Somlomo oHloniphekileyo weNdlu yoWiso-mthetho yeSizwe,
Sihlalo weBhunga leSizwe lamaPhondo (NCOP),
Sekela Somlomo weNdlu yoWiso-mthetho yeSizwe kunye noSekela Sihlalo we-NCOP,
Sekela Mongameli weRiphabliki, oHloniphekileyo uKgalema Motlanthe,
Owayesakuba nguMongameli uThabo Mbeki,
Owayesakuba nguSekela Mongameli u-FW de Klerk
Owayesakuba nguSekela Mongameli uBaleka Mbete,
KweHloniphekileyo iJaji eyiNtloko yeRiphabliki yoMzantsi Afrika, nakuwo onke amalungu axabisekileyo eCandelo leeNkundla,
IiNkulumbuso eziBekekileyo kunye nooSomlomo bamaPhondo wethu,
Sihlalo we-Salga, kunye nazo zonke iinkokheli zoorhulumente basekhaya,
Sihlalo weNdlu yeeNkokheli zeMveli yeSizwe;KwiiNtloko zamaZiko kaRhulumente axhasa intando yesininzi,
KwiRhuluneli yeBhanka enguVimba, uGill Marcus,
KwiiNtloko zamaZiko oKhuseleko lwethu,
IiNkokheli zamacandelo onke ? ezemisebenzi, ushishino, ezemidlalo kunye neenkokheli kwezenkolo,
Kumalungu eenkonzo zozakuzo,
Koonondaba baseMzantsi Afrika nabamazwe angaphandle,
Bemi baseMzantsi Afrika
Dumelang, good evening, goeienaand, molweni, thobela.
Ndiyabulela Somlomo oHloniphekileyo weNdlu yoWiso-mthetho yeSizwe kunye noSihlalo we-NCOP, ngeli thuba lokwabelana nabemi baseMzantsi Afrika neendwendwe eziphuma kumazwe angaphandle ngohlengahlengiso neNkqubo yokuSebenza yalo nyaka.
Ndibize le Ndibanisela yeziNdlu zePalamente ngokuhlwa kwakhona ukuze wonke ubani, kuquka abafundi nabasebenzi, banganethuba lokuzivela ngokwabo urhulumente wabo ethetha ngemiba echaphazela ubomi babo.
Siyawabulela amaGosa oNgameleyo ngokusinika eli thuba.
Mandiphinde, egameni likarhulumente, ndamkele amaLungu ePalamente kwakhona kwesi sixeko esihle saseKapa.
Sithanda ukubulela bonke abemi baseMzantsi Afrika abathe banegalelo kule Ntetho kaMongameli engoBume beSizwe ngokusebenzisa amajelo-ndaba angundoqo, nawolonwabo afana no-Facebook kunye ne-Twitter, kwakunye nokuqhagamshelana nathi ngqo.
Iingcebiso zabo zibe luncedo kakhulu.
Ngomso iza kuba yiminyaka engama-21 ukususela mhla uMongameli wethu esimthandayo uNelson Mandela wakhululwa entolongweni.
Yayingumhla wembali nomzuzu okhethekileyo kwilizwe lethu owabonisa uloyiso lwabantu bethu besoyisa imbandezelo nengcinezelo yocalucalulo.
Iziganeko zaloo mini zasilungiselela ukuqalisa ngombono wethu woMzantsi Afrika okhululekileyo, ongenabuhlanga, ongakhethi sini, wentando yesininzi, omanyeneyo noqhubela phambili.
Singene kunyaka we-17 wenkululeko, sikulungele ukuqhuba nephulo lokwenza uMzantsi Afrika ube lilizwe elinempumelelo nenkqubela phambili, sisakha kwisiseko esabekwa nguMongameli Mandela.
Njengokuba siphawula esi siganeko, sidlulisa iminqweno emihle kuTata uMadiba kunye nosapho lwakhe, kwaye simnqwenelela impilo ngokukhawuleza.
Bantu bakuthi,
Kufuneka samkele ubunyani bokuba uMongameli Mandela, esimthandayo sisonke, abancinane nabadala, amadoda nabafazi, abamnyama nabamhlophe, akasekho mtsha kwaphela.
Uza kuthi, ngamaxesha athile andwendwele amaziko ezonyango esiya kukhangela imeko yempilo yakhe, oko kuyinto eqhelekileyo kumntu weminyaka yobudala bakhe.
Kufuneka simvumele akwenze oko ngesidima, sinike usapho lwakhe negqiza loogqirha ithuba lokumjonga, egameni lethu, ngentlonipho.
Sinetyala elingako kuye, ngenxa yokulithanda kwakhe ilizwe lakhe nabantu balo, kunye negalelo athe walenza eMzantsi Afrika kunye nehlabathi liphela.
Siyalubulela usapho lwakhe, i-Nelson Mandela Foundation kunye negqiza loogqirha ngomsebenzi wabo omhle noncomekayo abawenzayo wokukhathalela esisisele senyathi sehlabathi, esizingcayo ukusibiza sithi sesethu.
Sinqwenela ukuqinisekisa isizwe ukuba uMadiba ufumana inkathalo kwezonyango ekumgangatho ophezulu, kwaye uchacha kakuhle.
SISONKE SIPHUMEZE OKUNINZI
Bantu bakuthi,
Siyaqhuba ukwenza inkqubela njengoko sisebenzela uluntu olunenkqubela phambili engaphezulu. Isiseko sezopolitiko siluqilima.
Sakhe ngokupheleleyo intando yesininzi edlamkileyo esekwe ngokoMgaqo-siseko.
Sinamaziko axhasa intando yesininzi nakhusela amalungelo oluntu aluqilima, afana ne-Ofisi yoMkhuseli woLuntu, iKomishoni yamaLungelo oLuntu yase Mzantsi Afrika, i-Ofisi yoMphicothi-zincwadi Jikelele, iKomishoni yokuKhuthaza kunye nokuKhusela amaLungelo eNkcubeko, ezeNkolo neeLwimi kunye neKomishoni yeSini.
Ngempumelelo, unyulo jikelele lwesizwe lubanjwa rhoqo emva kweminyaka emihlanu ukuze abemi baseMzantsi Afrika bazikhethele urhulumente ngokwabo, luqhutywa yiKomishoni yoNyulo eziMeleyo yethu esebenza kakuhle.
SinePalamente edlamkileyo elindele ukuba isiGqeba esiLawulayo sizise iingxelo kuyo.
SineCandelo leeNkundla elizimeleyo, elingabalamli bokugqibela abathembekileyo kwiimbambano zoluntu. Sinamajelo eendaba noonondaba abanenkululeko ekhuselwe nguMgaqo-siseko.
