Kabinete e kopane ka Laboraro la 13 Dibokwane 2019 ka Tuynhuys, Motsekapa.
A. Merero ye bohlokwa seemong sa bjale
1. Polelo ya Maemo a Setšhaba (SoNA)
1.1. Kabinete e amogela SoNA ya 2019 ka Mopresidente Cyril Ramaphosa yeo e swayago mengwaga ye 25 ga e sale go eba le Kopano ya Mohlakanelwa ya Palamente ya Afrika Borwa ye mpsha ya mmušo wa temokrasi. Bontši bja maAfrika Borwa ba amogetše polelo ye ka pelo tše šweu ka ge e tšwela pele go fa batho tshepho le go e tsošološa.
1.2. Mopresidente Ramaphosa o bontšhitše kgatelopele yeo e fihleletšwego mo ngwageng wa go feta. Ge a be a tlaleletša godimo ga dikatlego tše, Mopresidente o hlatholotše tšeo di tla šetšwago ngwageng wo. Tšona di akaretša go tšwetšwapele ga magato a bonamodi a go potlakiša kgolo ya ikonomi ya go akaretša tšohle le go hlola mešomo; go kaonafatša peakanyo ya rena ya thuto le go hlabolla mabokgoni a bokamoso le go gatela pele ka twantšho ya bomenene le go gogwa ga mmušo ka nko.
1.3. Mo bekeng ye tlago, Tona ya Ditšhelete Tito Mboweni o tla hlatholla thulaganyo ya gagwe ya tša ditšhelete ge a efa Polelo ya gagwe ya Tekanyetšokabo. Ka diboutu tša ditekanyetšokabo tša dikgoro, Ditona di tla tlhatholla dithulaganyo tša bona tša ditiro tšeo di tla kgontšhago SoNA ya Mopresidente go phethagala.
1.4. Kabinete e santše e ikgafetše go hlahla naga ya rena gore e lemoge Ponelopele ya 2030 ya Leanotlhabollo la Bosetšhaba (NDP), dikgatišo tše ngwadilwego fase tša go fediša bohloki le tlhokego ya mešomo mo nageng pele ga ngwaga wa 2030.
2. Indaba ya Afrika ya tša Meepo
2.1. Afrika Borwa e atlegile ka go ba monggae wa Indaba ya bo-25 ya ngwaga ka ngwaga ya Afrika ya Meepo, e lego Kopanokgothakgothe ye kgolokgolo lefaseng ya bakgathatema ba tša meepo le batsebalegi bao ba tšeago diphetho. Ka maitekelo a go goketša dipeeletšo meepong, Indaba ya ngwaga wo e be e swaretšwe ka fase ga morero wo: ‘‘Go dira Afrika nkgwete mererong ya yona ya Tlhabollo ya Ikonomi yeo e Swarelelago”.
2.2. Kabinete e amogela kwano yeo e saenetšwego ya bakgathatema ba tša meepo. Kwano ye e tla fihla kgole mo tlhohleletšong ya dipeeletšo tša thwi go tšwa dinageng tša ka moše mafapheng a go fapafapana a intasteri ya meepo.
2.3 Mmušo, ka Thulaganyo ya Pholisi ya Magato a Intasteri ya Kgoro ya Kgwebišano le Intasteri e hlaotše kholo ya diminirale bjalo ka lefapha leo le nago le dibaka tša mabu le ditlakala tšeo babeeletši ba ka di šomišago gore di ba hole go godiša lefapha la tša meepo. Se se fana ka kgonagalo ye kgolokgolo ya go thuša go godiša ikonomi ya naga, go hlola mešomo, go tliša diphetogo le go fediša bohloki.
3. Eskom
3.1. Tona ya Dikgwebo tša Mmušo Pravin Gordan o sedimošitše Kabinete ka ga kgaotšo ya mohlagase malobanyana mo yeo e amilego go sepela ga ikonomi ka boreledi nageng ka bophara. Dikgaotšo tše tša mohlagase di bile le ditlamorago tša go se lekane le selo ka malapeng a maAfrika Borwa le ikonoming ka bophara.
