Pego ya Kopano ya Setlwaedi ya Kabinete ye swaretšwego Union Buildings, Pretoria ka Labohlano la 13 Manthole 2019
A. Merero ye bohlokwa seemong sa bjale
1. Eskom
1.1. Kabinete e thekga ka botlalo matsapa ka moka ao a dirilwego go netefatša kgonthišišo ya kabo ya mohlagase ka mo nageng. Mo tabeng ye, Kabinete e laetše Tona ya Dikgwebo tša Mmušo Pravin Gordhan go rerišana le Mohlankediphethišimogolwane Morena Andre de Ruyter go thoma ka mošomo pelenyana ga letšatšikgwedi leo le beilwego.
1.2. Morena de Ruyter gotee le sehlopha sa gagwe sa bolaodi ba tla thoma semeetseng go kalokana le merero ye hlobaetšago ya pušo, tlhokego ya taolo ya ditšhelete le gape go bea ka fase ga taolo mešomo ka moka ya Eskom. Se se akaretša go swaragana le tšhalelomorago ye kgolo ya tokišo ya dinamelwa tša diteišene tša yona tša mohlagase le go se šome gabotse ga mananeokgoparara ka diteišeneng tša mohlagase tša Medupi le Kusile.
1.3. Motlatšamopresidente David Mabuza o tla bitša Seboka seo se tsošološitšwego sa Mešomo ya Enetši seo se bopilwego ke Tona ya Ditšhelete Tito Mboweni; Tona ya Diminirale le Enetši Gwede Mantashe le Tona Gordhan. Sehlopha se se tla swaragana le ditlhotlo dife goba dife go lebeletšwe kabo ya rena ya mohlagse ka mo nageng.
1.4. Kabo ya mohlagase wa go šomišwa leswa e tla kgatha tema ye bohlokwa kabong ya rena ya mohlagse go tlaleletša maitekelo a Eskom.
2. Tlhakodišo ya Kgwebo ya Tirelo ya Difofane ya Afrika Borwa (SAA)
2.1. Bekeng ye fetilego SAA e beilwe ka fase ga Tlhakodišo ya Kgwebo. Kabinete e nale kholofelo ya gore magato a a tlo thuša go fetoša seemo sa tirelofofane ya bosetšhaba go ba lekalakgwebo la go tia, la go phadiša leo go ya le nako le tla hwetšago tshepo ya MaAfrika Borwa ka moka le go goketša tekatekano ya bagwebišani.
2.2. Kabinete e amogetše go thwalwa ga Setsebi sa Tlhakodišo ya Kgwebo Morena Les Matuson wa go tšwa Matuson Associates. O tla šoma mmogo le Bagwebišani ba Bathobaso bao ba tlo tsebagatšwago mo nakong ya go se fediše pelo.
2.3. SAA e tlo amogela thušo ya tlaleletšo ya ditšhelete ya go lekana R2 bilione go tšwa mmušong yeo e tla thušago go phethagatša peakanyoleswa yeo e tseneletšego ya tirelofofane. Se se nngwe gape ke gore baadimiši bao ba lego gona ba SAA ba tlo fana ka R2 bilione ya tlaleletšo.
2.4. Kabinete e na le tshepo ya gore magato a a tlo bušetša sekeng seriti sa tirelofofane le go efoga phuhlamo yeo e tla bago le ditlamorago tše mpe go banamedi, baabi le bagwebišani ba bangwe ditirelong tša diphofo, le bašomi e lego batho ba bohlokwa.
2.5. Tona Gordhan o tla begela Kabinete kgafetšakgafetša ka kgatelopele mabapi le magato a Tlhakodišo ya Kgwebo.
3. Mafula
3.1. Kabinete e lebiša mahloko a yona go bao ba lobilego bao ba ba ratago ka baka la mafula ao ba itemogetšego ona mo dikarolong tša go fapafapana tša naga.
3.2. Mmušo o gare o kgokaganya tsenogare ya Makala a mehutahuta ka go diriša Senthara ya Bosetšhaba ya Taolo ya Masetlapelo go arabela tshenyo ye kgolo yeo e hlotšwego ke mafula a.
