Maafrika Tshipembe vha hashu,
Ndi Madekwana,
Ro dzhia tsheo ya u lengisa u thoma ha tshipitshi itshi tsha lushaka nga hafu ya awara nga nṱhani ha uri ḽizhakanḓila ḽa zwa khasho Afrika Tshipembe, Vho Noxolo Grootboom, vho vhala mafhungo avho a isiXhosa lwa u fhedzisela nga iri ya 7 kha Mafhungo a SABC madekwana ano.
Ndi khou tama u swikisa maipfi a ndivhuwo kha mufumakadzi Vho Grootboom sa ramafhungo wa nṱhesa, ane kha lwendo lwawe lwoṱhe mushumoni, o ri ḓisela zwithu zwo bvelelaho zwa ndeme kha ḓivhazwakale shangoni ḽashu na u mona na ḽifhasi ro ḓi dzulela miḓini yashu.
Ri vha tamela mashudu mavhuya Vho Grootboom khathihi na u vha ḽivhuwa kha miṅwaha minzhi ye vha shuma yone.
Ri khou tama uri, u bva kha muṱa muṅwe na muṅwe, Ri a vha funa.
Hu tshe ho tou fhela ṅwaha fhedzi u bva tshe ra ḓivhadza Tshiimo Tsha Shishi Tsha Lushaka ri tshi khou itela u lwa na dwadze ḽa COVID-19 nahone ra thoma maga a u thivhela u phaḓalala haḽo.
U bva tshetsho, roṱhe ro vho ḓo tea u konḓela maga a nyiledzo kha masia oṱhe a vhutshilo hashu.
Ṱhaṅwe tshe tsha tou konḓesa nga maanḓa ndi nḓila ye dwadze iḽi ḽa kwama ngayo nḓila ya matshilisano ane a ita uri ri ḓipfe ri tshipiḓa tsha lushaka.
Ro ṱuvha zwithu zwinzhi zwe ra zwi dzhiela fhasi, u fana na u dalela vhafunwa vhashu, u ya maḓikitani a vhuḓimvumvusi, kana u dzhenela tshumelo dza zwa vhurereli.
Nga murahu ha ṅwaha, ro no swikelela zwinzhi kha u ita uri dwadze iḽi ḽi langee.
Nungo dza vhashumeli vhashu vha mutakalo vhe vha shuma vha sa neti dzo vhulunga vhutshilo ha zwigidi, na mushumo wo thomiwaho nga tshitshavha tshashu tsha zwa saintsi tsho swikelela zwa khwinesa kha uri ri kone u pfesesa tshitzhili itshi.
Nga kha tshanduko dze ra kona u dzi ita roṱhe kha vhuḓifari hashu, ro kona u ḓitsireledza, miṱa yashu khathihi na zwitshavha zwashu.
Kha ḽa Afrika Tshipembe, u fana na kha maṅwe mashango manzhi u mona na ḽifhasi, ari athu lugela u humela kha vhutshilo ho ḓoweleaho.
Miṅwaha mivhili itshi khou tevhekana, ri ḓo tea hafhu u fhungudza vhuṱumani, zwihulwanesa nga tshifhinga tsha maḓuvha a Paseka.
Hezwi ndi nga nṱhani ha uri ri tshe kha tshivhilela tsha dengetenge ḽa dwadze la tshitzhili tsha Corona.
Ṅwahani wo fhiraho, shango ḽo rekhoda zwiwo zwi paḓaho 1.5 miḽioni zwa vho kavhiwaho nga tshitzhili tsha Corona.
Nahone ho no vha na mpfu dzi paḓaho 52 000 dzo vhigwaho dza vho lovhaho nga Covid- 19.
Ri elelwa na u lilela matshilo oṱhe aya o lozweaho.
Sa zwe nda vhigisa zwone musi ndi tshi guma u amba na vheiwe, Afrika Tshipembe ḽo kona u fhenya kha gabelo ḽa vhuvhili ḽa u kavhiwa nga tshitzhili itshi.
