefelong leo.
3.5 Kabinete e ipiletša go batswadi le go setšhaba go thekga ditsenogare tšeo di dirilwego ke kgoro go netefatša gore baithuti ba boela ka diphapošing tša thuto gomme ba ithuta le go tsenela dithuto tša tlaleletšo tšeo di ka ba dirago gore ba se hlwe ba šaletše morago ka go diriša ditsenogare tšeo di abelwago dikolo ka moka tša fao.
4. Ditšhupetšo Tša Dikgaruru
4.1 Kabinete e ipiletša go ditšhaba go tlogela go dira ditiro tša dikgaruru, botšhošetši le go tšeela batho dithoto ge di tšweletša dipelaelo tša tšona. Dikgaruru le ditiro tša go tšeela batho dithoto le go senya dithoto tša kgwebo tšeo di sa tšwago go direga ka Coligny, Eldorado Park, le ka Ennerdale di kgalengwa ka bogale ke Kabinete.
4.2 Kabinete e ipiletša go ditšhaba go tšweletša dipelaelo tša bona ka mokgwa wo o nyakago ditharollo ka ntle le go senya thoto ya setšhaba goba go gataka ditokelo tša maloko a mangwe a setšhaba.
4.3 Mopresidente o dirile boipiletšo ka 2015 ge a be a efa Polelo ya Maemo a Setšhaba, a ipiletša go Sehlopha sa tša Toka, Thibelo ya Bosenyi le Tšhireletšo (JCPS) go tiiša letsogo go dikgaruru le ditšhupetšo tšeo di nago le tshenyo. Kabinete e bušeletša boipiletšo bjo gore bao ba tshelago molao ba tla lebana le letsogo la molao.
4.4 Kabinete e ipiletša go bakgathatema ka moka go rerišana ka nepo ya go rarolla dithulano ka lebelo ka Ennerdale, Eldorado Park le ka Coligny.
5. Molaokakanywa Wa Lefelo La Bohlodi Ka Ga Ditšhelete
5.1 Kabinete e amogela go saenelwa ga Molaokakanywa wa Lefelo la Bohlodi ka ga Ditšhelete (FICA) go ba molao ke Mopresidente Zuma. Afrika Borwa ke karolo ya setšhaba sa lefase ka bophara seo se ikgwerantšego le go lwantšhana le ditiragalo tša mabapi le ditšhelete tšeo di sego molaong, e tla dirišana le tsenogare ya boditšhabatšhaba yeo e nyakago go lwantšhana le ditiro tša go sepetša tšhelete ye e hweditšwego ka ntle le molao gore e bonwe bjalo ka yeo e lego molaong le botšhošetši bjo bo dirwago ditšheleteng.
5.2 Molaokakanywa wo gape o tsenya letsogo go maatlafatša go hloka sephiri le seriti sa tshepedišo ya ditšhelete ya Afrika Borwa le go dira gore go be boimanyana gore basenyi ba kgathe tema ka go efogeng ga metšhelo, ka ditirong tša go sepetša tšhelete ye e hweditšwego ka ntle le molao gore e bonwe bjalo ka yeo e lego molaong le tshepedišo ya dišhelete ye e sego molaong ka go tšhabela go šomiša tshepedišo ya ditšhelete ya Afrika Borwa. Se se bopa ye nngwe ya ditlabelo tše re nago le tšona bjalo ka naga go lwantšha bosenyi bja ka dikantorong ka go bobedi lekaleng la phraebete le la setšhaba.
5.3 Kabinete e sedimošitšwe ke Tona ya Ditšhelete gore ditherišano di tšwela pele gomme di tla phethwa mo nakong ye e sa fetšego pelo go realo e le go netefatša gore go tla ba le tshepedišo ya go tsebagatša melawana yeo e tlago tsenya tirišong Molao wa FICA.
