1. Leanophološo la Kgwebo ya Tirelo ya Difofane ya Afrika Borwa (SAA)
1.1 Kabinete e amogetše pego ya kgatelopele ka ga tshepedišo ya leanophološo la kgwebo ya SAA go tšwa go Komiti ya go Bopša ke Ditona (IMC) ka ga SAA, yeo modulasetulo wa yona e bego e le Tona ya Dikgwebo tša Mmušo Pravin Gordhan.
1.2 Kabinete e sa gatelela gore tumelo ye kaone go tšwa go bakolotiši go feleletša tshepedišo ya phološo ya kgwebo e sa le kgetho yeo e ka dirišwago kudu le ye e kgonagalago, gore tirelo ya difofane ya bosetšhaba e beakanye leswa merero ya yona go akaretšwa le kgwebo ya yona, dikoloto tša yona le maikarabelo a mangwe. Kabinete e dumela gore tirelo ya difofane ye e beakantšwego leswa e tla phethagatša lenaneo ya diphetogo go swana le go tšwetša pele bafofiši ba bathobaso bao ba hlokago menyetla ka morago ga mengwaga ye 26 re le ka temokrasing ya rena.
1.3 E thekga tšhišinyo ya gore go hlangwe tirelo ye mpsha ya difofane le maitekelo ao a tseneletšego a go kgopela mašeleng go tšwa go methopo ye e fapafapanego, go akaretšwa go tšwa go balekane ba dišere gore ba tle lba sepediše tirelo ye mpsha ya difofane. Ye ke yona tsela e nnoši ye e ka kgonagalago yeo ka yona tirelo ye mpsha ye e kgonagalago, ya go kgona go šoma go ya go ile, ya go ba le bokgoni yeo e ka kgonago go aba ditirelo tša difofane tšeo di kopantšwego tša ka mo nageng, tša ka seleteng se le tša boditšhabatšhaba.
2. Ekonomi
2.1 Kabinete e amogela ditekanyetšo tšeo di beakantšwego leswa tša tlaleletšo tša ngwaga wa ditšhelete wa 2020/21 tšeo di abilwego ke Tona ya Ditšhelete Tito Mboweni ka Laboraro la 24 Phupu 2020. Ditekanyetšo tše di abilwe ka lebaka la ge go na le leuba la Bolwetši bja Coronavirus (COVID-19) leo le bakilego gore ekonomi e phuhlame. Ditekanyetšo tša Tlaleletšo di hlaloša leano la go bušetša sekeng sekoloto ka go kaonafatša mekgwa ya rena ya go šomiša tšhelete le go hloma motheo wa tsošološo ya ekonomi.
2.2 Kabinete e na le kholofelo ya gore boikgafo bjo bo tsebišitšwego ke Tona Mboweni bo tla bea ekonomi seemong seo se tiilego sa go ya go ile, kudukudu ge e le gore yo mongwe le yo mongwe o thekga mmušo go phethagatša boikgafo bjo.
3. Tshedimošo ya moragorago ka ga COVID-19
3.1 Kabinete e amogetše pego ya kgatelopele go tšwa go Lekgotla la Bosetšhaba la Taolo ka ga Coronavirus. Bjalo ka karolo ya go arabela kotsi ye e oketšegilego ye e sepelelanago le Legato la Boraro la go tswalela naga, diphetošo go melawana ya mabapi le Molao wa Taolo ya Masetlapelo wa 2002 (Molao wa 57 wa 2002) di ile tša hlagišwa.
3.2 Le ge Kabinete e lebogile mošomo o mogolo wo o sa dirwago go tliša tekatekano magareng ga go tšwetša pele go iphediša ga batho le go phološa maphelo, e dumeletše go ngwalwa ga diphetošo tše di amanago le go bulwa ga diresturente, dihotele le dikhasino ka gare ga kuranta ya mmušo.
3.3 Kabnete e tiišeletša boipiletšo go rena ka moka go šoma mmogo go thibela go phatlalatšwa ga diphetetšo ka ditšhabeng tša rena ka go obamela ditshepedišo tša maphelo tša go swana le go hlapa diatla, go tlogela sekgoba magareng ga batho le go apara maseke ge re le bathong.
4. Dikgaruru tša Bong (GBV)
4.1 Kabinete e tshwenyegile kudu ka ga go hlatloga ga ditiragalo tša GBV go ralala le naga. Ka morago ga ditiragalo tše ntši tša go bolawa ga basadi le bana, e ipileditše go batho ka moka ka Afrika Borwa go kopana le go šoma mmogo go emiša bošoro bjo. Kabinete e reta ditheo tša phethagatšo ya molao ka ga mošomo wa ka pela wa go golega ba bangwe ba bagononelwa gomme e ipileditše go ditheo tše go tšwela pele go šoma ka maatla go golega batho ka moka bao ba amegago ka mo dipolaong tše šoro tše.
