Go ikgodisetsa ngwana wa kwa nageng e e leng karolo ya tumalano

Kgodiso ya Bana ka Tumalano ya Hague

Fa o le moditšhaba mme o rata go ka ikgodisetsa ngwana wa Moaforika Borwa, o tshwanetse go batlisisa pele gore a naga ya gaeno e saenile Tumalano ya Hague. Tumalano e e tlhagisa tiragatso e e botoka ya kgodiso ya bana ba dinaga disele magareng ga dinaga tse di nang le seabe.

O ka dirisa fela mofuta o wa kgodiso fa naga ya gaeno, jaaka Aforika Borwa, e saenile tumalano ya Hague.

Tumalano e e tsaya tsia dikgatlhegelo tsa ngwana mme maitlhomo a yona ke go thibela go thopiwa, tshotlako, thekiso le kgwebisano ka bana.

Bothati jwa bogareng mo nageng ya gaeno bo tshwanetse go go romela kwa mokgatlong o o maleba wa tshireletso ya bana gore o sekasekwe. Mokgatlo oo o tla ikgolaganya gape le mokgatlo o o maleba wa tshireletso ya bana mo Aforika Borwa go go thusa go batla ngwana yo o tlhokang go ka godiswa.

Se o tshwanetseng go se dira

Golagana le Bothati jwa Bogareng mo nageng ya gaeno.
Bothati jwa Bogareng bo tla go romela kwa mokgatlong wa kgodiso ya bana mo nageng ya gaeno go go tlhatlhoba le go bona gore a o tshwanelwa ke go godisa ngwana.
Fa mokgatlo wa tshireletso o go fitlhela o le maleba go ka godisa ngwana, o tla dira pegelo e e tletseng ya tshekatsheko ya legae mme o e romele go Bothati jwa Bogareng jwa Aforika Borwa (SACA).
SACA e tla romela pegelo e go mokgatlo o o nang le tumalano e e dirang ya kgodiso ya bana le mokgatlo wa boditšhaba go go batlela ngwana yo o ka godisiwang.
Fa go na le ngwana yo o tlhokang kgodiso, mokgatlo wa tshireletso ya bana o tla rulaganya pegelo ya tshekatsheko ya ngwana mme o e romele go SACA gore e amogele kgodiso ya ngwana go ya ka tumalano ya dinaga (Athikele 17).
Mokgatlo wa tshireletso ya bana mo Aforika Borwa o tla romela pegelo go mokgatlo wa boditšhaba go golaganya bana le batsadi ba isago.
Fa o sa ntse o batla go ka godisa ngwana, Bothati jwa Bogareng kwa nageng e o nnang kwa go yona bo tla rebola Athikele 17, go go naya tetla ya go godisa ngwana.
Athikele 17 go tswa go Bothati jwa Bogareng kwa nageng ya gago ya bonno e tla romelwa go mokgatlo o o dumeletsweng wa tshireletso ya bana mo Aforika Borwa. Mokgatlo wa tshireletso ya bana o tla go itsise gore o ye kwa Aforika Borwa go konosetsa kopo ya kgodiso ya ngwana kwa kgotlatshekelo ya bana.
Kgotlatshekelo e tla konosetsa kopo e mme ditlankana tsa kgotlatshekelo di tla romelwa go SACA go netefadiwa le gore kopo ya kgodiso e kwadiswe.
SACA e tla rebola Setifikeiti sa go Maikano (Certificate of Conformity).
Mokgatlo wa kgodiso ya bana wa boditšhaba o tla go naya ditirelo tsa morago ga tlhokomelo sebaka sa dingwaga tse tlhano.

Nako ya tiragatso

Go farologana go ya ka dikgetse.

Tuelo ke bokae

O ka duela dituelo tse di latelang, tse di sekasekwang ngwaga le ngwaga, go mokgatlo o o maleba wa tshireletso ya bana mabapi le kgodiso ya bana go ya ka Tumalano ya Hague.