6. Diphetho Tša Kabinete
6.1 Tona ya Ditšhelete e sedimošitše Kabinete ka ga dikopano tšeo di sa tšwago go swarwa tša Lehlabula tša Sekhwama sa Ditšhelete sa Boditšhabatšhaba (IMF)/Panka ya Lefase, dikopano tša Dipeeletšo tša go ya Setšhabeng le Seboka sa tša Ekonomi sa Lefase ka ga Afrika. O tšwetše pele go ba sedimoša ka ga ditšhišinyo tša Tumelelano ya G20 le Afrika le dipelaelo tša babeeletši le tša ditheo tša Kelo ya Maemo a Ekonomi. Go bile le poledišano ye e tseneletšego ka ga seemo sa ekonomi lefaseng le sa ka dileteng, gomme seo re swanetšego go se dira go bušetša morago ditheošo tša maemo a ekonomi.
6.2 Kabinete e bušeleditše gore e sa ikgafile go seemo sa melawana ya ditšhelete seo se hlagišitšwego ka go Polelo ya Ditekanyetšo tša 2017, go phethagatša dipeakanyoleswa tša go kaonafatša pušo ka dikhamphaning tša mmušo; go tšwetša pele mollwane wo o beilwego wa tshenyegelo le go netefatša gore dikoloto tša mmušo di ba maemong a makaone. Lenaneo la mmušo ka ga go akgofiša go tsenywa tirišong ga dipeakanyoleswa tša makala tše di ikemišeditšego go thekga kgolo ya ekonomi ka ge go beilwe ka go Leano la Dintlha tše Senyane le tšwela pele go ba maleba go rarolla a mangwe a mathata ao a tšweleditšwego ke babeeletši.
6.3 Kabinete e amogela pego ye e sa tšwago go lokollwa ke feme ya EY Consultancy ka ga Peeletšothwii ya Dinaga tša ka ntle ka Afrika. Pego ye e bolela gore Afrika Borwa ke ye nngwe ya dinaga tše di tletšego ka ditiragalo tša ekonomi gomme yona e beilwe maemong a bobedi ka Dipalopalong tša 2017 tša Bogoketši bja Ekonomi ka Afrika.
6.4 Kabinete e ile ya sedimošwa gape ka ga diketelo tše di tlago tša Ditheo tša Kelo ya Ekonomi go tla go boledišana le dikhamphani tše mmalwa le balaodiphethiši ba mmušo.
6.5 Kabinete e dumeletše Sethalwa sa Leano leo le Lekodišišitšwego la Dinamelwa tša Dinagamagaeng. Leano le le fetola dilo tšeo di beilwego pele ka go mebasepala ya selete ya dinagamagaeng le diprofense, ka go rarolla kabo ye e hlaelelago ya Mananeokgoparara a Dinamelwa tša Dinagamagaeng le ditirelo tšeo di fokotšago tlhabollo ya ekonomi ya setšhaba.
Go tsenywa tirišong ga leano le go tla tsenya letsogo ka go tlhabollo ya ekonomi ya kgauswi le ya profense ka go kaonafatša phihlelelo go dinamelwa tša bohle. Se se tla oketša kgokagano gareng ga mafelo a ditoropong le a dinagamagaeng, ka nepo ya go tsenya tikologo ya dinagamagae ka go ekonomi ya bohle.
6.6 Kabinete e dumeletše Molawanakakaretšo wa Dinamelwa tša Lewatle. Se se laetša boikgafo bja mmušo go kgolo, tlhabollo le phetošo ya lekala la dinamelwa tša lewatleng la Afrika Borwa, go thekga tlhabollo ya ekonomi ya setšhaba mola ka go le lengwe re tsenya letsogo ka go kgwebišano ya boditšhabatšhaba.