3.3. Kabinete e amogela thekgo ya mekgatlo ya go fapafapana ka maitekelo a yona a kimollo ya ka pejana. Go tlošwa ga batho go tšwa meagong le go hudušwa ga bao ba bego ba dula diholong tša setšhaba le dikerekeng go laeditše moya wa Ubuntu (Botho). Kabinete e dira boipiletšo setšhabeng go hlwaya tsebe ge se fiwa ditemošo le dikeletšo ka ga maemo a go befa a boso.
3.4. Mafula a go kitima ka lebelo la godimo a ka tšea maphelo a batho ka gona baotledi le basepelakadinao ba hlohleletšwa go ba le šedi ye kgolo le go efoga go šomiša ditsela tšeo di tletšego ka mafula.
3.5. Badudi bao ba dulago ka fasenyana ga dinoka le matamo ba lemošwa go ba le tlhokomelo le gore ba hudugele mafelong a mangwe a go bolokega ge ba bona ditaetšo tša mathomo tša mafula. O se beye bophelo bja gago kotsing ka go rutha ka matamong le ka dinokeng nakong tša dipula tše maatla.
4. Sehla sa Maikhutšo
4.1. Kabinete e lakaletša MaAfrika Borwa ka moka Sehla sa Maikhutšo sa polokego le sa katlego. Bjalo ka MaAfrika Borwa re swanetše go tšwela pele go laetša Botho go MaAfrika Borwa a mangwe ka rena gotee le baeng ba rena ka nako ye ya lethabo.
4.2. Kabinete e dira boipiletšo go MaAfrika Borwa ka moka go latela melao ya tsela ge ba ikela mafelong a bona a maikhutšo le mo sehleng sa maikhutšo ka moka. Maikarabelo a go fokotša mahu a ditseleng ke a rena ka moka. Maitshwaro a maikarabelo ditseleng a akaretša go otlela ntle le go nwa madila, go se otlele ka lebelo la godimo, go naganela badiriši ba bangwe ba tsela, go akaretšwa le basepelakadinao. A re šomeng mmogo go phološa maphelo #LiveBeyondDezemba #Arrive Alive.
4.3. Ditiragalo tša mmušo tša Sehla sa Maikhutšo sa Polokego di šetše di thomile ka ge ba Ditirelo tša Maphodisa tša Afrika Borwa (SAPS) ba tšwele ka makatanamane ka yona nako ye ya leemaema. Badudi ba hlohleletšwa go diriša App ya sellathekeng ya go bitšwa MySAPS, e lego ya mathomothomo ya moswananoši khontinenteng ya Afrika.
4.4. App ye ye mpsha e thuša badudi go kgokagana le bahlankedi ba phethagatšo ya molao ka katlego le go loma maphodisa tsebe ntle le go tšweletša maina a bona, go ikhweletša diteišene tša maphodisa tša kgauswi le dinolofatši, le go dumelela batšwasehlabelo ba bosenyi go romela melaetša ka yona nako yeo ge ba le ka gare ga seemo sa tšhoganyetšo.
4.5. Kabinete e dira gape boipiletšo go batswadi le bahlokomedi ba bana go netefatša gore bana ga ba tlogelwe ba le noši mo nakong ye.
4.6. Kabinete e hlohleletša MaAfrika Borwa ka moka go tšea tsela ya Sho’t Left ka go etela mafelo a baeti a ka mo nageng le go thekga ditiragalo tša ka nageng. Tšhomišo ya badiriši bao ba ngwadišitšwego ba maeto goba bahlahli ba maeto go tla netefatša polokego le go kaonafatša maitemogelo a maeto. Tshedimošo ya bahlahli ba maeto bao ba ngwadišitšwego e ka humanwa diwepsaeteng tša go fapafapana tša Kantoro ya Boeti ya Profense.