Malunga neenkonzo ezisisiseko, nalapho senze inkqubela. Bangaphezu kwama-400 000 abantu abongezelekileyo abathe bafumana amanzi kunyaka ophelileyo. Malunga nama-81% elizwe aye afumana umbane xa kuthelekiswa nama-63% ngonyaka wama-2000.
Amanani olwaphulo-mthetho abonisa ukuhla kolwaphulo-mthetho, ngakumbi ukuphanga kuxhotyiwe, ukuqhekeza amakhaya kunye nokuphanga amashishini kwakunye nolwaphulo-mthetho oluchaphazela isiqu, umzekelo, ukubulala kuhle nge-8,6% kunyaka ophelileyo.
Senza umahluko kwezemfundo, njengokuba oko kungqinwa kukunyuka kakhulu kwezinga lempumelelo kwibanga lematriki kunyaka ophelileyo, nomdla kwimfundo eboniswa lulutsha kwilizwe lonke jikelele.
MaLungu aHloniphekileyo,
Phantse babezizigidi ezili-15 abemi baseMzantsi Afrika abafumana izibonelelo kurhulumente. Siza kuqalisa ngokwandisa isiBonelelo saBantwana ukuze abantwana abangaphantsi kweminyaka eli-18 abaselungelweni laso bakwazi ukusifumana.
Njengokuba sisakha umbuso wophuhliso ongenguwo owentlalontle, izibonelelo zikarhulumente kufuneka zinekhonkco nemisebenzi yezoqoqosho kunye nophuhliso loluntu, ukuze abafumana uncedo okwethutyana bakwazi ukuzimela kwixesha elizayo.
MaLungu aHloniphekileyo,
Sichulumancile yindlela elisebenza ngayo icandelo lethu lezezimali.
Libonakala ngokukhawuleza lomelele xa lijamelene nentlekele ngokwasezimalini esandul? ukubakho kunye nokuhla kwamandla emali kwihlabathi liphela.
Ukusilela kohlahlo-lwabiwo-mali kuza kuhla ukusuka kwi-6,7% ukuya phakathi kwe-3% ne-4 % ngowama-2013.
Inxalabo malunga nezinga lonaniselwano iyasikhathaza kwaye siyithatha njengenobungozi.
Iinguqu zonaniselwano ezabhengezwa kuMgaqo-nkqubo woHlahlo-lwabiwo-mali lwaPhakathi eNyakeni kunyaka ophelileyo ziyaqaliswa. Iinkcukacha ezithe vetshe ziza kunikezelwa nguMphathiswa wezeziMali kwiNtetho yoHlahlo-lwabiwo-mali.
INdebe yeHlabathi yeBhola eKhatywayo yeFIFA yowama-2010 yaba yeyona projekthi ichulumancisayo ngaphandle kwentandabuzo ngowama-2010.
Kwezamazwe ngamazwe, sibe nenyhweba yokuwongwa ngokungeniswa kwiqumrhu le-Brazil-Russia-India-China-South Africa (BRICS). Eli liqela lamazwe anoqoqosho oluhlumayo. Sithakazelela intlanganiso yokuqala ye-BRICS kwekaTshazimpunzi e-China.
Sithathe isihlalo sethu sethutyana kwiBhunga loKhuselo leZizwe eziManyeneyo, esiya kulisebenzisa ukukhuthaza i-Ajenda ye-Afrika kwakunye noxolo nokhuselo e-Afrika kunye nehlabathi liphela.
Inde kakhulu indlela esiyihambileyo. Kuninzi esikuphumezileyo, kodwa imiceli-mngeni isahleli.
Xa sisebenzisana siya kuphumeza ngaphezulu kakhulu.
UKWAKHA ULUNTU OLUPHUMELELE NGAPHEZULU
Bantu bakuthi,
Lo gama abemi baseMzantsi Afrika bebhiyozela ukunikezelwa kwezindlu, umbane okanye amanzi, kukho uninzi lwabanye olusalindileyo.
Umzila wamashumi ngamashumi eminyaka yonomgogwana wophuhliso localucalulo kunye nengcinezelo yamakoloniyali awusokuze ucimeke ngeminyaka eli-17 kuphela.
Kodwa siqhubela phambili, sizimisele ukuphumeza injongo yethu yokwakha ubomi obungcono babantu bonke.
Kwaye oko sikwenza ngoncedo lwabantu bethu. Siyazivuyela impendulo zabo abasoloko besinika zona.
UBongokuhle Miya ubhale kwiphepha le-Facebook le-Ofisi kaMongameli wenjenje, idolophu yakhe Umzimkhulu ikwimeko ehlazisayo, imibhobho yelindle igqabhuke kuyo le dolophu, akukho mibhobho yokumelana nezantyala-ntyala kwaye izilwanyana zasekhaya zizula kuyo yonke idolophu.
Ubhale wathi: Ukuba urhulumente, owenza kakuhle kakhulu, angathatha ingqalelo nje engaphezulu, ngokungxamisekileyo kwimimandla enjalo.
Ngenene, siyavuma ukuba ukuziswa kweenkonzo kufuneka kuhambe ngokukhawuleza.
Urhulumente wethu wentsebenziswano usekwafumana ulwazi neenkcukacha ngokuqhagamshelana ngqo nabantu bethu.
Kunyaka odlulileyo, sityelele iilali ezininzi, iilokishi kunye neendawo zasedolophini. Umyalezo wabo mnye awuguquki.
Bayayivuyela inkqubela eyenziweyo, bacela ukuziswa kweenkonzo okukhawulezayo kwaye bayakuchaza ukuzinikela kwabo ekusebenzeni norhulumente ukuphumeza ngaphezulu.
Sijonge umsebenzi ekusafuneka siwenzile, sigqibe kwelokuba ngowama-2009 sigxininise kwimiba engundoqo emihlanu. Loo miba zezemfundo, ezempilo, uphuhliso lwamaphandle kunye nonguqu kwezolimo, ukuya phambili nedabi lokulwa ulwaphulo-mthetho, kunye nokudala imisebenzi endilisekileyo.
Senze kakuhle kule miba ingundoqo.
Kanti ke, sixhalabile kuba ukungaphangeli nentlupheko zizingisile nangona kubekho ukukhula kwezoqoqosho kule minyaka ilishumi idlulileyo.
Ukushukuxa le nkxalabo, siye sagqiba kwelokuba lo nyaka wama-2011 siwubhengeze njengonyaka wokudala imisebenzi ngenguqu kwezoqoqosho olunentsingiselo kunye nokukhula okuqukayo.
