Pehelo ya Kopano ya Kabinete ya la 13 Tshitwe 2019

Pehelo ya Kopano e Tlwaelehileng ya Kabinete e neng e tshwaretswe Union Buildings, Tshwane ka Labohlano, la 13 Tshitwe 2019

A. Dintlha ka maemo a renang hajwale

1. Eskom

1.1. Kabinete e tshehetsa ka botlalo matsapa ohle a reretsweng ho netefatsa phepelo e tsitsitseng ya motlakase naheng yabo rona. Tabeng ena, Kabinete e laetse Letona la Dikgwebo tsa Mmuso Pravin Gordhan ho dula majwana le Mohlanka e Moholo wa Phethahatso Mong. Andre de Ruyter hore a thakgole mosebetsi wa hae le pele ho letsatsi leo a neng a tshwanela ho qala ka lona.
1.2. Hanghang Mong. de Ruyter mmoho le moifo wa hae wa bolaodi ba tla sebetsana le dintlha tse amang taolo, bolaodi ba ditjhelete ba be ba tsitsise ditshebetso tsa Eskom. Sena se akga ho sebetsana le tshallomorao e kgolo ya tokiso ya thepa e tsofalang ya diteishene tsa yona tsa motlakase esita le mafokodi a meralo ya motheo a diteishene tsa motlakase tsa Medupi le Kusile.
1.3. Motlatsi wa Moporesidente David Mabuza o tla epa Pitso ya Tsosoloso ya Eneji e nang le Letona la Ditjhelete Tito Mboweni; Letona la Diminerale le Eneji Gwede Mantashe le Letona Gordhan. Moifo ona o tla sebetsana le diphephetso dife kapa dife tsa phepelo ya motlakase ka hara naha.
1.4. Eneji e hlwekileng e tla ba le seabo sa bohlokwa phepelong ya rona ya motlakase bakeng sa ho tlatseletsa matsapeng a Eskom.

2. Tlhabollo ya Kgwebo ya Tshebeletso ya Difofane ya Aforika Borwa (SAA)

2.1. Bekeng ena e fetileng SAA e ile ya kenngwa tlasa Tlhabollo ya Kgwebo. Kabinete e na le tshepo ya hore bokenadipakeng bona bo tla thusa ho bea tshebeletso ena ya naha ya difofane maemong a matla, hore e be setheo seo kgabareng se tla tshetjwa ke maAforika Borwa ohle se be se hohele balekane ba tla se tshehetsa.
2.2. Kabinete e ananetse thonyo ya Setsebi sa Tlhabollo ya Dikgwebo Mong. Les Matuson wa Matuson Associates. O tla sebetsa le Balekane ba Batho ba Batsho ba tla phatlalatswa ha mmela o ntse o puta.
2.3. SAA e tla fumana tjhelete enngwe ya tlatsetso ya R2 bilione e le thuso ya ditjhelete e tswang mmusong bakeng sa ho kenya letsoho mabapi le tlhophobotjha e potlakileng ya tshebeletso ena ya difofane. Hape, baadimi ba hajwale ba SAA ba tla fana ka R2 bilione enngwe ya tlatsetso.
2.4. Kabinete e tshepa hore bokenadipakeng bona bo tla busetsa seriti sa tshebeletso ena ya difofane bo be bo thibele ho putlama ha yona ho neng ho tla ba le kgahlamelo e mpe ho bapalami, bafani ba ditshebeletso le balekane ba bang lekaleng la bofofisi mme haholoholo, ho basebetsi.
2.5. Letona Gordhan le tla tlalehela Kabinete kgafetsa ka kgatelopele e mabapi le bokenadipakeng bona ba Tlhabollo ya Dikgwebo.

