Tshitatamende tsha Muṱangano wa Khabinethe wa ḽa 07 Lara 2018

Khabinethe yo ṱangana nga ḽa 07 Lara 2018, ngei Tuynhuys Ḓoroboni ya Kapa.

A. Mafhungo a zwino kha shango

1. Samithi ya Muphuresidennde ya nga ha Mabulayo a vhathu vha tshisadzini na Khakhathi dzo Ḓisendekaho nga Mbeu 

1.1. Khabinethe i ṱanganedza nyambedzano dzo tshimbilaho zwavhuḓi dza Samithi ya Muphuresidennde nga ha Mabulayo a vhathu vha tshisadzini na Khakhathi dzo Ḓisendekaho nga Mbeu ye vha vha hone nga ḽa 01 na 02 Lara. Samithi yo khwaṱhisedza tshihaḓu tsha u swikelela thendelano nga ha sedzana na zwiwo zwa khakhathi dzo ḓisendekaho nga mbeu, khethululo kha vhafumakadzi na phambano khulwane vhukati ha mbeu.

1.2. Muvhuso wo tenda u ita tsedzuluso ya pulane dza lushaka dza u fhelisa khakhathi dzo ḓisendekaho na mveledziso ya Pulane ya Nyito ya Lushaka nga ha khakhathi dzo ḓisendekaho nga mbeu. U dzulela u ḓiimisela u shuma na vhathu vha kwameaho u khwaṱhisedza uri fhungudza vhukuma ḽevele ya khakhathi dzo ḓisendekaho nga mbeu – zwine mafheleloni vha ḓo dzi fhelisa tshoṱhe.

1.3. Khabinethe i ita khuwelelo kha Maafrika Tshipembe vhoṱhe uri vha shumisane u shandukisa mutheo wa kuhumbulele, maitele na zwiimiswa u fhelisa khakhathi dzi itelwaho vhafumakadzi.

2. Vhubindudzi

2.1. Khabinethe i ṱanganedza Khoniferentsi ya Vhubindudzi yo tshimbilaho zwavhuḓi ye ya vha hone nga Tshimedzi Sandton ngei Johannesburg.   Khoniferentsi ya Vhubindudzi yo konisa Afrika Tshipembe u kuvhanganya na u wana R290 biḽioni yo khwaṱhisedzwaho ya vhubindudzi u mona na sekithara dzo fhambanaho dza ikonomi. Hezwi zwi engedza kha mbofho  dza masheleni  dzi fhiraho R400 biḽioni ye ya ṱanganedzwa nga tshifhinga tsha fulo ḽa vhubindudzi nga tshigwada tsha tshipentshela na kha mashango o fhambanaho nga tshifhinga tsha madalo a muvhuso.

2.2. Khoniferentsi yo vha yo dzhenelwa nga vhurumelwa vhu fhiraho 1 000, u kha mashango a fhiraho 35 nga tshivhalo. Vhuḓipfi ha vhathu ho vha hu ha madakalo nahone shango ḽo ṱana zwikhala zwiswa zwa vhubindudzi na vhurangeli ha mbekanyamaitele vhune ha thusa u sika vhupo havhuḓi ha vhubindudzi.

2.3. Khabinethe i fhululedza thimu ye ya shuma kha Khoniferentsi na u fhulufhela u ḓo wana mivhigo ya zwo no khou bvelela kha u thoma u shuma ha zwe zwa fhulufhedziswa. 

2.4. Musi Afrika Tshipembe na dzhango ḽoṱhe ḽa Afrika vha tshi khou bvela phanḓa na u ya kha gondo ḽa maṱhakheni ḽi livhaho kha u alusa ikonomi ya dzhango, Khabinethe i dovha ya ṱanganedza u rwelwa ṱari ha Foramu ya Vhubindudzi ya Afrika, ine ya khou bvelela zwa zwino u swikela nga ḽa 9 Lara, ngei Johannesburg.  Foramu ya Vhubindudzi ha Afrika yo vhidzwaho nga Bannga ya Mveledziso ya Afrika. Yo livhiswa kha u fhaṱa kha mvelaphanḓa dza zwino nga u kuvhanganya vhabindudzi vha sekithara ya phuraivethe na ya muvhuso u vhekanya nḓila ya nyaluwo ntswa ya Dzhango ḽa Afrika ḽoṱhe. 

