Kabinete e swere kopano ya yona ya mathomo yeo e bego e tsenetšwe ke maloko ka sebele go tloga mola go tsebišwago dikiletšo tša mesepelo ka 2020, ye ke karolo ya ge Kabinete e fetogela go seemo se seswa sa tlwaelo ge naga e tšwela pele go boela seemong sa tlwaelo.
A. Merero seemong sa bjale
1. Go fega lebakanyana ga Lenaneo la Moento la Sisonke le tšhišinyo ya go o diriša leswa
1.1. Kabinete e sedimošitšwe mabapi le go fegwa ga lebakanyana ga Lenaneo la Moento la Sisonke la Johnson and Johnson (J&J), e bilego magato a temošo ao a dumeletšego bašomi ba tša mahlale ba Afrika Borwa go lekodišiša leswa tshedimošo ya Afrika Borwa mabapi le moento wa J&J. Se se latetše go fegwa ga lenaneo la go hlabela moento wa J&J ka United States of America (USA) ka morago ga ge batho ba tshela bao ba entetšwego ka moento wa J&J ba ile ba ba le mohuta wo o sego wa tlwaelega wa go photha ga madi. Lebaka le lengwe la go fegwa lebakanyana e bile sephetho seo se tšwerwego ke ba J&J go fega lebakanyana ka boithaopo go enta ka moento wo ka dinageng tša Yuropa.
1.2. Go fega lebakanyana ga moento wo ka mo Afrika Borwa go sepelelane le boikgafo bja mmušo bja go netefatša gore magato a polokego ka kakaretšo a a tšewa mabapi le go enta batho ka moento wo. Tshedimošo ye e lekodišišitšwego e tiišeleditše gore Afrika Borwa ga se ya itemogela go photha gofe goba gofe ga madi fao go sego gwa tlwaelega go bašomi ba tlhokomelo ya maphelo (di-HCW) bao ba šetšego ba entetšwe.
1.3. Kabinete e amogela tšhišinyo ye e dirilwego ke Bolaodi bja Taolo ya Ditšweletšwa tša Maphelo bja Afrika Borwa ya go tsenya tirišong leswa Lenaneo la Moento la Sisonke la J&J.
1.4. Bašomi ba rena ba tša mahlale ba tla tšwela pele go hlokomela maAfrika Borwa ka moka ge ba entelwa le ka nako yeo ba entelwago. Go fihla gare ga Moranang 2021, di-HCW tša go feta tše 292 623 di entetšwe ka fase ga Lenaneo la Moento la Sisonke.
2. Lenaneo la tlhabelo ya moento
2.1. Kabinete e amogetše kgatelopele ye e bilego gona ka go saeneng ga konteraka le J&J mabapi le go reka ga meento ya J&J yeo e tlogo dirišwa ka lenaneong ka moka la moento, gomme ya šišinya gore Tona ya Maphelo, Ngaka Zweli Mkhize le Tona ya Kgwebišano, Intasteri le Phenkgišano, Morena Ebrahim Patel, go rarolla mathata ao a sa šaletšego a mabapi le go reka meento ka ntle le go senya maemo a Afrika Borwa.
2.2. Godimo ga fao, Kabinete e amogetše ditherišano tše di atlegilego tša dilekanyo tša tlaleletšo tše 10 milione tša moento wa Pfizer, gomme se sa tliša palomoka ya dilekanyo tša Pfizer go fihla go tše 30 milione. Se se ra gore Afrika Borwa e tla kgona go enta batho ba 15 milione ka moento wa Pfizer sebakeng sa fela ba 10 milione.
2.3. Go lokišetša Kgato ya 2 ya lenaneo la go hlabela ka moento leo le thomago ka la 17 Mopitlo 2021, Kabinete e hlohleletša batho ba mengwaga ye 60 le ba mengwaga ya ka godimo go ingwadiša go Lenaneo la Elektroniki la Tshedimošo ya Moento: https://vaccine.enroll.health.gov.za.
2.4 Batho bao ba sa kgonego go fihlelela inthanete ba ka ingwadiša ka sebele mafelong a moento a go feta a 3 338 go ralala le naga. Dihlopha tša go thetha di tla romelwa go thuša batšofadi, bao ba hlokago madulo le batho bao ba dulago dinagamagaeng.