Lwa vhege mbili dzo fhelaho, tshivhalo tsha zwiwo zwiswa tsho no vha khwine hune tsha vha 1, 200 nga ḓuvha.
Tshivhalo tsha vho no valelwaho sibadela na tshone tshi khou tsela fhasi, u fana na tshivhalo tsha mpfu.
Tshivhalo tsha vhane vha khou fhola tshi nṱha nyana ha 95%.
Nga hezwi ri livhuwa vhadzulapo vhoṱhe vha ḽa Afrika Tshipembe vhe vha tevhedzela maga a nyiledzo e ra a vhea u bva Ṱhafamuhwe ṅwaha wo fhelaho u itela u tsireledza vhutshilo.
I dovha ya vha tsumbo ya u ṱhogomela hu hulwanesa he ra isa phanda na u hu vhona sa shango zwi tshi yelana na u ṱola, u linga, u tevhelela avho vho kwamanaho na vho kavhiwaho khathihi na maga a tsireledzo.
Nga tshenetsho tshifhinga, mbekanyamushumo yashu ya u haela yo no thoma nahone i ḓo engedzeaho itshi ya phanda.
Vhukati ha ṅwedzi wa Luhuhi, ro thoma na Luṱa lwa 1 lwa mbekanyamushumo yashu ya u haela, ine ya vha ya u haela vhashumeli vha mutakalo.
Luṱa holu lu khou tshimbila zwavhuḓi nahone lu ḓo vha lwo khunyelela hu sa athu fhela miṅwedzi miraru.
Vhashumeli vha mutakalo vha fhiraho 250,000 u swika zwino vho no wana khaelo ya Johnson & Johnson sa tshipiḓa tsha ndingo dzi no vhidzwa Sisonke.
Ro no wana khaelo dza 11 miḽioni dza Johnson & Johnson, dzine ra ḓivha dzi tshi shuma zwavhuḓi kha u lwa na variente ine ya wanala fhedzi fhano kha shangoni ḽashu.
Ro no wana dziṅwe khaelo hafhu dza 20 miḽioni nahone ri khou fhedzisa thendelano na vha Johnson & Johnson.
Ri khou dovha hafhu ra fhedzisa thendelano ya dziṅwe khaelo dza 20 miḽioni dza Pfizer, dzine dzone dzi haelwa luvhili.
Yo ṱangana yoṱhe, ṋetshedzo iyi ya khaelo i ḓo ri ṋetshedza ngelo ya mishonga yo linganaho kha u haela vhathu vha 41 miḽioni.
Ri ḓo ita dziṅwe nḓivhadzo musi nyambedzano hedzi dzo no fhela.
Ri dovha ra vha kha maga o fhambanaho a nyambedzano na vhabveledzi vha dziṅwe khaelo u fana na Sinovac, Sinopharm na Sputnik V. Vhaṅwe vha havha vhabveledzi vha kha ḽiga ḽa u fhedzisela ḽa u tendelwa uri khaelo dzavho dzi kone u shuma kha ḽa Afrika Tshipembe.
Nga nṱha ha ngelo dza mishonga ya khaelo, ri ḓo dzi wana thwii nga kha thendelano yashu na vhabveledzi, ri ḓo dovha ra wana khovhelo dza ngelo ya mishonga ya khaelo kha tshiimiswa tsha kha Mbumbano ya Vhuthihi ha Afrika (AU) tshe ra tshi vhumba musi ri Mudzulatshidulo wa AU.
Naho ho vha na u lenga kha u wana vhaṋetshedzi vha khaelo, ri kha ḓi vha na fulufhelo ḽa u swikelela zwipikwa zwashu kha u haela.