3. Dikgohola

3.1. Kabinete e fetisetsa matshediso a yona ho ba lahlehetsweng ke baratuwa ba bona ka lebaka la dikgohola tsa moraorao tse bonahetseng dibakeng tse fapaneng tsa naha.
3.2. Mmuso o hlophisa bokenadipakeng ba makala a mangata ka Setsi sa Naha sa Bolaodi ba Dikoduwa, ho arabela tshenyong e bakilweng ke dikgohola tsena.
3.3. Kabinete e ananela tshehetso ya mekgatlo e fapaneng e etsang matsapa a thuso e potlakileng. Ho pholoswa ha batho meahong le ho fallisetsa ba neng ba hloka bodulo diholong tsa setjhaba le dikerekeng, ho bontshitse moya wa sebele wa Ubuntu. Kabinete e etsa kgoeletso setjhabeng ho mamela ditemoso le dikeletso mabapi le maemo a kotsi a lehodimo.
3.4. Metsi a dikgohola a phallang ka sekgahla a bea bophelo kotsing mme bakganni le ditaaso ba kgothaletswa ho ba sedi haholo ba be ba pheme ka hohlehohle ho sebedisa ditsela tse tletseng metsi.
3.5. Badudi ba dulang dibakeng tse tlase pela dinoka le matamo, ba lemoswa ho ba sedi le ho ya dibakeng tse bolokehileng ka potlako ha ba bona matshwao a dikgohola. O se ke wa bea bophelo ba hao tsietsing ka ho sesa matamong le dinokeng nakong ya dipula tsa ditlwebelele.

4. Sehla sa Monyaka wa Mafelo a Selemo

4.1. Kabinete e lakaletsa maAforika Borwa ohle katleho le polokeho Sehleng sa Monyaka wa mafelo a selemo.  Re le maAforika Borwa re lokela ho tswelapele ho bontsha Ubuntu ho maAforika Borwa a habo rona mmoho le baeti nakong ena ya nyakallo.
4.2. Kabinete e etsa kgoeletso ho maAforika Borwa ohle hore a hlomphe melao ya tsela ha a leba dibakeng tsa phomolo esita le nakong yohle ya sehla sena sa monyaka wa mafelo a selemo. Boikarabelo ba ho fokotsa dikoduwa mebileng ke ba e mong le e mong wa rona.  Boikarabelo mebileng bo kenyeletsa ho se nwe o ntse o kganna, ho kganna ka lebelo le molaong, ho nahanela basebedisi ba bang ba mmila, ho kenyeletsa le ditaaso. Ha re sebetseng mmoho ho boloka maphelo #LiveBeyondDezemba # Arrive Alive.
4.3. “Ditshebetso tse Bolokehileng tsa Sehla sa Monyaka wa mafelo a selemo” di se di qadile moo Tshebeletso ya Sepolesa sa Aforika Borwa (SAPS) e keneng kgabong nakong ena. Baahi ba kgothaletswa ho sebedisa mobile App ya MySAPS, e leng ya pele ya mofuta wa yona kontinenteng ya Aforika.
4.4. App ena e ntjha e thusa baahi ho iteanya le bahlanka ba qobello ya molao ka bokgabane ka ho loma sepolesa tsebe ntle le ho itsebisa, ho fumana diteishene le disebediswa tse haufi tsa sepolesa, esita le ho thusa lehlatsipa la ditlolo tsa molao ho romela melaetsa hanghang nakong ya tshohanyetso.
4.5. Kabinete e boetse e ipiletsa ho batswadi le bahlokomedi ho netefatsa hore bana ha ba siuwe ba le bang nakong ena.
4.6. Kabinete e kgothaletsa maAforika Borwa ho nka Sho’t Left ka ho etela dibaka tsa kwano lapeng tse nang le kgohedi e le ho tshehetsa diketsahalo tsa lapeng. Tshebediso ya batataisi ba ngodisitsweng ba bahahlaudi e tla netefatsa polokeho e be e matlafatse malebela a ho eta. Dintlha tse tebileng tsa batataisi ba ngodisitsweng ba bahahlaudi di ka fumanwa diwebsaeteng tse fapaneng tsa Dikantoro tsa Bohahlaudi tsa Diprovense.

