MaAfrika Borwa a gešo ao a rategago,
Ke rata go boledišana le lena mantšiboeng a lehono ka ga seemo sa bjale sa leuba la coronavirus ka Afrika Borwa.
Pele ga ge ke dira se, ke rata go laetša tebogo ya ka go maAfrika Borwa ka moka bao ba hlomphilego matšatši a mahlano a go ba mahlokong go thoma ka la 25 go fihla ka la 29 Dibatsela go gopola bao ba lahlegetšwego ke maphelo a bona ka lebaka la COVID-19 le dikgaruru tša bong le dipolao tša basadi.
Ge re dutše re ba gopola, a re tshephišeng gore re tla dira ka fao re ka kgonago ka gona go laola mauba a a mabedi a le go phološa maphelo.
Leuba la lefase ka bophara le tšwela pele go baka masetlapelo go ralala le lefase, fao go bilego le diphetetšo tše di fetago tše 64 milione gomme le batho bao ba nyakilego go ba seripagare sa milione ba tiišeditšwe gore ba hlokofetše ka lebaka la leuba le.
Re bone dinaga tše ntši go ralala le lefase di itemogela go hlasela leswa ga coronavirus, gomme ba bangwe tlhaselo ya bobedi ya leuba le e bile ye e mpefetšego kudu go feta la mathomo ge e be e ile godimo.
Le ge e le gore Afrika Borwa ka nako ye nngwe e ile ya ba maemong a bohlano a diphetetšo lefaseng ka bophara, mo lebakeng le re theogetše fase maemong a bo 14 mo lefaseng ka ge diphetetšo ka dinageng tše dingwe di hlatlogile kudukudu.
Gomme le ge go le bjale, ka ntle le kgatelopele ye re bilego le yona, re be re šetše re tseba gore tlhaselo ya bobedi ya diphetetšo e a kgonagala ka Afrika Borwa ge re sa tšeye magato ao a hlokagalago go itšhireletša le go šireletša bao re lego kgauswi le bona.
Bjale go na le bohlatse bjo bo lego nyanyeng bja tlhaseloleswa ya diphetetšo ka dikarolong tše dingwe tša naga ya rena, tšeo, ge di ka se lwantšhwe gabotse le ka ntle le go dikadika, di ka feletšago ka mathata a magolo le mahu.
Leuba le le šetše le bile le masetlapelo a magolo ka nageng ya rena.
Palomoka ya batho ba 800 872 ba tiišeditšwe gore ba fetetšwe ke baerase ye ka Afrika Borwa go tloga ka Hlakola.
Palo ye e balelwago go 92% ya batho ba e fodile.
Go fihla lehono, batho ba 21 803 go tsebja gore ba hlokofetše ka lebaka la COVID-19 ka Afrika Borwa.
Mo matšatšing ao a nyakilego go ba a 100, go thoma gare ga Phato, re kgonne go dira gore dipalopalo tša diphetetšo tše diswa di eme felogotee, ka fase ga diphetetšo tše diswa tše 2 000 ka letšatši.
Le ge go le bjale, seo se fetogile mo dibekeng tše tharo tše di fetilego.
Go bile le tlhatlogo ye e lemogilwego ya diphetetšo tše diswa le koketšego ka go palo ya batho bao ba amogelwago ka sepetlele.
Ka bekeng ya Mathomo ya Dibatsela, re be re e ba le palogare ya diphetetšo tše diswa tše 1 500 ka letšatši.
Ka beke ya mafelelo ya Dibatsela, palo ye e nyakile go oketšega gabedi go ya go palogare ya diphetetšo tše diswa tše 2 900 ka letšatši.
Maabane, Afrika Borwa e bile le diphetetšo tše diswa tša go feta tše 4 400, e lego palo ya godimodimo ya koketšego ya diphetetšo ya letšatši le lengwe le le lengwe go tloga gare ga Phato.
Palomoka ya balwetši bao ba amogelwago sepetlele bjale e feta 5 800 nageng ka bophara ebile e a oketšega.
Dibeke tše tharo tše di fetilego balwetši bao ba amogelwago sepetlele e bile ba 4 900.
Go na le mafelo a mararo ka mo nageng ao a nago le seabe se segolo go bontši bja diphetetšo tše tše diswa.