5. Dipoelo tša Ditlhahlobo tša Marematlou tša 2019 (NSC)
5.1. Kabinete e leboga barutiši, baithuti le batswadi ka go šoma mmogo le mmušo go netefatša phetšo yeo e atlegilego ya Ditlhahlobo tša NSC tša 2019. Dipoelo di tla kwalakwatšwa mathapama a la 7 Pherekgong 2020 ka gona baithuti ba marematlou ba hlohleletšwa go etela wepsaete ya Kgoro ya Thuto ya Motheo (www.education.gov.za) goba ba ka ingwadiša ka SMS ka go romela dinomoro tša bona tša pasa le dinomoro tša bona tša ditlhahlobo mo go 35658 gore ba hwetše dipoelo tša bona.
B. Diphetho tša Kabinete
6. Tlhako ya Taolo ya Dibešwa tša Tlhago
6.1. Kabinete e dumeletše Tlhako ya Taolo ya Dibešwa tša Tlhago, yeo e tla kgontšhago phethagatšo ya Leano la Intasteri ya Dibešwa tša tlhago. Dibešwa tša tlhago di tsebagala maemong a boditšhabatšhaba bjalo ka tšeo di tšeago legato la dibešwa tšeo di tupišago khabone ya fase. Ba fetoša dibešwa go ba dibešwa tša setlwaedi tša diminerale go fokotša tšhilafalo ya moya go tšwa tšhomišong ya dibešwa tša dinamelwa.
6.2. Tlhako ye e fana ka magoro a mahlano ao e tlo a laolwago e lego (1) Prothokhole ya dijo. Prothokhole ye e thibela kotsi ya lenaneo la dibešwa tša tlhago tšhireletšegong ya dijo. (2) Melao ya dikobamelo tša kgapeletšo tša phetošo ya dibešwa nepo e le go hlola kgonthišišo ya nyakego ya dibešwa tša tlhago. (3) Magato a ditshenyegelo tša go lota go fetošwa ga dibešwa tša tlhago. (4) Magato a thušo ya mašeleng go dibešwa tša tlhago a thekgo ya barafi ba dibešwa tša tlhago le thekgo ya badiri ba tšona. (5) Mokgwatirišo wa go kgetha ga diprotšeke tša dibešwa tša tlhago tšeo di hlokago thušo ya mašeleng. Sengwalwa sa tlhako s ka humanwa ka wepsaete ya Kgoro ya Enetši ya: www.energy.gov.za.
7. Khansele ya Bosetšhaba ya Tšhireletšego
7.1. Kabinete e dumeletše go hlongwaleswa ga Khansele ya Bosetšhaba ya Tšhireletšego go beakanyetša tsamaišo ya mešomo ka moka ya naga ya go amana le tšhireletšego. Khansele e tla rwala maikarabelo a go dumelela Leanopeakanyo la Bosetšhaba la Tšhireletšego, ditlapele tša Bohlodi bja Bosetšhaba bja naga le Dikakanyetšoe tša Bosetšhaba tša Bohlodi.
7.2. Khansele ye e tla etwa pele ke Mopresidente mo maemong a gagwe bjalo ka Molaodimogolo wa Mabotho ao a Itlhamilego ka Dibetša le a Tšhireletšego. Maloko a mangwe a khansele e tla ba Motlatšamopresidente Mabuza; Tona ya Tšhireletšego ya Mmušo Ayanda Dlodlo; Tona ya Tšhireletšo le Bagale ba Sešole Nosiviwe Mapisa-Nqakula; Tona ya Merero ya Selegae Aaron Motsoaledi; Tona ya Toka le Ditirelo tša Tshokollo ya Bagolegwa Morena Ronald Lamola; Tona ya Maphodisa Bheki Cele; Tona ya Ditšhelete Tito Mboweni le Tona ya Pušo ya Tirišano le Merero ya Setšo Nkosazana Dlamini Zuma.
8. Sengwalwa sa Ditherišano ka Palamenteng ka gaMerero ya Selegae
8.1. Kabinete e dumeletše Sengwalwa sa Ditherišano ka Palamenteng ka ga Merero ya Selegae, gotee le leanopeakanyo la maemo a godimo le mašupatsela a go beakanya leswa Kgoro ya Merero ya Selegae bjalo ka yeo e kgontšhago kgatelopele ya ekonomi le tšhireletšego ya setšhaba.