5. Diphetho tsa 2019 tsa Ditlhahlobo tsa Materiki tsa Naha (NSC)

5.1. Kabinete e leboha matitjhere, baithuti le batswadi ka ho sebedisana le mmuso ho netefatsa ho phethelwa ka katleho ha Ditlhahlobo tsa 2019 tsa NSC. Diphetho di tla phatlalatswa phirimaneng ya la 7 Pherekgong 2020 mme baithuti ba kgothaletswa ho etela websaete ya Lefapha la Thuto ya Motheo (www.education.gov.za) kapa ba ingodise ka SMS ka ho romela dinomoro tsa bona tsa boitsebiso le Nomoro ya Tlhahlobo ho 35658 ho fumana diphetho tsa bona.  

B. Diqeto tsa Kabinete

6. Moralo wa Taolo ya Dioli tsa Tlhaho

6.1. Kabinete e ananetse Moralo wa Taolo ya Dioli tsa Tlhaho, o tla fana ka matla bakeng sa ho kenngwa tshebetsong ha Lewa la Diindaseteri tsa Dioli tsa Tlhaho. Dioli tsa Tlhaho di ananelwa le matjhabeng ka ho ba disebediswa tse nang le khabone e tlase. Di tswaka dioli bakeng sa dioli tse tlwaelehileng, mabapi le ho fokotsa disilafatsi tsa moya tsa tshebediso ya oli ya dipalangwang.
6.2. Moralo o fana ka dibaka tse hlano tse lokelang ho laolwa, e leng (1) Porothokhole ya disebediswa tsa motheo tsa tlhahiso. Porothokhole ena e bebofatsa kotsi ya lenaneo la dioli tsa tlhaho mabapi le kanetso ya dijo. (2) Melawana e tlamang ya ho tswaka bakeng sa ho hlahisa botsitso ba tlhoko ya dioli tsa tlhaho.  (3) Mokgwa wa ho kgutlisa ditjeo tsa ho tswaka dioli tsa tlhaho. (4) Mokgwa wa tshehetso ya ditjhelete bakeng sa Dioli tsa Tlhaho ka morero wa tshehetso ya dihwai tsa dioli tsa tlhaho le baetsi ba dioli tsa tlhaho. (5) Mokgwa wa ho kgetha diporojeke tsa dioli tsa tlhaho tse hlokang tshehetso ya ditjhelete. Tokomane ya moralo ona e ka fumanwa ka websaete ya Lefapha la Eneji: www.energy.gov.za.

7. Lekgotla la Naha la Tshireletso

7.1. Kabinete e ananetse ho thewa botjha ha Lekgotla la Naha la Tshireletso, ho tjhorisa kgokahano ya mosebetsi ohle o amanang le tshireletso ya naha. Lekgotla le tla ikarabella kananelong ya Lewa la Tshireletso ya Naha, dintlha tse ka sehlohlolong tsa Mautlwela a Naha le Dikgakanyo tsa Mautlwela a Naha.
7.2. Modulasetulo wa Lekgotla e tla ba Moporesidente boemong ba hae jwaloka Molaodi e Moholo wa Mabotho a Sesole le Tshireletso. Ditho tse ding tsa lekgotla e tla ba Motlatsi wa Moporesidente Mabuza; Letona la Tshireletso ya Puso Ayanda Dlodlo; Letona la Lebotho la Tshireletso le Mekaubere ya Sesole Nosiviwe Mapisa-Nqakula; Letona la Merero ya Lehae Aaron Motsoaledi; Letona la Toka le Ditshebeletso tsa Tlhabollo ya Batshwaruwa Monghadi Ronald Lamola; Letona la Sepolesa Bheki Cele; Letona la tsa Ditjhelete Tito Mboweni le Letona la Puso ya Kopanelo le Merero ya Botjhaba Nkosazana Dlamini Zuma.

