Afrika Borwa e nyaka bafalaledi bao ba kgonago go ba le seabe sa bohlokwa ka kgodišong ya motheo wa ekonomi ka Afrika Borwa.
Pele ga ge o ka dira kgopelo ya phemiti ya bodudi bja sa ruri, sa mathomo o swanetše go fa mabaka a gore ke ka lebaka la eng o swanetše go bonwa bjalo ka motho yo a sa iletšwego goba bjalo ka motho wa go se nyakege.
Wena le molekane wa gago le na le maswanedi a go hwetša phemiti ya thwii ya madulo a sa ruri ge e le gore le dutše ka Afrika Borwa ka lebaka la phemiti ya mošomo wa lena mo lebakeng la bonyane mengwaga ye mehlano. Bao ba botilego badudi ba Afrika Borwa goba ba botilego bao ba nago le phemiti ya madulo ya sa ruri le bona ba ka dira kgopelo.
Diphemiti tša bodudi ka lebaka la mabaka a mangwe di šoma go batšwantle bao:
- ba lokelwago go šoma mošomo wa sa ruri ka Afrika Borwa
- ba nago le bokgoni le dithuto tše di kgethegilego
- ba nyakago go hloma kgwebo ka Afrika Borwa
- ba nago le maswanedi a go ba bafaladi go latela Karolo ya 27(c) ya Molao wa Bofaladi
- ba nago le maswanedi bjalo ka batho bao ba rotšego modiro ka lebaka la bogolo
- ba ikemego ditšheleteng goba
- e lego ba leloko (ba madi goba ba godišwa ka semolao) ba modudi wa Afrika Borwa goba ba motho yo a nago le phemiti ya madulo a sa ruri.
Hwetša dintlha ka botlalo mabapi le tshepedišo ya go dira kgopelo ya bodudi bja sa ruri, goba ikgokaganye le Kgoro ya Merero ya Selegae.
