Kufaka esiswini umntfwana wemindeni lesemaveni lamabili lehlukene

Mayelana nekufaka esiswini umntfwana wemndeni noma wemindeni lehlobene ngekwengati lesemaveni lamabili lehlukene

Kuyenteka kutsi ufake esiswini umntfwana wesihlobo sakho saseNingizimu Afrika umtsatse lowo mntfwana uyewuhlala naye kulelinye live. Nangabe useNingizimu Afrika kantsi lomntfwana uhlala kulelinye live, ungamtsatsa lomntfwana kutsi atewuhlala nawe lapha eNingizimu Afrika nangabe sewumfake esiswini lomntfwana kulelo live langephandle.

Kufaka umntfwana esiswini lokwenteka emkhatsini wemindeni yemave lamabili kusho kwendlulisela emalungelo ekuba ngumtali netibopho asuke kum/batali balomntfwana ete kuwe ngesheya kweminyele yemave emhlaba.

Kufaka umntfwana esiswini wesihlobo sakho lesiseNingizimu Afrika kufanele kutsi ubonane neMtimba Lomkhulu Wekugunyata lapho uhlala khona. Nangabe kute umtimba logunyatwe kutsi wente loko eveni lakho, ungatsintsa Inhlangano Yemave Emhlaba Yetinsita Tetenhlalahle (i-ISS) kulelo live kute ichube loko kufakwa esiswini kwemntfwana.

I-ISS yinhlangano yemave emhlaba lengenti inzuzo lenaka bantfwana lasengotini yehlaseleka kalula labacoshiwe emaveni abo. Isebenta emaveni la-140 ngekusebentisa inethiwekhi yemagatja avelonkhe, tisebenti tetenhlakahle, tinhlangano letingemalunga kanye nalababhalelana nabo. Nangabe lomntfwana ahlala kulelinye live, kufanele kutsi ubonane neMtimba waseNingizimu Afrika Lomkhulu Wekugunyata (i-Saca), lokutawuba nguwo lotawundlulisela loludzaba enhlanganweni levumelekile levikela bantfwana. Nangabe lenhlangano levikela bantfwana ikutfola kutsi ungumtali lofanele longafaka lomntfwana esiswini emva kwekukuhlola nekukucubungula, itawubhala umbiko lophelele iwutfumele kuMtimba Lomkhulu Wekugunyata walelo live langaphandle. LoMtimba Lomkhulu Wekugunyata walelo live langaphandle, utawube, uyaphenya bese ubhala umbiko ngalomntfwana bese iwutfumela eNingizimu Afrika.

Nangabe omabili lamave ayavumelana ngalokufakwa esiswini kwalomntfwana, kutawufuneka kutsi uye kulelive langaphandle uyewuphotfula khona lokufakwa esiswini kwalomntfwana.

Kufakwa esiswini kwemntfwana kwemindeni nome kwetihlobo tengati kungentiwa nanome ngabe nguliphi live ngaphandle kwekutsi kube khona sivumelwane sekusebentisana (Sivumelwane saHague nome ngaphandle kwesayini yeSivumelwane saHague). 

Yini lekumele kutsi ukwente

1. Nangabe uhlala eveni langephandle nekutsi ufuna kufaka esiswini umntfwana waseNingizimu Afrika lohlobene nawe, kufanele kutsi utsinte Umtimba Lomkhulu Wekugunyata kulelo live lapho uhlala khona.

2. Inhlangano levumelekile itakuhlola ikucubungule kute itfole kutsi uyafaneleka yini njengemtali lotawufaka lomntfwana esiswini. Nangabe lenhlangano ikutfola kutsi ufanele futsi ulungile kutsi ungamfaka esiswini lomntfwana, itawubhala umbiko logcwele ngelikhaya lakho iwutfumele ka-Saca, bese yona iwutfumela enhlanganweni levumelekile levikela bantfwana.

3. Inhlangano yaseNingizimu Afrika levikela bantfwana itawuphenya ihlole kutsi lomntfwana angafakeka yini esiswini. Sisebenti setenhlalakahle sitawucinisekisa kutsi wonkhe umuntfu lekufanele kutsi avumelane nalokufakwa esiswini kwalomntfwana, ukwenta loko kuvuma kwakhe ngekusebentisa Inkantolo Yebantfwana.

4. Emacembu latsintsekako atawunikwa tinsuku letinge-60 kutsi ahocise kuvuma kwawo ngembikwekutsi lomntfwana atsatseke ngekutsi sewufakwe esiswini.

5. Inhlangano lefaka lomntfwana esiswini itawubhala umbiko lophelele ngalomntfwana bese iwutfumela kulelo live langaphandle.

6. Nangabe omabili lamave ayavumelana ngekufakwa esiswini kwalomntfwana, kutawufanele kutsi ute lapha eNingizimu Afrika utewuphotfula kufakwa esiswini kwalomntfwana.

Nangabe uhlala lapha eNingizimu Afrika futsi ufuna kufaka esiswini umntfwana lohlobene naye kodvwa loseveni langephandle, inchubo yekwenta loko kufakwa esiswini kwalowo mntfwana ngulena lelandzelako:

1. Kufanele kutsi utsinte i-Saca yona-ke itawubese indlulisela loludzaba enhlanganweni levumelekile levikela bantfwana.

2. Lenhlangano levikela bantfwana itakuhlola ikucubungule kutfola kutsi ngabe uyafaneleka yini kutsi ube ngumtali lotawufaka lomntfwana esiswini. Nangabe lenhlangano ikutfola kutsi uyafaneleka futsi ukulungele kumfaka esiswini, itawubhala umbiko lophelele ngelikhaya lakho bese iwutfumela eMtimbeni Lomkhulu Wekugunyata walelive langaphandle.

3. LoMtimba Lomkhulu Wekugunyata waseveni langaphandle, ngekusebentisa inhlangano yawo utawuphenya kufakwa esiswini kwalomntfwana bese ubhala umbiko lophelele ngalomntfwana. Lowo mbiko utawutfunyelwa ku-Saca.

4. Nangabe omabili lamave avumelana ngalokufakwa esiswini kwalomntfwana, kutawumele kutsi uhambe uye kulelo live langaphandle uyowuphetsa khona kufakwa esiswini kwalomntfwana. 

Kutsatsa sikhatsi lesingakanani

Kuyehluka kuleyo nakuleyo ndzaba.

Kubita malini

Kufanele kutsi ukhokhele inhlangano levumelekile yekuvikela bantfwana mayelana nekufaka esiswini umntfwana emkhatsini wemave lamabili.

Emafomu lekumele kutsi agcwaliswe

Tsintsa Umtimba Lomkhulu Wekugunyata kulelive lohlala kulo.

Ngubani longamutsintsa