Ṱhoḓea ya khaelo u mona na ḽifhasi yo no tou vha muṱaṱisano muhulu fhedzi ri khou lwa nga nungo dzoṱhe u wana dzo linganaho u haela vhadzulapo vha ḽa Afrika Tshipembe na dzhango ḽa Afrika.
Ri ḓo tea u ḓowela tshivhumbeo tshi shandukaho tsha tshitzhili khathihi na vhuṅwe vhuṱanzi vhuswa nga ha kushumele kwa khaelo dzo fhambanaho.
Ri ḓo khwaṱhisedza uri ri na khaelo dzo linganaho dzi shumaho khwine u swikelela khaelo ya vhathu vhanzhi tshitshavhani nga tshifhinga tshipfufhi.
Luṱa lwa 2 lu khou lavhelelwa u thoma vhukati ha Shundunthule.
Ri na fulufhelo ḽa uri ri ḓo vha ri tshi khou wana tshivhalo tshihulwane tsho linganelaho u bva kha vhabveledzi nga vhunzhi tsho tendelaniwaho khatsho u ya nga thendelano dzashu navho.
Kha Luṱa lwa 2 ri khou fulufhela u haela vhunzhi ha vhathu vhashu kha miṅwedzi ya rathi.
Zwi tshi elana na maitele a khwine ḽifhasini, ri ḓo dzhiela nṱha avho vha re kha khombo ya u nga valelwa vhuongeloni na lufu, u fana na vhathu vha re nṱha ha miṅwaha ya 60 na avho vha no khou tshila na malwadze a sa fholi.
Tshipiḓa tsha vhuvhili tsha mbekanyamushumo ya u haela COVID-19 tsho pika kha u tsireledza zwitshavha zwashu, u tsireledza tshumelo ya mutakalo kha u ḓalelwa khathihi na u fhungudza ṱhoḓea dza nyiledzo dza u tshimbila zwine zwa khakhisa pfunzo, ikonomi khathihi na vhutshilo ha roṱhe.
U ḓiṅwalisela u haelwa zwo tetshelwa u thoma nga Lambamai.
Vhathu vha ḓo ṱuṱuwedzwa u ḓiṅwalisa kha tshumelo ya online, fhedzi avho vha si na zwishumiswa zwa online vha ḓo tou ya vha ḓiṅwalisa nga tshavhukoma.
U khwaṱhisedza uri ri na themamveledziso i thusaho, vhupo ha u haela vhu fhiraho 2,000 ho topolwa u mona na shango.
Hezwi zwi katela ha dokotela, kiḽiniki dza tshitshavha na khemisini, mavhengeleni nahone kha nyimele dziṅwe, zwiimiswa zwihulwane u fana na zwitediamu na senthara dza khoniferentsi kana dza maguvhangano a tshitshavha.
Sisiṱeme ya Data ya Mafhungo a u Haelwa ya Elekitironiki yo thomiwa u langa kutshimbidzelwe kwa khaelo khathihi na u sumbedza vhathu fhethu hune vha nga haelwa hone hu re tsini na hune vha dzula hone.
Sisiṱeme heyi i ḓo vha tendela uri vha ḓiṅwalise, vha wane datumu ya u haelwa na fhethu, na u wana ṱhanziela ya didzhithala kana ya bammbiri ino khou khwaṱhisedza tshiimo tshavho tsha u haelwa musi vho no fhedza u haelwa.
Muṅwe na muṅwe ane a ḓo haelwa u ḓo tea u thoma a ṅwaliswa kha sisiṱeme u thoma, nahone vha ḓo vhidzwa u ḓiṅwalisa musi vho no lugela.
Ri ḓo shuma nga kha zwiimiswa zwa vundu na zwa tshiṱiriki khathihi na madzangano a zwitshavha u ṅwalisa avho vhadzulapo vha si na tshomedzo dza thekhinoḽodzhi.
Ri khou thoma nḓila dza u topola na u ṅwalisa vhathu avho vha si naho mabammbiri a u vha kha ḽino uri navho vha kone u haelwa.