8. Pampiri e Tshweu ya Merero ya Lehae

8.1. Kabinete e ananetse Pampiri e Tshweu ya Merero ya Lehae, hammoho le lewa la boemo bo hodimo le mmapa wa ho hlophisa botjha Lefapha la Merero ya Lehae e le mothusi ya hlokolosi bakeng sa ntshetsopele ya moruo le tshireletso ya naha.
8.2. Pampiri e Tshweu e itshetlehile hodima motheo wa leano bakeng sa mmuso wa sejwalejwale o sebedisang mekgwa ya dijithale, e re atametsang phihlellong ya merero ya e-Government le e-Commerce.

9. Kabinete e anantse ho kenngwa ha Tumellano ya Madrid ya Matshwao a Matjhaba a Boingodiso (1989) Palamenteng bakeng sa kamohelo.

9.1. Porothokhole ya Madrid e akaretsa tshireletso ya matshwao a boitsebahatso a kgwebisano. Matshwao a boitsebahatso a kgwebisano a aha temoho ya dihlahiswa le monyetla wa tlhodisano mabapi le papatso ya thepa le ditshebeletso kwano lapeng le matjhabeng.

9.2. Ho fihlella Porothokhole ya Madrid ho tla thusa ka ntshetsopele ya Leano la Thepa ya Bonono (IP) la naha. Le tla fana ka lepatlelo dikgwebong tsa Aforika Borwa haholoholo tse nyane, la ho sebedisa tsamaiso ya IP bakeng sa ho bapatsa thepa le ditshebeletso tsa bona matjhabeng.

10. Lekala la Bapalami ba Diterene la Aforika Borwa (PRASA)

10.1. Kabinete e ananetse ho qhalwa ha Boto ya Nakwana ya PRASA esita le ho bea setheo sena tlasa tsamaiso.
10.2. Aforika Borwa e hloka dibaka tsa diterene tse tshepahalang, tse bolokang tjhelete ebile e le tse phallang ha bobebe, tse sebetsang e le tshiya ya dipalangwang tsa setjhaba mabapi le ho hokahanya mefuta e fapaneng ya dipalangwang. Sephetho sa moraorao sa Mohlahlobi-Kakaretso wa dibuka tsa ditjhelete bakeng sa 2018/19, se tlalehile ho hloleha ho hobe ha taolo ya PRASA, kgaello ya bolaodi bo hlwahlwa ba ditjhelete tsa PRASA ka hore e fumane Sephetho sa ho le Nyaya le Kolobe sa Bohlahlobi ba Ditjhelete.
10.3. Ka lebaka lena, Kabinete e ananetse thonyo ya Motsamaisi, Mong Bongisizwe Mpondo, ho tsamaisa merero ya setheo sena ka dikgwedi tse 12. Bokenadipakeng bona bo tla thusa mabapi le ho busetsa tshebetso e hlwahlwa ya PRASA.

11. Ho Fallela ha Kgaso Mokgweng wa Dijithale

11.1. Kabinete e ile ya tsebiswa ka boemo ba lenaneo la ho Fallela Kgasong ya Mokgwa wa Dijithale mabapi le bolaodi ba poloko ya decoder, kabo le kgokelo.
11.2. E elelletswe moralo bakeng sa kgokelo ya thepa ya di-decoder e bolokilweng dipolokelong tsa Tshebeletso ya Poso ya Aforika Borwa. Kabinete e ananetse hore bakeng sa dikgokelo tse salletseng tsa di-decoder, bahokedi ba tla thonngwa boemong ba bomasepala.  Mokgwa ona o shebilweng botjha wa phano o reretswe ho akofisa motjha o lebisitseng tabeng ya ho fallela mokgweng wa dijithale ho tloha ho wa analoko, esita le ho lokollwa ha High Demand Spectrum. 
11.3. Kabinete e boetse e ananetse thonyo ya Mong. Newyear Niniva Ntuli e le Motsamaisi le Mohlanka ya Ikarabelang wa Lekgotla la Tshebeletso ya Lefatshe ka Bophara le Phumantsho la Aforika Borwa, ka dikgwedi tse 24.