3.2. Kabo ya enetši ya Afrika Borwa e santše e le tlamego ya bohlokwa gomme seemo sa bjale kua Eskom se ka hlola matšhošetši a kgwebo a magolo mo nageng, tielelong ya ditšhelete tša naga le ikonoming. Karoganyo yeo e etšwego tlhoko ya Eskom ka makalakgwebo a mararo ao a tlo Laolwago ke Mmušo ka botlalo e bago go fehlwa ga mohlagase; thomelo ya ona le kabo e ya nyakega bakeng sa tshwarelelo ya go tšea lebaka le letelele ya moabi wa mohlagase le nageng ka moka.
3.3. Ka gona go rarolla seemo se se hlagilego malobanyana mo, Mopresidente Ramaphosa o thwetše Komiti ya go Ikgetha ya Kabinete mo go Eskom yeo e eteletšwego pele ke Motlatšamopresidente ebile e bopilwe ke Tona ya Dikgwebo tša Mmušo; Tona ya Enetši; Tona ya Ditšhelete; Tona ya Dinamelwa; Tona ya Tšhireletšo ya Mmušo le Tona ya Maphodisa. Komiti ye e tla šetšana le merero ya Eskom tšatši ka tšatši le go fana ka dipego tša tšatši ka tšatši go Mopresidente gore ke magato afe ao a swanetšego go latelwa go šireletša kabo ya enetši.
3.4. Sehlopha se sa ditona se letetšwe gore se kopane le bakgathatema ka moka go thuša go bušetša sekeng boitsetsepelo kabong ya naga ya mohlagase le go rulaganya magato ao a ka latelwago goya pele mola ka go le lengwe ba netefatša gore badiriši le balefalekgetho ba itemogela ditlamorago tše nyenyane kudu tša ikonomi.
4. Maloka a go bouta
4.1. Kabinete e lebogiša maAfrika Borwa ka moka, kudukudu diketekete tša bafsa le bao ba tla bego ba bouta lekga la mathomothomo, bao ba kgathilego tema boingwadišong bja mafelelo bja mafelelo a beke ka la 26 le 27 Pherekgong 2019 pele ga ge naga ye e ka swara dikgetho tša yona tša boselela tša mmušo wa temokrasi tša bosetšhaba le tša profense ka la 8 Mopitlo 2019.
4.2. Kabinete e dira boipiletšo bakgething ka moka bao ba nago le maloka a go kgetha go diriša ditokelo tša bona ka mikarabelo ebile e dira boipiletšo go maAfrika Borwa ka moka bao gabjale ba sa kago ba ingwadiša go kgetha, go dira bjalo kua dikantorong tša Khomišene ya go Ikema ya Dikgetho (IEC) tšeo di butšwego nageng ka bophara. O ka lekodišiša gape seemo sa gago sa boingwadišo ka go romela SMS ya nomoro ya gago ya pasa go 32810 (SMS ye tee e bitša R1.00) goba o ka hloma sedirišwa sa app sa mahala sa IEC sellathekeng sa gago wa se šomiša go lekola dintlha ka moka ka ga boingwadišo bja gago.
4.3. Ga e sale go tloga mola temokrasi e kokotago, re kgonne go bopa temokrasi ya molaotheo yeo e atlegilego ya dihlongwa tša go netefatša ditokelo tša rena tša motheo le tokologo. Go feta mo, go phethagaditšwe mananeo go fetoša sebopego sa ikonomi le go rarolla ditlhotlo tša rena tše ntši tša ikonomi setšhabeng. Dikgetho tšeo di tlago ke monyetla wa thaka ye sese le bafsa ba maAfrika Borwa go phethagatša ditokelo tša bona tša go bouta, le go dira gore mantšu a bona a kwagale mo bokamosong bja bjona le bokamosong bja naga ya rena.
5. Go utollwa ga oli le gase ke khamphani ya Total
5.1. Bjalo ka karolo ya maitekelo a bosetšhaba a go godiša ikonomi le go hlola mešomo, mmušo wa naga ye, ka Lesolo la ona la Operation Phakisa la Ikonomi ya Mabopong, o kgontšhitše menyetla lefapheng la naga ye la oli le gase bakeng sa kgolo ya ikonomi le dipeeletšo. Afrika Borwa e nale methopo yeo e tshephišago kudu ya difaki tše bilione ye tee le 60 tcf (trilione ye tee ya naokubiki) goba difaki tše 11 bilione tša go lekana le gase ya kgole le lebopo.
