1. Phethagatšo ya Mananeo a Bohlokwa a Mmušo
1.1. Kabinete e amogetše Ditekanyetšo tša Bosetšhaba tša 2015 tšeo di tlago hlohleletša phethagatšo ya leano la dintlha tše senyane tšeo di hlagišitšwego ke Mopresidente ge a efa Polelo ya gagwe ya Maemo a Naga. Ditekanyetšo tše di fa bonnete, seemo se sekaone le taolo ya ditšhelete ye e lebeletšego bokamoso ye e hlokagalago go sepetša ekonomi ya Afrika Borwa ka mo maemong a boima a ekonomi.
Kabinete e bušeletša gore magato a metšhelo ao a tsebagaditšwego ka Ditekanyetšong tša Bosetšhaba tša 2015 a a hlokagala go thekga seemo sa ditšhelete mo ngwageng wo re o lebilego. MaAfrika Borwa a hlohleletšwa go šoma mmogo le mmušo go lwantšha maemo a bjale a ekonomi ka nepo ya go hlohleletša kgolo ya ekonomi go ya pele.
1.2 Kabinete e reta mošomo o mobotse wo o dirilwego ke Motlatšamopresidente Cyril Ramaphosa ge a nolofaditše go swarwa ga dikgetho tše di lokologilego le tša go hloka mathata ka nageng ya Lesotho ka mošomong wa gagwe bjalo ka Mosepediši wa Setšhaba sa Dinaga tše di Hlabologago tša Borwa bja Afrika (SADC). Kabinete e reta gape Lekgotla la Keletšo ka ga Dikgetho (EAC) la SADC, Khomišene ya Dikgetho ya Lesotho (LEC), Mabotho a Tšhireletšo le batho ba Lesotho ge ba sware dikgetho tša khutšo, tše di lokologilego tša go hloka mathata. Afrika Borwa e tla Šoma le mmušo wo moswa wo o sa tšwago go kgethwa wa Lesotho go hlabolla ekonomi ya dinaga tše tše pedi, ya Selete sa Borwa bja Afrika le ya Khonthinente ka bophara.
1.3 Kabinete e amogetše le go dumelela go kgatha tema ga Afrika Borwa ka go swara Letšatši la Lefase la Diphedi tša Šokeng ka la 03 Hlakola 2015. Ka fase ga boetapele bja Tona Molewa Afrika Borwa e tšwela pele go tsenya tirišong mananeo ao a šireletšago tikologo ya ka nageng le a ntwa kgahlanong le go tsoma ka ntle ga tumelelo. Se bohlokwa magareng ga tše ke go bea bahlapetši ba Green Scorpions ka Boemafofaneng bja Boditšhabatšhaba bja O.R. Tambo. Se ke go netefatša gore batho ba obamela Melawana ya mabapi le Mehuta ya Diphedi tše di Lego Kotsing goba tše di Šireleditšwego, Melawana ya Khonferentshe ya Mekgatlo ya Kwano ka ga Kgwebišano ya Boditšhabatšhaba ka Mehuteng ye e lego Kotsing ya Diphoofolo le Dimela tša Lešoka (CITES), Tekolo ya Diphedi tše di fapafapanego, Melawana ya Kabelano ya Phihlelelo le Kholego le Melawana ya mabapi le Mehuta ya Diphedi tše e sego tša Setlogo le tšeo di Tsenatsenago lefelong. Afrika Borwa le yona e ralokile tema ye bohlokwa ka go rerišana le Interpol, kudukudu go Lekgotla la Keletšo ya Komiti ya mabapi le Go obamela Melawana ya Tikologo le Phethagatšo ya yona, le ka dihlopheng tše tharo tša Interpol tša go šoma ka bosenyi e lego Sehlopha sa Go šoma ka tša Bosenyi go Diphedi tša Šokeng, Sehlopha sa Go šoma ka Bosenyi bja Borei bja dihlapi le Sehlopha sa Go šoma ka Bosenyi bja Tšhilafatšo ya Tikologo.