8.2. Sengwalwa se sa Ditherišano ka Palamenteng se theilwe go motheo wa pholisi wa mmušo wa ditšithale le wa sebjalebjale wo o re batametšago kgauswi le go lemoga dinepo tša e-Government le tša e-Commerce.
9. Kabinete e dumeletše go romelwa Palamenteng ga Kwano ya Madrid ka ga Ngwadišo bja Boditšhabatšhaba bja Maswaokgwebo (1989) gore a dumelelwe.
9.1. Prothokhole ya Madrid e akaretša tšhireletšo ya maswao a kgwebo. Maswao a kgwebo ke ona a bopago temogo ya mainakgwebo le menyetla ya phadišano ya go bapatša ditšweletšwa le ditirelo ka mo nageng le maemong a boditšhabatšhaba.
9.2. Go atlega ga Prothokhole ya Madrid go tla kgontšha tšwetšopele ya Pholisi ya naga ya Thoto ya Bohlale (IP). Yona e tlo fa dikgwebo tša Afrika Borwa kudukudu dikgwebopotlana monyetla wa go diriša tshepedišo ya IP go bapatša ditšweletšwa tša bona le ditirelo maemong a boditšhabatšhaba.
10. Setheo sa Afrika Borwa sa Banamedi ba Ditimela (PRASA)
10.1. Kabinete e dumeletše go fedišwa ga Lekgotlataolo la Motšwaoswere la PRASA le go bea setheo seo ka tlase ga tsamaišo.
10.2. Afrika Borwa e hloka diporo tša go botega, tša go se ture le tša go sepela ka ntle le mathata tšeo di šomago bjalo ka motheo wa dinamelwa tša bohle go kgokaganya mehuta ya go fapafapana ya dinamelwa. Dipoelo tša moragorago tša Mohlakišipharephare wa Ditšhelete tša 2018/19 di begile gore go na le go palelwa kudu ga mmušo ka go PRASA, tlhokego ya tshepedišo ye maleba ya ditšhelete yeo e hlotšego gore PRASA e hwetše Poelo ye e sa Kgahlišego ya Bohlakiši bja Ditšhele.
10.3. Ka lebaka la se, Kabinete e dumeletše go thwalwa ga Motsamaiši, Mna Bongisizwe Mpondo, go tsamaiša merero ya setheo se lebaka la dikgwedi tše 12. Tsenogare ye e tlo thuša go bušetša sekeng phethagatšo ye kaone ya mošomo ya PRASA.
11. Khudugelo go Kgašo ya Titšithale
11.1. Kabinete e sedimošitšwe ka ga seemo sa lenaneo la Khudugelo go Kgašo ya Titšithale mabapi le polokelotshedimošo ya lepokisana la tekhouta, kabaganyo le taolo ya ditlhomo.
11.2. E lemogile tlhako ya tlhomo ya setoko sa decorder seo se beilwego ka gare ga diphaphošipolokelo tša Poskantoro ya Afrika Borwa. Kabinete e dumeletše gore go hloma ditekhouta tšeo di šaletšego, bahlomi ba ditekhouta ba tlo thwalwa maemong a mebasepala. Mokgwa wo o bušeleditšwego wa kabo o ikemišeditše go potlakiša tshepedišo ya tšhutišo o tloga go tša kgale go ya go tša titšithale le go lokollwa Sepekthramo sa Nyakego ya maemo a Godimo.
11.3. Kabinete e dumeletše go thwalwa ga Morena Newyear Niniva Ntuli bjalo ka Motsamaiši le Molaodi wa yo a Rwelego Maikarabelo wa Setheo sa Tirelo le Phihlelelo ya Bohle sa Afrika Borwa lebaka la dikgwedi tše 24.