5.2. Kabinete e retile temogo ye ya kgole le mabopo ya methopo ya gase ka khamphani ya oli ebago Total yeo e ka bago le bilione ye tee ya difaki tša methopo ye, yeo e ka hlatlošetšago kabo ya oli le ya gase godimodimo.
5.3. Temogo ye e utolotšwe ke khamphani ye morago ga go bora ba phuruphutša kgonagalo ya dirafsa kua Brulpadda molapong wa Outeniqua, bokgole bja dikhilomithara tše 175 kgole le lebopo la Afrika Borwa.
6. Kopanokgothakgothe ya bo 32 ya Kopano ya Afrika (AU)
6.1. Kabinete e lebogiša Mopresidente Ramaphosa ge a thwetšwe bjalo ka Modulasetulo wa AU go thoma ka 2020. O tla tšea marapo a setulo se go tšwa go Mopresidente wa Egepeta Abdel Fattah el-Sisi, yo gabjale a feleletšago paka ya gagwe ya ngwaga wa 2019.
6.2. Mopresidente Ramaphosa o eteletše pele baromiwa ba Afrika Borwa goya Kopanong ya setlwaedi ya bo-32 ya Kgothakgothe ya Dihlogo tša Mebušo le Mmušo wa AU, yeo e swaretšwego gola Addis Ababa, Rephabliking ya Temokrasi ya Bogare bja Ethiopia go tloga ka la 15 Pherekgong go fihla ka la 11 Dibokwane 2019, ka fase ga morero wo “Bafaladi, Bao ba boelago magae le bao ba tšhabišitšwego ka mo nageng: Ditharollo tša Lebaka le letelele tša bao ba tšhabišitšwego ka kgang mo Afrika’’. Morero wo o fane ka monyetla wa go lebeledišiša le go rarolla mabakatheo a go hlola ditšhabešo tša kgapeletšo mo Afrika.
6.3. Afrika Borwa e rometše Lengwalo la yona la go laetša Thekgo ya Kwano ya Lefelo la Kontinente ya Afrika la Kgwebišano ya hloka mellwane (AfCFTA) ka nako ya samiti. Ditaba tšeo go boletšwego ka tšona di akaretša mpshafatšo ya mafapha le thekgo ya ditšhelete ya setheo se sa kontinente; Khutšo le Tšhireletšego mo Kontinenteng; dikgatelopele tša go amana le AfCFTA; le ditherišano tša kwano ye mpsha ya lekoko magareng ga dinaga tša Afrika, tša dinaga tšeo di hlabologago tša lewatle la Carribbean le la Pacific le Kopano ya Yuropa morago ga ngwaga wa 2020.
6.4. Mo gare ga ngwaga wo, Mopresidente Ramaphosa o letetšwe gape go tšea maemo a bodulasetulo bja Komiti ya Dihlogo tša Dinaga tša Afrika le tša Mebušo mabapi le Phetogo ya Leratadima (CAHOSCC). CAHOSCC e hlomilwe ka 2009 ke Kgothakgothe ya AU ya Dihlogo tša Dinaga le tša Mebušo go eta pele Boemo bjo Swanago bja Afrika go tša Phetogo ya Leratadima le ditherišanong tša bolefase tša phetogo ya leratadima.
6.5. Nakong ya ge Mopresidente Ramaphosa a tšwelapele ka maemo a gagwe a bodulasetulo, o tla šoma mmogo le baetapele ba bangwe ba dinaga go netefatša phethagatšo yeo e atlegilego ya Kwano ya Pulamadibogo yeo e fihleletšwego kua Paris ya go fediša le go itlwaetša ditlamorago tša phetogo ya leratadima. Ka CAHOSCC, Afrika e tla kgatha tema ye bohlokwa mo maitekelong a bolefase a khabone ya maemo a fase le dikgatelopele tšeo di ka kgotlelelago phetogo ya leratadima.
7. Thuto ya Godimo
7.1. Kabinete e lebiša mahloko a yona go ba lapa le go bagwera ba moithuti wa Yunibesithi ya Mahlale ya Durban, Mlungisi Madonsela. Tšhakantšho ya dithuto le go tswalelwa ga dihlongwa tša thuto ya godimo, kudukudu gola KwaZulu-Natala, tšeo di hlotšego lehu la masetlapelo la moithuti wo, di tloga di hlobaetša kudu.
