Ukubhalisa iziko lemfundo ephakamileyo labucala

Malunga nokubhalisa iziko lemfundo ephakamileyo

Ingaba unomnqweno wokunikela ngemfundo ephakamileyo eMzantsi Afrika? Kufuneka uqale ubhalise iziko njengelemfundo ephakamileyo labucala kwiSebe leMfundo ePhakamileyo noQeqesho (i-DHET) ukuze ube negunya ngokwasemthethweni lokunikela ngeenkqubo zemfundo ephakamileyo.

Amaziko emfundo ephakamileyo abucala anikela ngemigangatho efana neyesiKhokelo-nkqubo seSizwe seziQinisekiso (i-NQF) (Umgangatho wesi-5 ukuya kowe-10) njengeeyunivesithi zikarhulumente okanye iiyunivesithi zobuchwepheshe.

Injongo yobhaliso kukuqinisekisa ukuba:

• amaziko abucala anikela ngemfundo esemgangathweni
• uluntu lukhuselekile kumaziko emfundo anganyanisekanga nabaxhaphazayo
• umfundi ufumana iziqinisekiso zemfundo ezihambelana nesiKhokelo-nkqubo seziQinisekiso zeMfundo ePhakamileyo (i-HEQF) kwaye ezibhaliswe kwi-NQF
• inkqubo yemfundo ihlangabezana neenjongo zokutshintsha uMzantsi Afrika ngokomgaqo-nkqubo nemithetho karhulumente
• amaziko emfundo abucala athobela uMthetho weMfundo ePhakamileyo, wowe-1997 (uMthetho we-101 wowe-1997).

Iinkqubo zamaziko emfundo abucala zifanele ukubhaliswa e-DHET, zigunyaziswe yiKomiti yemiGangatho yeMfundo ePhakamileyo (i-HEQC) yeBhunga kwiMfundo ePhakamileyo (i-CHE) ngokunjalo zibhaliswe kwi-NQF liQumrhu laseMzantsi Afrika leziQinisekiso (i-Saqa). Iinkqubo zifanele ukwamkeleka esizweni nasehlabathini.

Kwiinyanga ezili-18 obona buncinane zokunqwenela ukuqalisa ukusebenza kweziko lakho ufanele ukufaka isicelo sokubhalisa kumBhalisi wamaZiko eMfundo ePhakamileyo abuCala. Isicelo sokuGuqulwa masingeniswe ngomhla omiselwe ngumBhalisi (uMlawuli-Jikelele).

Ofanele ukukwenza

1. Zalisa ifomu emiselweyo yokufaka izicelo.
2. Faka ifomu yokufaka izicelo kumBhalisi wamaziko eMfundo ePhakamileyo yabuCala.
3. Faka amaxwebhu alandelayo nefomu yokufaka isicelo:
   • iingxelo eziphicothiweyo zeemali zonyaka okanye iingqikelelo zeemali eziphicothiweyo
   • isicwangciso seshishini
   • isivumelwano sesiqinisekiso
   • amaxwebhu obhaliso lwequmrhu
   • iingxelo eziphicothiweyo zokuthotyelwa kwemimiselo yempilo nokhuseleko emsebenzini
   • isatifikethi sobhaliso lweshishini
   • isibhengezo sesicelo sokuqinisekiswa
   • isivumelwano sokuqinisekisa ukuba iziko linabasebenzi abafanelekileyo
   • isibhengezo sokubek’ iliso novavanyo
   • izivumelwano eziphakathi kwamaziko, ukuba zikhona
   • iincwadana eyenzelwe abafundi eneenkcukacha ngezifundo, izidanga namaxesha azo
   • iifomu zokubhalisa, izivumelwano zabafundi nemithetho kunye nemigaqo.
4. Abafaki-zicelo bangaphandle bafanele ukufaka okulandelayo:
   • isibhengezo malunga nokulingana kweziqinisekiso zemfundo
   • ubungqina bokwamkeleka kwilizwe ummi wangaphandle avela kulo
   • ubungqina bokugunyaziswa kwilizwe ummi wangaphandle avela kulo
   • isatifikethi sokugunyaziswa esivela kwi-HEQC nobhaliso lwase-Saqa
   • isibhengezo esisayiniweyo sokuba iziko alisayi kucalucalula nangeyiphi na indlela
   • xa kukho utshintsho, , makutshintshwe iinkcukacha
   • isibhengezo ngokubek’ iliso nokuvavanya, kwakunye nesibhambathiso sokuzibophelela esisephepheni eligximfizwe igama leziko, elibekwe umhla laze lasayinwa.
5. Hlawula umrhumo omiselweyo.

Qaphela: Nceda qhagamshelana nomBhalisi malunga nalo naluphi na utshintsho onqwenela ukulenza ngexesha lenkqubo yokufaka isicelo.

Kuthatha ixesha elingakanani

• Obhalisa okokuqala: iinyanga ezili-18 phambi kokuvulwa kweziko ukwenzela ubhaliso.
• Ukwenza izilungiso: iinyanga ezili-12 phambi kokuqalisa ngezilungiso ezo.
• Ukwenza inguquko: ngokokubona komBhalisi.

Kuziindleko ezingakanani

Yi-R500

Iifomu ezizaliswayo

Iifomu zifumaneka kwiSebe leMfundo ePhakamileyo noQeqesho:

• Isicelo sobhaliso njengeZiko leMfundo ePhakamileyo labuCala, ifomu APX -01
• Isicelo seziLungiso, ifomu APX-02 
•  Isicelo seNguquko, ifomu APX-03

Ungaqhagamshela nabani