2.5. Khoniferentsi ya Afrika ya G20 ye ya farwa zwenezwino i dovha ya engedza ndavhelelo yashu ya nyaluwo nga kha vhuḓiimiseli ho fhambanaho vhune ha bveledzisa vhubindudzi ha phuraivethe na vhudzheneli kha zwa ikonomi kha mashango a Afrika sa tshipiḓa tsha Mulanga na Vhurangeli ha Afrika. Mulanga na Vhurangeli ha Afrika u kho tshimbidzwa nga vhadzulatshidulo vha Afrika Tshipembe na Germany nga kha Tshigwada tsha Vhueletshedzi tsha Afrika.

2.6. Khabinethe yo dovha ya ṱanganedza u rwelwa ṱari ha Phuthaditjhaba Industrial Park ya R50 miḽioni zwenezwino ine ya ḓo alusa mveledziso ya nḓowetshumo na u engedza tsiko ya mishumo yapo na nyaluwo kha vunḓu ḽeneḽo.

2.7. Khabinethe i na fulufhelo ḽa uri thusedzo idzi dzi ḓo swika hune dza thoma u fhungudza khaedu dza u shaya mishumo dzina shango ḽa khou ṱangana nadzo, nga u vusuludza muya wa fulufhelo. 

3. Tsiko ya Mushumo

3.1. Muvhuso u khou lingedza nga maanḓa u sika mishumo minzhi ya vhaswa na Afrika Tshipembe nga vhuḓalo, wo sedzesa kha ikonomi dza mahayani na dza ḓoroboni, na mabindu a vhafumakadzi na vhaswa vhane vha anzela u konḓelela muhwalo wa khaedu dza vhungoho ha nyimele ya zwa ikonomi.

3.2. Khabinethe i na fulufhelo ḽa uri zwiṱuṱuwedzi zwa maga a u vusuludza ikonomi, zwine zwa ḓo dzhenisa R50 biḽioni kha sekithara dza ndeme u fana na vhulimi, themamveledziso dza tshitshavha, ikonomi dza mahayani na dza ḓoroboni, zwi ḓo ṋetshedza ṱhuṱhuwedzo dzo teaho dza tsiko ya mushumo na mvusuludzo ya ikonomi yo khwaṱhaho.

3.3. Hezwi zwi engedzedza kha mvelelo dzi vhonalaho dza Samithi ya Mushumo he muvhuso, mabindu na vhashumi vha ḓiṋetshedzela u: renga zwibveledzwa zwapo, u ṱanganedze maitele o khwaṱhaho a u engedzedza zwivhambadzwaseli, thikhedzo kha nyengedzedzo ya ndeme ya zwibveledzwa kha vhulimi na thuso kha mabindu maṱuku u engedza mishumo.

3.4. Khabinethe i kholwa uri thikhedzo idzi ndi dza vhuṱhogwa kha u sedza na muvhigo wo wanalaho u bva kha Quarterly Labour Force Survey kha kotara ya vhuraru ya 2018, une wa sumbedza nyaluwo kha mushumo na u gonya ha tshivhalo tsha vhathu vha sa shumiho. Lwa miṅwedzi miraru, miṅwe mishumo ya 92 000 yo swikiwa. Fhedziha, ngauri vhaṱoḓi vha mushumo vhe vha vha vho no fhela nungo vha 131 000 vho dzheniswa kha makete wa mishumo kha kotara, reithi ya vhushayamushumo yo gonya, nga 0.3 phesenthe ya vha 27.50.