12. Tlaleho ya Tjhebobotjha ya Dilemo tse 25 tsa Matlafatso ya Basadi le Tekano ya Bong ka hara Aforika Borwa: 1994-2019

12.1. Kabinete e ananetse tlaleho ena, e tla sebetsa e le Tlaleho ya Tumellano ya Beijing le Lepatlelo la Tshebetso la Beijing (Beijing +25) ya Mokgatlo wa Matjhaba a Kopaneng (UN). Khomishene ya UN ya Boemo ba basadi e rerile ho etsa sehopotso sa bo-25 sa Tumellano ya Beijing le Lepatlelo la Tshebetso ka Tlhakubele 2020. Aforika Borwa ke motekeni wa Tumellano ya Beijing. 
12.2. Tlaleho ena e hlakisa kgatelopele dintlheng tse ngata mabapi le matlafatso ya basadi le matsapa a ho ngotla sekgeo sa ho se lekane ha bong. Leha e tiisa hore Aforika Borwa e na le bokenadipakeng bo phethahetseng ba melao le leano tse arabelang ho tsa bong ho lokisa botjha kgethollo ka bong, diqholotso tsa ho fetola nalane ya ho se lekane ha bong le ho rarolla taba ya ditlwaelo tse ntseng di tsitlalletse tsa bontate ba le ka sehloohong, le ho kgetholla ho ntseng ho le teng.

13. Dikgoka tse Amanang le Bong (GBV) le Moralo wa Lewa la Naha wa Dipolao tsa Basadi (NSP) (2020-2030)

13.1. Kabinete e ile ya tsebiswa ka NSP 2020-2030, e fanang ka moralo wa lenaneo la mekga e mengata, leano la lewa le momahantsweng le lenaneo la moralo, ho netefatsa karabelo e hokahantsweng ya naha ho GBV ke mmuso le naha ka bophara. Kabinete e ananetse hore mananeo ohle a morero a thuswang ka ditjhelete, a tlameha ho kenngwa tshebetsong ke mafapha a fapaneng a amehang. 
13.2. Kabinete, leha ho le jwalo, e laetse hore mosebetsi o mong o lokela ho etswa mabapi le ho batalatsa tlhophiso e lohothwang ya setheo le kgokahanyo ya mosebetsi ona. Matona ana a latelang a ile a laelwa ho etsa mosebetsi wa tlatsetso tabeng ena: Letona la Ntshetsopele ya Setjhaba Lindiwe Zulu; Letona la Toka le Ditshebeletso tsa Tlhabollo ya Batshwaruwa Ronald Lamola; Letona la Sepolesa Bheki Cele; Letona la Basadi, Batjha le Batho ba Qhwadileng Maite Nkoana-Mashabane. Letona Nkoana-Mashabane o tla hokahanya setlamo sena.

14. Dikgothaletso tsa Phanele ya Boeletsi ya Boporesidente ya Tlhabollo ya Mobu le Temothuo

14.1. Ka la 24 Phupu 2019, Kabinete e amohetse Tlaleho ya Phanele ya Boeletsi ya Boporesidente ya Tlhabollo ya Mobu le Temothuo tlasa bodulasetulo ba Ngaka Vuyokazi Mahlati, e entseng dikgothaletso tse 73.  Ka Komiti e Kopanetsweng ya Matona ya Tlhabollo ya Mobu e etelletsweng pele ke Motlatsi wa Moporesidente Mabuza, mafapha ohle a amehang a ile a koptjwa ho sekaseka dikgothaletso tse amanang le ditshebetso tsa bona ka tatelano a be a arabele ka tshwanelo.
14.2. Kabinete e se e tjhaelletse monwana ebile e tsheheditse tse 60 tsa dikgothaletso tsena. Ke tse robong feela tse sa tjhaellwang monwana mme tse tharo di ile tsa nkelwa hloohong. Mafapha a fapaneng a tla fana ka tsebiso e batlang e le toma dintlheng tse ileng tsa nkelwa hloohong empa di sa tjhaellwa monwana.