1.4 Kabinete e lemogile gore Durban e tsenetše phenkgišano ya go swara Dipapadi tša Dinaga tša Commonwealth tša ngwaga wa 2022, yeo e tsebagaditšwego semmušo ka London ka la 02 Hlakola 2015. Go swarwa ga dipapadi tše go ka hloma mešomo ye e ka bago ye 11 650 le go thuša ekonomi ya naga ye ka R20 pilione ye e akantšwego. Mašaledi a mangwe a dipapadi tše e tla ba lenaneo leo le kopantšwego la dinamelwa tša bohle ka Durban leo dipeakanyo tša lona di šetšego di dumeletšwe.
2. Diphetho tše Bohlokwa tša Kabinete
2.1. Kabinete e dumeletše Molawanaphetošwa wa go Hudugela go Kgašo ya Titšithale ka go akaretša lenaneo la taolo ka go Lepokisana leo le Bewago Godimo ga Thelebišene la Set Top Box (STB), leo le tlago hlalošwa gabotse nakong ya ge molawana woo o phatlalatšwa. Mmušo o tla aba STB mahala go beng ba dithelebišene bao ba hlokago ba go feta ba dimilione tše 5. Go tla fiwa pele malapa ao a lego ka seleteng sa mafelo a mellwane ya ka nageng. Tona ya Dikgokagano o tla tsebiša ka ga letšatšikgwedi la go gotetšwa ga phetogelo ya go ya go siknale ya titšithale le la go tima ga siknale ya Manakana mo nakong ye e sa fetšego pelo.
2.2 Kabinete e amogetše Tlhako ya Togamaano ya mengwaga ye mehlano la Molawana wa tša Temo, Kagodithokgwa le Boreahlapi le Leano tiro la tša Temo. Tlhako ye e bea ditlhohlo tše bohlokwa tšeo mafapha a mararo a lebanego le tšona le go šišinya ditsenogare ka mafapheng a mane e le go, Tekatekano le phetošo; kgolo ya go lekalekana le phadišano, go ba maleba tikologong le pušo. Togamaano le leanotiro di tla mpshafatšwa ngwaga o mongwe le o mongwe. Kabo ya naga ke le lengwe la mananeo a mmušo ao a tšweditšego pele tekatekano, eupša go fihla mo lebakeng le ka ntle le go fihlelela phetošo kudu. Le ge e le gore lenaneo la kagoleswa le tlhabollo le beile gore maikemišetšomagolo a kabo ya naga e bile go fetoša sebopego sa Temo ya Afrika Borwa, le nyaka gape go thekga mafapha ao ka nepo ya go godiša ekonomi le go hloma mešomo.
2.3 Kabinete e dumeletše go swarwa ga Khonkrese ya bo 40 ya Dipetlele tša Lefase ya Mokgatlo wa Boditšhabatšhaba wa Dipetlele ye e tlogo swarwa ka Durban go ya mafelelong a 2016. Mokgatlo wa Boditšhabatšhaba wa Dipetlele ke mokgatlo wa lefaseng ka bophara wo o ikemego, wa go se dire letseno, wo e sego wa mmušo wa dipetlele le mekgatlo ya tlhokomelo ya maphelo. Khonkrese ye ya ngwaga ka ngwaga e fa bašomi ba tša maphelo sebaka sa go abelana mekgwa ye mekaone ya go dira mošomo/ ditsela tše kaone tša go kaonafatša dipoelo tša tlhokomelo ya maphelo.
2.4 Kabinete e ipiletša go batswadi go kgatha tema ka mafolofolo ka go dikgetho tša 2015 tša Makgotlataolo a Dikolo (SGB) tše di tlogo swarelwa ka dikolong ka moka tša setšhaba go thoma ka la 6 go fihla ka la 28 Hlakola 2015. Di-SGB di na le seabe ka tlhabollong ya maikutlo a maatla a gore setšhaba se ikwe e le beng ba dikolo tša rena. Go šoma ga dikolo ka kakaretšo go akaretšwa diphihlelelo dithutong go fela go kaonafalo ge batswadi ba kgatha tema ka mafolofolo le ge ba na le kgahlego ka mererong ya sekolo. Balaodi ba dikolo bao ba fetago 250 000 ba a kgethwa mengwaga ye mengwe le ye mengwe ye meraro go šoma ka dikolong tša rena tša setšhaba gomme ba kopanywa ke maikemišetšo ao a swanago a go dira gore thuto e be taba ya makgonthe ya setšhaba.