12. Pego ya Tshekatsheko ya Mengwaga ye 25 ya Maatlafatšo ya Basadi le Tekatekano ya Bong ka Afrika Borwa: 1994-2019
12.1. Kabinete e dumeletše pego ye, yeo e tla šomago bjalo ka Pego ya Kgatelopele ya Naga go Tsebagatšo ya Beijing le Sefala sa Magato (Beijing+25) sa Ditšhabakopano (UN). Khomišene ya UN ya Seemo sa Basadi e beakanyeditše go dira anibesari ya bo25 ya Tsebagatšo ya Beijing le Sefala sa Magato ka Hlakola 2020. Afrika Borwa ke ye nngwe ya dinaga tša go saenela Tsebagatšo ya Beijing.
12.2. Pego ye e laetša kgatelopele ya palo ya magoro goya ka maatlafatšo ya basadi le maitekelo a go fediša tlhokego ya tekatekano ya bong. Le ge e le gore pego ye e kgonthišiša gore Afrika Borwa e nale le magatotharollo ao a ipheditšego a pholisi le a semolao a go arabela tša bong le go rarolla kgethollo ya bong, ditlhotlo tša go fetoša ditiragalo tša kua morago tša go se lekalekane ga banna le basadi le go rarolla ditlwaedi tšeo di sa tšwelago pele tša kgatelelo ya basadi ka banna le dikgopolo tše fošagetšego ka basadi go swana le ya gore tša etwa ke ye tshadi pele di wela ka leopeng di sa ntše di sa šaletše.
13. Leanotharollo la Bosetšhaba (NSP) la Dikgaruru tše Ikadilego ka Bong (GBV) le Polao ya Basadi (2020-2030)
13.1. Kabinete e sedimošitšwe ka ga NSP ya 2020-2030, yeo e fanago ka tlhako ya mananeo le pholisi ya makalamantši, ya maano a go hlaka go netefatša karabelo ya bosetšhaba ya GBV yeo e rulagantšwego ka mmušo le ka naga ka bophara. Kabinete e dumeletše gore mananeo ka moka ao a filwego thekgo ya ditšhelete a thulaganyo a swanetše go phethagatšwa ke dikgoro tša go fapafapana tšeo di amegago.
13.2. Le ge go le bjalo, Kabinete e file taelo ya gore mošomo wa go tsenelela o dirwe go thumeletša dipeakanyetšo tšeo di šišintšwego tša setheo mo mošomong wo. Ditona tšeo di latelago di laetšwe go dira mošomo wo go tšwela pele gomme bona ke Tona ya Tlhabollo ya Leago Lindiwe Zulu; Tona ya Toka le Tshokollo ya Bagolegwa Ronald Lamola; Tona ya Maphodisa Bheki Cele; Tona ya Basadi, Baswa le Batho ba go Phela ka Bogole Maite Nkoana-Mashabane. Tona Nkoana-Mashabane o tla kopantšha sehlopha se.
14. Ditšhišinyo tša Lekgotlakeletšo la Mopresidente ka ga Peakanyoleswa ya Naga le Temo
14.1. Ka la 24 Mosegamanye 2019, Kabinete e amogetše Pego ya Lekgotlakeletšo la Mopresidente ka ga Peakanyoleswa ya Naga le Temo leo modulasetulo wa lona e bego e le Ngaka Vuyokazi Mahlati, leo le dirilego ditšhišinyo tše 73. Ka Komiti ya ye e bopilwego ke Ditona ya Peakanyoleswa ya Naga yeo e eteletšwego pele ke Motlatšamopresidente Mabuza, dikgoro ka moka tšeo di amegago di kgopetšwe go tsinkela ditšhišinyo tša go amana le diphothefolio tša bona le go fetola ka tsela ye maleba.
14.2. Kabinete go tloga fao e ile ya dumelela le go thekga ditšhišinyo tše 60. Ke tše senyane fela tšeo di sa kago tša dumelelwa mola tše tharo di etšwe hlogo. Dikgoro tša go fapafapana di tla fana ka ditshedimošetšo ka botlalo mo ditšhišinyong tšeo di bonwego eupša di sa ka tša dumelelwa.