Siye sazisa Umgaqo-nkqubo oMtsha wokuHluma koQoqosho oya kusikhokhela ekuphumezeni ezi njongo, sisebenza sikholelwa ukuba ukudala imisebenzi endilisekileyo kusembindini womgaqo-nkqubo wezoqoqosho lwethu.
Sikhuthaza onke amacandelo kunye nawo onke amashishini, kungaqwalaselwanga bungakanani bawo, kugxininiswe ekudaleni imisebenzi. Igalelo ngalinye liyabala kulo mzamo wesizwe.
Ndiza kunikezela nje ngesishwankathelo esibanzi seNkqubo yokuSebenza kule ntetho.
AbaPhathiswa baza kubhengeza imisebenzi abajolise kuyo kwaye ngaphezulu bazise iinkcukacha ezithe ngqo ngokwecandelo, kwiiNtetho zeVoti yoHlahlo -lwabiwo-mali zabo ezizayo.
Onke amasebe karhulumente aza kulungelelanisa iinkqubo zawo nokubaluleka kokudala amathuba emisebenzi. Amanqanaba karhulumente akumaphondo noorhulumente basekhaya baceliwe ukuba nabo benze ngokufanayo.
Iinkqubo zamaShishini kaRhulumente kunye namaziko ophuhliso lwezimali kufuneka nawo alungelelaniswe ngokumandla ne-ajenda yokudala amathuba emisebenzi.
MaLungu aHloniphekileyo,
Uphando lubonisa ukuba singakwazi ukudala amathuba emisebenzi kwimiba emithandathu engundoqo. Loo miba luphuhliso lwezakhiwo, ezolimo, ezemigodi kunye nokuphuculwa kwezimbiwa ngenjongo yokufumana inzuzo, imveliso, ezoqoqosho ngendalo, kunye nokhenketho.
Asikwazi ukudala lamathuba emisebenzi sisodwa. Kufuneka sisebenze namashishini, abasebenzi kunye namacandelo oluntu.
Amava abonisa ukuba siyaphumelela xa sisebenzisana.
Umzekelo obalulekileyo nguloo msebenzi wenziwa ziiMpendulo zeSicwangciso-nkqubo se-Ofisi kaMongameli kwiqela leNtlekele yezoQoqosho lwaMazwe ngaMazwe, eliquka urhulumente, ushishino, abasebenzi kunye namacandelo oluntu.
Phakathi kwezinto ezibalulekileyo eli qela eliziphumezileyo, uMzantsi Afrika uqalise ngoqeqesho lokuqala kubasebenzi ngenjongo yokufumana enye indlela engcono kunokudenda abasebenzi.
Okunye ukungenelela kuquka inkxaso ngezimali kwimizi-mveliso ehlangabezana neengxaki, okuthe kwakhusela imisebenzi ebalelwa kuma-7 000. Siyalibulela eli qela ngomsebenzi walo omhle noncomekayo, kwaye sijonge phambili kwintsebenziswano eqhubekayo.
Lo gama sijonge ngakumbi kwicandelo labucala lezoshishino ukusinceda sidale amathuba emisebenzi emininzi, urhulumente ngokuqinisekileyo uza kudlala indima yakhe.
Sinovuyo ukwazisa ngokusekwa kwengxowamali yemisebenzi yeebhiliyoni ezisithoba kwiminyaka emithathu ezayo ukubonelela ngemali amaphulo amatsha okudala amathuba emisebenzi.
Ukongeza, iQumrhu loPhuhliso lwamaShishini (IDC) libekele bucala iibhiliyoni zeerandi ezilishumi kwiminyaka emihlanu ezayo zotyalo-mali kwimisebenzi yoqoqosho ebonakalisa amandla okudala amathuba emisebenzi emininzi.
Isekwaluvuyo kum maLungu aHloniphekileyo, ukwazisa iibhiliyoni zeerandi ezingama-20 ezinika umnyinyiva kwirhafu ukuxhasa utyalo-mali, ukwandisa kunye nokuphucula icandelo lemveliso.
Ukuze iprojekthi ikwazi ukufumana inkxaso, kufuneka isixamali esizizigidi seerandi ezingama-200 ukuba iprojekthi leyo intsha, ize ibe zizigidi zeerandi ezingama-30 ukwandisa kunye nokuphucula iprojekthi.
Inkqubo iza kubonelela ngenkxasomali eya kufikelela kwizigidi zeerandi ezingama-900 ekutsalwa kuzo irhafu kubatyali-mali abatsha kunye nezigidi zeerandi ezingama-550 ukwandisa nokuphucula.
Bantu bakuthi,
Icandelo lamashishini asakhasayo lilungu elixabisekileyo kwiphulo lokudala amathuba emisebenzi.
Siya kuqhuba ukubonelela ngenkxaso mali kunye nenkxaso engakhatshwa yimali kumashishini amancinane, aphakathi nasakhasayo (SMME?s), nezolimo ezikwizinga eliphantsi kwakunye nomanyano lwamashishini.
Kufuneka sinciphise intlawulo yolawulo, sinqande uphindaphindo kwaye sithumele izinto eziluncedo kumashishini amancinane.
Ngoko ke, sicinga ngokuhlanganisa ii-arhente zontathu; Khula, SA Micro Finance Apex Fund kunye nenkxaso yamashishini amancinane e-IDC abe liqumrhuelinye.
Iphulo lokuhlawula amashishini amancinane, aphakathi kunye nasakhasayo ngexesha, zingaphelanga iintsuku ezingama-30, liqhuba kakuhle.
Umnxeba ongxamisekileyo wentlawulo weSebe lezoRhwebo noShishino elithe latsalelwa umnxeba izihlandlo ezimalunga nama-20 000 kulo nyaka-mali uphelileyo, kwaye ixabiso lemali ehlawulweyo lizizigidi zeerandi ezingama-R210.
Amanye amasebe nawo asungule awawo amaphulo, umzekelo iphulo i-Re Ya Patala (Siyahlawula) leSebe lezeMisebenzi yoLuntu.
Siyaqhuba nohlaziyo lowiso-mthetho ukwenza ukubhalisa amashishini kube lula kunye nokomeleza uMthetho woKhuphiswano ukuvula imarike kwabathatha inxaxheba abatsha.
MaLungu aHloniphekileyo,
Ubutyebi bezimbiwa belizwe lethu bulixabiso kwisizwe sethu kwaye bulilifa elilelethu sonke bemi baseMzantsiAfrika, uMbuso ungumgcini wabo.
UMzantsi Afrika unobutyebi bezezimbiwa, ezixabisa ngoku malunga neetriliyoni zeedola zaseMerika.