Se se sepelelana le dilo tšeo mmušo o di beilego pele tše di amanago le Operation Phakisa ka ga go godiša Ekonomi ya Lewatle. E sepelelana gape le dinepo ka kakaretšo tša go tšwetša pele kgolo ya ekonomi le go thuša ka tlhomo ya mešomo, ka ge go hlagišitšwe ka go NDP le ka go Leano la Mananeokgoparara la Bosetšhaba.
6.7 Kabinete e dumeletše go phatlalatšwa ga Sethalwa sa Leano la Dinamelwa tša go Amana le Tikologo gore setšhaba se ye go fa ditshwaotshwao ka ga sona. Dinamelwa di raloka tema ye bohlokwa go kgontšha kgwebišano ya lefaseng ka bophara ka mokgwa wo o tšwelago pele go ya go ile ka tša ekonomi, tša setšhaba le tša tikologo. Mananeo a dinamelwa a bopa motheo wa ditiragalo tša ekonomi ya setšhaba tša Afrika Borwa ka go kgontšha go sepetšwa ga batho le diphahlo. Le ge go le bjale, meši ye e tšwago ka lekaleng la dinamelwa e na le seabe go palomoka ya meši ya digase tša lefaufaung ka mo nageng (GHG), gomme dinamelwa tša tseleng tšona di etile pele go ba le seabe se. Leano le le nyaka go šišinya ditsenogare tšeo di tlago fokotša meši ya GHG ka go diriša melawana ya tlhabollo ya go ya go ile.
6.8 Kabinete e dumeletše gore Afrika Borwa e tsenele seboka sa Smart Africa Alliance.
Ye ke tirišano ye e etilwego pele ke Afrika yeo e lebeletšego kudu go hlabolla ditharollo tša maleba tša tlhabollo le go abelana methopo ka nepo ya go rarolla mathata a tlhabollo ao khonthinente e lebanego le ona. E bea Ditheknolotši tša Tshedimošo le Dikgokagano bjalo ka selo se bohlokwa sa lenaneotlhabollo la 2063 la dinaga tša Afrika.
Afrika Borwa e tla holega ka bobedi go tša ekonomi le tša sepolotiki ka go kgatha tema ga yona ka go Smart Africa.
Ka go dira gore diintasteri le botsebi bja Afrika Borwa di be bohlokwa go lenaneotlhabollo la Smart Africa, Afrika Borwa e tla tsenya letsogo go kgolo ya dikgwebo tša kgauswi ka mo seleteng.
6.9 Kabinete e dumeletše go tsebagatšwa ga Molawana wa Bosetšhaba wa Kgoro ya Thuto ya Motheo (DBE) ka ga Baerase ya go Palediša Mašole a Mmele go Šoma (HIV), Malwetši a go Fetelwa ka Thobalano (di-STI) le Bolwetši bja Mafahla (TB).
Molawana wa 1999 o lebeletše kudu ditemošo tša bohle le dilo tša thibelo tša payolotši le kalafo, gomme o hlokometše gannyane dihlohleletši tša makala, tša setšhaba le tša maitshwaro tša HIV.
Molawana wo o šišinya gore go fetogelwe go go bona HIV bjalo ka taba ye bohlokwa ya bolaodi go dirišwa mokgwa wa maphelo a setšhaba, gammogo le go akaretša TB bjalo ka selo seo se beilwego pele ka dikolong, gareng ga tše dingwe. Mollwane wa go phethagatša se o katološeditšwe go baithuti, go barutiši le go bahlankedi ba mmušo, go setšhaba gammogo le go dikolo tšeo di ikemego.
7. Melaokakanywa
7.1 Kabinete e dumeletše go tsebagatšwa ga Molaokakanywaphetošwa wa Khamphani ya Maemafofane, wa 2017 le Molaokakanywaphetošwa wa Sephethephethe sa Moyeng le Ditirelo tša Bofofiši ka Palamenteng.