3.5. U ya nga Vha Mbalombalo vha Afrika Tshipembe (StatsSA), nyaluwo ya mishumo yo ṅwaliswa kha mbambadzo ya tshumelo ya mabindu na u fhaṱa, ngeno u lozwea ha mishumo ho vha hone kha migodi, mamaga, vhuendi na miṱani. Mishumo kha sekithara ya fomaḽa yo fhungudzea, ngeno mishumo kha sekithara Ii si ya fomaḽa yo aluwa.

4. Anivesari ya Vhu20 ya Mulayo wa Muṱaṱisano

4.1. Khabinethe i dzhiela nzhele uri Mulayo wa Muṱaṱisano wo swikisa miṅwaha ya 20 u bva tshe wa thoma u shuma nga Tshimedzi 1998. Kha miṅwaha ya fumbili yo fhiraho, ndangulo dza muṱaṱisano dzo sumbedzisa tswikelelo ya vhuṱhogwa kha u lwa na zwigwada zwi lwaho na muṱaṱisano, u laula makete nga nḓila i si yavhuḓi na tsireledzo ya madzangalelo a tshitshavha nga tshifhinga tsha musi dzi tshi ṱangana dza vha tshithu tshithihi. Ndangulo dzo hwedza ndaṱiso dzi linganaho R8 biḽioni kha khamphani kha u pfuka hadzo Mulayo. Muhasho wa Mveledziso ya Ikonomi, nga kha maga are kha Mulayo wa Muṱaṱisano, wo bveledza R5 biḽioni kha zwikwama zwo khetheaho u bveledzise mabindu maṱuku, vhaḓisedzi vha tshumelo kana zwibveledzwa vhapo na vhudzheno ha vhorabulasi vha vharema kha sia ḽa ikonomi.

4.2. Khabinethe i fhululedza vha ndangulo ya miṱaṱisano kha mushumo we vha ita u vulela ikonomi kha vhoramabindu vhaswa na u bveledzisa zwa mabindu na muṱaṱisano.

5. Khoro ya Indian Ocean Rim Association ya vhu18 (IORA) ya miṱangano ya Dzimista

5.1. Khabinethe i fhululedza Muhasho wa Vhushaka ya Dzitshaka na Tshumisano kha u vha ṋemuḓi wa Muṱangano wa Khoro ya Dziminista (COM) Indian Ocean Rim Association (IORA) wa Vhu18 we wa tshimbila zwavhuḓi nahone wo vha wo farelwa ngei Durban, Kwazulu Natala nga ḽa 02 Lara 2018 nga fhasi ha thero: U ṱanganya Vhathu vha Afrika, Asia, , Australasia na Middle East nga kha vhushumisani ho khwaṱhaho ha Mulalo, Vhudziki na Mveledziso yo Khwaṱhaho”.

5.2. Iṅwe ya mvelelo dza muṱangano wa IORA ya Vhu18 ho vha Mulevho wo Khetheaho hu tshi khou huliswa Muphuresidennde Vho Nelson Mandela vhane vha vha muṅwe wa vhatumbuli vha IORA. Hezwi zwo ḓo swikisa kha u thomiwa ha mbekanyamushumo dza vhugudisamushumo dza “IORA Nelson Mandela ‘Kha vha vhe Ifa” dzine dza khou lavhelelwa u rwelwa ṱari lwa tshiofisi nga Fulwana 2019. Ndivho ya vhurangeli uvhu ndi u maanḓafhadza na u gudisa vhaswa vha IORA u vha na tshenzhemo ya mushumo kha sia pfunzo dze vha gudela dzone.

6. U lwa na Vhugevhenga

6.1. Khabinethe i ṱanganedza u rwelwa ṱari ha Yunithi i Lwaho na Vhugevhenga ha Zwigwada ngei Hanover Park, Kapa Vhukovhela nga Muphuresidennde Vho Cyril Ramaphosa.  Nyengedzedzo ya thusedzo iyi nga muvhuso i ḓo thusa vhukuma kha u lwa na thaidzo ya zwigwada zwa vhugevhenga vhu elanaho na zwidzidzivhadzi ho welaho zwitshavha.