Wona ke Nelson Mandela Bay le Selete sa Sarah Baartman ka Kapa Bohlabela le Selete sa Garden Route ka Kapa Bodikela.
Palo ya balwetši bao ba amogelwago sepetlele ka mo dileteng tše e a hlatloga, gomme ka dinakong tše dingwe e bapetšwa le ka nakong ya diphetetšo tša godimodimo tša mathomo tša leuba le.
Ka Kapa Bohlabela le ka Kapa Bodikela go bile le tlhatlogo ka go bobedi mahu ao a begilwego a go bakwa ke leuba le mahu a tlaleletšo a go bakwa ke tše dingwe.
Se se swanetše go ba tlhobaboroko go yo mongwe le yo mongwe wa rena.
Go na le mabaka a mmalwa ao a bakago go hlatloga ga diphetetšo.
Batho ba bantši ba etela go tloga profenseng go ya go ye nngwe le go eta ka profesenseng e tee ka dipalo tša godingwana, kudukudu ka ge sehla sa meletlo se batametše.
Mabapi le Garden Route, se gape se direga ka lebaka la go sepela ga bašomi bao ba tlago go šoma lebakanyana bao ba šomago ka profenseng e tee gomme ba dula ka go ye nngwe.
Dikgobokano tša leago, tša setšo le tša sedumedi di swarwa fao batho ba lego ba bantši.
Mabakeng a mantši dikgobokano tše gantši di tsenelwa ke batho ba bantši kudu go feta palo yeo e dumeletšwego ka fase ga dikiletšo tša legato la mathomo. Seo se hlobago boroko ke gore dikgobokano tše gantši di swarwa ka mafelong ao a nago le tsenyomoya ye e fokolago.
Se se direga kudu ka dipolokong tša bahu, tšeo ka morago ga tšona di latelwago ke seo se bitšwago meletlo ya “after tears”.
Dipetlele tše mmalwa ka gare ga Masepela wa Toropokgolo wa Nelson Mandela Bay di begile tlhatlogo ya go amogelwa ga balwetši bao ba bilego le dikgobalo ka lebaka la go nwa bjala
Ka ge re boletše mo nakong ye e fetilego gore balwetši bao ba amogelwago dipetlele ka lebaka la dikgobalo tše di bakilwego ke go nwa bjala ba kgoreletša go thušwa ga batho bao ba amogetšwego maokelong ka lebaka la COVID-19
Eupša go fihla mo lebakeng le selo se segolo kudu seo se bakago diphetetšo tše ke gore batho ba bantši ga ba apare dimaseke, ebile ga ba latele dikgato tša maleba tša maphelo tša go ihlwekiša le go tlogela sekgoba magareng ga bona le batho ba bangwe.
Ka ge ke boletše ka kopanong ya rena ya mafelelo ya lapa la rena, ka legatong la temošo la mathomo, re na le magato ao re a hlokago a go laola baerase ye.
Eupša bothata bja rena bjo bogolo ke gore go na le dikarolo tša naga fao batho ba sa obamelego dikeletšo tša bjale gomme magato a thibelo a motheo ga a latelwe.
Mošomo wa tšhoganetšo wo o lego pele ga rena mo lebakeng le ke go laola go hlatloga ga diphetetšo ka dileteng tšeo di amegilego ka Kapa Bohlabela le ka Kapa Bodikela, le go netefatša gore seemo sa go swana le se ga se hlage ka dikarolong tše dingwe tša naga.
Go thibela se re tsenya tirišong leano la go thibela go hlaselwa leswa ga baerase ye leo re le hlamilego le sehlopha sa tlhaselo ya baerase sa Mokgatlo wa Maphelo wa Lefase (WHO).
Re oketša ditirelo tše ka dipetleleng le ka dikliniking ka mafelong a.
Re oketša ditsenogare tša maphelo a setšhaba go swana le go dira diteko, go latišiša bao ba ka bego ba fetetšwe ke malwetši, go beela balwetši thoko le go hlaola balwetši ba dula lefelo le itšego.
Gape re oketša masolo a rena a temošo mabapi le melawana ya rena ya maphelo a setšhaba.
MaAfrika Borwa ao a rategago,
Re swanetše go fetoša maitshwaro a rena mo lebakeng le go thibela go hlasela leswa ga baerase ye le go laola ditlhaselo tša godimo tša baerase kae goba kae fao di hlagago gona.