15. Protšeke ya Gauteng ya Kaonafatšo ya Ditsela tša lephefo (GFIP)
15.1. Kabinete e amogetše pego ya GFIP (e-tolls) ya Sehlophatšhomo seo se eteletšwego pele ke Tona Fikile Mbalula. Sephetho sa go ruma sa ditšhišinyo tša Sehlophatšhomo go ya ka fao se lego ka gare ga pego se tla dirwa Ngwageng wo Moswa.
16. Molawana wa go Kgethwa ga Baholegi le Kabaganyo ya Naga
16.1. Kabinete e dumeletše phatlalatšo ya molawana wo gore setšhaba se fe ditshwayotshwayo tša sona. Molawana wo o fana ka tshepedišo ya go botega le ya go se ute selo ya kabaganyo ya naga le go kgethwa ga baholegi.
16.2. Se bohlokwa ke gore, molawana wo o rarolla go se lekalekane ga bong kabaganyong ya naga le go hwetšagala ga naga, le tlhokego ya magato a go kgontšha badudi ba dipolasa ba go itlhakela le badudi ba dinagamagae go hwetša naga mo ditiragalong tša masetlapelo a tlhago le maemo a mangwe a tšhoganyetšo.
C. Melaokakanywa
17. Kabinete e dumeletše go phatlalatšwa ga Molaokakanywa wa 2019 wa Ditirelo tša Thekgo ya Batšwasehlabelo gore setšhaba se fe ditshwayotshwayo. Molaokakanywa wo o fana ka mokgwa wa tsenogare wo o kopantšwego wa mekgwa ye mentši go lebeletšwe dinyakwa tša batšwasehlabelo ba bosenyi le ba dikgaruru. Ka ona molaokakanywa wo mešomo le ditirelo dikgoro tše di fapafapanego tša ka Sebokeng sa Toka, Thibelo ya Bosenyi le Tšhireletšego le ka Sebokeng sa tša Leago di tla sepetšwa bokaone bjalo ka karolo ya Tshepedišo e tee. Kabinete e dumeletše gape le Pholisi ya Ditirelo tša Thekgo ya Batšwasehlabelo ya 2019.
18. Kabinete e dumeletše gape Molaokakanywa wa 2019 wa Bašomi ba Ditirelo tša Leago gore o phatlalatšwe kuranteng ya mmušo gore setšhaba se fe ditshwayotshwayo tša sona. Molaokakanywa wo o diretšwe go katološa taolo ya bašomi ba ditirelo tša leago ka go lemoga gore go na le ditsebi le maemo a thekgo mo mešomong ya ditirelo tša leago. Ge Molaokakanywa wo o šetše o fetišitšwe ka semolao, o tla phumola Molao wa bjale wa Diprofešenale tša Ditirelo tša Leago, 1978 (Molao 110 wa 1978). Kgoro ya Tlhabollo ya Leago e tla re ka moragonyana ya hlatholla melaokakanywa ye mebedi ye šišintšwego.
19. Kabinete e dumeletše go romelwa setšhabeng ga Molaokakanywa wa 2019 wa go Tšewa ga Naga gore setšhaba se fe ditshwayotshwayo. Molaokakanywa wo o maatlafaditšwe ke ditshwayotshwayo go tšwa ditherišanong tše tseneletšego le setšhaba le go tšwa ditheong tša go fapafapana. Ge e šetše e le molao, Molaokakanywa wo o tla fana ka ditshepedišo tše swanago tšeo di tlo latelwago ge go diragatšwa go tšewa ga naga. Ona o fana ka tlhako ya semolao dikgorong tša mmušo le makala a mangwe a mmušo mo didikong tše tharo tša mmušo go diriša ditshepedišo tše swanago tša go tšewa ga naga.