3. Dipalopalo tša diphetetšo tša Bolwetši bja Coronavirus (COVID-19)
3.1. Kabinete e amogetše Tshedimošo ya moragorago mabapi le diphetetšo tša COVID-19 go ralala le naga gomme ya reta maAfrika Borwa ka go tšwela pele go obamela ditshepedišo tša maphelo tše di sa amanego le dihlare ka go apara dimaseke ge ba le mafelong a setšhaba, ka go tlogela sekgoba magareng ga batho sa tekano ya metara o tee le seripa le go hlapa diatla ka mehla ka sesepa le meetse goba ka go šomiša sanithaesa sa diatla sa alekhohole ya 70%.
3.2. Le ge go le bjale, pego e laeditše gape gore go na le koketšego ye nnyane ya 4,9% go batho bao diteko tša bona di laetšago gore ba fetetšwe mo matšatšing ao a fetilego a 14, go fihla ka la 18 Moranang 2021. Diphetetšo di oketšegile go tloga go 14 113 mo matšatšing ao a fetilego a 14 go fihla go diphetetšo tše 14 807 mo matšatšing ao a fetilego a 14.
3.3. Koketšego ye nnyane ya diphetetšo e bakilwe ke go hlatloga ga diphetetšo ka mafelong a itšego ka Foreisetata le ka Kapa Leboa, gomme dihlopha tša phetolo ya tšhoganetšo di hlomilwe gore di dire tatišišo ya bao ba ka bego ba bile kgauswi le bao ba fetetšwego.
4. Tsošološo ya ekonomi
4.1. Kabinete e amogetše Dinyakišišo tša Kakaretšo tša Ngwaga le Ngwaga tša 2021 tša go Hwetša Tirelontle ya Tshepedišo ya Kgwebo ya Kantoro ya Setšhabeng (BPO), yeo e beilego Afrika Borwa maemong a mathomo lefaseng bjalo ka lefelo leo le etelwago la BPO.
4.2. Dinyakišišo tše di akareditše le go fihla go balaodibagolo ba go feta ba 600 go tšwa ka mebarakeng ye seswai ye bohlokwa ya go hwetša ditirelo, go akaretšwa Australia, Canada, France, Germany, Italy, Spain, United Kingdom (UK) le USA.
4.3. Se se tiišetša mošomo wa boithomelo wa mmušo le lekala le ka go ageng ga bokgoni bja naga ye bja BPO, leo le bago le kgolo ye maatla ka makaleng a megala, thekgo ya sethekniki le ditirelo tša thekgo tša ka kantorong tša pele le morago tša difeme tše kgolo tša ditšhaba tše ntši le tša difeme tša ka Afrika Borwa.
4.4. Mananeokgoparara a titšithale ao a gatetšego pele a ka mo nageng, bašomi bao ba nago le bokgoni, tsebo ka go theknolotši le ditirelo tša ditšhelete, le go kgona Seisemane, go tšwela pele go dira naga go ba lefelo la go goketša baeti ba BPO.
5. Tlhomo ya mešomo
5.1. Kabinete e thabišwa ke gore magato a mmalwa a mmušo a go hlohleletša go kgatha tema ga maAfrika Borwa a mantši ka ekonoming, kudukudu bafsa, a thoma go tliša dipoelo.
5.2. Lenaneo la Tlhohleletšo ya Tlhomo ya Mešomo ka Kantoro ya Mopresidente leo le tsebagaditšwego semmušo ka Diphalane 2020 go arabela seabe sa COVID-19 le hlomile goba le dirile gore mešomo ye 360 010 e dule e le gona go ya mafelelong a Dibokwane 2021, kudukudu go bafsa bao ba sa šomego. Godimo ga fao, tlhohleletšo ya tlhomo ya mešomo e thekgile go iphediša ga baholegi ba 60 539 ka go fetišetša thekgo, go akaretšwa diboutšhara tša tšweletšo go balemi bao go itšweleletša dijo.
5.3. Palo ya go feta 300 000 ya dibaka tše e tlile ka go tsenya bafsa mešomong bjalo ka bathuši ka dikolong go ralala le naga, ka go diriša Lesolo la Tlhomo ya Mešomo la Thuto ya Motheo. Bathuši ba ba dikolong ba ralokile tema ye bohlokwa go maatlafatša seemo sa go ithuta ka dikolong ka nakong ye boima.
