Pehelo ya kopano ya Kabinete ya la 04 Tshitwe 2013

05 Dec 2013

1. Maemo a Kabinete mabapi le dintlha tsa bohlokwa maemong a ha jwale

1.1. Kabinete e thoholeditse Lefapha la Thuto ya Motheo, dihlooho tsa dikolo, matitjhere le barutwana ka ho phethelwa ka katleho ha dihlahlobo tsa Naha tsa Setifikeiti se Phahameng tsa 2013.
Kabinete e amohela ho ntshuwa ha Ditekolo tsa Naha tsa Selemo le Selemo tsa 2013 kajeno, la 4 Tshitwe 2013, e leng sesebediswa se babatsehang sa tshekatsheko e thusang Lefapha la Thuto ya Motheo ho fofonela kgatelopele ya diphetho tsa ho ithuta esita le ho ntlafatsa boleng ba thuto.

Kabinete e boela e thoholetsa Lefapha la Thuto ya Motheo le Khomishene ya Mopresidente ya Tlhophiso ya Meralo ya Motheo (PICC) ka boemo bo hatetseng pele phanong ya dibuka tsa ho bala, dibuka tsa ho ngolla, fenetjhara, le neelano ya sekolo se le seng ka beke haesale ho tloha ka la 22 Phupu 2013, e le karolo ya Morero wa Naha wa Meralo ya Motheo.

1.2. Kabinete e ananetse ho thakgolwa ha Morafo wa Tlhahiso wa Stanley Nkosi wa khamphane ya manganese ya Kgalakgadi, Hotazel, Kapa Leboya, eo e leng setsi se seholo ka ho fetisisa sa tlhahiso ya manganese lefatsheng. Sena se bopa karolo ya pokello ya diprojeke tse hlophisitsweng ke PICC, e etelletsweng pele ke Mopresidente Zuma. Ka projeke ena, ho bile le tjhelete e kaalo ka R6.5 bilione e keneng Kapa Leboya, ka nako ya dilemo tse nne, moo ho theilweng mesebetsi e 3 000 ka kotloloho, mme le tsebo ya ho etsa mesebetsi e ntse e ntshetswa pele kahara batjha.

1.3. Mopresidente Jacob Zuma o tla thakgola Letsatsi la Poelano ka la 16 Tshitwe Meahong ya Kopanong tlasa mookotaba o reng: “Kaho ya Setjhaba, Momahano le Poelano ya Setjhaba”.

Keteko e thulana le sehopotso sa dilemo tse 100 tsa Meaho ya Kopanong e le setsi sa mmuso. Seemahale sa Mopresidente wa mehleng Ntate Nelson Mandela, senatla tokolohong le poelanong ya naha ya rona, se tla kgurumollwa Meahong ya Kopanong e le karolo ya sehopotso. Kabinete e etsa kgoeletso ho maAforika Borwa ho sebedisa letsatsi lena ho hetla morao ho bona dikgato tseo re di tsamaileng re le setjhaba, ho phela le ho sebetsa mmoho.

1.4. Motlatsi wa Mopresidente Ntate Kgalema Motlanthe o tla etela pele Seboka sa Bobedi sa Boetapele ba Mmuso Setsing sa Diboka tsa Matjhaba sa Lekgotla la Diphuputso tsa Saense le Indasteri, Pretoria ho tloha ka la 10 ho isa ho la 12 Tshitwe 2013. Seboka se tla kgobokanya baokamedi ba baholo ba tswang makaleng ohle a mararo a mmuso, ka sepheo sa ho ntlafatsa kutlwisiso e abelanweng ka seabo sa Tshebeletso ya Setjhaba ho fihlelleng ditlhoko tsa mantlha tsa maAforika Borwa esita le ho etela pele ntshetsopele ya moruo wa rona.

1.5. Mopresidente Jacob Zuma o tla amohela Kgosi ya Setlamo sa Malaysia, Tuanku Abdul Halim Mu’adzam Shah, Meahong ya Kopanong bakeng sa Ketelo ya Naha ka la 10 Tshitwe 2013. Ketelo ya Naha e tla tiisa maqhama a rona le Malaysia a sepolotiki le moruo esita le ho sebetsa e le monyetla wa ho ntshetsapele Ditabatabelo tsa rona tsa Aforika.