Ge re nagana ka ga leuba le bjalo ka hlaga, re swanetše go tima mollo pele ga ge o fetoga mollo wo montši wa go se laolege.
Ka sona seo sebaka, re swanetše go dira ka fao re ka kgonago ka gona go dira gore ekonomi e dule e bulegile le go tšwela pele ka matsapa a kagoleswa le a tsošološo.
Mabapi le mokgwa wa rena wo o farologantšhitšwego wa go laola leuba le, ka fao re tla tsenya tirišong magato a tlaleletšo ka mafelong ao go utollotšwego bjalo ka ao a tletšego ka diphetetšo tša coronavirus.
Ge re utolla lefelo leo le tletšego ka diphetetšo tša baerase ye, go lebeletšwe palo ya diphetetšo tše diswa tša COVID-19 letšatši le lengwe le le lengwe, kelo ya go dira diteko ka setšhabeng, kelo ya bao ba lego phosethifi ka setšhabeng, palo ya bao ba fetetšwego ke baerase ye, palo ya go amogelwa sepetlele le palo ya mahu.
Ka morago ga tšhišinyo ye e dirilwego ke Lekgotla la Bosetšhaba la Taolo ya Coronavirus (NCCC) le ka morago ga go rerišana le Ditonakgolo, le dimeyara tša ditoropokgolo le baetapele ba setšo, Kabinete e tšere sephetho sa go goeletša gore Masepala wa Torokokgolo wa Nelson Mandela Bay ke lefelo leo le tletšego ka phetetšo ya coronavirus.
Godimo ga dikiletšo tše di lego gona tša legato la temošo la mathomo, dikiletšo tše di latelago tša tlaleletšo di tla šoma fela ka go Masepala wa Toropokgolo wa Nelson Mandela Bay go thoma bošegogare bja lehono:
- Diiri tša dinako tša kiletšo ya mesepelo bošego di tla thoma ka iri ya lesome mantšiboa go fihla ka iri ya bone mesong.
Se se ra gore – ka ntle le maemo a tšhoganetšo – ga go motho yo a swanetšego go ba ka ntle ga legae la gagwe magareng ga dinako tšeo.
Se ga se ame bašomi ba bohlokwa bao ba dumeletšwego go ba mošomong diiring tšeo.
- Thekišo ya bjala ka mabenkeleng e tla dumelelwa fela magareng ga iri ya lesome mesong le ya boselela mantšiboa go thoma ka Mošupologo go fihla ka Labone.
- Go nwa bjala ka mafelong a setšhaba, a go swana le ka mabopong a mawatle le ka diphakeng, go ileditšwe kudu. Se se a hlokagala go thibela dikgobokano tše kgolo tša setšhaba.
- Dikgobokano – go akaretšwa dikgobokano tša sedumedi – ga se tša swanela go tsenelwa ke batho ba go feta ba 100 ka meletlong ya ka gare ga meago le ba 250 ka meletlong ya ka ntle ga meago.
Ka dinakong ka moka, palomoka ya batho ka lefelong ga se ya swanela go feta seripagare sa palo ye e tlatšago lefelo leo.
- Sa mafelelo, dikgobokano ka moka tša ka morago ga dipoloko tša bahu di ileditšwe.
Magato a a tlaleletšo a a hlokagala go laola go hlasela gape ga leuba le ka Nelson Mandela Bay, go thibela diphetelo tša malwetši tše di bakwago ke dikgobokano tša setšhaba le go šireletša bokgoni bja tshepedišo ya tša maphelo ka nepo ya go aba tlhokomelo go bao ba e hlokago.
Ge re bea dikiletšo tše, re nyakile magato ao a hlokagalago kudu go phološa maphelo mola ka go le lengwe re fokotša ditšhitišo tša ekonomi.
Ka lebaka la ditherišano tše di tseneletšego le baetapele ba setšo, re dumelelane gore dikoma tša selemo ka Kapa Bohlabela di ka tšwela pele.
Se ke ka lebaka la gore baetapele ba setšo ka Kapa Bohlabela ba rometše leano leo le thibelago kotsi leo le dumeletšwego ke Kgoro ya Maphelo le Kgoro ya Pušo ya Selegae le Merero ya Setšo.