7.2. Kabinete e dira boipiletšo go bakgathatema ka moka go rarolla mathata ka moya wa khutšo. Naga ya gaborena e hloka bafsa ba go rutega gore ba kgathetema tlhabollong ya naga ya rena.
7.3. Mmušo, ka Kgoro ya Thuto ya Godimo le Tlhahlo, e thuša ditheo tša thuto ya godimo fao go nago le ditlhotlo.Tona ya Thuto ya Godimo le Tlhahlo Naledi Pandor le yena o laetše basepediši ba Setlamo sa Bosetšhaba sa Thušo ya Ditšhelete tša Thuto go Baithuti (NSFAS) go bea pele mošomo wa go araba dipotšišo ka moka tša baithuti.
8. Go bewa ka fase ga taolo ga bolwetši bja Tlhako le Molomo (FMD)
8.1. Ka gona go šireletša maphelo a naga ye, Kabinete e kgotsofaditšwe ke dikarabo le magatotharollo a go thibela go keka ya phulego ya bolwetši bja FMD kua Seleteng sa Vhembe, Limpopo. Kgoro ya Temo, Kagodithokgwa le Boruatlhapi, gotee le Mokgatlo wa Nama ye Hwebedu le bakgathatema ba bangwe, ba šoma ka thata go rarolla taba ye bjalo ka ngatana ye tee.
8.2. Go hlabelwa go thomile ka la 1 Pherekgong 2019, ka dikgomo go tšwa metsaneng yeo e amilwego gotee le dikgomo tša bokgole bja dikhilomithara tše 20 go potologa metsana yeo e amilwego. Go fihla lehono, palomoka ya dikgomo tšeo di hlabetšwego di feta 10 000; tšona di fiwa maswao gore di kgone go hlaolwa go tšwa go tše dingwe.
9. Samiti ya Difilimo ya Afrika Borwa
9.1. Intasteri ya difilimo ya Afrika Borwa e hlaotšwe kgale bjalo ka yeo e tlišago diphetogo tša kgolo ya ikonomi le tlholego ya mešomo mo Afrika Borwa. Intasteri ya boihlamelo le ya setšo, kudukudu lekala la difilimo, le kgatha tema ye bohlokwa kudu go tšwetšapele dikanegelo tša Afrika Borwa le go kgatha tema mo matsapeng a go aga setšhaba le go hlola phedišano setšhabeng.
9.2. Ka go tsamaišana le lemanoga le, Kabinete e amogela ka atla tše pedi Samiti ya difilimo ya Afrika Borwa yeo e swaretšwego gola Johannesburg go tloga ka la 4 go fihla ka la 5 Dibokwane 2019 ka fase ga morero wo: “Diphetogo le kaonafalo Intastering ya Afrika Borwa ya Difilimo/Tsebeihlo gotee le Diphetogomoka tša Diintasteri tšeo di šomišago theknolotši (4IR). Afa re ipeakanyeditše diphetogo tše?’’
9.3. Ditlamorago tša samiti ye di letetšwe gore di kgathe tema mo tlholegong ya tikologo ya go kgontšha intasteri ye go atlega. Mmušo o santše o ikgafile go thekga diprotšeke tše ka mašeleng ka Koporasi ya Tlhabollo ya Diintasteri (IDC) gotee le ka Kgoro ya Kgwebišano le Intasteri (the dti).
B. Diphetho tša Kabinete
10. Phedišano setšhabeng le kago ya setšhaba
10.1. Le ge e le gore setšhaba sa rena se fihleletše diphenyo tše kgolo ga e sale go tloga ka 1994, mapheko a maitirelo goya ka mehlobo, maemo le go fapafapana ga ditšo a tšwelapele go phaela thoko dikgatelopele tša rena. Mabapi le se, Kabinete e dumeletše Basekaseki ba Mebono ya Sepolotiki, bao ba fanago ka tlhako ya semolao le ya pholisi go thekga phedišano yeo e nabilego setšhabeng le kago ya setšhaba goya pele.
10.2. Bjalo ka ge go theilwe ka gare ga NDP, tlhako ye e tla ba khuetšo ye gagabago go fihla kgole mo phethagatšong ya dinepo tša go bopa ‘‘batho bao e lego ngata ye tee le setšhaba seo se phedišanago gabotse gomme ga se feela dinepo tša maikemišetšo a bosetšhaba; ke mekgwa ye mengwe ya go fediša bohloki’’.