1.6. Kabinete e tshohlile puo e entsweng ke Letona la Mesebetsi ya Setjhaba ka tlaleho ya Setlamo sa Matona a Kopantsweng mabapi le dintlafatso tsa tshireletso matlong a Mopresidente a Nkandla. Kabinete e ananetse ditshisinyo yaba ya laela hore tlaleho e fetisetswe setjhabeng. Matona a Setlamo sa Tshireletso le Letona la Mesebetsi ya Setjhaba ba tla bua le boraditaba ka Labobedi, mohla la 10 Tshitwe 2013.

1.7. Kabinete e ananela sephetho sa Foramo ya bobedi sa BRICS sa Keketseho ya Setjhaba Ditoropong le Foramo ya boraro ya Ditoropokgolo tse nang le Setswalle esita le Tshebedisanommoho ya Mmuso wa Dibaka. Foramo e tsepamisitse maikutlo tlhokehong ya mehato e fapaneng ya mmuso hore e matlafatse puisano le tshebedisanommoho dikarolong tsa meralo ya motheo, ntshetsopele ya dibaka tsa ditjhaba, moruo o sa senyeng tikoloho, phapanyetsano ya botjhaba, matsete le phetisetso ya thekenoloji.

1.8. Kabinete e amohela dinaha tsa Aforika tse 16 le batshehetsi ba tsona tse tla ba le seabo Ditlhodisanong tsa boraro tsa Orange African Nations Championship (CHAN) dipakeng tsa la 11 Pherekgong le la 1 Hlakola 2014 Aforika Borwa. Ho tshwara dipapadi tsena ho tla fa Aforika Borwa monyetla wa ho aha hodima lefa le letle la Mohope wa Lefatshe wa FIFA wa 2010 le Mohope wa Dinaha tsa Aforika wa 2013, e boele e matlafatse momahano ya setjhaba le motlotlo wa setjhaba.

Tlhodisano e boela e fana ka monyetla bakeng sa maAforika Borwa hore a bapatse naha ya rona e le sebaka se hlaphohetsweng sa bohahlaudi, kgwebisano le matsete.

1.9 Nakong ya sehla sena sa phomolo, mmuso o etelletse pele matsholo a fapafapaneng ka tshebedisanommoho le makala ohle a setjhaba ho netefatsa polokeho le boikarabelo boitshwarong. Tse ka sehloohong ho tsena ke Matsholo a Mekgwa ya ho phela Bophelo bo Botle, Fihla o Phela moo o yang, Matsatsi a 16 a Boitseko le Letsatsi la AIDS la Lefatshe. MaAforika Borwa ohle tlameha ho ba le seabo ho fana ka moelelo matsholong ana. Mmuso o ke ke wa e etsa o le mong.

Nakong ena keketseho e bonahalang ya bahlanka ba qobello ya molao dithibelleng tsa mebileng esita le ditshebetso tsa ho phenyekolla naha ka bophara di tla netefatsa hore maAforika Borwa a bolokehile. Basebedisi ba mebila ba hopotswa hore ba se ke ba kganna ba tahilwe, kapa ba se ke ba tsamaya ba tahilwe. Bao ba fumanweng ba le molato wa ho tlola melao ba tla sebetswa ka phethahalo ho ya ka molao.

1.10 Kabinete e ipiletsa ho maAforika Borwa ohle ho ba sedi ho netefatsa hore bana ba rona ba a hlokomelwa mme ba bolokwa hole le kotsi. Ke boikarabelo ba batswadi, bahlokomedi le setjhaba ho netefatsa hore bana ba rona ba bolokehile, haholoholo nakong ena eo re lebileng ho yona.

1.11 Jwaloka ha e le kopano ya ho qetela ya Kabinete ya 2013, ditho tsa Phethahatso di lakaletsa maAforika Borwa ohle phomolo e monate, kgotso le polokeho sehleng sena sa keteko. Kabinete e ipiletsa ho rona bohle ba ka kgonang, ho etsa Botho ka ho thusa batho le malapa a sa kgoneng ho iphedisa, le ho bontsha kutlwelobohloko re le setjhaba se hlokomelanang se bile se hlomphana.