15. Porojeke ya Gauteng ya Ntlafatso ya Mebila e Meholo (GFIP)

15.1. Kabinete e bone tlaleho ya GFIP (di e-toll) ya Moifo wa Tshebetso o eteletsweng pele ke Letona la Dipalangwang Fikile Mbalula. Qeto ya moshwelella e mabapi le dikgothaletso tsa Moifo wa Tshebetso jwaloka ha di fuperwe tlalehong, e tla etswa Selemong se Setjha.

16. Kgetho ya Bakgolamolemo le Leano la Kabo ya Mobu

16.1. Kabinete e ananetse phatlalatso ya leano lena bakeng sa hore setjhaba se tshwaele. Leano le fana ka motjha o tshepahalang ebile e le o bonaletsang bakeng sa kabo ya mobu le kgetho ya bakgolamolemo.

16.2. Se hlakileng ke hore, le rarolla taba ya ho se lekane ya bong mabapi le kabo le phumantsho ya mobu, le kgaello ya mekgwa e thusang badudi ba metseng le metsaneng ho fumantshwa mobu ka lebaka la dikoduwa tsa tlhaho le maemo a mang a tshohanyetso.

C. Dibili

17. Kabinete e ananetse phatlalatso ya Bili ya Ditshebeletso tsa Tshehetso ya Mahlatsipa ya 2019 bakeng sa hore setjhaba se tshwaele. Bili ena e fana ka katamelo ya bokenadipakeng bo kopanetsweng, ba mekgatlo e mengata mabapi le ditlhoko tsa mahlatsipa a ditlolo tsa molao le dikgoka. Ka bili ena mesebetsi le ditshebeletso tsa mafapha a fapaneng ho lefapha la Toka, Thibelo ya Ditlolo tsa Molao le Tlelastara ya Tshireletso le Tlelastara ya Kahisano, di tla hokahanngwa hantle e le karolo ya lethathama le le leng la boleng. Kabinete e Tjhaelletse Monwana hape le Leano la Ditshebeletso tsa Tshehetso ya Diphofu la Selemo sa 2019.

18. Kabinete e boetse e ananetse Bili ya Ditsebi tsa Ditshebeletso tsa Kahisano ya 2019 hore e kenngwe koranteng ya mmuso bakeng sa hore setjhaba se tshwaele. Bili e entswe bakeng sa ho atolosa taolo ya ditsebi tsa tshebeletso ya setjhaba ka ho ananela hore ho na le maemo a seporofeshenale le a bothusi ka hara mesebetsi ya tshebeletso ya kahisano. Bili ena, hang ha e ba molao, e tla hlakola Molao wa Seporofeshenale wa Tshebeletso ya Kahisano, 1978 (Molao wa bo-110 wa 1978). Hamamorao Lefapha la Ntshetsopele ya Setjhaba le tla manolla dibili tsena tse pedi tse sisintsweng.

19. Kabinete e ananetse ho kenngwa ha Bili ya Kamoho ya Thepa ya 2019 bakeng sa tshwaelo ya setjhaba. Bili ena e matlafaditswe ke ditshwaelo tsa dipuisano tse batsi le setjhaba le ho tswa dikarolong tse fapaneng. Hang ha e fetiswa ho ba molao, Bili e tla fana ka metjha e tshwanang e tla latelwa ha kamoho ya thepa e kenngwa tshebetsong. E fana ka moralo wa semolao bakeng sa mafapha a mmuso le dikarolo tse ding tsa puso makaleng a mararo a mmuso bakeng sa ho sebedisa metjha e tshwanang ya kamoho ya mobu le ya meralo e meng ya motheo. 