3. Melaokakanywa
3.1. Kabinete e dumeletše go romelwa ga Melaokakanywa ye mebedi, bobedi e fetoša Molao wa Bana, wa 2005 (Molao wa bo 38 wa 2005) ka ge o fetošitšwe ke Molao wa bo 41 wa 2007, ka Palamenteng. Diphetošo tše di arabela dikahlolo tša kgorotsheko, tšeo di bonego gore dikarolo tše dingwe tša Molao ga di sepelelane le molaotheo.
Molaokakanywaphetošwa wa Bana, wa 2015 (karolo ya 75 ya Molaokakanywa) – Diphetošo di bolela ka ga tlhalošo ya “molato wa tša thobalano” gomme tša o amantšha le Molaophetošwa wa Molao wa Bosenyi (melato ya thobalano le merero ya go amana le yona) wa bo 32 wa 2007. Diphetošo tše gape di šoma mabapi le go dumelela basenyi ba melato ye e amanago le bana go dira ditlhagišo pele ga ge maina a bona a ka tsenywa ka gare ga Retšistara ya Tšhireletšo ya Bosetšhaba. Diphetošo tše di šišinywago gape di hlaloša gabotse nyakego ya go bea ngwana ka fase ga tlhokomelo ya kgodišo ebile di fana ka magoro a tlaleletšo a bana bao ba ka godišwago ke batswadi bao e sego ba madi.
Molaokakanywaphetošwa wa Bobedi wa Bana, wa 2015 (karolo ya 76 ya Molaokakanywa) – o ikemišeditše go netefatša gore bana ka moka ba ipshina ka ditirelo le dikholego tše di ikemišeditšego go nolofatša phihlelelo ya tlhokomelo ya tša leago le polokego le go hloma lenaneo leo le šomago gabotse la tlhokomelo ya bobotlana setšhabeng. O ikemišeditše gape go aba tikologo ye e bolokegilego le ya tšhireletšo mabapi le go romela bana bao ba hweditšwego ba hloka tlhokomelo le tšhireletšo mafelong a makaone a tlhokomelo.
4. Maemo a Kabinete ka ga Merero ye e lego Ditabeng ka Seemong sa Bjale
4.1. Kabinete e kgalema ka mantšu a bogale go šwahla ga dingwalwa tšeo di ka beago tšhireletšego ya naga mathateng. Le ge e le gore ke setlwaedi sa boditšhabatšhaba gore dinaga di fane ka merero ya bohlodi, gareng ga tše dingwe, merero ye e putlaganyago dinaga ya mabapi le dibaka tša ekonomi le merero ya tšhireletšo, go šwahliša ka maikemišetšo ga dingwalwa tše di bolelago ka mešomo ya Lekala la Tšhireletšo ya Mmušo ga go molaong.
Kabinete e amogela dinyakišišo ka botlalo tše di dirwago ke Lekala la Tšhireletšo ya Mmušo mabapi le taba ye gomme e netefaletša leswa maAfrika Borwa gore Lekala la Tšhireletšo ya Mmušo le tla tšwela pele go lebelela kudu mošomo wa sona wa go šireletša le go boloka seriti sa naga, sa badudi ba yona le mananeokgoparara a yona.
Kabinete e bušeletša molaetša wo o filwego ke Tona ya Lekala la Tšhireletšo ya Mmušo, Tona David Mahlobo, wa gore maitshwaro a mohuta woo a nyatša go šoma gabotse ga mošomo wa go šireletša naga le mellwane ya yona.