6. Tlhabollo ya mananeokgoparara
6.1. Kabinete e lebogile kgatelopele ye e dirilwego ka go maatlafatša bokgoni le botsebi bja Boemakepe bja Durban tše di feleleditšego ka phokotšo ye kgolo ya go pitlagana le dinako tša go phetha mošomo tšeo di kaonafaditšwego.
6.2. Mohlomphegi, Mopresidente Cyril Ramaphosa, o ile a etela Boemakepe bja Durban ka Labone la 15 Moranang 2021 go sekaseka kgatelopele ya mabapi le kaonafatšo ya mananeokgoparara a boemakepe ka morago ga go tsenela kopano le bašomiši ba boemakepe le bakgathatema ka Diphalane 2019.
6.3. Go kanoafatša go phethagatša ga mošomo ka maemakepe a Afrika Borwa, kudukudu Boemakepe bja Durban, go bohlokwa go maikemišetšo a mmušo a go tšwetša pele maemo a Afrika Borwa a go ba gareng ga maemakepe a kgwebo a magolo kudu le ao a šomago gabotse le go maatlafatša seemo sa rena bjalo ka lefelo la go tloga ga dithoto go leba ka seleteng le ka khonthinenteng.
6.4. Kabinete e amogetše gape pego ya mabapi le ketelo ya tlhokomedišišo ka Boemakepe bja Saldanha Bay ka Kapa Bodikela ka Tona ya Mešomo ya Setšhaba le Mananeokgoparara Patricia de Lille – a na le Motlatšatona Noxolo Kiviet le Ngaka Kgosientsho Ramokgopa, e lego Hlogo ya Dipeeletšo le Mananeokgoparara ka Kantorong ya Mopresidente – ka Labobedi la 6 Moranang 2021.
6.5. Lenaneo la go Lokiša le go Hlokomela Maemakepe a Mannyane, leo e lego Protšeke ye e Kopantšwego ya Togamaano bjalo ka karolo ya Leano la Peeletšo ka go Mananeokgoparara leo le dumeletšwego ke Kabinete ka Mopitlo 2020, mo lebakeng le phethilwe ka 77%. Le hlomile palomoka ya dibaka tša mešomo tše 611 gomme dikgwebopotlana tša mehutahuta tša kgauswi, tša magareng le tše nnyane di holegile ka boleng bja tšhelete ye e ka bago R55 milione. Protšeke ye go emetšwe gore e tlo phethwa ka Hlakola 2022.
7. Dipego tša Dipalopalo tša Kgwedi le Kgwedi
7.1. Tirelo ya Dipalopalo ya Afrika Borwa (StatsSA) e tšwela pele go lokolla dipego tše mmalwa tša kgwedi le kgwedi ka ga go šoma ga makala a mehutahuta a ekonomi. Le ge e le gore makala a mangwe a tšwela pele go swara bothata bja go tsošološa dikgwebo tša tšona, go kgotlelela ga intasteri ya temo, ya botšweletši le ya meepo go tšwela pele go hlohleletša boitshepo ka go tsogeng ga ekonomi ya Afrika Borwa.
7.2. Kabinete e thabišitšwe ke gore go tsenywa tirišong ga Leano la Kagoleswa le Tsošološo ya Ekonomi go tliša seabe seo se bonagalago ka go tsošološweng ga ekonomi ya Afrika Borwa.
8. Go tshwenya dikolong
8.1. Kabinete e laeditše tlhobaboroko mabapi le ditiro tše di tletšego tša go tswenya baithuti ba bangwe ka dikolong tša rena, tšeo di akareditšego ditiragalo tše di sa tšwago go direga ka Sekolong seo se Phagamego sa Mbilwi ka Thohoyandou, ka Limpopo, ka Sekolong seo se Phagamego sa Dinwiddie ka Germiston, ka Gauteng le ka Sekolong seo se Phagamego sa Mathole High School ka KwaZulu-Natal.
8.2. Kabinete e swabišitše ke lehu la Lufuno Mavhunga (15) go tšwa ka Sekolong seo se Phagamego sa Mbilwi ka Thohoyandou, ka Limpopo, gomme ya lebiša mahloko go ba lapa la ga Mavhunga le go bagwera ba gagwe. Kabinete e ipileditše go ba tirelo ya molao go nyakišiša ka pela taba ye le go netefatša gore toka e a phethagala ka maleba.