20. Kabinete e ananetse phatlalatso ya moralo wa Bili ya Ntshetsopele ya Mehlodi ya Peterole bakeng sa tshwaelo ya setjhaba. Bili ena e habile ho bopa tikoloho e tla hodisa botsetedi ba lekala la peterole. E fana ka tataiso mabapi le mesebetsi ya tshibollo le tlhahiso, e tla thusa kgolong ya moruo le diphetohong. Bili e boela e fana ka taolo ya mehlodi ya peterole ka ho kgetheha. E thea Lekgotla la Peterole la Aforika Borwa, le tla etsa dikgothaletso ho Letona la Mehlodi ya Diminerale le Eneji.

21. Kabinete e ananetse phatlalatso ya Sehlomathiso sa Bili ya Matla a Ditjhelete le Mesebetsi ya Bomasepala bakeng sa hore setjhaba se tshwaele. Bili ena e hlomathisa Molao wa Matla a Ditjhelete le Mesebetsi ya Bomasepala, 2007 (Molao wa bo-12 wa 2007). E laola matla a bomasepala a ho teka ditefello tsa ntshetsopele mabapi le dikopo tsa ntshetsopele ya mobu tse kentsweng ho bomasepala.

Ditefello tsa ntshetsopele ke tse ding tsa disebediswa tseo bomasepala ba ka di sebedisang ho nyolla kotla ya ntshetsopele ya meralo ya motheo ya bomasepala. Sena se thusa bomasepala ho etsa mesebetsi ya bona ya ho fana ka meralo ya motheo e tshwerweng hantle ebile e le e sebetsang bakeng sa ho katolla dikgoro tsa kgolo ya moruo.

22. Kabinete e ananetse ho kenngwa ha Sehlomathiso sa Bili ya Lekala la Bohlahlobi ba Dibuka tsa Ditjhelete. Bili ena e hlomathisa Molao wa Porofeshene ya Bohlahlobi ba Dibuka tsa Ditjhelete, 2005 (Molao wa bo-26 wa 2005). Bili ena e sisinya hore Boto e Ikemetseng ya Taolo ya Bahlahlobi ba Dibuka tsa Ditjhelete e matlafatswe bakeng sa ho fana ka samane mothong ya nang le lesedi lefe kapa lefe le hlokehang bakeng sa ho phethela diphuputso mabapi le boitshwaro bo sa lokang ba bahlahlobi. Dihlomathiso di boetse di matlafatsa Letona la tsa Ditjhelete bakeng sa ho lekanya tjhelete e hodimodimo e ka lefiswang mohlahlobi ya fumanweng a le molato nyeweng ya kgalemo ya boitshwaro.

D. Diketsahalo tse tlang

23. Kgoeletso ya ho kenela Dikgau tsa Boraditaba tsa Mokgatlo wa Dinaha tsa Aforika e ka Borwa (SADC)

23.1. Boraditaba ba Aforika Borwa ba memelwa ho kenela tlhodisano ya Dikgau tsa Boraditaba tsa SADC tsa 2020 pele ho la 28 Hlakola 2020. Baqolotsi ba Ditaba ba lakatsang ho kenela tlhodisano ba ka fumana lesedi le tomanyana ho www.sadc.int le www.gcis.gov.za.

E. Melaetsa

24. Dithoholetso

Kabinete e fetisetsa dithoholetso tsa yona ho:

24.1. Mohlodi wa Mabotle wa Aforika Borwa Zozibini Tunzi ka ho hapa sekola sa Miss Universe 2019 Atlanta, Amerika.
24.2. Restaurant Mosaic bakeng sa ho kgethwa e le lebenkele la dijo le maemong a hodimo ka ho fetisisa la Aforika Borwa ho Dikgau tsa Lefatshe tsa selemo le selemo tsa La Liste Paris, Fora.
24.3. bahlanka ba sepolesa ba batjha ba 4 971 ba phethetseng dithupelo ka Labohlano, la 13 Tshitwe 2019 ho tswa dikholetjheng tsa sepolesa. Makolwane ana a bahlanka ba sepolesa a tla kena ditulong tsa SAPS bakeng sa ho ntlafatsa polokeho ya baahi.
24.4. Tonakgolo ya Engelane (UK) Boris Johnson le Mokga wa hae wa Conservative ka ho hapa Dikgetho tsa Kakaretso tsa UK tsa 2019, mme re habile ho tswela pele ka ho tiisa maqhama pakeng tsa dinaha tsena tse pedi nakong ya puso ya hae.
24.5. Amajita (Sehlopha sa naha sa bolo ya maoto sa ba ka tlasa dilemo tse 20 [U20]) ka papadi ya bona e matla kgahlanong le Zambia esita le ho tswa bobeding Mohopeng wa COSAFA wa U20.