Ri dzula ro ḓiimisela u vhona uri lushaka lu dzule lu tshi ḓivha nga ha maga oṱhe a u ṋetshedza khaelo.
Mulovha, Muthusa Muphuresidennde na nṋe ro dalela ḽimaga ḽa Aspen ḽa u bveledza ngei kha ḽa Eastern Cape, ḽine ḽa ḓo shuma u bveledza khaelo dza Johnson & Johnson.
Heḽi ndi ḽimaga ḽa maimo a ḽifhasi ḽine ḽa vhambedzwa na a khwinesa ḽifhasini.
Heyi ndi tswikelo khulwane vhukuma kha shango ḽa Afrika Tshipembe, i sumbedzaho vhukoni hashu kha vhubveledzi ho khwiniseaho.
Ndi khou tama u livhuwa Aspen vho vha na mbonelaphanḓa ya u bindudza kha tshiimiswa itshi khathihi na luvhilo lwe vha shuma ngalwo u itela u thoma mveledzo ya khaelo.
Nḓadzo kana khaphasithi i fhiraho hafu ya ḽimaga iḽi – ḽine ḽa kona u bveledza ngelo ya mishonga i linganaho 300 miḽioni nga ṅwaha – yo ṋetshedzwa dzhango ḽa Afrika.
Mathomoni a ino vhege, Tshikwama tsha Afrika tsha U renga Khaelo tsho saina thendelano ya thengo tsho imela mashango are miraḓo ya Mbumbano ya Vhuthihi ha Afrika ya ngelo ya mishonga i linganaho 220 miḽioni dza khaelo dza Johnson & Johnson.
Tshi dovha tsha vha na tshikhala tsha u nga engedza dziṅwe dza 180 miḽioni.
Thendelano heyi ndi ya ndeme kha dzhango ḽa Afrika, hu si nga uri i sumbedza vhuḓiimiseli hashu kha u vhona uri a hu na shango ḽo salelaho murahu, fhedzi na nga nṱhani ha uri khaelo hedzi dzi ḓo bveledzwa hanefha kha dzhango ḽashu.
Tshumisano khulwanesa vhukati ha muvhuso, mabindu, vhashumi na zwiimiswa zwa tshitshavha ndi ya ndeme kha u bvelela ha ṋetshedzo ya khaelo.
Sekhithara ya phuraivethe i khou isa phanḓa na u tamba tshipiḓa tshihulwanesa tsha u tikedza kha vhuḓidini ha muvhuso.
Ri khou ṱuṱuwedzwa zwihulu nga vhuḓiimiseli ha sekhithara ya ndondolo ya mutakalo ya phuraivethe kha tshumisano na muvhuso u vhona uri ṋetshedzo ya khaelo hu tshimbile zwavhuḓi, ri tshi khou shumisa vhukoni he ra vhu thoma kha nḓowetshumo.
Ri khou dovha hafhu ra livhuwa khamphani nnzhi dzi no khou shuma nga kha Tshikwama tsha Vhuthihi u hadzima zwiko zwa masheleni kha thengo ya khaelo na u ṋetshedzwa hadzo.
Ri khou khoḓa vha Vodacom Group khathihi na Vodafone Foundation , vhane vho ḓigana u ḓo ṋetshedza R87 miḽioni ya matshimbidzele na khovhekanyo ya zwirothodzi kha mashango a Afrika ane vha bindudza khao u itela uri khaelo hedzi dza Covid-19 dzi ṋetshedzwe dzo tsireledzea.
Nga nṱha ha zwenezwo, Vodacom i khou ḓo shumisa pulatifomo ya ndaulo ya khaelo ya maimo a nṱhesa u mona na mashango oṱhe are miraḓo ya AU, zwi tshi tevhela ṋetshedzo ya pulatifomo i fanaho na yeneyi kha ḽa Afrika Tshipembe.