8.3. Kabinete e ipileditše go bakgathatema ba thuto, go akaretšwa batswadi le bahlokomedi ba bana, go kopana kgahlanong le ditiro tša go tswenya baithuti ba bangwe ka nepo ya go hloma seemo seo se loketšego go ithuta. Ke maikarabelo a yo mongwe le yo mongwe w arena go bolela le go bega ditiragalo tša go tshwenya go ba taolo ya maleba, kudukudu fao e lego gore batšwasehlabelo ba palelwa ke go di bega goba ba tšhabago go di bega.
9. Bosenyi bja lehloyo
9.1. Kabinete e kgalema ka bogale ditiragalo tša bosenyi bja lehloyo tšeo di sa tšwago go direga tša go lebišwa go batho ba LGBTIQ+ tšeo di feleleditšego ka mahu a Andile Ntuthela, Siphamandla Khoza le Nathaniel Mbele.
9.2. Molaokakanywa wa Ditokelo wo o ukangwego ka gare ga Molaotheo wa Afrika Borwa wa 1996 o ipiletša go rena gore re hlomphe ditokelo tša maloko ka moka a setšhaba ka ntle le mokgwa wa go ba kgethologanya. Bosenyi bjo šoro bjo le ditiro tša kgobošo ga di na fao di beilwego gona ka temokrasing ya rena, gomme di swanetše go kgalengwa ka bogale ka fao go kgonagalago ke rena ka moka.
9.3. Kabinete e ipileditše go motho mang goba mang yo a ka thušago ka go golega le go sekiša ga badirabosenyi ba ditiro tše go ikgokaganya le maphodisa ka go diriša nomoro ya mogala wa go se lefelwe ya 10111 goba re etele seteše sa maphodisa sa kgauswi le rena.
10. Bolwetši bja Dikolobe bja Afrika (ASF) le Mokhwehlane wa Avian
10.1. Kabinete e lemogile go hlaga ga ASF ka polaseng ya Potchefstroom ka Leboa Bodikela gammogo le Mokhwehlane wa Avian (mokhwehlane wa dikgogo) ka polaseng ya kgwebo ya Ranteng Bohlabela ka Gauteng.
10.2. Kgoro ya Temo, Peakanyoleswa ya Naga le Tlhabollo ya Dinagamagae le bakgathatema ba bangwe ba maleba di tšeere magato ka pela a go hloma magato a tšhireletšo le go phethagatša magato a go beela dikgogo tšeo thoko.
10.3. ASF ke bolwetši bja go fetela bjo bo fetelago fela dikolobe tša go ruiwa ka gae le tša nageng. Mokhwehlane wa Avian o fetela dikgogo ebile ga bo fetetšwe go batho.
11. Maitapišo a go tima mollo
11.1. Kabinete e retile matsapa ao a tšerwego ke bašomi ba phološo le bašomi ba ditimamollo bao ba šomilego ka bogale dinako ka moka go laola mello ya ka Motsekapa le ka Sepetleleng sa Dinyakišišo sa Charlotte Maxeke ka Johannesburg ka go latelana.
11.2. Mello ya ka Motsekapa e sentše meago ye bohlokwa ya kgale mola mollo wa ka Sepetleleng sa Dinyakišišo sa Charlotte Maxeke o dirile gore go fetišetšwe balwetši ba go feta ba 400 go ya ka dipetleleng tše dingwe. Kabinete e lakaleditše bao ba gobetšego go fola ka pela. Dinyakišišo tša go nyaka go tseba seo se bakilego mello ye di šetše di thomile.
12. Thulano ya ka Mozambique
12.1. Kabinete e amogetše matsapa a ao a tšerwego ke Mokgatlo wa Dinaga tše di Hlabologago tša ka Borwa bja Afrika (SADC) go tliša khutšo le tšhireletšo tša go ya go ile, gotee le poelano le tlhabollo, ka Repabliking ya Mozambique.
12.2. Seboka sa Moswananoši sa Dihlogo tša Dinaga le Mebušo ya SADC se swerwe ka Labone la, 8 Moranang 2021 ka Maputo se laetše gore go be le thomelo ya bašomi ba sethekniki ka Mozambique go šogana le bothata bjo.