Ngowama-2009, ushishino lwezimbiwa labanegalelo elingaphezu kwama-30% ngokupheleleyo kwimali yempahla ethunyelwa ngaphandle, laze laqesha i-2,9%yabantu abasakwaziyo ukusebenzela uqoqosho elizweni.
Uqikelelo lubonisa ukuba imithombo yezimbiwa zethu ilindeleke ukuba ingavelisa ngaphezu kwekhulu leminyaka ezayo.
Ukuwasebenzisa kakuhle loo mandla, urhulumente uxhase uPhononongo lwe-Afrika, iQumrhu leziMbiwa kunye neziMali njengeNkampani yoMbuso yeziMbiwa eya kuthatha indawo ebalulekileyo kubuchule bezemigodi.
Enye yemiba ephambili kurhulumente kulo nyaka isekwa kukugqibezela kunye nokwamkela ubuchule bokuphuculwa kwezimbiwa ngenjongo yokufumana inzuzo njengomgaqo nkqubo karhulumente, ukuze sikwazi ukuqalisa ukuvuna inzuzo yezimbiwa zethu.
Bantu bakuthi,
Kwezonxibelelwano, sizinikele ukuguqula iimpawu zethu zoomabonakude nonomathotholo ukusuka kumgangatho we-analogu ukuya kwidijithali, oluya kwenza ukuba imifanekiso nesandi zibe kumgangatho ophezulu.
Amathuba emisebenzi aza kudalwa kwezoshishino lwemveliso, ukupakisha, ukuhambisa nokufakela idijithali ngeli thuba.
Somlomo oHloniphekileyo kunye noSihlalo we-NCOP,
Sinovuyo yimpumelelo yecandelo lezokhenketho, ngakumbilulwazi lokuba abakhenkethi abali-16 badala amathuba emisebenzi womntu omnye elizweni.
Ngaphezu kwezigidi ezi-7,3 zabakhenkethi zityelele eMzantsi Afrika kunyaka ophelileyo, xa kuthelekiswa malunga nezigidi ezi-6,3 kowama-2009. Siza komeleza iimarike ezikhoyo lo gama siphonononga uqoqosho olukhulayo.
Ilizwe lethu lisaqhuba ngokuba yindawo ethandwayo yeendibano zamazwe ngamazwe.
KweyeKhala, siza kusingatha indibano yezemidlalo yomgangatho ophezulu eThekwini, iSeshoni yeNdibano Jikelele yeKomiti ye-Olimpiki yaMazwe NgaMazwe (i-IOC) ye-123.
Siyayibulela i-IOC ngethuba esinike lona lokusingatha le ndibano ibaluleke kangaka.
Sesiqinisekise iintlanganiso neenkomfa ezingama-95 phakathi kowama-2010 kunye nowama-2016.
Ukomeleza amandla okhenketho lwethu, phakathi kwezinye izinto, siza kujonga ukwenza iinguqu kwimfuno ze-visa , siphucule amaxesha ethu okuma kweenqwelomoya kwizikhululo zeenqwelomoya zamazwe angaphandle kwakunye neziseko zoncedo lwabakhenkethi.
Ngokuhambelana nezokhenketho, siza kuqhuba ukuphuhlisa icandelo loshishino ngenkcubeko, olunegalelo elimalunga neebhiliyoni zeerandi ezimbini kwimveliso epheleleyo yasekhaya.
Silibonile ixabiso leziyunguma ezifana noMnyhadala we-Jazz waMazwe ngaMazwe waseKapa, onegalelo elingaphezu kwezigidi zeerandi ezingama-475 kuqoqosho lwaseKapa noludale amathuba emisebenzi engama-2 000 kunyaka ophelileyo.
Sinqwenela kwakhona ukudlulisa ilizwi elikhethekileyo kwi-Minstrels Carnival yaseKapa, eqaqambisa esi sixeko rhoqo ngonyaka ngomhla we-2 kweyoMqungu, bebhiyozela ukukhululwa kwamakhoboka.
MaLungu aHloniphekileyo,
Inkqubo yethu yophuhliso lweziseko zoncedo yenza sikwazi ukwandisa ukufikelela kwiinkonzo ezisisiseko kunye nokuphucula umgangatho wobomi.
Oku kuquka iiprojekthi zokubonelela ngamanzi, umbane kunye nezindlu.
Ukuqinisekisa ukubakho kombane kubaluleke kakhulu kuphuhliso lwezoqoqosho kunye nokudalwa kwamathuba emisebenzi. Ukuqinisekisa ukunikezelwa kombane elizweni, u-Eskom utyale imali engaphezu kweebhiliyoni zeerandi ezingama-75, ngakumbi kwizikhululo ezitsha i-Medupi, i-Kusile kunye ne-Ingula, kwakunye nokubuyela kwiinkonzo nokusasazwa kwezinye iiprojekthi.
Kufuneka sonke songe umbane ukuze singabuyeli kwinkqubo yokuhlisa umthwalo wombane kwakhona njengendlela yokuwonga.
Kulo nyaka, siza kuqalisa ukufumana umbane kubavelisi abenzangokutsha amandla wombane, okuya kubonisa ukuzinikela kwethu kumandla aphinde enziwa matsha.
MaLungu aHloniphekileyo,
Ushishino lokwakha liyaziwa ngokuvelisa amathuba emisebenzi. Kukho izigidi ezi-1,2 zabantu abahlala kwimimandla enamatyotyombe engama-2 700.
Ngowama-2014, kufuneka amakhaya angama-400 000 abe sele eneziqinisekiso zokuba ngabanini bomhlaba kwaye bafumane neenkonzo ezisisiseko.
Siza kuphucula ukuziswa kweendawo zokuhlala eziqeshisayo njengokuba abanye abantu abeza ezidolophini bengazimisele kuhlala ngokusisigxina.
Oku kungazindaba ezimnandi kubemi abafana no-Portia Busisiwe Mrwetyana owabhala kwiphepha lethu le-Facebook malunga nokungalingani e-Bekkersdal, apho amatyotyombe, angenazinkonzo, akhiwe kufutshane nezindlu zasedolophini ezingaphaya kwendlela ezifumana zonke iinkonzo.
Ubuza athi: Ndinqwenela ukwazi kutheni siphethwe ngendlela eyahlukileyo, kodwa sikunika ivoti efanayo, KUTHENI?
Urhulumente uza kuchitha iibhiliyoni zeerandi ezi-2,6 kwiinkonzo zamanzi kulo nyaka. Phakathi kwemimandla ebalulekileyo ngamaphondo ase-Limpopo, KwaZulu-Natal kunye neMpuma Koloni apho kusekho inani eliphezulu labantu abangenawo amanzi acocekileyo okusela, lo gama singayekanga ukuyihoya neminye imimandla.