2. Diqeto tsa bohlokwa tsa Kabinete

2.1 Kabinete e ananetse Leano, Lewa le Morero tsa Maqhubu a Dikgokahanyo a Naha a bitswang ka hore ke Hokahanya Aforika Borwa. Sena se tla thusa haholo kgolong ya moruo, ntshetsopele le tlhahiso ya mesebetsi. Sepheo se akaretsang ke ho fihlella monyollo e lekaneng ya lebelo la lefatshe lohle la di-mbps tse 100 ka 2030. Ho fihlella pehelo ena ka mokgwa o hatelang pele, ho na le dipehelo tse ka shejwang botjha tse qalang ka lebelo le lekaneng la mosebedisi wa di-mbps tse 5 tse tla fihlellwa ka 2016 tse seng di fumaneha ho 50% ya setjhaba mme e tla ba 90% ka 2020. Dipehelo di boetse di lokiseditswe ho hokelwa dikolong, ditleliniking le lekaleng la setjhaba ka kakaretso. Kgolo e potlakileng ya theknoloji ya maqhubu a dikgokahanyo e bolela hore dipehelo tsena di tla shejwa botjha selemo le selemo.

2.2 Kabinete e ananetse ho kenngwa ha Pampiri e Tala ya Leano la Theknoloji ya Lesedi la Dikgokahanyole Kopantsweng (ICT) la Naha koranteng ya mmuso bakeng sa ho bontshana le setjhaba. Pampiri e Tala e sebetsana le tlhokeho ya ho fetolwa ha maano le melawana ho nkela hloohong diphetoho tse potlakileng ho ICT dilemong tsa moraorao. Ho tse ding tsa dintho tseo e tsepamisitseng maikutlo ho tsona ke ditshebeletso tsa dikgokahanyo tsa mehala, tsa kgaso le tsa poso. Dipitso tsa nonyo ya maikutlo a setjhaba di tla tshwarwa diporofenseng tsohle qalong ya selemo se tlang.

2.3 Kabinete e ananetse diphetolo tsa Leano la ho Fetolwa ha mokgwa wa Kgaso le amanang haholo le taba ya hore na ebe Mabokoso a Kenngwang Hodimo (STB) (didikhouda) di tshwanela ho ba le mokgwa wa ho laolwa kapa tjhe. E meng ya mekgwa e sebedisitsweng ho nka qeto ho sena ke e latelang:

  • tlhokeho ya ho fetola mokgwa wa kgaso ka potlako, haholoholo ho ntsha mefutafuta ya maqhubu a seyalemoya;
  • ho netefatsa hore ditjhelete tsa ditshehetso tsa mmuso di sebediswa hantle;
  • ho qholotsa indasteri ya lapeng ya dielektroniki le tlhahiso ya mesebetsi;
  • hore borakgwebo ba thuthuang ba fole molemo;
  • ho fokotsa kgonahalo ya hore mebaraka ya Aforika Borwa e subuhlellwe ke di-STB tsa theko e tlase tse sa sebetseng hantle;
  • ho tshireletsa ditabatabelo tsa SABC;
  • ho ba hlokolotsi diphetohong tse potlakileng tsa lekala la kgaso le ICT ka kakaretso;
  • ho fokotsa sekgahla sa ho kotela ba bang mme ho kgothaletswe tlhodisano ka ho thea lepatlelo bakeng sa ditlabotjha mmarakeng wa dithelevishene tse lefellwang ntle le leeme la ho fola molemo dithusong tsa ditjhelete tsa mmuso;
  • ho fokotsa sekgahla sa dikgato tsa molao tse nkwang ke bahasi le bahwebi ba tla henahenana le mosebetsi wa ho fetola mokgwa wa kgaso.

Ho kopanya mokgwa ona le e meng, Kabinete e qetile ka hore tshebediso ya ho laola mokgwa wa kgaso ha e a tshwanela ho tlama. Leha ho le jwalo, di-STB di tla ba le mokgwa wa taolo ho tshireletsa matsete a Mmuso mmarakeng le indastering ya dielektroniki tsa lapeng tsa STB tse tsheheditsweng ka ditjhelete tsa mmuso, mme ka diphetoho tse potlakileng ho tsa theknoloji, bakeng sa tshebediso ke bahasi ba ka nnang ba batla ho e sebedisa hona jwale.

Ho qoba boingodiso bahasi ba folang molemo ka leeme mokgweng wa tsamaiso wa STB, ho tla hulwa ditjhelete ho bahasi bao ba ingodisitseng empa ba kgetha ho sebedisa mokgwa wa Taolo wa STB.

Kabinete e kopa mekgatlo yohle hore e tlohele diphapang tsa yona tsa nako e fetileng mme e sebetse mmoho le mmuso ho thakgola mokgwa o motjha wa kgaso ka potlako molemong wa naha.