7.2. Diphetošo ka mo go Melaokakanywa ye mebedi ye di nyaka go hlagiša gore go be le sehlongwa sa taolo ya sa ruri. Gape diphetošo tše di hlagiša gore go hlongwe dikomiti tša mekgwa ya boipelaetšo, tšeo di tlago šoma go rarolla merero efe goba efe ya dithulano.
8. Ditiragalo Tše Di Tlago
8.1 Mopresidente Jacob Zuma o tla fa polelo ya pulo ya Tourism Indaba 2017 yeo e tlago swarelwa ka Inkosi Albert Luthuli International Convention Centre ka Durban gareng ga la 16 le la 18 Mopitlo 2017.
Ye ke kopano ya boditšhabatšhaba yeo gape e tlago laetša ditšweletšwa le ditirelo tša Afrika Borwa le lekala la kamogelo ya baeng. Tourism Indaba 2017 e tla re gape ya tšwetša pele le go thekga phetošo ye e tšwelago pele le tlhabollo ya intasteri ya tša boeti ya Afrika Borwa ka ge go bonwa tema ye e kgathwago ke bahlomi ba dikgwebo le dikgwebopotlana.
Ka Afrika Borwa baeti ba go feta ba 10 milione ba fihlile ka 2016, e lego 13% go feta ka 2015. Se se feta kelo ya kgolo ya palogare ya lefaseng ka bophara ya 3% ya lebaka leo la nako. Mo lebakeng le la nako ya Tourism indaba, Afrika Borwa e tla holega go palo ya baromiwa bao ba tlago tla ka nageng ya rena.
8.2 Tona ya Enetši Mmamoloko Kubayi o tla re mo kgweding ye a eta pele lesolo la Kgwedi ya Enetši ka fase ga morero wa, “Re tšwetša pele motswako wa enetši wa go se ture le wa go ya go ile e le go thekga phetošo ya ekonomi ya setšhaba ya motheo”. Lesolo le le tla ruta, la hloma temošo le go boledišana le setšhaba ka ga go šomiša enetši gabotse, tšhireletšego ya enetši, merero ya mehuta ye mengwe ya enetši le ka fao ka moka ga tšona di lego bohlokwa ka go tšhomišo ya ka malapeng, ya kgwebo le ya diintasteri.
8.3 Dipolelo tša Ditekanyetšo tša Dikgoro tša 2017 ka Mopitlo di fana ka sebaka sa gore dikgoro di hlagiše ka palamenteng le go setšhaba ka bophara ka fao di tlogo šomiša ditekanyetšo tša 2017 tšeo di abetšwego tšona. Di tla šomiša ditlhagišo tše gape go botša setšhaba gore mananeo a tšona a tlo ba mabapi le eng mo ngwageng wo wa ditšhelete. Kabinete e ipiletša go setšhaba go rerišana ka ga ditlhagišo tše tša ditekanyetšo ge di hlagišwa go latela tshepedišo ya Palamente.
8.4 Kgoro ya Meetse le Kelelatšhila e tla swara Beke ya Kelelatšhila gareng ga la 16 le la 22 Mopitlo 2017 ka fase ga morero wa “Kelelatšhila ke ya Maphelo le Seriti”. Mmušo o ikgafile go tliša seriti go maAfrika Borwa ka go aba ditirelo tša kelelatšhila. Nepokgolo mo bekeng ye ya kelelatšhila e tla ba Lenaneo la Phedišo ya Dintlwana tša Boithomelo tša go šomiša Dipakete leo le beilwego pele. Se se tla dira gore go abje kelelatšhila yeo e sepetšwago ka meetse ditšhabeng ka Masepaleng wa Selegae wa Nketoana, ka Foreisetata le ka Masepaleng wa Selegae wa Dawid Kruiper, ka Kapa Leboa bjalo ka karolo ya go akgofiša ditirelo go fediša dintlwana tša boithomelo tša go šomiša dipakete.