Leano le le akaretšwa go obamela ditshepedišo tša maphelo, go akaretšwa go lekodišiša bao ba welago dikoma tše, kabo ya ditlabelo tša tšhireletšo go malwetši le kabo ya meetse go thuša go itlhwekiša le go thibela go felelwa ke meetse mmeleng.
Le ge go le bjale, ka lebaka la dipalopalo tša godimo tša phetetšo ka masepaleng wa toropokgolo, ga go dikoma tšeo di tlago dumelelwa ka Nelson Mandela Bay.
Magato ao a tšewago ka Nelson Mandela Bay ga se a direlwa go otla badudi.
Ga se a ikemišetša go oketša go hlaka ga badudi ba rena.
Magato a a hlokagala go laola go phatlalala ga baerase le go phološa maphelo.
Mo matšatšing ao a tlago Tona ya Maphelo o tlo etela Selete sa Sarah Baartman le sa Garden Route go sekaseka seemo le go rerišana le bakgathatema ba mehutahuta ka profenseng yeo.
Go lebeletšwe tshekatsheko ye le go tšwelela ga bolwetši ka mafelong a, NCCC le tla bea magatotiro a maleba.
Go netefatša gore magato a bjale a thibelo ya go anama ga bolwetši bjo a tswelela go letlelelwa go ba mo tšhomišong, Seemo sa Bosetšhaba sa Masetlapelo se tla katološwa go fihla ka la 15 Pherekgong 2021 go sepelelana le Molao wa Taolo ya Masetlapelo.
Dikiletšo ka moka tša legato la mathomo di tšwela pele go šoma nageng ka bophara.
Re na le ditlabelo ka moka tšeo re di hlokago go thibela go hlasela gape ga leuba le nageng ka bophara.
Re ka kgona go dira se ge fela yo mongwe le yo mongwe a kgatha tema ya gagwe.
Re ka kgona go thibela go hlasela ga leuba la bobedi ge ka moka ga rena re ka hlompha melawana ye e beilwego go šireletša yo mongwe le yo mongwe.
Gore ka moka ga rena re bolokege, bao ba tshelago melawana ba swanetše go lebana le ditlamorago.
Re laetše bahlankedi ba phethagatšo ya molao go netefatša gore batho ba obamela molao, ka bengmešomo, basepediši le balaodi ba mafelo a mešomo, beng ba mabenkele, beng ba dihlongwa le ba meago go netefatša gore go ba le sekgoba magareng ga batho le go apara dimaseke.
Baotledi ba dithekisi le bona ba kgopelwa go netefatša gore banamedi ba bona ba apara dimaseke.
Godimo ga fao, yo mongwe le yo mongwe wa rena o tla kgopelwa go obamela dinako tša kiletšo ya mesepelo bošego.
Mmogo le magato a go laola go hlasela leswa ga leuba le ka mafelong ao a tletšego ka diphetetšo, lesolo la bosetšhaba le tšwela pele go maatlafatša ditsenogare tša maphelo a setšhaba tša go swana le tekodišišo ya malwetši setšhabeng, go dira diteko ka fao go okeditšwego, go latišiša bao ba ka bego ba fetetšwe ke baerase le kgokagano mabapi le phetogo ya maitshwaro.
Ka ge re boletše mo nakong ye e fetilego gore tšhireletšo fela ye e tiilego kgahlanong le COVID-19 e tla ba thibelamalwetši.
Mo lebakeng le go na le maitekelo a mantši mo lefaseng go akgofiša go hlangwa ga thibelamalwetši.
Re tšwela pele go dirišana le badirišani ba rena ka setšhabeng sa boditšhabatšhaba go netefatša gore dinaga ka moka di na le phihlelelo go thibelamalwetši ye e šomago gabotse le ya go se ture.
Re kgatha tema ka Senolofatšing sa Phihlelelo ya Thibelamalwetši ya COVID-19 ya Mokgatlo wa Dinagakopano – ye e tsebjago bjalo ka senolofatši sa Covax – seo se ikemišeditšego go hwetša methopo le go abelana ka kotsi ya tlhamo ya thibelamalwetši go realo e le go netefatša gore go ba le phihlelelo ye e lekanego go dithibelamalwetši ge di hwetšagala.
Re a hlohleletšwa ge Sekhwama sa Kwelobohloko se tlo dira tsenyoletsogo ya mathomo ya R327 milione ya go reka thibelamalwetši ye legatong la naga ya rena.