Siziqaphele izicelo ezivela kubaxhasi bale ntetho, becela ukuba urhulumente alungise imingxuma esezindleleni.
INkqubo yeMisebenzi yoLuntu eNatyisiweyo(i-EPWP) ejolise ekudaleni amathuba emisebenzi azizigidi ezi-4,5, namathuba angaphezu kwesigidi sele edaliwe ukususela kwiNqanaba leSibini. Inxalenye yenkqubo igxininise ekulungiseni ukuthungelana kweendlela zethu.
Uninzi lwabantu bethu luyazuza kakhulu kwi-EPWP.
Abantu bafumana imisebenzi yokulungisa iindlela, ezemidlalo, ukufundisa abadala ukufunda nokubhala, nokugcina iindlela zicocekile.
Inkqubo yokulungisa iindlela, ebizwa ngokuthi Zibambele, iza kunatyiselwa kwilizwe lonke kulo nyaka khon? ukuze kudaleke amathuba emisebenzi.
Siza kuphuhlisa iziseko eziluncedo eziya komeleza icandelo lezolimo, lo gama lisekwanceda nokudala amathuba emisebenzi.
Oovimba bamanzi, amaphiko omoyo kunye nezikimu zonkcenkcesho ziza kuvuselelwa. Izilimo, imfuyo kwakunye namadlelo aza kukhuselwa ngokubiyelwa ngocingo.
Ezi projekthi ziza kwandisa ukufumaneka kokutya kwaye zidale namathuba emisebenzi kubantu abaninzi, ingakumbi abasetyhini basemaphandleni.
Ukuqaqambisa ubuchwepheshe bethu kwinzululwazi neteknoloji kunye nokudala amathuba emisebenzi, sizama ukufumana imvume yokusingatha isibonakude soonomathotholo i-Square Kilometre Array .
Oku kuzama ukufumana le mvume sele kudale amathuba emisebenzi kwicandelo lokwakha engama-800 eMntla Koloni kwaye kuza kudala eminye eyongezelekileyo eli-100 kulo nyaka.
Iphulo lethu lokudala amathuba emisebenzi kufuneka liqaqambise uphuhliso lolutsha.
I-arhente yoPhuhliso loLutsha yeSizwe ibambe iingxoxo namalungu ombuso kunye nabezoshishino ukulungelelanisa uphuhliso lolutsha kwiinkqubo zecandelo likarhulumente nokuxhasa ushishino lolutsha kunye nomanyano lwamashishini.
Bantu bakuthi,
Sikholelwa ukuba ukungenelela njengoko sitshilo kuza kusiqhubela ekubeni sibeke ukudala amathuba emisebenzi phezulu kwinkqubo yabo bonke abathatha izigqibo elizweni.
AbaPhathiswa abasixhenxe baye bahlangana namaqabane ethu kwezentlalo ngoLwesibini ukuxoxa ngobu buqabane kwaye sisenethemba lokuba siza kuphumelela.
Somlomo oHloniphekileyo kunye noSihlalo oHloniphekileyo,
Ngokunxusene nenkuthazo yokudalwa kwamathuba emisebenzi, siza kuqalisa ngenguqu kumgaqo-nkqubo onxulumene nobomi babasebenzi bethu.
Urhulumente, ngokubambisana nabehlulelani bakhe kwezentlalo, uhlengahlengisa umthetho wee-arhente eziqeshisayo kunye nenkqubo-sikhokhelo yomgaqo-nkquboukubonelela ngeenkonzo zokuqeshwa eburhulumenteni.
Oku kuza kwenza urhulumente agcine iinkcukacha zabantu abafuna umsebenzi kunye namathuba emisebenzi.
IPhepha lesiGqibo sikaRhulumente soKwakha Kutsha uKhuseleko kwezeNtlalo kulindeleke ukuba lipapashwe kulo nyaka ukuze kubanjwe iingxoxo.
Imiba eza kushukuxwa iza kuquka inkxaso-mali kunye nendlela iNgxowamali yoKhuseleko lweNtlalo yeSizwe eza kuba yiyo, nokuba ingxowamali zomhlalaphantsi kunye nezecandelo labucala lezoshishino ziza kulunga njani na kuyo yonke le nkqubo, kunye nequmrhu eliya kulawula.
Urhulumente kufuneka azalise zonke izithuba zemisebenzi ezabelwe imali. ISebe loHlolo lweNtsebenzo noLawulo liza kubonelela ngengxelo kwiinyanga ezintandathu ezizayo.
Somlomo oHloniphekileyo kunye noSihlalo oHloniphekileyo,
Ngenene, inde indlela esiyihambileyo ukususela ngowe-1994. Siphumeze lukhulu, kodwa kusekuninzi ekufuneka sikwenzile, kwaye xa sisebenzisananjengabemi baseMzantsi Afrika, siya kuphumeza lukhulu!
Ndicela nindivumele ukuba ngoku ndithethe ngeminye imiba emine ephambili kwakunye nezinye iinkqubo.
Inqwalasela kwimfundo esisiseko kulo nyaka yimiba emithathu engo-T: Teachers, Textbooks and Time (nguTitshala, yiNcwadi yokufunda kunye neXesha). Siyaliphindaphinda ikhwelo lethu lokuba ootitshala kufuneka babe sesikolweni, emagumbini okufunda, ngexesha, befundisa ubuncinane iiyure ezisixhenxe ngemini.
ULawulo kufuneka luqinisekise ukuba wonke umntwana unencwadi yokufunda ngexesha, nokuba sincede ootitshala badale iimeko ezikhuthaza ukusebenza ukuze bakwazi ukunikezela ngokufundisa okusemgangathweni.
Ukulandela inkqubela, kulo nyaka, siqalise ngokuhlola kwesizwe rhoqo ngonyaka kwizifundo zokufunda nokubala ezivavanywe ngamazwe ngamazwe kumabanga 3, 6 nele-9.
Siza kuqhuba sityala imali ekuqeqesheni ootitshala, ngakumbi kwiziBalo kunye neNzululwazi.
Siza kuqwalasela ngakumbi ekuqeqeshweni kweenqununu, ngakumbi ezo zilawula kwizikolo ezingenzi kakuhle.
Ingqwalasela kwezemfundo ephakamileyo iza kuba kukwandisa ukufikelela ngakumbi kwabantwana abahluphekayo kulo mgangatho wemfundo.
Oku kuquka ukuguqula imali-mboleko ibe yinkxaso-maliyokufunda kubafundi abakunyaka wabo wokugqibela abakulungeleyo oko.