12.3. Kabinete e kgotsofaditšwe gape gore badudi ba Afrika Borwa bao ba lego ka Mozambique ba filwe thušo ya botseta ka go diriša Lekala la Taelo ya Botseta la go šoma diiri tše 24 la Kgoro ya Dikamano tša Boditšhabatšhaba le Tirišano. Badudi ba Afrika Borwa ba mmalwa ba boile ka mo nageng mola ba bangwe ba išitšwe mafelong ao a bolokegilego ka Mozambique.
13. Polao ye šoro ya barwarre ba Coka
13.1. Kabinete e kgalemile polao ye šoro ye e sa tšwago go hlaga ya barwarre ba babedi, e lego Zenzele le Amos Coka, ka polaseng ya ka Mpumalanga. Barwarre ba ba bile karolo ya sehlopha sa badudi ba ka polaseng bao ba bego ba nyaka mešomo bjalo ka bašomi ba lebakanyana.
13.2. Kabinete e retile maphodisa ao a arabetšego tiragalo ye ka pela ba golega badirabosenyi bao ba šetšego ba tšweletše ka Kgorotshekong ya Maseterata ya Piet Retief.
13.3. Kabinete e ipileditše go setšhaba go iša moya fase go dumelela toka go phethagala le go netefatša gore bao ba bonwago molato ba lebana le maatla ka botlalo a letsogo la molao.
14. Tharollo ya ditiro tša badiraditšhupetšo ka Motsekapa
14.1 Tona ya Kgoro ya Merero ya Selegae, Ngaka Aaron Motsoaledi, o sedimošitše Kabinete ka ga kgatelopele yeo e dirilwego ke Mokhomišenaremogolo wa Bafaladi wa Mokgatlo wa Dinagakopano (UNHCR) go rarolla bothata bja mabapi le badiraditšhupetšo ka Motsekapa, bao bontši e lego badudi ba Democratic Republic of Congo (DRC).
14.2 Badiraditšhupetšo ba ba filwe madulo a lebakanyana ka Paint City le ka Wingfield ka Motsekapa ka fase ga melawana ya Masetlapelo a Seemo sa Bosetšhaba sa COVID-19.
14.3 UNHCR e ikgafile go thuša badiraditšhupetšo ka moka go dula gape ka ditšhabeng tša ka Motsekapa le tikologo. Mokgatlo wa tša Bofaladi wa Boditšhabatšhaba (IOM) le ona o file bao ba nyakago go boela nageng ya bona dithekethe tša sefofane. Kabinete e amogela mpho ye ya kabelano le ye e kwagalago, gomme e ipiletša go badiraditšhupetšo go e amogela.
B. Dipheto tša Kabinete
1. Sengwalwa sa Ditherišano ka ga Manyalo
1.1. Kabinete e dumeletše go phatlalatšwa ga Sengwalwa sa Ditherišano ka ga Manyalo gore setšhaba se fe ditshwaotshwao ka ga sona. Sengwalwa se sa Ditherišano se nyaka go šoma gore go ngwalwe Molaokakanywa wa Lenyalo le Tee. Se beakanya gape seemo sa manyalo gore se sepelelane le molaotshepetšo wa molaotheo wa tekatekano.
1.2. Sengwalwa se se dira ditšhišinyo ka ga manyalo a batho ba ka maemong ka moka a tša bong, sedumedi le ditšo. Se šišinya gape go tloša ka botlalo manyalo a bana ka seemong sa rena sa manyalo sa ka moso.
2. Leano la Tsošološo ya Lekala la Boeti
2.1. Kabinete e dumeletše Leano la Tsošološo ya Lekala la Boeti. Leano le le emetše phetolommogo ya lekala la mmušo le la boeti go tshenyo ye e bakilwego ke leuba la COVID-19. Sethalwa sa leano le se lokolotšwe gore setšhaba se fe ditshwaotshwao ka ga sona ka Phato 2020.
2.2. Leano le le šišinya magato ao a logetšwego maano a šupa, ao a akaretšago go hlohleletša nyakego ya ka nageng; go tsebagatša semmušo mananeo a dipeeletšo le a go kgopela methopo; le kopanyo ya boeti bja ka seleteng se.
2.3. Magato ao a šišintšwego le ona a sepelelana le ERRP ya ka mo nageng. Ke go lota mešomo le go iphediša ga batho, le go hloma dibaka tša mešomo. Leano le gape le tla maatlafatša magato a phetošo ka lekaleng le le go hlohleletša go thwalwa ga basadi mešomong, bafsa le bagolofadi ka mo lekaleng le.