2.4 Kabinete e ananetse mekgwa e reretsweng ho thusa malapa a tetebetseng dikolotong esita le ho matlafatsa botsitso ba tsa ditjhelete.
Matona a tsa Ditjhelete le Kgwebisano le Indasteri a ne a filwe matla a ho kenya tshebetsong mekgwa ya thibelo ho fokotsa kotsi ya ho tetebela ka ho fetisisa dikolotong ka dikadimo tsa kamoso tsa ditjhelete. Sena se akga ho fana ka lenaneo le kopaneng la dikgato tse sebetsang hantle la ho thusa malapa ao e bang hona jwale a se a ntse a le tebetebeng ya dikoloto hore a se ke a tetebela ka ho fetisisa dikolotong kamoso.

Letona la tsa Ditjhelete le tla boela le nka dikgato tsa ho kgothatsa bahiri ho thusa bahiruwa ba bona ba tetebetseng haholo dikolotong ka ho fuputsa ditokomane tsa qobello ya tefo ho bona hore na ke nnete ho le hokae, esita le ho fa bahiruwa mekgwa ya dikeletso ka tsa ditjhelete.

2.5 Kabinete e ananetse Pampiri e Tshweu ya Leano la Naha la Bolaodi ba Tikoloho ya Mawatleng. Leano le teka mokgwa wa bolaodi bo hlophisitsweng ba lekala ho ya bolaoding ba tikoloho ya mawatleng. Sena se tla dumella Aforika Borwa ho rarolla ka bokgabane diphephetso tse holang tse bakwang ke tshenyo e etswang ke batho tikolohong ya mawatleng, ha ka lehlakoreng le leng e thusa kahohlehohle bokgoning ba ntshetsopele ya moruo boo mawatle a fanang ka bona.

2.6 Kabinete e ananetse Maemo a makgaolakgang a Leano la Naha la Metsi yaba ya ela hloko mesebetsi ya dipuisano tsa setjhaba e entsweng ho phethelaTjhebobotjha ya Leano la Naha la Metsi.

Maemo a matjha a Leano la Metsi a amohela ntlha ya ntshetsopele ya bolaodi ba metsi, e rarollang dikgohlano dipakeng tsa bolaodi ba metsi le ntshetsopele esita le sepheo sa mmuso sa diphetoho. Sena se lekodisisa boleng ba tsamaiso ya metsi ka kakaretso mabapi le kamoo metsi a ka thusang ka teng ntshetsopeleng ya tekano, ya ho fola molemo le ya nako e telele naha ka bophara.

2.7 Kabinete e ananetse mosebetsi wa ho amahanya botjha Diboto tsa Metsi ho ba Ditheo tsa Mabatowa tsa Metsi tse robong. Sena se latela tlaleho ya ho qetela kahong botjha e sisintsweng ya Diboto tsa Metsi.

Mosebetsi wa bohlokwahlokwa wa Ditheo tsa Mabatowa tsa Metsi e tla ba ho aha le ho laola moqeqeko wa meralo ya motheo ya mabatowa (phepelo ya metsi le mohlodi wa metsi) ho akga le ditjhelete, ntshetsopele ya projeke le mesebetsi e tswelang pele le poloko ya disebediswa di le maemong a matle. Sena se tla thusa ka phano e betetshana ya tshehetso mmusong wa dibaka, e leng tlhokeho ya bohlokwa ya popobotjha ya lekala ka kakaretso.

2.8 Kabinete e ananetse ho kenngwa tshebetsong ha ho entelwa Kokwanahloko ya Papiloma Bathong, eo tsamaiso ya yona e tla laolwa ka dikgwedi tse tsheletseng tse qadikaneng, ka 2014, bananeng ba dilemong tse pakeng tsa tse robong le tse 10 ka Lenaneo la Kopantsweng la Bophelo bo Botle Dikolong. Sena se tsamaisana le tshisinyo ya Mokgatlo wa Lefatshe wa Bophelo bo Botle.

Sepheo ke ho fokotsa kotsi ya ho ba le mofetshe wa popelo hamorao bophelong ba banana, mme e tla thusa ntlafalong ya bophelo ba boleng basading e be e eketse tebello ya dilemo tsa bona tsa ho phela, athe e boetse e fokotsa haholo boteng ba mafu a diqebo.

3. Dibili

3.1 Kabinete e ananetse ho kenngwa koranteng ya mmuso ha Bili ya nakwana ya Agrément ya Aforika Borwa, ya 2013 le Memorandamo o mabapi le sepheo sa Bili hore setjhaba se tshwaele.