6.2. Yunithi i na miraḓo vhe vha pfumbudziwa kha u shuma kha nyimele i re na khovhakhombo khulwane sa i zwi vha tshi bva kha thimu dza TRT –  ine ya ḓivhiwa nga u pfi  Maberethe, special task force khathihi na yunithi ya thusedzo ya lushaka. Kha ndingedzo dza u lwa na vhugevhenga, thusedzo idzi dzo khetheaho dzo rangwaho phanḓa nga muvhuso dzi ḓo ṋetshedza kha lushaka lwoṱhe. 

6.3. Khabinethe i ita khuwelelo kha zwitshavha u shumisana na mazhendedzi a vhutevhedzeli ha mulayo u ṋetshedza vhutsireledzi na tsireledzo zwine zwa vha zwa ndeme kha mveledziso ya tshitshavha tshiṅwe na tshiṅwe.

7. Khalaṅwaha ya Muthelo

7.1. Khabinethe i livhuwa vhatheli vhoṱhe kha u rumela nga u ṱavhanya mbuelo dza muthelo dzavho dza khalaṅwaha ya muthelo wa  2017/2018, ye ya vala nga ḽa 31 Tshimedzi 2018. Mbuelo yo bveledzwaho nga kha mithelo i dzulela u vha yone tshiko tshihulwane tsha masheleni ane a khwaṱhisedza uri muvhuso u kona u ṋetshedza tshumelo kha tshitshavha.

8. Tshikimu tsha Thuso ya Masheleni kha Matshudeni tsha Lushaka (NSFAS)

8.1. Khabinethe i humbudza vhagudi vha ṱoḓaho u ita khumbelo ya Tshikimu tsha Thuso ya Masheleni kha Matshudeni tsha Lushaka (NSFAS) u wana thuso ya masheleni nga 2019 uri u ita khumbelo kha inthanethe hu khou vala nga ḽa 30 Lara 2018.

8.2. Nga ḽa 01 Khubvumedzi 2018, khumbelo dzo ḓo vulelwa matshudeni vho teaho vha tamaho u isa phanḓa na ngudo dzavho nga 2019 kha khoso dzo ṱanganedzwaho kha yunivesithi kana kha gudedzi ḽa Pfunzo ya Vokheshinala na Thekhinikhala na Vhupfumbudzi (TVET) fhano Afrika Tshipembe.

8.3. Matshudeni vha khou ṱuṱuwedzwa vhukuma uri vha rumele khumbelo dza kha inthanethe kana vha dalele senthara ya Zhendedzi ḽa Mveledziso ya Vhaswa ḽa Lushaka (NYDA) ḽa tsini na ha havho phanḓa ha ḓuvha ḽa u fhedzisela ṱanganedza khumbelo.

B. Tsheo  dza Khabinethe

9. Khabinethe yo ṱanganedza Muhanga wa Tshiṱirathedzhi wa u zwima madzangalelo a tshiṱirathedzhi tsha ikonomi a Afrika Tshipembe ḽifhasini malugana na mbambadzo, vhubindudzi na mveledziso ya nḓowetshumo. Ndivho ya tshiṱirathedzhi ndi u  khwaṱhisedza nyambedzano na dzitshaka dzi thusa mbekanyamaitele dza vhuṱhogwa dza fhano hayani u fana na u fhungudza vhushai, vhushayamushumo na u sa langana.

Tshiṱirathedzhi  tshi amba uri Afrika Tshipembe ḽi sala murahu ṱhanganyelo ya mveledziso kha masia maṅwe oṱhe a dzhango ḽa Afrika ḽi tshi khou tikedzwa nga tshiṱirathedzhi tsho rangwaho phanḓa nga vhubindudzi na u fhaṱa vhukonani ha tshiṱirathedzhi u bveledzise adzhenda yaḽo. Ḽi dovha ḽa kuvhanganya vhuvhambadzi haḽo na vhushaka ha vhubindudzi  na mashango o bvelelaho na u sala murahu vhubindudzi ha nga ngomu, zwikili na u pfukisela thekhinoḽodzhi na zwivhambadzwa nnḓa zwo engedzwaho ndeme..