F. Dithonyo

Dithonyo tsohle di emetse ho netefatswa ka mangolo a thuto le tumello e amehang ya tlhatlhobisiso.

1. Lekgotla la Ntshetsopele ya Kgiro la Aforika Borwa:

a. Moatefokate Richard Sizani (Khomishene ya Tshebeletso ya Setjhaba);
b. Mofumahadi Phindile Mkwanazi (Sekolothupello sa Naha sa Mmuso);
c. Mofumahadi Riefdah Ajam (Federeishene ya Mekgatlo ya Basebetsi ya Aforika Borwa);
d. Mong. Narius Moloto (Lekgotla la Naha la Mekgatlo ya Basebetsi);
e. Mong. Bheki Ntshalintshali (Khonkerese ya Mekgatlo ya Basebetsi ya Aforika Borwa);
f. Ngaka Octavia Mkhabela (O beile meja fatshe);
g. Ngaka Chris Nhlapo (Yunivesithi ya Thekenoloji ya Peninsula ya Kapa);
h. Ngaka Dudu Mkhize (Batjha ba Aforika Borwa ba Boenjinereng);
i. Mong. Sanele Mlotshwa (Mokgatlo wa Dihlooho tsa Dikholetjhe wa Aforika Borwa);
j. Mong. Thulani Dlamini (Lekgotla la Diphuputso tsa Saense le Diindaseteri);
k. Ngaka Glenda Kruss (Lekgotla la Diphuputso tsa Disaense tsa Botho);
l. Mong. Joe Samuels (Bolaodi ba Mangolo a Thuto ba Aforika Borwa);
m. Mong. Bruno Peter Nkosi Druchen (Federeishene ya Ditholo ya Aforika Borwa);
n. Mong Sifiso John Mtsweni (Lekala la Naha la Ntshetsopele ya Batjha);
o. Ngaka Jeremia Gule (Setheo sa Bolaodi ba Batho);
p. Mofumahadi Busisiwe Mavuso (Boetapele ba Kgwebo ba Aforika Borwa);
q. Mong Mustak Ally (Lekgotla la Diminerale la Aforika Borwa);
r. Mong. Dumisani Mphafa (Lekgotla la Dikgwebo tsa Ba Batsho);
s. Moprofesara Sibongile Muthwa (Diyunivesithi tsa Aforika Borwa);
t. Mofumahadi Sesi Nombulelo Nxesi (Foramo ya Lekala la Thuto le Thupelo);
u. Ngaka Randall Carolissen (Sekema sa Naha sa Dithuso tsa Ditjhelete tsa Baithuti);
v. Mofumahadi Yvonne Pelle (Lekala la Tswelopele ya Thuto le Thupelo);
w. Mong. Christo van der Rheede (AgriSA);
x. Mong. Michael Peter (Meru ya Aforika Borwa);
y. Mofumahadi Sithembiso Dlamini (Bohahlaudi ba Aforika Borwa); le
z. Mong. Gerhard Hattingh (Mokgatlo wa Ditharollo tsa Dikgwebo tsa Tlhahiso).

2. Boto ya Letlole la Dikotsi tsa Mebileng.

3. Mofumahadi Nompumelelo (Mpumi) Mpofu jwaloka Motsamaisi Bolaoding ba Khamphani ya Maemafofane ya Afrika Borwa.

Dipotso: Mofumahadi Phumla Williams – Sebueledi sa Kabinete se Tshwereng Mokobobo
Mohala: 083 501 0139

Share this page

Similar categories to explore