4.2 Kabinete ga e tekateke ka boikgafong bja yona bja go tsenya tirišong ka botlalo mehutahuta ya ditsenogare tšeo di hlamilwego go tšwa go Leano la Togamaano la Bosetšhaba ka ga GBV le Polao ya basadi. Komiti ya go Bopša ke Ditona ye e etilwego pele ke Tona ya Basadi, Bafsa le Bagolofadi ka Kantorong ya Mopresidente Mohumagadi Maite Nkoana-Mashabane, e tšwela pele go phethagatša ditsenogare tša mmušo tša mafapha a mantši. Le ge go le bjale, ditsenogare tše di šomago gabotse kudu di nyaka gore maAfrika Borwa ka moka a raloke karolo ya bona go fediša setlwaedi sa dikgaruru kgahlanong le maloko a setšhaba ao a lego kotsing kudu.
5. Seboka sa Tlhabollo ya go ya Go ile ya Mananeokgoparara sa Afrika Borwa (SIDSSA)
5.1 Kabinete e amogela go swarwa la mathomo ga SIDSSA yeo e swerwego ka inthanete mo bekeng ye ka fase ga morero wa: “Re beeletša go mananeokgoparara gore re atlege mmogo: mo lebakeng le, nakong ye e tlago le go feta”.
SIDSSA ke sefala seo se kopanyago mmogo bakgathatema ba bohlokwa ka lekaleng la dipeeletšo, bao ba hlohleletšwago mabapi le nepo ye bohlokwa ya go akgofiša leano la tsošološo ya ekonomi leo le etilwego pele ke mananeokgoparara. Tsenogare ya mananeokgoparara e tšwela pele go ba seo se hlohleletšago lenaneo la tsošološo ya ekonomi ya Afrika Borwa.
5.2 Ka tshepedišong ye ka moka, palomoka ya diprotšeke tše 276 di šetše di sekasekilwe. Tšona di bopa diprotšeke tše bohlokwa tša peeletšo ya mananeokgoparara tšeo di kgonago go oketšega go hloma dibaka tša mošomo le go thuša ekonomi.
5.3 Tše masomeseswai-seswai tša diprotšeke tše di loketše dipeeeltšo gomme di akaretšwa diintasteri tšeo di nago le laetditšego gore di kgona go oketšega kudu ka go mananeokgoparara a enetši; a meetse; a dinamelwa; a theknolotši ya tshedimošo le dikgokagano; a madulo a batho; a temo le go šoma ditšweletšwa tša temo.
5.4 Diprotšeke tše di tla thušwa ka mašeleng go tšwa go a mangwe a makala a mararo e lego – la dikgwebo, leo le kopanyago ditšhelete le kabo ya mašeleng. Bjalo ka karolo ya leano la tsošološo ya ekonomi, moya wa ka mo nageng wa tirišano magareng ga mmušo le lekala la phraebete o tšwela pele go lebelela kudu go rarolla go se lekalekane ga mafelo, go fetoša ekonomi le go hloma mešomo ye e hlokagalago kudu.
Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
1. Maloko a Lekgotlataolo leo le Ikemego la Balekodi ba Dipuku tša Ditšhelete:
1.1. Mohumagadi Martie Janse van Rensburg (O thwetšwe leswa);
1.2. Morena Iqbal Motala (O thwetšwe leswa);
1.3. Morena Madoda Petros (O thwetšwe leswa);
1.4. Mohumagadi Nombulelo Gumata;
1.5. Mohumagadi Thembeka Semane;
1.6. Morena Roy Andersen;
1.7. Morena Preston Speckmann;
1.8. Mohumagadi Jesmane Boggenpoels;
1.9. Morena Shauket Fakie; le
1.10 Moprofesara Nirupa Padia.
2. Maloko a lekgotlataolo la Mokgatlo wa Inšorentshe ya Dikotsi tše di Kgethegilego wa Afrika Borwa:
2.1. Morena Moss Ngoasheng (Modulasetulo);
2.2. Mohumagadi Priscilla Mokonyane (Motlatšamodulasetulo);
2.3. Mohumagadi Moipone Ramoipone;
2.4. Morena Desmond Marumo;
2.5. Mohumagadi Japhtaline Mantuka Maisela;
2.6. Morena Christiaan Johannes van Dyk;
2.7. Morena Enos Ngutshane;
2.8. Morena Reginald Haman;
2.9. Morena Sathie Gounden;
2.10. Mohumagadi Margret Mosibudi Phiri;
2.11. Mohumagadi Refilwe Moletsane; le
2.12. Mohumagadi Nolwandile Mgoqi-Mbalo.
Dipotšišo: Mohumagadi Phumla Williams – Seboleledi sa Kabinete
Mogala: 083 501 0139