Ndi khou itela khuwelelo vhashumisani na riṋe kha sekhithara ya phuraivethe uri vha tikedze tshiteṅwa itshi tshiswa tsha u lwa na tshiwo tsha dwadze ili.
Maafrika Tshipembe vha hashu,
Kha maḓuvha a si gathi a ḓaho, shango ḽi khou ya maḓuvhani a u awela a ṅwaha nga ṅwaha a Paseka.
Kha vhanzhi, hetshi tshi ḓo vha tshi tshifhinga tsha u ima nyana vha awela, hu nga vha kha mushumo kana kha zwa pfunzo, na kha mitsiko ya miṅwedzi yo fhiraho.
Vhunzhi hashu ro no ita pulane dza mafhelo a vhege malapfu a khou ḓaho.
Vhaṅwe vhashu ri khou ya kha dziṅwe ḓorobo; vhaṅwe vha ḓo vha vha khou dalela dzikhonani na mashaka.
Vhunzhi hashu ri khou ḓo vha ro dzhenela maguvhangano na mabembela.
Kha miḽioni dza vhathu, hetshi tshi dovha tsha vha tshifhinga tsha u dzhenela kha mishumo ya zwa vhurereli.
Naho tshivhalo tsha u kavhiwa tsho dzika, ri nga si tende u nyadza zwithu.
Hetshi ndi tshone tshifhinga tshine ra tea u ṱhogomela na u fhirisa.
Ngoho ndi ya uri u tshimbila ha vhathu nga vhunzhi, u endela maṅwe mavundu, u shumiseswa ha vhuendi ha nnyi na nnyi khathihi na maguvhangano zwi ḓisa khombo khulu ya u engedzea ha u kavhiwa nga vhulwadze.
Kha maḓuvha asi gathi o fhiraho, ro ṱoḓa tsivhudzo kha vhaḓivhi ra dovha ra kwamana na vhaimeli vha mavundu na muvhuso wapo khathihi na vharangaphanḓa vha sialala kha uri ndi maga afhio ane ra nga a vhea kha mafhelo a vhege malapfu e ra livhana nao u thivhela u ṱaha ha u kavhiwa huswa.
Ro kona u sedza zwithu zwo fhambanaho, u fana na makumedzwa u bva kha tshitshavha tsha zwa vhurereli nga ha maga a u thivhela e vha a vhea ro sedza maguvhangano ane a khou lavhelela.
Ro sedza ḽevele dza pfukiselo dzi re fhasi vhukuma, ro dzhia tsheo ya u litsha shango kha Luṱa lwa 1 lwa Tsivhudzo lwa tshitzhili tsha corona.
Naho zwo ralo, nga nṱhani ha nyimele dzo khetheaho dza tshino tshifhinga, ri tea u ita tshanduko ntswa dzi si gathi.
Maṅwe a maga ane a sa ḓo shanduka ndi a tevhelaho:
Tshifhinga tsha u iledzwa u tshimbila tshi ḓo dzula tsho ralo u thoma vhusikukati u swika nga iri ya 4 maḓautsha.
Fhethu ha u ḓimvumvusa ha nnyi na nnyi u fana na dzibitshi, dziphakha na madamu hu ḓo dzula ho vula.
Naho zwo ralo, hezwi zwi ḓo itwa hu tshi khou tevhedzwa maga a tsireledzo o khwaṱhaho, u fana na u sia tshikhala vhukati muthu na muṅwe, u ambara masiki.
Mbulungo dzi tshe dzo iledzwa u dzhenelwa nga vhathu vha paḓaho 100 nahone tshumelo a i tei u fhira awara mbili.
U endela maṅwe mavundu zwi tshe zwo tendelwa.
Naho zwo ralo, ndi khou itela khuwelelo vhadzulapo vha Afrika Tshipembe u fhungudza nyendo dzavho nga hune zwa konadzea ngaho khathihi na u tevhedzela ndaela dzoṱhe dzo teaho arali zwo tou tea uri vha ende.