4.2. Kabinete e amogela tsebišo ye e dirilwego ke Eskom ya gore Yuniti ya bo 6 ya Seteše sa Mohlagase sa Medupi e tšweleditše mohlagase wa yona wa mathomo mo bekeng ye, se sa dira gore e be ya mathomo go tše tshela tša diyuniti tša yona go ka thoma go šoma. Go thoma go šoma ga yuniti ke tshepedišo yeo ka yona tšenereitha e kgokaganywang ka se mohlagase go kabo ya mohlagase ya bosetšhaba. Le ge e tšwela pele go šoma go oketša kabo ya mohlagase ka kabong ya mohlagase ya bosetšhaba, kabinete e ipiletša go setšhaba go tšwela pele go obamela magato a go seketša mohlagase. Ditšhaba di hlohleletšwa go šomiša mohlagse ka go o seketša, ge re tšwela pele go tsebagatša methopo ye mengwe ya go fehla mohlagase.
4.3 Kabinete e reta bogale, boikgafo, maikemišetšo le go šoma ka maatla ga banna le basadi bao ba šomago ka ntle le go fela maatla go boloka maphelo le go thibela tshenyo ya dithoto, ya diruiwa le ya tikologo ya rena ya tlhago ye bohlokwa tšeo di sentšwego ke mello ya dihlaga ka Motsekapa.
Kabinete e lebiša ditebogo tša yona go ditšhaba tšeo ka moya wa Botho, di šomilego mmogo le mmušo go hloma mafelo a tlhokomelo ya batho ka bontši go fa bao ba tšwelego dintlong tša bona ka lebaka la mello madulo. Moya wa boithaopo wo o laeditšwego ke batho bao ba thušago batšwasehlabelo ba mello ke o mogolo ebile o a hlohleletša.
4.4 Kabinete e tšwela pele go hlobaetšwa ke go hlaselwa ga batšwantle ebile e eletša gore ditheo tša phethagatšo ya molao di tla tšwela pele go ba gona ka bontši ka mafelong ao a amegago, le gore bao ba dirago bosenyi bjo ba tla lebana le bogale bja molao ka botlalo. Dikgaruru kgahlanong le batšwantle di rarollwa gabotse ka go tšeelwa diphetho ke makala a Mmušo a mehutahuta.
4.5 Kabinete e lebogiša Sehlopha sa Kgwele ya Maoto sa Bosetšhaba sa Afrika Borwa sa ba Mengwaga ya ka Fase ga ye 17 (U17), Amajimbos, ge se dirile gore naga e ikgantšhe ka go fihlelela maswanedi a go tsenela makgaolakgang a Dipapadi tša Sebjana sa Afrika sa Kgwele ya maoto tša 2015 sa U17 ka Niamey, ka Niger. Papadi ya bona ye e kgahlišago kudu ka Phadišanong ya Bonkgwete ya Bafsa ya Afrika e ba file maswanedi a go tsenela Phadišano ya Sebjana sa Lefase sa FIFA U17 ka Chile moragonyana mo ngwageng wo.
4.6 Kabinete e bile mahlokong ka go hlokofala ga seopedi sa kgale sa go tuma sa Afrika Borwa Zayn Adam, e lego seopedi seo se tumilego kudu sa go hlabeletša sa seminare ya bo70 ya sehlopha sa Pacific Express yo mošomo wa gagwe wa go opela o tšerego mengwaga ye 50. O be a tsebega kudu go histori ya mmino wa ka Motsekapa.
4.7 Kabinete e thabišwa ke gore, ka ge e le mmušo wo o tlogago o kgathala ka nnete, kgato ya mafelelo ya go bušetša mašaledi a ditopo tša maAfrika Borwa ao a hlokofetšego ge ntlo ya baeti e phuhlama ye e lego ya Synagogue Church of All Nation (SCOAN) ka Lagos e phethilwe. Dithapelo tša rena di lebišwa go ba malapa bao ba lahlegetšwego ke bao ba ba ratago le go bao ba gobetšego ka masetlapelong ao.