10. Khabinethe yo ṱanganedza khwiniso ya muholo wa ṅwaha nga ṅwaha u ya nga ṱhoḓea dza vhutshilo wa miraḓo ya Khomishini ya Pfanelo dza Vhathu ya Afrika Tshipembe.  Mulayo wa Khomishini ya Pfanelo dza Vhathu wa Afrika Tshipembe wa 2013 u sumbedza uri muholo, na dziṅwe mbadelo na milayo yo tiwaho na nyimele ya ofisi zwe tea u tiwa nga Muphuresidennde vho kwamana na Khabinethe na Minista wa zwa Masheleni.

C. Zwi khou ḓaho

11. Dzangano ḽa Mishumo ḽa Dzitshaka

Khomishini ya Ḽifhasi ya Ḽevele ya Nṱha ya Dzangano ḽa Mishumo ḽa Dzitshaka (ILO) nga ha Vhumatshelo ha Mushumo ḽi ḓo fara sesheni ya fhedzisela u bva nga ḽa 15 u swika 17 Lara 2018. Muphuresidennde Vho Cyril Ramaphosa na mueḓani navho Vho Stefan  Löfven vha Sweden vha ḓo vha vhadzulatshidulo vha Khomishini. Khomishini ya Ḽifhasi ya Ḽevele ya Nṱha, yo dzudzanywaho nga ILO nga 2017, yo ṋewa mushumo wa u ela tshanduko nga u ṱavhanyedza dzo no khou bvelela kha ḽifhasi ḽa mishumo, u topole khaedu khulwane na uri ndi zwifhio zwine zwa tea u itwa uri vhutshilo ha mushumo vhu vhe ha khwine na u sa dzhia sia ḽithihi. Mushumo wa Khomishini ya Ḽifhasi u tshimbilelana na mushumo we muvhuso sedza khawo wa  u sika mishumo yavhuḓi i sa nyeṱhi   na ndingedzo dza u khwaṱhisedza uri vhaswa vha Afrika Tshipembe vha na zwikili zwo teaho u bvelela mishumoni.

12. China International Import Expo (CIIE)

Khabinethe i ṱanganedza vhudzheneli ha Afrika Tshipembe sa mueni wa vhuṱhogwa kha China International Import Expo (CIIE) ngei Shanghai.  Minista wa Mbambadzo na Nḓowetshumo Vho Rob Davies, vha khou ranga phanḓa vhurumelwa ha 27 ha madzangano a Afrika Tshipembe a 27. Vhurumelwa vhu khou lambedzwa nga Muhasho wa Mbambadzo na Nḓowetshumo nga kha Tshikimu tsha Thusedzo tsha Vhubindudzi  na U maketa Zwivhambadzwaseli (EMIA).

Vhudzheneli havhuḓi ha Afrika Tshipembe hu konisa shango u bveledzisa vhuvhambadzi haḽo na vhukoni ha vhubindudzi nahone ro ḓiimisela u vha vhaṱani vho dzhenelaho u bva kha sekithara, hu tshi katelwa na tshandukiso ya zwibveledzwa zwa vhulimi, zwienda na mikumba, zwa inzhiniara, khemikhala dza peṱirolo, zwipiḓa zwa reḽiwei, vhupileli, khathihi na thekhinoḽodzhi ya vhadavhidzani na mafhungo, na u humela hayani na dzioda dza u renga. Kha madzhini dza EXPO, Afrika Tshipembe na ḽone ḽo vha ṋemuḓi wa semina ya vhubindudzi yo sedzaho kha zwikhala kha sekithara ya  u bveledza..