Re hlohleletšwa gape ke dipoelo tšeo di tshepišago go tšwa ka ditekong tše tharo tša dithibelamalwetši tšeo di sa lekwago, tšeo di laeditšego magato a go šoma gabotse a magareng ga 70% le 95%.
Re emetše tiišetšo go tšwa go bolaodi ba dihlare gore dithibelamalwetši tše di bolokegile, di šoma gabotse le gore ebile di loketše dinyakwa tša rena.
Ka Afrika Borwa, Bolaodi bja rena bja Taolo ya Ditšweletšwa tša Maphelo (SAHPRA) bo tla lekodišiša dikgopelo tša tumelelo ge di hweditšwe go tšwa go batšweletši le go dumelela go šomišwa ga tšona.
Eupša a re gopoleng gore go fihla ge thibelamalwetši e tšweleditšwe le go phatlalatšwa, re tšwela pele go ba boitšhireletšo bja rena bjo bokaone kgahlanong le COVID-19.
Ke ka ditiro tša rena tša ka mehla fao re tlago dira gore re bolokege le go boloka ba bangwe.
Ke ka go apara dimaseke ge re le setšhabeng dinakong ka moka.
Ke ka go obamela melawana ya go tlogela sekgoba magareng ga rena le batho ba bangwe le go efoga dikgobokano tšeo go nago le batho ba bantši go tšona le mafelo a ka gare ga meago fao tsenyomoya e fokolago.
Ke ka go hlapa diatla kgafetšakgafetša goba go di sanithaesa.
Re ka itšhireletša gape ka go taonelouta app ya selefoune ya Covid Alert SA yeo e ka kgonago go re tsebiša ge e le gore re kotsing ya go fetelwa ke baerase go realo e le go thuša go kgaola kgokagano ya diphetetšo.
Go tloga go hlohleletša kudu gore app ya selefoune ya Covid Alert SA mo lebakeng le e taoneloutilwe ke maAfrika Borwa a milione.
Ge e le gore go na le se sengwe seo leuba le le re rutilego sona, ke kotsi ya go itebala.
Lefaseng ka bophara, dinaga tšeo diphetetšo tša tšona di theogelago fase di fokoditše dikiletšo gomme ka moragonyana tša itemogela tlhaselo ya leuba ya bobedi yeo e mpefetšego kudu, gomme se sa di gapeletša go hloma leswa dikiletšo tša mesepelo, tša dikgobokano le tša ditiragalo tša ka ekonoming.
Ge e le gore go bile le nako ya go ba šedi kudu, ke mo lebakeng le.
Sehla sa meletlo se batametše.
Dikolo le dikolo tša thuto ya godingwana di tla tswalela e se kgale go ya maikhutšong a selemo.
Bontši bja lena le feleletša go šoma gomme e se kgale le tla be le le ka gae le ba malapa a lena.
Bontši bja lena le itokišetša go tšea maeto a go kopana leswa le bagwera le ba leloko ba lena.
Maeto a na le dikotsi tše kgolo, tšeo re ka di fokotšago ka go efoga go tšea maeto ao a sa hlokagalego.
Re ka fokotša kotsi ya phetetšo ka go apara maseke ka dinamelweng tša bohle, ka go dula re butše mafasetere a difatanaga le go tšwela pele ka magato a thibelo ge re fihla fao re yago gona.
Sehla sa selemo ka tlwaelo ke nako ya dkgobokano tša setšhaba, tša go tsenela meletlo le ditiragalo, le go dula le batho meketeng, ka dikgobokanong tša sedumedi mafelong a setšhaba le a phraebete.
Dikgobokano tše tša setšhaba di ka ba ditiragalo tša ‘phetetšo ye kgolo’ tšeo di nago le kotsi ye kgolo ya phetetšo ya baerase ye.
Yo mongwe le yo mongwe wa rena o swanetše go netefatša gore re hlokomela gore re efoge go phatlalatša baerase go ba malapa a rena, kudukudu batšofadi ba rena.
Re swanetše go dira gore dikgobokano di be tše nnyane, re di swarele ka ntle goba ka mefelong ao a tsenyago moya gabotse, re netefatše gore go ba le sekgoba magareng ga rena le batho ba bangwe re apare le maseke kudu ka fao go kgonagalago.
Re swanetše go gopola gore le ge e le gore re nyaka go iketla, baerase ye ga e khutše.