Abafundi abafunda kwiikholeji zokwandisa imfundo noqeqesho abakulungeleyo ukuxhaswa ngemali baza kukhululwa ekuhlawuleni imali yesikolo.
Sikhuthaza amashishini karhulumente ukuba adlale indima ebalulekileyo kuphuhliso lwezakhono kunye nokunceda ngokubonelela ngezakhono zobugcisa ezifunekayo kuqoqosho.
Inkampani i-Denel, i-Eskom, i-SAA kunye ne-Transnet baxhase uqeqesho olungaphezu kwama-6 000 abafundi kubugcisa-kunye-nobunjineli ezizizakhono ezinqabileyo nezinzima.
Bemi baseMzantsi Afrika,
Siyaqhuba ukuphucula umthamo nokusebenza kakuhle kwamapolisa, ngakumbi iinkonzo zokuphanda, zophengululo lobungqina kunye noongcothoza bolwaphulo-mthetho.
Sikwandisile ukubonakala kwamapolisa nokujikeleza kwawo echonga iindawo ezibalaseleyo ngolwaphulo-mthetho. Senza inkqubela ebonakalayo ekucutheni ukuxhaphaka kwemipu engekho mthethweni kunye nesemthethweni.
Iinkundla zethu ziyaqhuba ngokusebenza kakuhle, kwaye neenkqubo zokunciphisa umsebenzi osemva kwinqanaba lezithili nelengingqi liqhuba kakuhle.
Siza kuqhuba ukwenza ulwaphulo-mthetho olujoliswe kubasetyhini nabantwana umba ophambili, kunye nokubabonelela ngenkxaso ngamaziko enkathalo i-Thuthuzela.
Siza kusebenza noluntu nabanye abantu abachaphazelekayo ukulwa ukuthengiswa nokusetyenziswa gwenxa kweziyobisi, okwahlula uluntu phakathi.
Utyelelo lwam kwiziko lokubuyiselwa kwezimilo zabasebenzisa iziyobisi gwenxa e-Mitchells Plein ngoLwesibini kwandiqinisekisa ukuba kufuneka sibe namandla angaphezulu kwidabi lethu lokulwa ukusetyenziswa gwenxa kweziyobisi kunye nokuthengiswa kwazo kuluntu lwethu.
Ndithumele amapolisa ukuba abaphathe ngokugwebayo abantu abathengisela abantwana iziyobisi eKapa nakweminye imimandla. Asisokuze sibanyamezele abanini beendawo ezithengisa utywala abathengisela abantwana utywala.
Ukulwa norhwaphilizo nako kuyaqhuba.
Kusekwe iYunithi yoKulwa noRhwaphilizo eKhethekileyo liSebe lezabaSebenzi bakaRhulumente noLawulo ukuze lijongane namatyala oluleko anxulumene norhwaphilizo lwabasebenzi boluntu.
Kukho inkqubela eyenziwayo kuphando oluninzi oluqhubekayo.
Malunga nezigidi zeerandi ezingama-44 zithe zafunyanwa kwakhona kubasebenzi bakarhulumente abafumene inzuzo engekho mthethweni kwisibonelelo sezindlu, lo gama ukucocwa korhwaphilizo kwesixokelelwano senkxaso mali karhulumente kusaqhuba.
Sithumele iYunithi yoPhando eKhethekileyo ukuba iphande ngolawulo olugwenxa okanye urhwaphilizo kumasebe athile karhulumente, koomasipala kunye namaziko karhulumente.
Lo gama singagwebi phambi kophando, babonise ukuluthibaza urhwaphilizo kuwo onke amanqanaba karhulumente kunye neeNkonzo zoLuntu.
IQela eliSebenzayo lee-Arhente eziliQela elijongene nokuFumana umsebenzi elikhokhelwa ngoNondyebo weSizwe, iiNkonzo zeRhafu yaseMzantsi Afrika kunye neZiko lobunNtlola kwezeMali liphonononga yonke inkqubo yokufumana umsebenzi ukuqinisekisa ixabiso elingcono lemali elivela kwinkcitho-mali yombuso.
Kwicandelo lezempilo, kulo nyaka, siza kugxininisa ekuqesheni abasebenzi abafanelekileyo nabakulungeleyo ukusebenza kwizikhundla ezifanelekileyo.
Sifuna iintloko zamasebe, amagosa azintloko kwezezimali, amagosa azintloko zesigqeba ezibhedlele, amagosa ezempilo ezithili kunye nabalawuli beekliniki.
Siceba ukuvuselela iikholeji zokuqeqesha abongikazi ezi-105 kulo lonke ukuze kuqeqeshwe abongikazi abangaphezulu.
Sikwacwangcise ukuvula isebe lezifundo zobugqirha kwiSibhedlele sabaFundi e-Limpopo ukuze kuqeqeshwe oogqirha abangaphezulu.
Ukuvuselelwa nokwenziwa ntsha kwezibhedlele neekliniki kuyaqhubeka.
Sijonge ukugxininisa kwethu kwimpilo yabantu basetyhini, siza kwandisa umda wamalungelo empilo yenzala sibonelele nangeenkonzo, phakathi kwezinye izinto, ezinxulumene nocwangciso-ntsapho, izifo zokwabelana ngesondo, ukukhulelwa kwabantwana abafikisayo kunye nokunikezelwa kwezikhuseli xa usexesheni kwabo bahluphekayo.
Malunga nokulwa neNtsholongwane kaGawulayokunye noGawulayo,sizivuselele iinkqubo zethu zokuxhasa amanyathelo aliqela okhuselo, kuquka ukoluka kwamadoda phantsi kweliso labezempilo, ukunqanda ukosulelwa kwabantwana ngentsholongwane kaGawulayo besosulelwa ngoonina kunye nokukhuthaza uvavanyo lwegazi luvavanyelwa iNtsholongwane kaGawulayo.
Uvavanyo luthathelwe phezulu kulo lonke ilizwe. Kuye kwenziwa ngaphezu nje kwezigidi ezintlanu zovavanyo ukususela oko kwamiselwa iphulo lokuzivavanya kwekaTshazimpunzi kunyaka ophelileyo.
Kulo nyaka uphelileyo, umsebenzi wokuphuhlisa umgaqo-nkqubo we-Inshorensi yezeMpilo yeSizwe nesicwangciso sokuyiqalisa uyaqhuba. Urhulumente uzakukhupha uxwebhu lomgaqo-nkqubo kwakamsinyane ukuze uluntu luwuphonononge.