13. Vhege ya Imbizo

Vhege dzine dza khou ḓa dza vhuhali nga muvhuso dzi ḓo vha dza u swikelela Vhege ya Imbizo ya Muvhuso ya Vhu9, ine ya khou tshimbidzwa nga Sisiteme  ya Thekhinoḽodzhi ya Vhudavhidzani ha Muvhuso (GCIS). Miraḓo ya Khorondangi ya Lushaka khathihi vharangaphanḓa vha mavundu na muvhuso wapo vha ḓo  dzhenela kha miṱangano ya na Izimbizo u mona na shango. Mbekanyamushumo dzi ḓo poswa kha www.gov.za lwa tshifhinga tsha u bva kha 12 u swika nga 25 Lara 2018.

Maafrika Tshipembe a ṱuṱuwedzwa u shumisa luvhanḓe ulu u ambedzana na vhalanguli nga ha mafhungo a nḓisedzo ya tshumelo u khwaṱhisedza uri ri shumisana roṱhe kha u bveledzise zwitshavha zwashu.

D. Ndiliso

14. Khabinethe Ii swikisa ndiliso dzayo kha miṱa na vhafunwa vha avho vhoṱhe vhe vha lozwa matshilo avho nga tshifhinga tsha mililo ye ya ṱaha ngei Garden Route na vhupo ha tsini, khathihi na Vhubvaḓuvha ha Kapa. Mulilo wo dzhia vhutshilo ha Nico Heyns, we a vha a phaiḽotho ya “Working with Fire”. Wo vhulaha hafhu vhathu vhaṅwe vha ṱahe na u lozwa mahaya a vhathu vha ṱoḓaho u lingana 2000. Zwifhaṱo zwo vhalaho na vhupo vhuhulwane na zwimela na zwone zwo tshinyadzwa. Khabinethe i khoḓa u swika nga u ṱavhanya ha vhadzimamulilo na vhaofisiri vha ndangulo ya mutshinyalo, khathihi na Mmbi ya Muyani ya SA na “Working on Fire” vhe vha shuma vha sa neti u vhulunga matshilo na u kona u langa mulilo.

15. Khabinethe i swikisa ndiliso dzayo kha Muvhuso na vhathu vha Indonesia nga murahu ha u wa ha bupo ḽa vhulaha vhathu vha 189 nga murahu ha musi ḽi kha ḓi bva u takuwa u bva ḓoroboni ya Indonesia, Jakarta.

E. U fhululedza

16. Khabinethe i fhululedza Afrika Tshipembe kha khethiwa haḽo nga ṋetshedza thikhedzo ya u shuma kha Khoro ya Dzangano ḽa Vhudavhidzani nga ṱhingo ha Dzitshaka (ITU) nga Musumbuluwo wa 05 Lara 2018 nga tshifhinga tsha Khonferensi ya Dzulo ḽa ITU ngei  Dubai.

Khabinethe i fhululedza Vho Mandla Mchunu vha ICASA vhe vha khethiwa u shuma kha Bodo ya Ndaulo ya Radio ya ITU khathihi na Vho Doreen Bogdan-Martin kha u khethiwa hawe sa Mulanguli wa Burou ya Mveledziso ya Vhudavhidzani nga ṱhingo, na u vha mufumakadzi wa u thoma u vha tshipiḓa tsha ndangulo khulwane ya ITU u bva tshe ya thomiwa nga 1865.

Afrika Tshipembe ḽi a ḓiṱukufhadza nga fulufhelo ḽe ḽa fhiwa nga miṅwe mivhuso u shuma kha tshiṱirakitsha itshi tsha nṱha tsha ITU lwa miṅwaha miṋa i ḓaho. Ri ḓo shumisa vhuimo uvhu u i sa phanḓa  adzhenda ya mveledziso na tshitshavha tsha mafhungo o katelaho kha tshifhinga tsha didzhithala.