20. Kabinete e amogela phatlalatšo ya sethalwa sa Molaokakanywa wa Tlhabollo ya Methopo ya Petroliamo ya ka Meetseng gore setšhaba se fe ditshwayotshwayo. Molaokakanywa wo o lebeletše go hlola ikologo yeo e tlo hlohleletšago dipeeletšo ka gare ga lefapha la petroliamo ya ka meetseng. Ona o fana ka tlhahlo ka ditiragalo tša phuruphutšo le tša tšweletšo tšeo di tlo kgathago tema kgolong le phetošong ya ikonomi. Molaokakanywa wo gape o fana ka taolo ya ka thoko ya methopo ya petroliamo. O hloma Setheo sa Afrika Borwa sa Petroliamo, seo se tla dirago ditšhišinyo go Tona ya Methopo ya Diminerale le Enetši.
21. Kabinete e dumeletše phatlalatšo ya Molaokakanywaphetošwa wa Mešomo le Maatla a Tšhelete ya Mebasepala gore setšhaba se fe ditshwayotshwayo tša ona. Molaokakanywa wo o fetoša Molao wa Ditiro le Maatla a Ekonomi ya Mebasepala wa 2007, (Molao wa bo12 wa 2000). O laola maatla a mebasepala go lefiša ditefišo tša tlhabollo go ya ka dikgopelo tša tlhabollo ya naga tšeo di rometšwego mmasepaleng. Ditefišo tša tlhabollo ke tše dingwe tša didirišwa tšeo mebasepala e ka di šomišago go thekga ka ditšhelete tlhabollo ya mananeokgoparara a mmasepala. Se se kgontšha mmasepala go phethagatša maikarabelo a yona a go aba ditirelo tša mananeokgoparara tša go šoma gabotse le tšeo di hlokometšwego go utolla kgolo ya ekonomi.
22. Kabinete e dumeletše go romelwa Palamenteng ga Molaokakanywaphetošwa wa Profešene ya Bohlakiši bja Dipuku tša Ditšhelete. Molaokakanywa wo o fetoša Molao wa Profešene ya Bohlakiši wa 2005 (Molao 26 wa 2005). Molaokakanywa wo o šišinya gore Lekgotlataolo la go Ikema la Bahlakiši bja Dipuku tša Ditšhelete le fiwe maatla a go biletša motho ofe goba ofe kgorong ya tsheko kudu bao ba nago le tshedimošo yeo e ka nyakegago go ruma nyakišišo ya maitshwaromabe ka ga bahlakiši ba dipuku tša ditšhelete. Diphetošo tše tša molao di fa Tona ya Ditšhelete maatla a go bea seroto sa godimo seo se ka fiwago mohlakiši wa dipuku tša ditšhelete yo a bonwego molato morago ga ditheeletšokgalemo.
D. Ditiragalo tšeo di tlago
23. Boipiletšo bja go tsenela Difoka tša Bakgašoba Dinaga tše di Hlabologago tša Borwa bja Afrika (SADC)
23.1. Bakgašo ba Afrika Borwa ba laletšwa go romela ditsenelo tša bona tša phadišano ya 2020 ya SADC ya Difoka tša Bakgašo pele ga la 28 Dibokwane 2020. Babegaditaba bao ba ratago go tsenela phadišano ye ba ka hwetša tshedimošo ka botlalo go tšwa go www.sadc.int le www.gcis.gov.za.
E. Melaetša
24. Ditebogišo
Kabinete e lebiša ditebogišo tša yona go:
24.1. Mohumagatšana wa Afrika Borwa Zozibini Tunzi ge a filwe sefoka sa Mohumagatšana wa Lefase ka Bophara wa 2019 kua Atlanta, USA.
24.2. Restaurant Mosaic ge leina la yona le tšweletše bjalo ka resturente ya maemo a godimodimo ka Afrika Borwa Difokeng tša ngwaga ka ngwaga tša Resturente ya Lefase ya La Liste go la Paris, France.
24.3. Maphodisa maswa a go lekana 4 971 bao ba alogilego ka Labohlano la 13 Manthole 2019 go tšwa dikholetšeng tša maphodisa. Maphodisa a maswa ao a sa tšogo aloga a tla tsena Tirelo ya Maphodisa ya Afrika Borwa (SAPS) go kaonafatša polokego ya badudi.