Somlomo oHloniphekileyo kunye noSihlalo oHloniphekileyo we-NCOP,
Siza kuqhuba neNkqubo yoPhuhliso lwamaPhandle ngokuBanzi ejolise ekuvuseleleni iiprojekthi zonikezelo lwemihlaba kunye neenkqubo zonkcenkcesho kwiindawo ezazisakuba ngamaphandle azimele-gegqi kwakunye neefama eziphantsi koxinizelelo ezibanikazi bazimeleyo.
Urhulumente uphuhlise inkqubo yeNkonzo yoManyano lwamaShishini oLutsha lwasemaPhandleni lweSizwe ukuncedisa ulutsha emaphandleni.Ngoku nje, ngaphezu kwama-7 000 abantu abatsha baqeshiwe kule nkqubo.
Somlomo oHloniphekileyo kunye noSihlalo oHloniphekileyo,
Urhulumente uwise umthetho ovuselela iBhanka yasePosini, esithi ukuyikhumsha yi-Post Bank, eza kunceda abasemaphandleni ukuba bonge imali, kwaye baboleke nemali yokuqala amashishini amancinane.
Siyabakhuthaza ukuba bayisebenzise ukuqinisekisa uphuhliso.
UKWAKHA INKQUBO KARHULUMENTE WASEKHAYA ESABELAYO, EPHENDULAYO, ESEBENZA KAKUHLE KUNYE NECHANEKILEYO
MaLungu aHloniphekileyo,
Ilizwe liza kubamba unyulo lwesine loorhulumente basekhaya phambi kokuphela kwekaCanzibe.
Kwezi veki zidlulileyo kubekho izikhalazo ezininzi malunga noorhulumente basekhaya.
Ukungoneliseki kweminye imimandla kuba neziphumo zoqhankqalazo, olwalatha iingxaki ezigqubayo kweli nqanaba likarhulumente.
Kufuneka senze amava abantu ngoorhulumente basekhaya ibe ngamava ochulumankco, kuba ufikelela emakhayeni abo nasebomini babo ngqo, yonke imihla.
Abanye oomasipala basebenza kakuhle kakhulu, kwaye nabanye ooceba bawenza kakuhle kangangoko banakho umsebenzi wabo.
Simisele ubuchule bokuzisa inguqu koomasipala basekhaya, sigxininisa, phakathi kwezinye izinto, ukomelezwa kweenkqubo zolawulo olusisiseko, ulawulo lwezimali kunye nokukhathalela abafuna iinkonzo.
Amalungiselelo onyulo loorhulumente basekhaya ahamba kakuhle.
Ubhaliso lwabavoti obelubanjwe kwimpelaveki edlulileyo luhambe kakuhle, kwaye sibothulel? umnqwazi abo bathe babhalisa. Sikhuthaza abo bangenazo izazisi bafake izicelo zabo zezazisi ngaphandle kokulibazisa, ukuze bangaphoswa lubhaliso olulandelayo kwinyanga ezayo.
Kulandela ukumiselwa kwePhulo lokuBhalisa iNani laBemi leSizwe eLibode, eMpuma Koloni kunyaka ophelileyo, ngaphezu kwama-700 000 ezazisi zathi zakhutshelwa abanini bazo abatsha, kusalatha umdla omkhulu wabantu bethu ukuba bafumane le ncwadana ibaluleke kangaka.
Njengokuba silungiselela unyulo, sikwaqaphela ukuba ilizwe lethu lithwaxwe kanobom zizikhukhula kwezi veki zisandul? ukudlula, kwaye iintsapho ezininzi zichaphazelekile.
Sigqithisa uvelwano olunzulu kwiintsapho zabo bathe baphulukana nobomi babo. Sikwavelana nabo bathe benzakala kwanabo bathe balahlekelwa zizinto zabo zonke.
Bemi baseMzantsi Afrika,
Mandithathe eli thuba lokwazisa ukuba urhulumente ubekele bucala izigidi zeerandi ezingama-800 ukunceda uluntu oluchaphazelekayo nokulunika umnyinyiva.
Siza kuphawula inkxaso-mali eza kujongana nokuvuselela ubomi emva kwezikhukhula nokwakhiwa ngokutsha kwiminyaka ezayo.
Siyazibulela ii-arhente ezinika umnyinyiva, imibutho engekho phantsi kolawulo lukarhulumente, ushishino, imibutho yeemvaba ngeemvaba kunye noluntu ngokunceda abo baselusizini.
UKWAKHA I-AFRIKA ENGCONO KUNYE NEHLABATHI ELINGCONO
I-Ajenda yase-Afrika ihleli iyingqwalasela yethu ephambili yomgaqo-nkqubo.
UMzantsi Afrika uza kusebenza isithuba seminyaka emibini kwiBhunga loXolo noKhuselo lweManyano ye-Afrika.
Ilizwe liza kuthatha isikhundla sokuba ngusihlalo weLungu laMazwe asemaZantsi e-Afrika aluLuntu loPhuhliso kwezoPolitiko, uKhuselo noKhuseleko ukusukela kweyeThupha.
Kule ndima, siza kuqhuba iingxoxo namaqabane ezingokuqalisa iSivumelwano seHlabathi sezoPolitiko eZimbabwe kunye nophuhliso lwendlela eya kunyulo.
Siza kuxhasa izigqibo ezimalunga nokruthakruthwano e-Malagasy. Siza kubeka esweni sincede apho sinakho ukuqinisekisa ukuba imeko yezopolitiko nokhuseleko kwi-Democratic Republic of Congo (DRC) ilulungele unyulo.
Sibe nenyhweba yokuwongwa ngokuthatha inxaxheba ekufumaneni isisombululo kwimeko egqubayo e-Cote d?Ivoire njengelungu loLuhlu lwaMazwe aChophele uMcimbi woMgangatho oPhezulu weManyano ye-Afrika, njengokuba sakhethwa ukuba sincede ekusombululeni imiceli-mngeni kwelaa lizwe.
Siwuqhwabela izandla umsebenzi woMkhosi woKhuselo weSizwe waseMzantsi Afrika, othe wathumela umndilili ongaphezu kwama-2 000 amajoni kwimizamo yokugcina uxolo e-DRC, e-Sudan kunye nakwi-Central African Republic.
Siya kuqhuba sithatha inxaxheba ekuhlaziyeni uubuDlelwane oButsha boPhuhliso lwe-Afrika sigxininisa ngokukhethekileyo ekuqaliseni kwenkqubo yeziseko eziluncedo, apho siza kuzingisa ukumela uphuhliso lweziseko eziluncedo kumazwe aseMantla naseMazantsi.
UMzantsi Afrika uziqaphele iziganeko ezenzekayo eYiphutha kwakunye nezo zenzeke e-Tunisia kuqala.