2.4. Tona Mamoloko Kubayi-Ngubane o tsebišitše Leano le la Tsošološo ya Boeti gotee le ba Intasteri ya boeti pejaneng mesong ya lehono.
3. Pego ka ga Go šoma ga Lenaneo la Putseletšo ya Metšhelo go Dinyakišišo le Tlhabollo (R&D)
3.1. Kabinete e dumeletše go romelwa ga Pego ya Go šoma ga Lenaneo la Putseletšo ya Metšhelo go R&D la 2018/19 ka Palamenteng ka ge go nyakwa ke Karolo ya 11 D ya Molao wa Motšhelo wa Letseno wa 1962 (Molao wa bo 58 wa 1962).
3.2. Lenaneo la putseletšo ya motšhelo le tsebagaditšwe ka nepo ya go thuša naga ye gore e fihlelele nepišo ya 1% ya palomoka ya letseno la ka nageng go tshenyegelo ya R&D ka ngwaga wa 2024. Pego ye e tla hwetšwa ke setšhaba ka morago ga ge e sepedišitšwe ka tshepedišo ya palamente.
4. Setlamo sa Sekhwama sa Tefelo ya Tlhokego ya Diphošo
4.1. Kabinete e dumeletše go hlongwa ga Sekhwama sa Tefelo sa Tlhokego ya Diphošo. Go hlongwa ga sekhwama se go sepelelana le ditumelelano tša konteraka yeo e tsenetšwego le dikhamphani tša dihlare tšeo di tlago abela Afrika Borwa ka meento ya COVID-19.
4.2. Sekhwama gape se bohlokwa go šireletša maAfrika Borwa bao ba ka angwago ke malwetšana a ka morago ga go hlabelwa ka moento gore ba kgone go hwetša thekgo le kalafo ye kaone.
4.3. Sekhwama se se tla hlongwa ka go dira diphetošo go Karolo ya 27 ya Molao wa Taolo ya Masetlapelo wa 2002 (Molao wa bo 57 wa 2002). Modulasetulo wa sona e tla ba Moahlodi.
5. Pego ka ga Phanele ya Maemo a Godimo (HLP) ka ga Taolo ya Diphoofolo tša Naga
5.1. Kabinete e dumeletše pego ya HLP ka ga Taolo ya Diphoofolo tša Naga, yeo e hlomilwego ke Tona ya Kagodithokgwa, Boreahlapi le Tikologo go lekodišiša leswa melawana, melao le ditiro ka ga ditaba tšeo di amanago le go laola, go tswadiša, go tsoma, go gweba le go hlokomela (bophelo bja tšona le go phela gabotse ga tšona) mehuta ya diphoofolo tša naga tšeo di lego kotsing ya go hwelela tša ka mo nageng ye. Tšona di akaretšwa ditlou, ditau, dinkwe le ditšhukudu.
5.2. Kantoro ya Tona go emetšwe go lokolla ditšhišinyo tša phanele gore di phethagatšwe le gore go dirwe ditherišano tše di hlokagalago.
C. Melaokakanywa
1. Molaokakanywaphetošwa wa Tshepedišo ya Bosenyi
1.1. Kabinete e dumeletše go romelwa ga Molaokakanywaphetošwa wa Tshepedišo ya Bosenyi Palamenteng. Molaokakanywaphetošwa wo o fetoša Karolo ya 154(3) ya Molao wa Tshepedišo ya Bosenyi wa 1977 (Molao wa bo 51 wa 1977), yeo kahlolo ya Kgorotsheko ya Molaotheo e hweditšego gore o palelwa ke go šireletša boitšhupo bja batšwasehlabelo ba bana ba bosenyi ka ditshepedišo tša bosenyi.
1.2. Temana ya bjale e šireletša boitšhupo bja basenyi ba bana, batšwasehlabelo le dihlatse kgahlanong le diabe tšeo di ka ba kwešago bohloko tša go phatlalatšwa ga go kgatha tema ga bona ka ditshepedišong tša bosenyi go fihla ka mengwaga ye 18.
1.3. Diphetošo tše di šišintšwego di iletša go phatlalatšwa ga Tshedimošo, yeo e utollago goba e ka utollago boitšhupo bja motho yo a pharwago ka molato goba bja hlatse yo e lego goba e bego e le ka fase ga mengwaga ye 18 ka nakong ya molato wo go bolelwago ka ona. Go phatlalatša ga boitšhupo go ka dirwa fela ka morago ga ge go dumeletšwe ke mohlankedi wa tirelo ya molao goba moahlodi yo a swerego molato.