8.5 Afrika Borwa e keteka Kgwedi ya Afrika ka fase ga morero wa: Re Aga Afrika ye Kaone le Lefase le Lekaone. Ditiragalo tše mmalwa di a phethagala tšeo di etilwego pele ke Kgoro ya Bokgabo le Setšo gomme tšona di ikemišeditše go tšwetša pele botee bja Afrika. Ditiragalo tše di tla fihla ka la 25 Mopitlo 2017 fao Mopresidente Zuma a tlago ba monggae wa dijo tša matena ka ntlong ya baeng ya Mopresidente ya Sefako Makgatho. Ka mo dijong tše tša matena go tla laletšwa baetapele ba badudi ba dinaga tša ka ntle bao ba lego ka Afrika Borwa bao Mopresidente a kopanego le bona ka 2015.
9. Go Romelwa Ga Mašole A Bosetšhaba A Tšhireletšo A Afrika Borwa (SANDF)
9.1 Kabinete e amogela sephetho seo se tšerwego ke Mopresidente Jacob Zuma sa go katološa go romelwa ga maloko a SANDF ka Democratic Republic of Congo (DRC). Se ke maitapišo a go tsenya letsogo go tliša khutšo le šebešebe ka khonthinenteng ya Afrika le kudukudu ka mo seleteng se go sepelelana le ditlamego tša rena tša boditšhabatšhaba le melaotshepetšo ya rena mabapi le dinaga tša ka ntle ya go ba le seabe kaone go Afrika le lefaseng.
9.2 Palomoka ya maloko a 1 371 a SANDF a rometšwe ka DRC go thekga Lesolo la Phedišo ya Dintwa la Mokgatlo wa Dinagakopano. Go romelwa ga bona go katološitšwe go tloga ka la 01 Moranang 2017 go fihla ka la 31 Hlakola 2018.
9.3 Go romela mašole ga rena ka khonthinenteng ke thekgo ye e tšwelago pele ya ditshepedišo tša ka mo seleteng le tša ka khonthinenteng tša go arabela le go rarolla mathata, go tšwetša pele khutšo le tšhireletšo, go maatlafatša kopanyo ya ka seleteng, go oketša kudu kgwebišano ya ka gare ga Afrika le go eta pele tlhabollo ya go ya go ile ka Afrika.
10. Difoka Tša Bosetšhaba
10.1 Kabinete e lebogiša baamogedi ka moka ba Difoka tša Bosetšhaba tša 2017. Ngwageng wo wa OR Tambo ba re bontšhitše maatla a go šomela go fihlelela Afrika Borwa ye kaone le setšhaba se kaone. Re hlohleletšwa ke diphihlelelo tša bona, boikgafo bja bona, go rata ga bona le go nyaka go tšwetša pele batho ga bona. Sefoka sa Ikhamanga sa Gauta (1), Sefoka sa Ikhamanga sa Silibera (7), Sefoka sa Ikhamanga sa Porontshe (1), Sefoka sa Baobab sa Gauta (1), Sefoka sa Baobab sa Silibera (2), Sefoka sa Baobab sa Porontshe (2), Sefoka sa Luthuli sa Silibera (29), Sefoka sa Luthuli sa Porontshe (1), Sefoka sa Mapungubwe sa Silibera (2), Sefoka sa Bagwera ba OR Tambo sa Gauta (1).
10.2 Go lokollwa ga Pego ya bo 17 ya Khomišene ya Tekatekano Mešomong ke Tona ya Mešomo, Mohumagadi Mildred Oliphant e laetša lebelo leo le ganelelago go nanya la diphetogo ka mafelong a mešomo ka mmarakeng wa bašomi wa Afrika Borwa. Pego ye e laetša gore re sa le kgole go fihlelela mafelo a mošomo ao a emelago ka nnete ka fao setšhaba sa rena se lego ka gona. Bathobaso, Basadi le Bagolofadi ba tšwela pele go se emelwe ka fao go lekanego kudu ka mererong ka moka ya Tekatekano Mešomong.