Wo e bile ngwaga o boima go rena bjalo ka naga.
O lekile bokgoni bja rena kudu le go nyaka gore yo mongwe le yo mongwe wa rena a šitelege.
Eupša le ge maikhutšo a batametše, re ka se nyefiše boitlhokomelo bja rena.
Ka ntle le ge re ka rwala maikarabelo go maphelo a rena le go maphelo a ba bangwe, batho ba bantši ba tlo fetelwa ke baerase ye. Batho ba bantši ba tlo hlokofala.
Mo dikgweding tše di fetilego tše seswai, batho ba bantši ba lahlegetšwe ke batswadi, bana ba gabo bona, balekane, bagwera le bašomimmogo ka lebaka la COVID-19.
Bjalo ka setšhaba, re lahlegetšwe ke bašomi ba bogale ba bantši bao ba šomago fao go nago le balwetši bao ba fetetšwego ke baerase ye bao ba bego ba hlokometše balwetši bao ba lego ka dipetlele le ka dikliniking.
Re lahlegetšwe ke bašomi ba ditirelo tše bohlokwa bao ba thušitšego go dira gore naga ye e tšwele pele ka nakong ya kiletšo ya mesepelo.
Re lahlegetšwe ke barutiši bao ba bego ba eya sekolong letšatši le lengwe le le lengwe go thekga bana ba rena le go netefatša gore baithuti ba rena ba marematlou ba kgona go ngwala ditlhahlobo tša bona tša mafelelong a ngwaga.
Re hlompha batho ka moka bao ba lahlegetšwego ke maphelo a bona ka masetlapelo ka lebaka la baerase ye kotsi ye gomme re se ke ra dumelela gore mathata le mahloko a a etele malapa a mangwe.
Re leboga bagwera ba rena le ba leloko le bao re phelago le bona.
Re leboga naga ya rena, ka gobane go hlasela leswa ga baerase go ka ba poelomorago ye kgolo go tsošološo ya ekonomi ya rena, go matsapa a rena a go bušetša sekeng le go hloma mešomo, le go kabo ya rena ya ditirelo go batho.
Kudukudu re iteboga e le rena le ba bangwe, ka ge se se re ama ka moka.
Mantšiboeng a lehono re thekga ka kwelobohloko batho ba Masepala wa Toropokgolo wa Nelson Mandela Bay ge ba šoma go laola go phulega ga leuba le.
Ke na le tshepo ye kgolo go seo boetapele bja profense ya Kapa Bohlabela bo se dirago gomme re tla dira dilo ka moka tšeo di hlokagalago go dira gore dipalopalo tša phetetšo di theogele fase gape.
Ke ipiletša go yo mongwe le yo mongwe wa lena go gopola bao ba lahlegetšwego ke maphelo a bona le go maphelo a bohlokwa ao re sa swanetšego ke go a boloka.
Mo dikgweding tše di fetilego tše seswai, re atlegile mo go laoleng baerase ye ka go šoma mmogo.
Re lwantšhitše leuba le ka se sengwe le se sengwe seo re bego re na le sona.
Ka matsapa a rena ao a kopantšwego, re phološitše diketekete tša maphelo ao nka bego a ile a lahlega ka fao go bego go sa hlokagale.
Bjale, ge dipalo tša diphetetšo di thoma go hlatloga gape, re ka se kgone go lahla diphihlelelo tšeo re bilego le tšona.
Re ka se boele mehleng ye boima ya Phupu le Mosegamanye, fao phetešo ya baerase e bego e phatlaletše kudu gomme maphelo a ba malapa a rena le a bagwera a be a le kotsing.
Le ge e le gore re a tseba gore tlhaselo ya bobedi ya leuba le e a kgonagala, re a tseba gape gore e ka efogwa.
Ka fao mantšiboeng a lehono, ke le kgopela gore le ikgafeng leswa mo ntweng ye.
Re ka tšwela pele go thibela baerase ye go phatlalala go tšwela pele ge re ka tšea magato a maleba mo lebakeng le.
Go swana le ge re dirile mathomong a leuba le, a re beng mmogo re šomeng mmogo.
Re tla feta mo lebakeng le le boima le go swana le ge re dirile mathateng ao a fetilego.
A Modimo a Boloke Afrika Borwa a šireletše batho ba yona.
Ke a leboga.