Naho zwo ralo, ro sedza tshipiḓa tshi tambiwaho nga halwa kha u engedza vhuḓifari vhu si havhuḓi, ri ḓo vhea dziṅwe nyiledzo nga tshifhinga tsha mafhelo a vhege a Paseka.
U swika zwino, u rengiswa ha halwa ha u nwela nnḓa a zwi nga tendelwi nga Ḽavhuṱanu, Mugivhela, Swondaha na Musumbuluwo.
U renga halwa wa nwela nga ngomu mavhengeleni a zwiḽiwa ( resitorente) zwo tendelwa, zwipotoni na dzi barani zwi ḓo tendelwa, u ya nga milayo ya ḽaisentsi yavho, u swika nga iri ya 23:00.
Maafrika Tshipembe vha hashu,
Mafhelo a vhege haya a Paseka ndi tshifhinga tsha ndeme kha zwa vhurereli, nahone u dzhenela tshumelo dza vhurereli ndi zwa ndeme kha dzi miḽioni dza vhathu.
Kha vha Khristo, u rabela vho ṱanganelana ndi tshipiḓa tsha ndeme tsha u pembelela maḓuvha a Paseka.
Tshitshavha tsha vha Vhayuda zwa zwino vha khou pembelela Paseka, tshitshavha tsha vha Mamosilemu tshone hu si kale vha khou thoma na ṅwedzi wa Holy Ramadam.
Kha vhege dzo fhiraho zwenezwino, ro ḓo fara nyambedzano na zwitshavha zwa thendo u wana thandululo dza khwine dzine dza nga ri thusa kha khaedu dza u langa vhathu vhanzhi kha maguvhangano a tshumelo dza zwa vhurereli.
Zwi tshi tevhela nyambedzano idzi, ro wana zwa uri maguvhangano a zwa vhurereli nga tshifhinga hetshi a ḓo dzhenelelwa nga vhathu vha sa fhiri mbalotshikati ya 250 nga ngomu ha tshifhaṱo khathihi na 500 nga nnḓa.
Hune tshifhaṱo tsha vha tshiṱuku kha u nga fhelela vhathu vha mbalo idzi ho tevhedzelwa na maga a u sia tshikhala vhukati ha muthu na muṅwe, zwi amba uri vhathu vha songo fhira 50 wa phesenthe ya vhuhulu ha tshifhaṱo tshenetsho.
Vhakereki vha songo kuvhangana nnḓa ha tshifhaṱo tshine vha rabela khatsho, nahone vhathu vha ye hayani vha songo eḓela henefho nga murahu ha tshumelo.
Ndi khou ṱoḓa u livhuwa vharangaphanḓa vha tshitshavha tsha zwa dzithendo vhe vha ambedzana na riṋe zwo khwaṱha sa muvhuso.
Hu na ndivhuwo dzine roṱhe ra tea u dzi swikisa kha u tikedza vhathu vhashu musi vha tshi shumisa pfanelo yavho ya u rerela na u ita uri shango ḽashu ḽi dzule ḽo tsireledzea.
Malugana na maṅwe maguvhangano, na one a ḓo tendelwa u vha na vhathu vha sa fhiri tshivhalo tsho pimiwaho tsha 250 nga ngomu ha tshifhaṱo na vha 500 nga nnḓa.
Sa u thomani, hune tshifhaṱo tsha vha tshiṱuku u nga kona u fara mbalo idzi ho tevhedzwa na maga a u sia tshikhala vhukati ha muthu na muṅwe, zwi tou amba uri hu tea u shumiswa 50 wa phesenthe ya tshifhaṱo itsho.
Ri khou isa phanḓa na u humbela Maafrika Tshipembe vhoṱhe u sa dzhenela maguvhangano aya arali vha tshi wela kha tshigwada tsha avho vhane vha vha khomboni, u fana na vhaaluwa khathihi na avho vha re na malwadze mavhili kana fhira.