Bili ya nakwana e hlekela kananelo ya Agrément ya Aforika Borwa e le setheo. Boto ya Agrément ya Aforika Borwa e filwe thomo, ho tse ding, ya ho hlahloba ho lokela mosebetsi ha dihlahiswa tse sa amohelwang semmuso tse amanang le kaho kapa mekgwa ya ho di sebedisa indastering ya kaho, moo e bang ho hang ha ho maemo a naha a beilweng.
Sena se tla thusa ho theweng ha indasteri ya kaho e hatelang pele ebile e le ya maemo e tla thusa tlhahisong ya mesebetsi ha ka ho le leng e tla be e kenya letsoho mererong ya meralo ya motheo ya Mmuso.

3.2 Kabinete e ananetse ho tekwa ha Bili ya Sehlomathiso ya Banka ya Ntshetsopele ya Aforika e ka Borwa, ya 2013 Palamenteng. Bili e hlomathisa Molao wa Banka ya Ntshetsopele ya Aforika e ka Borwa, wa 1997.

Leqheka la tjhadimo ya Bili ya Sehlomathiso ke ho kgontsha katoloso ya Banka ya Ntshetsopele ya Aforika e ka Borwa ho ya naheng efe kapa efe e kontinenteng ya Aforika esita le dihlekehlekeng tse mawatleng a yona. Sena se tla kgontsha Banka ho ba le seabo meralong e meholo ya motheo le diprojeke tse ding kantle ho lebatowa la Dinaha tse Tswelang pele tsa Aforika e ka Borwa tse nang le bokgoni ba ho ntlafatsa kgwebisano le kgolo ya moruo kontinenteng esita le ho tshehetsa boitelo le boikitlaetso ba naha tse pedi momahanong ya -

3.3 Kabinete e ananetse hore Bili ya nakwana ya Bolaodi ba Lekala la tsa Ditjhelete e ntshuwe bakeng sa hore setjhaba se tshwaele ka yona, ho thusa boikitlaetsong ba Aforika Borwa ba G-20.

Sepheo sa Bili ke ho etsa hore lekala la tsa ditjhelete le bolokehe ka ho kenya tshebetsong mokgwa wa taolo wa ‘tlhoro pedi’; e leng ho thewa ha balaodi ba babedi: e mong o ikarabela polokehong le botsitsong ba ditheo tsa ditjhelete ha e mong a ikarabela mokgweng oo ditheo tsa ditjhelete di etsang mosebetsi wa tsona ka teng.

4. Dithonyo

4.1 Kabinete e ananetse ho thonngwa ha Esther Sarah Makau mosebetsing wa Mohlanka e Moholo wa tsa Ditjhelete Lefapheng la Bonono le Botjhaba.

4.2 Kabinete e ananetse dithonyo tse latelang Lefapheng la Dokgokahanyo:
a) Reneva Fourie mosebetsing wa Motlatsi wa Molaodikakaretso: Lesedi la Ntshetsopele ya Setjhaba le Diphuputso;
b) Tinyiko Moses Ngobeni mosebetsing wa Motlatsi wa Molaodikakaretso: Kaho ya Meralo ya Motheo ya ICT;
c) Sibongile Vulikhaya Makopi mosebetsing wa Motlatsi wa Molaodikakaretso: Tekolo ya Dikhamphane tseo e leng tsa Mmuso le Kaho ya Dikgwebo tsa ICT.

4.3 Kabinete e ananetse ho thonngwa ha Siyakhula Paradise Simelane mosebetsing wa Mohlanka e Moholo wa tsa Ditjhelete Lefapheng la Ntshetsopele ya Dibaka tsa Mahae le Tlhabollo ya Naha.

4.4 Kabinete e ananetse ho thonngwabotjha ha Siyabulela Thomas Tsengiwe mosebetsing wa Mokomishenara e Moholo wa Khomishene ya Tsamaiso ya Kgwebisano ya Matjhaba.

4.5 Kabinete e ananetse ho thonngwa ha Mme Thezi Rosemary Mabuza e le Motlatsi wa Mokhomishenara wa Khomishene ya Naha ya Bareki.

4.6 Kabinete e ananetse ho thonngwa ha Ntate Themba Thomas Cyril Dlamini e le Mohlanka e Moholo wa Phethahatso (CEO) Botong ya Dipapadi ya Naha

4.7 Kabinete e ananetse ho thonngwa ha Moadvokheiti Solomon Makhosini Msibi e le CEO ya Koporasi ya Taolo ya Sephethephethe Mebileng.