Siyaqhuba ngokubeka esweni elibukhali imeko egqubayo, kuquka impembelelo yayo emazweni akuMbindi Mpuma kunye naseMntla Afrika.
Sikholelwa ngokungagungqiyo ukuba indlela ayikhethayo nokuqulethwe yinguqu kwakunye nalapho asingise khona la mazwe angoodade, kufuneka ibhalwe ngawo.
Kulo mba, uMzantsi Afrika unika inkxaso yawo kwiinzame ezijolise ekwaziseni nasekuqaliseni inguqu zezopolitiko eziya kuqinisekisa inguqu ezolileyo nelawulwa luxolo e-Tunisia naseYiphutha.
Sithemba ukuba akusayi kubakho nto ibakhupha emzileni wokuqonda uthakazelelo lwabantu basePalestina bethakazelela umbuso ozimeleyo nokhuselekileyo, ophila ecaleni komnye ngoxolo noMbuso wakwaSirayeli.
UMzantsi Afrika uyaliphindaphinda ikhwelo kuluntu lwamazwe ngamazwe lokuwakhuthaza onke aqhube ngokufuna isisombululo esiluqilima kuMbindi Mpuma.
Sivuyisana ngentliziyo yethu yonke nabantu base-Sudan ngovoto logayo-zimvo olube yimpumelelo, kwaye samkela uMbuso omtsha oyi-Sudan eseMazantsi.
Eli libali lempumelelo elibalulekileyo e-Afrika. Siyavuyisana neManyano yase-Afrika kunye neZizwe eziManyeneyo ngokuyiphatha ngobuchule le projekthi.
Kwezamazwe ngamazwe ngokubanzi, siyakuthakazelela ukusingatha iNgqungquthela ye-India-Brazil-South Africa yesihlanu kulo nyaka.
KwiQumrhu le-G20, siza kuqhuba ukuxoxela imeko yokulingana ngaphezulu kwezoqoqosho lwehlabathi.
UKWAKHA ULUNTU LWENTANDO YESININZI KUNYE NOLUMANYENEYO
Bantu bakuthi,
Amava eNdebe yeHlabathi yeBhola eKhatywayo ye-FIFA yowama-2010 asifundise imfuneko yokuthanda konke okulungileyo ngelizwe lethu.
Iflegi yoMzantsi Afrika ibe yeyona nto ibaluleke kakhulu kwikhaya ngalinye.
Urhulumente uza kwakha koku kuxabiseka kweflegi ngokuqinisekisa ukuxhonywa kwayo ezikolweni nakumaziko oluntu ukuxhasa iimpawu zethu zesizwe kunye nokuba singobani.
Sikhuthaza bonke abantu bafunde umhobe wesizwe kwaye bawucule ngokuchanekileyo nangokuzingca.
Siza kumisela inkqubo yokubhiyozela izisele zenyathi zesizwe kwaye sixhase uMzila weLifa LeSizwe, ukuwonga abantu abenze igalelo elikhulu kwinkululeko yelizwe lethu.
MaLungu aHloniphekileyo,
Siwabonile amandla ezemidlalo njengesixhobo somanyano kunye nokwakha isizwe kwilizwe lethu.
Sisonke masixhase iqela lethu leQakamba,ama-Proteas eliza kudlala kwakamsinyane kwiNdebe yaMazwe ngamazwe yeQakamba yowama-2011, kunye neqela lomboxo eliza kuya e-New Zealand liyokukhusela iNdebe yeHlabathi yoMboxo yowama-2007.
Sikwanqwenelela impumelelo iqela lesizwe lebhola yomnyazi xa lisiya kukhuphisana kwiNdebe yeHlabathi yeBhola yoMnyazi kweyeKhala. Siza kubaxhasa ngokupheleleyo.
Mandithathe eli thuba lokothulel? umnqwazi omnye wabadlali abaphume izandla kwibhola yeqakamba, uMakhaya Ntini, olundwendwe lethu elikhethekileyo ngale njikalanga. Wenze igalelo elikhulu kwibhola yeqakamba ekhaya nakumazwe ngamazwe.
UMzantsi Afrika uza kubamba ubalo-bantu lwawo lwesithathu lwasemva kocalucalulo kweyeDwarha kulo nyaka. Siyambulela uMnu Makhaya Ntini ngokuvuma ukuba abe ngunozakuzaku weli phulo libaluleke kangaka.
Somlomo oHloniphekileyo kunye noSihlalo oHloniphekileyo,
Sihleli sizinikele ekwakheni umbuso osekwe ekusebenzeni.
ISebe loHlolo lweNtsebenzo noLawulo liza kuququzelela longamele umsebenzi wamasebe karhulumente njengokuba eza kudala amathuba emisebenzi.
Siyasamkela isigqibo sePalamente sokongamela ukunamathela kwikhwelo lokudala amathuba emisebenzi njengomba obalulekileyo karhulumente.
Bantu bakuthi
Injongo yethu icacile. Sifuna ukuba nelizwe apho izigidi ezingaphezulu zabemi baseMzantsi Afrika bafumana amathuba omsebenzi ondilisekileyo, oneziseko eziluncedo zala maxesha kunye noqoqosho oludlamkileyo nalapho umgangatho wobomi uphezulu.
Sonke sinoxanduva lokusebenza nzima ukwenza oku kube yinyaniso.
Wonke umntu makacinge ukuba anganegalelo njani na kweli phulo lemisebenzi ngokuzidalela amathuba yena ngokwakhe kunye nabanye abantu.
Ekwenzeni oko, masifumane inkuthazo kuMongameli Mandela wethu esimthandayo kwintetho yakhe yokubekwa ngokusesikweni njengomongameli ngowe-1994, esikhumbuza ngemfuneko yokusebenza kunye.
Wathi:
Sisakuqonda ukuba akukho ndlela ilula iya enkululekweni.
Siyayazi kakuhle loo nto, yokuba akukho namnye kuthi onokufikelela empumelelweni esebenza yedwa.
Ngoko ke kufuneka sisebenze kunye njengabantu abamanyeneyo, sisebenzele uxolelwaniso lwesizwe, ukwakha isizwe, nokuzalwa kwelizwe elitsha.
Makubekho ubulungisa kumntu wonke.
Makubekho uxolo kumntu wonke.
Makubekho umsebenzi, isonka, amanzi kunye netyuwa kumntu wonke.
Umntu ngamnye kufanele ukuba makayazi ukuba umzimba, ingqondo kunye nomphefumlo zikhululwe ukuze zizizalisekise.
Ndiyanibulela.
Issued by: The Presidency