Ri dovha ra ita khuwelelo ya uri maguvhangano a itelwe nnḓa nahone fhethu ho vuleaho, zwine zwo tsireledzea u fhirisa maguvhangano a nga ngomu tshifhaṱoni.
Ri ḓo dovha ra sedzulusa maga aya a tshivhalo tsho themendelwaho guvhanganoni kha maḓuvha a 15 a ḓaho zwi tshi ya nga u ṱhaṱhuvha tshiimo tsha dwadze iḽi khathihi na u tevhedzelwa ha maga a zwa mutakalo.
Ri kha ḓi isa phanḓa na u tevhedza mulayo wa uri nyiledzo dzi songo tou vha dzi lemelaho lwo kalulaho na musi zwi songo tea u itela u kona u langa u phaḓalala ha tshitzhili.
Ri kha ḓi isa phanḓa na u dededzwa nga mawanwa a tshiimo tsha ngudo dza zwa u ṱaha ha malwadze tshitshavhani khathihi na tsivhudzo dza vhaḓivhi na nyambedzano na vhashumisani na muvhuso.
Ri ḓo dzulela u lavhelesa tshiimo nga vhuronwane nahone ri ḓo dzhenelela nga u ṱavhanyedza musi ri tshi vhona tsumbo iṅwe na iṅwe ya u ṱaha huswa.
Maafrika Tshipembe vha hashu,
Dwadze heḽi ḽi kha ḓivha na riṋe.
Ri tea u kanda nga vhuronwane, hu si mafhelo a vhege ino fhedzi, fhedzi na kha maḓuvha, vhege na miṅwedzi i ḓaho.
A ri ḓivhi uri dwadze ḽa tshitzhili itshi ḽi ḓo ri sala murahu u swika lini, fhedzi ri a ḓivha zwine ra tea u ita.
Ri a zwi ḓivha uri u ambara masiki fhethu ha nnyi na nnyi nahone tshifhinga tshoṱhe, u dzulela u ṱamba zwanḓa misi yoṱhe, u sia tshikhala vhukati hashu na vhaṅwe khathihi na u sa ḓidzhenisa kha zwigwada zwa vhathu vhanzhi zwi kha ḓi vha nḓila ya khwinesa kha u langa u phaḓalala ha tshitzhili.
Nyito iṅwe na iṅwe ine ya vhea vhutshilo hashu kana ha vhaṅwe luṱhaṱheni i tea u litshiwa.
Nyiledzo dzi re hone zwa zwino dza mutakalo washu roṱhe na tsireledzo dzi tea u tevhedzwa.
Kha ri vhe lushaka lu re na vhuḓifari lune lwa dzulela u limuwa nga ha u vha hone ha tshitzhili.
Kha ri ise phanḓa na u dzula mahayani kana u vha kha zwigwada zwiṱuku zwa vhathu.
Kha ri ṱutshele kule na u ḓiwana ri kha zwigwada zwa vhathu vhanzhi na fhethu hu sa dzheni muya zwavhuḓi.
Ri songo ya mbulungoni nga nnḓa ha musi dzi dza mashaka a tsinisa nahone ri songo dalela miṱa ya vhalidzi.
Roṱhe ri na mushumo kha vhuḓidini uvhu ha lushaka ha u fhenya COVID-19.
Kha ri tambe tshipiḓa tshashu.
Kha tshino tshifhinga, musi mulaedza wa Paseka wa fulufhelo, u bebwa hafhu khathihi na mvuseledzo u tshi vha na zwine wa amba kha matshilo a vhunzhi hashu, kha ri ṱhogomele vhukuma.
Mudzimu nga vhe a tshi isa phanḓa na u shudufhadza Afrika Tshipembe na u tsireledza vhathu vhaḽo.
Ndo livhuwa.