4.8 Kabinete e ananetse dithonyo tse latelang tsa ditho tseo e seng sa Phethahatso Botong ya Koporasi ya Taolo ya Sephethephethe Mebileng.
a) Mme Thembeka Mdlulwa
b) Ntate Ike Nxedlana
c) Mme Nalini Maharaj
d) Ntate Rowan Graham Nicholls
e) Mme Morwenyane Maria Mathabathe
f) Ntate Zola Malvern Percival Majavu
g) Ntate Sam Ledwaba.

4.9 Kabinete e ananetse dithonyo tse latelang tsa Balaodi bao e seng ba Phethahatso Botong ya Kantoro ya Poso ya Aforika Borwa:
a) Ntate Templeton Mageza
b) Ntate Sihle Joel Ngubane
c) Mme Selebaleng Primrose (Boitumelo) Mothelesi
d) Ntate Sathiaseelan Gounden.

4.10 Kabinete e ananetse dithonyo tse latelang Botong ya Tlhomamiso ya Setheo sa Naha sa Pepeseho ya Matlakala a Kotsi haholo:
a) Moprofesara. Gordan Sibiya (Modulasetolo)
b) Clive Douglas Kneale
c) Eric Peter McDonald
d) Queen Nothando Gopo
e) Mathews Mateo Mathebe
f) Ngaka. Margaret Mmeongi Mkhosi
g) Nolwazi Zandile Cobbinah
h) Justin Daniel.

4.11 Kabinete e ananetse ho thonngwa ha Baemedi ba latelang ba Mothonngwa wa Mohiruwa Letloleng la Dipenshene tsa Basebetsi ba Mmuso:
a) Ntate Stadi Mngomezulu (Matlotlo a Naha)
b) Ntate Bhekithemba Thabo Gamedze (Letona la tsa Ditjhelete)
c) Ngaka Renosi Mokate (Letona la tsa Ditjhelete)
d) Ngaka Malcolm Barry Kistnasamy (Lefapha la Bophelo bo Botle)
e) Mme Gladys Modise (Lefapha la Thuto ya Motheo)
f) Mme Esther Euphane Aletta (Barbara) Watson (Lefapha la Tshebeletso le Tsamaiso ya Setjhaba)
g) Ntate Nkhangweleni Seth Makhani (Lefapha la Tshireletso)
h) Mme Moira-Anne Moses (Koporasi ya Matsete a Setjhaba).
Kabinete e ananetse ho thonngwa ha Baemedi ba latelang ba Mothonngwa ya Nkang Sebaka sa Mohiri:
i) Mme Lindy Ann Bodewig (Matlotlo a Naha)
j) Moadvokheiti Lindiwe Grace Nkosi-Thomas (Letona la tsa Ditjhelete)
k) Ntate Abel Sithole (Letona la tsa Ditjhelete)
l) Ngaka Thamizhanban Pillay (Lefapha la Bophelo bo Botle)
m) Ngaka Mogenthiran Shunmugam (Morgan) Pillay (Lefapha la Thuto ya Motheo)
n) Ngaka Lesiba Alex Mahapa (Lefapha la Tshebeletso le Tsamaiso ya Setjhaba)
o) Mobrigadiri Johan David Griesel (Tshebeletso ya Sepolesa sa Aforika Borwa)
p) Mme Rejane Woodroffe (Koporasi ya Matsete a Setjhaba).

4.12 Kabinete e ananetse ho thonngwabotjha ha Ntate Andrew Zaloumis e le CEO ya Lekgotla la Phaka ya Lenyekethe la iSimangaliso.

4.13 Kabinete e tsebile ka ho thonngwabotjha ho Molaodi wa Naha wa Ditotobatswa tse Tlamang
a) Jeff Molobela (Modulasetolo)
b) Ntate Nico Vermeulen (Setho seo e seng sa Phethahatso)
c) Mme Funzani Asnath Melato (Setho seo e seng sa Phethahatso)
d) Mme Susanna Elizabeth Moolman (Setho seo e seng sa Phethahatso)
e) Moprofesara Sadhasivan Perumal (Setho seo e seng sa Phethahatso)
f) Mme Dora Ndaba (Setho seo e seng sa Phethahatso)
g) Ntate Paul Serote (Setho seo e seng sa Phethahatso)
h) Ntate Sipho Reginald Zikode (Setho seo e seng sa Phethahatso).

Dipotso:
Phumla Williams (Sebueledi sa Kabinete se Tshwereng Mokobobo)
Mohala: 083 501 0139

Issued by: Government Communications

Share this page

Similar categories to explore