17. Khabinethe i fhululedza hafhu Federal Democratic Republic ya Ethiopia kha u khetha muphuresidennde mufumakadzi wa u tou thoma, Khosi Vho Sahle-Work Zewde, vhane vha vha muphuresidennde wa mufumakadzi wa zwino muthihi fhedzi kha dzhango ḽa Afrika. Afrika Tshipembe ḽi ḓo bvela phanḓa  khwaṱhisa vhushaka ha masia mavhili na Ethiopia kha masia o vhalaho hu tshi katelwa vhushaka ha vhuvhambadzi, ha polotiki na ha ikonomi.

18. Khabinethe i fhululedza Muphuresidennde wa Cameroon Vho Paul Biya, vhe vha vhewa hafhu u vha muphuresidennde lwa vhusumbe. Khabinethe i ita khuwelelo kha vhathu vhoṱhe vha Cameroon uri vha shumisane kha u wana thandululo ya mulalo nga kha maitele a nyambedzano o katelaho. Khabinethe yo ḓiimisela u khwaṱhisedza vhushaka ha masia mavhili ha polotiki, ha ikonomi na ha mbambadzo vhukati ha Afrika Tshipembe na Cameroon.

19. Khabinethe i fhululedza hafhu vhathu vha Brazil kha u fara khetho dze dza tshimbila zwavhuḓi dze dza ita uri Muphuresidennde- nkhetheni wa Federative Republic ya Brazil, H.E. Jair Bolsonaro vha vhe Muphuresidennde wa Brazil a tevhelaho.

20. Khabinethe i tamela mashudu tshitshavha tsha Hindu tsha Afrika Tshipembe vhane vha khou pembelela Diwali kana Deepavali. Hovhu ndi vhuṱambo ha vhureleli vhune ha pembelela gundo ḽa zwivhuya vhudzuloni ha vhuvhi, nḓivho na vhuṱali vhudzuloni ha u sa londa khathihi na gundo ḽa tshedza vhudzuloni ha swiswi. Tshedza tshikhethwa tshi fhaṱutshedze Afrika Tshipembe nga mulalo, lupfumo, dakalo, mvelaphanḓa na u fushea, musi roṱhe ri tshi khou ita tshipiḓa tsha u khwaṱhisedza pfano na vhuthihi kha mvelele ya shango ḽashu na phambano ya vhureleli.

F. U tholwa

U tholwa hoṱhe hu ḓo itwa ho thoma ha khwaṱhisedzwa ndalukanyo dza vho tholwaho na u sedzwa arali vha si na milandu

21. U tholiwa hafhu ha Vho Nomfundo Maseti sa Muraḓo wa Ndangulo wa Tshoṱhe , vha shumaho kha ndangulo ya Piped-Gas, vha tshi shuma kha Bodo ya NERSA 

22. Vhathu vha tevhelaho vho tholiwa kha Khoro ya Vhuponi hune ha khou u Fhaṱiwa:

a. Vho Absalom Mosabeni Molobe (Mudzulatshidulo);
b. Vho Maphefo K Mogodi (Muthusa Mudzulatshidulo);
c. Vho Zandile Yvonne Mathe;
d. Vho Dokotela Jenitha Badul;
e. Vho Ngwako Edward Hutamo;
f. Vho Noninzi Qina;
g. Vho Gert Hendrik Meyer;
h. Vho Jerry Leigh Magolius;
i. Vho Hendrik Ndlovu;
j. Vho Dokotela Keith Ivor Jacobs;
k. Adv Vho Boitumelo Tlhakung;
l. Vho Inge Maree Vieira;
m. Vho Sinenhlanhla Thuleleni Mthembu;
n. Vho Dokotela Prittish Dala
o. Vho Ulandi Exner
p. Vho Florence Rabada;
q. Vho Noluthando Hazel Molao; na
r. Vho Dokotela Claire Deacon.

Mbudziso:
Vho Phumla Williams – Muambeli wa Khabinethe o tou Farelaho
Sele: 083 501 0139

 

Share this page

Similar categories to explore