24.4. Tonakgolo ya United Kingdom (UK) Boris Johnson le Mokgatlo wa gabo wa dipolotiki wa Conservative Party ka go thopa Dikgethokakaretšo tša 2019 tša UK ebile e emetše go maatlafatša dikamano magareng ga dinaga tše pedi nakong ya pušo ya gagwe.
24.5. Amajita (sehlopha sa Afrika Borwa sa bosetšhaba sa babapadi ba ka tlase ga mengwaga ye 20) ka papadi ya bona ye botse kudu kgahlanong le Zambia le ge se fihleletše makgaolakgang mogopong wa U20 COSAFA.
F. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba .
1. Lekgotla la Afrika Borwa la Tlhabollo ya Methopo ya Bašomi:
a. Moatbokheiti Richard Sizani (Khomišene ya Ditirelo tša Mmušo);
b. Mohumagadi Phindile Mkwanazi (Sekolotlhahlo sa Bosetšhaba sa Mmušo);
c. Mohumagadi Riefdah Ajam (Fetereišene ya Diyunione tša Afrika Borwa);
d. Morena Narius Moloto (Lekgotla la Bosetšhaba la Mekgatlo ya Bašomi);
e. Morena Bheki Ntshalintshali (Khonkrese ya Afrika Borwa ya Mekgatlo ya Bašomi);
f. Ngaka Octavia Mkhabela (O rotše modiro);
g. Ngaka Chris Nhlapo (Yunibesithi ya Theknolotši ya Cape Peninsula);
h. Ngaka Dudu Mkhize (Mokgatlo wa Bafsa ba Afrika Borwa go tša Boentšeneere);
i. Morena Sanele Mlotshwa (Mokgatlo wa Afrika Borwa wa Dihlogo tša Dikholetšhe);
j. Morena Thulani Dlamini (Lekgotla la Dinyakišišo tša mahlale le tša Intasteri);
k. Ngaka Glenda Kruss (Khansele ya Diphatišišo tša Mahlale a Batho);
l. Morena Joe Samuels (Lekgotla la Afrika Borwa la Mangwalothuto);
m. Morena Bruno Peter Nkosi Druchen (Fetereišene ya Afrika Borwa ya Difoa le Dimumu);
n. Morena Sifiso John Mtsweni (Setheo sa Bosetšhaba sa Tlhabollo ya Bafsa);
o. Ngaka Jeremia Gule (Setheo sa Taolo ya Batho);
p. Mohumagadi Busisiwe Mavuso (Boetapele bja tša Dikgwebo ka Afrika Borwa);
q. Morena Mustak Ally (Lekgotla la Diminerale la Afrika Borwa);
r. Morena Dumisani Mphafa (Lekgotla la Dikgwebo tša Bathobaso);
s. Moprofesara Sibongile Muthwa (Mokgatlo wa Diyunibesithi tša Afrika Borwa);
t. Mohumagadi Sesi Nombulelo Nxesi (Seboka sa Lefapha la Thuto le Tlhahlo);
u. Ngaka Randall Carolissen (Setlamo sa Bosetšhaba sa Thušo ya Ditšhelete tša Baithuti);
v. Mohumagadi Yvonne Pelle (Lefapha la Tšwetšopele ya Thuto le Tlhahlo);
w. Morena Christo van der Rheede (AgriSA);
x. Morena Michael Peter (Dithokgwa tša Afrika Borwa);
y. Mohumagadi Sithembiso Dlamini (Boeti bja Afrika Borwa); le
z. Morena Gerhard Hattingh (Mokgatlo wa Ditharollo tša Dikgwebo tša Botšweletši).
2. Lekgotlataolo la Sekhwama sa Dikotsi tša Ditseleng.
3. Mohumagadi Nompumelelo (Mpumi) Mpofu bjalo ka Molaodi wa Khamphani ya Difofane ya Afrika Borwa.
Dipotšišo: Mohumagadi Phumla Williams – Seboleledi sa Kabinete sa Motšwaoswere
Sellathekeng: 083 501 0139