5 Ditiragalo tše di tlago
5.1 Mopesidente Jacob Zuma o tla fa polelo ka pulong ya Ntlo ya Bosetšhaba ya Baetapele ba Setšo ka Palamenteng, Motsekapa ka la 05 Hlakola 2015 (lehono). Kamano magareng ga mmušo le baetapele ba setšo e bohlokwa go netefatša gore re aga ditšhaba tša dinagamagaeng tše di nago le mafolofolo, tše di lekalekanago le tše di tšwelago pele go ya go ile.
5.2 Kabinete e amogela go bušwa ga mašaledi a ditopo tša bagale ba ntwa ya tokologo JB Marks le Moses Kotane ka Afrika Borwa go tšwa ka Russia fao ba ilego ba bolokwa gona mengwaga ye 42 ye e fetilego. Baetapele ba ba go se ikhole, bao ba bego ba bonwa bjalo ka botate ka dintwa tša go lwela tokologo ebile ba hlohleleditše bagale ba ntwa ya tokologo ba go swana le Nelson Mandela, Oliver Tambo le Walter Sisulu, ba tla hwetša dipoloko tše di kgethegilego tša semmušo. Mopresidente Jacob Zuma o laetše gore Folaga ya Setšhaba e fofišwe magareng go thoma ka la 09 Hlakola go fihla ka bošegong bja la 22 Hlakola 2015. Moses Kotane o tla bolokwa leswa ka Pella, ka profenseng ya Leboa Bodikela ka la 14 Hlakola 2015 gomme JB Marks yena o tla bolokwa ka Ventersdorp, ka profenseng ya Leboa Bodikela ka la 22 Hlakola 2015. Go boa ga bona ke karolo ya boikgafo bja mmušo bja go buša mašaledi a ditopo a bagale ka moka ba ntwa ya tokologo bao ba hlokofetšego dinageng tša ka ntle. Ngwageng wo o fetilego mogaši wa ditaba yo a tumilego yo a bego a le kgahlanong le kgethologanyo Nat Nakasa o bušeditšwe ka mo nageng ka katlego go tšwa ka New York gore a tle a bolokwe leswa ka Lefelong la go Bolekela Bagale ka Chesterville, Durban.
5.3 Kabinete e amogela lesolo le legolo la kakaretšo la tekodišišo le go dira diteko tša bolwetši bja mafahla (TB) leo le tlogo tsebišwa semmušo ke Motlatšamopresidente Cyril Ramaphosa ka la 24 Hlakola 2015 e lego Letšatši la Lefase la TB, ka Masepaleng wa Selete wa Ngaka Kenneth Kaunda ka Profenseng ya Leboa Bodikela – ka fase ga moreo wa “Go fediša leuba la Afrika Borwa la TB: Re akgofiša phetolo ya rena ka Ditšhabeng tše Bohlokwa”. Lesolo le la bophelo bjo botelele le tla hlohleletša maAfrika Borwa ka moka kudukudu bao ba dulago ka metseng ye go nago le meepo, bagolegwa ka mafelong a kgolego le ka mafelong a kgodišo ya bana ba mengwaga ya ka fasana gore ba lekodišišwe le go dirwa diteko tša TB. Mo mengwageng ye e fetilego ye mehlano go dirilwe maitapišo a magolo go maatlafatša maano a mmušo a taolo ya TB gomme gwa dirwa ditekodišišo tše di oketšegilego le diteko kudukudu ka lesolo la Keletšo le Diteko tša HIV gomme go dira diteko go thušitšwe ka go tsebagatšwa ga diteko tša phekolo tša kgafetšakgafetša tša TB le tša TB ya go palelwa ke go alafša ke diokobatši.