10.3 Pego ye e laetša gore bathobašweu ba go ba 68% ba maemong a godimo a bolaodi ka mo nageng ka go makala a setšhaba le a phraebete, e lego makga a tshela go feta sehlopha se sa setšhaba seo se kgathago tema ka ekonoming. Bathobaso ba go fela 14.4% ya balaodi ba godimo.
10.4 Ka lebaka la tlhokego ya tšhoganetšo ya go fetoša ekonomi le go netefatša gore go ba le ekonomi ye e akaretšago mang le mang, se ga se selo seo se lekanego. Kabinete e amogela tsebišo ye e dirilwego ke Tona ya Mešomo ya gore kgoro ya gagwe e nyaka go diriša magato a boima go bao ba sa obamelego melao.
11. Melaetša Ya Ditebogišo Le Ya Kwelobohloko
11.1 Kabinete e ba le Mopresidente Jacob Zuma ge a lebogiša Morena Emmanuel Macron, Mopresidente yo a kgethilwego wa Repabliki ya France, go latela go thopa ga gagwe ga dikgetho tša go kgetha mopresidente wa France tše di swerwego ka la 7 Mopitlo 2017.
Afrika Borwa e letetše go šoma le mmušo wa France ka fase ga boetapele bja Morena Macron go tiišetša selekane seo se šetšego se tiile sa tša dipolotiki, sa tša ekonomi le tša kgwebišano gareng ga Afrika Borwa le France.
11.2 Kabinete e lebogiša ratoropo wa peleng wa Johannesburg, le modulasetulo wa Mokgatlo wa Dipušoselegae wa Afrika Borwa, Parks Tau ge a thwetšwe bjalo ka modulasetulommogo wa Seboka seo se Ikemego sa Maemo a Godimo sa Mokgatlo wa Dinagakopano sa go hlokomela go šoma gabotse ga Habitat III.
Lenaneo le le amogetšwe ke UN go tsošološa boikgafo bja lefase ka bophara go tlhomo ya metsesetoropo ya go ya go ile.
11.3 Kgoro ya Kgwebišano le Diintasteri (dti) e ile gae le sefoka sa molaetši yo mokaone wa dinaga tša ka ntle ka Pontšhong ya bo 58 ya Boditšhabatšhaba ya tša Kgwebišano ye e bego e swaretšwe ka Zimbabwe (ZITF).
Se se lemoga maitapišo a magolo kudu ao a dirwago ke Team South Africa go netefatša gore boikgafo bja naga ye bja go aga dilekane le Zimbabwe bo tšweletša diphihlelelo tše di nyakegago tša ekonomi.
11.4 Kabinete e lebišitše mahloko go mmušo le go batho ba Repabliki ya Tanzania ka ga kotsi ya pese ya masetlapelo ye e feleditšego ka go hlokofala ga batho ba 36, gomme ba 33 ba bona ke bana.
12. Bao Ba Thwetšwego Mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
12.1 Maloko a Lekgotla leo le Ikemego la Bolaodi bja Bahlakiši ba Dipuku tša Ditšhelete:
a) Mohumagadi Amanda L Mazibuko (o thwetšwe leswa);
b) Morena Abel Dlamini (o thwetšwe leswa);
c) Morena Thiru Pillay (o thwetšwe leswa);
d) Mohumagadi Nkabaneng T Mashile;
e) Mohumagadi Zuziwe Ntsalaze;
f) Morena Mohamad I Motala;
g) Morena Madoda A Petros; le
h) Mohumagadi Martie J Janse van Rensburg
12.2 Go thwalwa leswa ga Morena Cedric Monwabisi Masondo bjalo ka Molaodipharephare le Molaodiphethiši wa Mokgatlo wa Diinšorentshe tša Dikotsi tše di Kgethegilego (SASRIA) SOC LTD.
Dinyakišišo: Phumla Williams
Mogala: 083 501 0139