D. Ditiragalo tše di tlago
1. Kgwedi ya Tolokogo le Letšatši la Tokologo
1.1. Kgwedi ye ya Tokologo e ketekwa ka fase ga morero wa: “Ngwaga wa Charlotte Maxeke: Tlhalošo ya Tokologo ka fase ga COVID-19”.
1.2. Kabinete e ipiletša go yo mongwe le yo mongwe go šomiša meketeko ya Kgwedi ye ya Tokologo le ya Letšatši la Tokologo go tšwela pele go lwantšha baerase ye mola ka go le lengwe ba lwela go akaretšwa ka bophara le go dirišana bjalo ka setšhaba.
1.3. Ka moka ga rena re na le maikarabelo a go šomiša temokrasi ya rena le tokologo go šoma mmogo le go kopana mabapi le lenaneo la rena la go aga Afrika Borwa ye e kopanego le ye e atlegilego.
1.4. Meketeko ya ngwaga wo e tla diriša mokgwa wo o fapanego wa go keteka fao e lego gore moketeko wa bosetšhaba o tla swarwa ka Foreisetata.
2. Letšatši la Puku la Bosetšhaba
2.1. Letšatši la Puku la Bosetšhaba, leo gape le tsebjago bjalo ka Letšatši la Boditšhabatšhaba la Puku, le ketekwa gwaga o mongwe le o mongwe ka la 23 Moranang. Letšatši le le šomišwa go hlohleletša batho go amogela dipuku le go thuša go hloma setlwaedi se sekaone sa go bala.
2.2. Kabinete e ipiletša go maAfrika Borwa go thekga setlwaedi sa go bala le gore ba se amogele ka go mekgwa ya bona ya go phela ya ka mehla. Go bala ke bokgoni bjo bohlokwa fao e lego gore go ithuta ka moka go agwa gona ebile go hloma sebaka sa go fihlelela dibaka tša mešomo.
E. Melaetša
1. Mahloko
Kabinete e lebišitše mahloko go ba lapa le bagwera ba:
• Ngaka Sindisiwe van Zyl (45), ngaka ye e bego e ratwa kudu le mogoeletši wa seyalemoya sa Kaya FM yo a kgomilego maphelo a batho ba bantši le go tsenya letsogo kudu go maphelo le go phela gabotse ga setšhaba.
• Vukosi Ringani, Nhlaluko Maluleke, Freedom Rihlamfu, Aubrey Chauke, Temba Nyambi, le Thomy Masipenda bao e lego baithuiti ba tshela go tšwa ka Sekolong seo se Phagamego sa Jim Chavani ka seleteng sa Vhembe, ka Limpopo bao ba hlokofetšego ge bene yeo ba bego ba sepela ka yona e thula ntlo.
• Mohlomphegimogolo Morwa wa Kgoši Philip, e lego Duke of Edinburgh (100) ka UK
• Morena Bhekizizwe Vusimuzi Mpila (43), yo e bego e le mokgonyana wa Motlatšamopresidente David Mabuza.
• Mopresidente Idriss Déby Itno (69) wa Repabliki ya Chad. Kabinete e kgalema dikgaruru tšeo di fetilego ka maphelo a mantši, go akaretšwa le bophelo bja Mopresidente Déby, yo a hlokofetšego ka lebaka la dikgobalo tšeo a di hweditšego ka nako yeo a bego a etile pele mašole ao a bego a elwa le marabele.
F. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
1. Lekgotla la Balaodi la Sekhwama sa Inšorentshe ya bao ba Lahlegetšwego ke Mošomo:
(i) Morena Zola Luswazi (Modulasetulo);
(ii) Morena Edward Malometje Thobejane;
(iii) Mohumagadi Martle Keyter;
(iv) Morena Donald Khumalo;
(v) Mohumagadi Louressé Specht;
(vi) Mohumagadi Vuyiswa Miya;
(vii) Morena Thembinkosi Josopu;
(viii) Mohumagadi Thandiwe Mfulo;
(ix) Ngaka Hamilton Daluxolo Ntsinde;
(x) Morena Takalani Musekwa;
(xi) Mohumagadi Brenda Sibeko; and
(xii) Mohumagadi Ogalaletseng Gaarekwe.