5.4 Kabinete e reta boikgafo le maikemišetšo a barutiši ba rena, bao ka ntle le bona re ka bego re se ra kgona go fihlelela bontši bja dinepo tša rena tša bosetšhaba. Ditšhišinyo tša maina tša Difoka tša Barutiši tša Bosetšhaba di lemoga seabe seo se kgahlišago kudu seo barutiši ba se dirilego ka go hlabolleng ga naga ya rena; kabo ya Difoka tše e tla swarwa ka la 7 Hlakola 2015 ka Gallagher Estate, Midrand. Kgoro ya Thuto ya Motheo ke monggae wa moletlo wo wa ngwaga ka ngwaga go reta barutiši ba diphrofešenale bao ba ikgafilego, ba go šoma ka maikemišetšo, ba go šoma ka maatla.
5.5 Tona ya Kgoro ya Meetse le Kelelatšhila Nomvula Mokonyane o tla tsebagatša semmušo Beke ya Meetse ya Bosetšhaba ka KwaDukuza ye e hlasetšwego ke komelelo ka KwaZulu-Natal ka la 16 Hlakola 2015 ka fase ga morero wa: “Meetse Ga a Na Seo se ka a Emelago Legato”. Beke ye ya meetse ya bosetšhaba e tla fela ka go swarwa ga Letšatši la Meetse la Lefase ka la 22 Hlakola 2015. Lesolo le le tla ruta maAfrika Borwa ka ga boleng bja meetse le tlhokego ya taolo ya go ya go ile ya mothopo wo o hlokegago wo. Kabinete e gopotša maAfrika Borwa ka moka gore re dula ka nageng ye e hlakago meetse gomme e kgopela batho ka moka go seketša meetse ka go lokiša fao meetse a dutlago gona le go dira diphetošo go mekgwa ya go phela ka go hlokomela meetse.
5.6 Lamorena la 8 Hlakola ke Letšatši la Basadi la Boditšhabatšhaba (IWD) e lego letšatši leo le šomišwago ngwaga ka ngwaga lefaseng ka bophara go gopola ka ga kgatelopele ye e dirilwego, boipiletšo bja phetogo le ditiro tša go keteka go se fele maatla le boikgafo bjo bo dirilwego ke basadi ba tlwaelo bao ba ralokilego tema ye bohlokwa kudu ka historing ya ditšhaba tša bona le ya dinaga tša bona. Kgoro ya Merero ya Basadi e tla eta pele moketeko wa bosetšhaba wa IWD ka Sekolong se se Phagamego sa Langa ka Motsekapa ka fase ga morero wa: “Ditokelo tša Basadi ke Ditokelo tša Botho: Mmogo re tšwetša pele Afrika Borwa ye e Hlokago Dikgaruru”. Morero wo o nyalelanywa le morero wa Mokgatlo wa Dinagakopano wa: “Tekatekanyo ya Basadi ke kgatelopele go bohle!” le Kwano ya Mokgatlo wa Selekane sa Afrika ya gore ngwaga wa 2015 o bonwe bjalo ka “Ngwaga wa Maatlafatšo le Tlhabollo ya Basadi go leba go Lenaneo la Afrika la 2063”. Letšatši le le tla šomišwa go tsebagatša semmušo lenaneo la dingangišano tša Bosetšhaba le tša Diprofense leo le tlago thoma mo kgweding ye go fihla ka Phupu. Se se tla feletša ka go ngwalwa ga pego ka ga maemo a basadi yeo e tlago tsebagatšwa semmušo ke Mopresidente ka la Phato 9.
5.7 Kabinete e ipiletša go ba kgašo ka Afrika Borwa go romela ditšhišinyo tša bona tša phadišano ya kabo ya Difoka tša Kgašo tša SADC tša 2015. Letšatši la go tswalela ke la 31 Hlakola 2015 gomme tshedimošo ka botlalo e hwetšagala wepsaeteng ya Kgoro ya Dikgokagano ya www.doc.gov.za. Kabo ye ya difoka e kgokaganya mafapha a semmušo a mebušo ya SADC, badudi, dirutegi, bašomi le kgašo. Di tšwetša pele kopanyo ya dilete le tirišano ka go hlohleletša bašomi ba tša kgašo ka dinageng tša maloko go gaša ka ga merero ye e amanago le selete se. Phadišano ye e bopilwe gape ke Difoka tša Kgašo ya mabapi le Meetse tše di lemogago dikanagelo tše di tšwetšago pele Taolo ye e Kopantšwego ya Methopo ya Meetse ka seleteng sa SADC.
6. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
6.1 Morena Mayihlome Tshwete bjalo ka Motlatšamolaodipharephare: Ditirelo tša Dikgokagano ka Kgorong ya Merero ya Selegae.
6.2 Mohumagadi CM Mogotsi bjalo ka Motlatšamolaodipharephare ka Kgorong ya Bokgabo le Setšo
6.3 Morena Vusimuzi Philemon Madonsela Katološo ya Konteraka bjalo ka Molaodipharephare wa Kgoro ya Tirišano ya Makala a Pušo le Merero ya Setšo.
7 Balaodi bao e sego ba khuduthamaga go Lekgotlataolo la maina a Mafelo la ZA (ZADNA)
7.1 Mohumagadi N Dhevcharran (Modulasetulo)
7.2 Ngaka NYH Mzizana
7.3 Morena AM Brooks
7.4 Morena NM Msibi
7.5 Moatbokheiti MJ Ralefatane
7.6 Morena MR Khumalo
7.8 Ngaka YKN Mohutsioa-Mathabathe
7.9 Mohumagadi MO Morata
7.10 Morena J Tshipa
8 Maloko ao a sego a Khuduthamaga go Lekgotla la Protepente la Infraco
8.1 Morena BMC Ngcobo (Modulasetulo)
8.2 Mohumagadi MM Maponya
8.3 Ngaka A Githiari
8.4 Mohumagadi N Selamolela
9 Baoladi bao e sego ba Khuduthamaga go Lekgotla la SENTECH
9.1 Morena MA Mello (Modulasetulo)
9.2 Morena SM Radebe
9.3 Morena LC Mtimde
10 Lekgotla la Sehlongwa sa Bosetšhaba sa Diphedi tše di Fafapafanego sa Afrika Borwa (SANBI)
10.1 Mohumagadi MNE Magomola (Modulasetulo)
10.2 Ngaka ST Cornelius
10.3 Ngaka JM Matjila
10.4 Mohumagadi BD Ngidi
10.5 Morena S Gounden
10.6 Mohumagadi NN Mnqeta
10.7 Morena T Godongwana
10.8 Moprofesara BW van Wilgen
10.9 Ngaka YN Seleti
10.10 Mohumagadi S Mancotywa
10.11 Mohumagadi TE Abrahamse
11 Lekgotla la Dirapa tša Bosetšhaba tša Afrika Borwa
11.1 Mohumagadi J Yawitch (Modulasetulo)
11.2 Ngaka K Njobe
11.3 Morena ET Khumalo
11.4 Ngaka CG Olver
11.5 Mohumagadi F Futwa
11.6 Mohumagadi BD Ferguson
11.7 Morena M India
11.8 Morena L Zitha
11.9 Ngaka M Matlou
11.10 Morena MT Mokono
11.11 Ngaka N Mzilikazi
11.12 Mohumagadi T Semane
11.13 Mohumagadi JE McCourt
11.14 Morena FG Mketeni
12 Maloko ao a sego a khuduthamaga go Setheo sa Ditsela sa Bosetšhaba sa Afrika Borwa (SANRAL)
12.1 Morena R Morar (Modulasetulo)
12.2 Mohumagadi A Lawless
12.3 Mohumagadi ZJ Kganyago
12.4 Morena M Matete
12.5 Mohumagadi D Mashile-Nkosi
13 Balaodi bao ba sego ba Khuduthamaga go Lekgotla la Khamphani tša Maemafofane a Afrika Borwa (ACSA)
13.1 Morena SD Macozoma (Modulasetulo)
13.2 Ngaka MS Mabela
13.3 Mohumagadi S Simelane
13.4 Mohumagadi MK Matlou
Dipotšišo:
Mohumagadi Phumla Williams (Seboleledi sa Kabinete sa Motšwaoswere)
Mogala: 083 501 0139