2. Katološo ya nako ya mošomo ya Lekgotla la Balaodi la Boeti la Afrika Borwa:
(i) Morena Siyabonga Dube (Modulasetulo);
(ii) Mohumagadi Mojankunyana Gumbi;
(iii) Morena Aloysius Ikalafeng;
(iv) Morena Enver Duminy;
(v) Mohumagadi Michelle Constant;
(vi) Morena Ravi Nadasen;
(vii) Mohumagadi Kathleen Elizabeth Rivett-Carnac;
(viii) Mohumagadi Lindiwe Sangweni-Siddo;
(ix) Morena Mduduzi Zakwe;
(x) Mohumagadi Zola Baba Tshefu;
(xi) Mohumagadi Gloria Serobe; and
(xii) Mohumagadi Nomzamo Bhengu.
3. Lekgotla la Balaodi la Bolaodi bja Nyutleleara bja Bosetšhaba:
(i) Mohumagadi Vuyiswa Miya;
(ii) Morena Allan Taylor;
(iii) Morena Peter Becker; and
(iv) Mohumagadi Khangela Baloyi.
4. Maloko a Lekgotla la Balaodi la Difilimi le Diphatlalatšo:
(i) Mohumagadi Zamantungwa Mkosi (Modulasetulo);
(ii) Ngaka Siyasanga Mhlangabezi Tyali;
(iii) Mohumagadi Lungelo Nxele;
(iv) Mohumagadi Agalutchmi Pillay;
(v) Morena Phosa Mashangoane;
(vi) Mohumagadi Gloria Zanele Nkosi;
(vii) Mohumagadi Mpho Sedibe;
(viii) Ngaka Andile Nontso; and
(ix) Moatbokheiti Lufuno Tokyo Nevondwe.
5. Lekgotla la Dithrasti tša Thraste ya Tlhabollo ye e Ikemego:
(i) Mohumagadi Tebogo Magogodi Malaka;
(ii) Morena Krishen Sukdev;
(iii) Mohumagadi Lerato Kumalo;
(iv) Mohumagadi Karabo Siyila;
(v) Mohumagadi Nthabiseng Mkhwanazi;
(vi) Moprofesara Raymond Nkado;
(vii) Morena Mpilo Sakile Mbambisa;
(viii) Mohumagadi Zimbini Hill;
(ix) Morena Tim Sukazi; and
(x) Ngaka Michael Sutcliffe.
6. Moromiwamogolo le Moromiwa wa Tšhielano ba Khomišene ya Meetse a Magologolo a Lesotho:
(i) Morena Teboho Nkhahle; le
(ii) Ngaka Musa Furumele.
7.Mohumagadi Thembelihle Mbatha bjalo ka Mohlankedimogolo wa Ditšhelete (CFO) wa Tirelo ya Maditsela wa Setlamo sa Setšhaba ka Kgorong ya Madulo a Batho, Meetse le Kelelatšhila.
8.Mohumagadi Nonhlanhla Nyewula bjalo ka CFO ya SENTECH.
9.Morena Shonisani Mathews Munzhedzi bjalo ka Mohlankedimogolophethiši wa Sehlongwa sa Bosetšhaba sa Diphedi tša Mehutahuta sa Afrika Borwa.
10.Mohumagadi Nondumiso Mandisa Tshikwatamba bjalo ka Motlatšamolaodipharephare (DDG): Ditirelo tša Kgoro ka Kgorong ya Dipapadi, Bokgabo le Setšo.
11.Mohumagadi Constance Moitse bjalo ka DDG: Twantšho ya Bomenetša le Direlo tša Tšhireletšo ka Kgorong ya Merero ya Selegae.
12.Ngaka Nicholas Gilmour Crisp bjalo ka DDG: Inšorensthe ya Maphelo ya Bosetšhaba ka Kgorong ya Maphelo.
13.Morena Allan Golden Zimbwa bjalo ka DDG: Thekgo ya Sethekniki ka Setheong sa Thekgo ya Mananeokgoparara a Mebasepala.
14. Morena Lindokuhle Cedric Mkhumane bjalo ka Molaodipharephare ka Kgorong ya Tlhabollo ya Dikgwebopotlana.
Dipotšišo: Mohumagadi Phumla Williams – Seboleledi sa Kabinete
Mogala: 083 501 0139