10.3. Mafapha ka moka a setšhaba a hlohleletšwa go thekga tlhako ye ya pholisi ka go keteka go fapafapana ga rena goya ka ditšo le go aga setšhaba seo se ka bušetšago morago bohwa bja bokoloniale le kgethollo.
10.4. Kgoro ya Bokgabo le Setšo e tlabe e sepediša Kopanokgothakgothe ya Kwano ya Setšhaba mafelelong a kgwedi ya Hlakola 2019 gola Johannesburg fao mafapha a go fapafapana a setšhaba go akaretšwa mekgatlo yeo e lego setšhabeng, bašomi, dikgwebo, dirutegi le boramabjoko, dihlopha tša sedumedi le babegaditaba ba tla ikgafago mo protšekeng ye ya phedišano setšhabeng le kago ya setšhaba. Ditherišano le mafapha a di tla dirwa mo kgweding ya Dibokwane le gare ga kgwedi ya Hlakola 2019.
C. Melaokakanywa
11. Phetošo ya Molaokakanywa wa Bana wa 2019
11.1. Kabinete e dumeletše tlhagišo ya Phetošo ya Molaokakanywa wa Bana wa 2019 Palamenteng go maatlafatša mošomo wa setšhaba sa rena mo tšhireletšong ya ditokelo tša bana.
11.2. Ka 2017 Senthara ya Melao ya Bana e pharile le go swina Kgoro ya Tlhabollo ya Leago ka ditefo tša semolao go ya ka ditšhalelomorago tša tlhokomelo ya kgodišo ya bana.
11.3. Kgorotsheko ya Godimo e laetše Tona ya Tlhabollo ya Leago gore, gare ga tše dingwe, a beakanyetše le go tsebagatša pele ga Palamente diphetošo tše maleba Molaong wa Bana, 2005 (Molao 13 wa 2004) go fana ka tharollo ya semolao yeo e feletšego ka botlalo go rarolla ditlhotlo tša tšhalelomorago mo tlhokomelong ya kgodišo ya bana.
11.4. Bana ka moka ga bona ba swanetše go ipshina ka khumanego ya ditirelo tšeo di nepilego go nolofatša polokego ya bona, tlhokomelo le tšhireletšo; gape le peakanyo ye nago le mohola ya boiketlo maphelong a bona. Gona le ditlhaelelo tše mmalwa mo peakanyong ya bjale ya tlhokomelo ya bana le tšhireletšo ya bona. Molaokakanywa wo o šogašogana le, magareng ga tše dingwe, ditlhotlo tša go amana le kabo le tshepedišo ya tlhokomelo ya kgodišo ya bana, gotee le merero ye mengwe ya go amana le tlhokomelo le tšhireletšo ya bana.
D. Ditiragalo tšeo di tlago
12. Samiti ya Ikonomi ya Ditšithale
12.1. Magato a bolefase go lebeletšwe theknolotši a go hlohleletšwa Diphetogomoka tša 4IR a tla ka dibaka tše difsa go aga setšhaba sa gaborena le ikonomi. Gore naga ye e dule e le maemong a ka pele go dikgatelopele tše difsa tša theknolotši, e tla ba monggae wa Samiti ya Ikonomi ya Ditšithale ka Hlakola 2019.
12.2. Samiti ye e tlo swarwa ka fase ga leswao la go laetša 4IR ya Afrika Borwa (4IRSA), ebago tšhomišano magareng ga Kgoro ya Mananeokgoparara a Dikgokagano le Ditirelo tša Poso, Telkom, Yunibesithi ya Witwatersrand, Yunibesithi ya Johannesburg le Yunibesithi ya Fort Hare.
12.3. #4IRSA e nepile go rarolla ditlhotlo tšeo di lebaganego le Afrika Borwa mo Mehleng ya Ditšithale e le gona go hwetša tharollo yeo e hlakilego ya bohle ka nageng.
13. Difoka tša Babegaditaba tša 2019 tša Ditšhaba tšeo di Hlabologago tša Borwa bja Afrika (SADC)
13.1. Bjalo ka karolo ya go hlohleletša go akaretšwa ga batho ka seleteng, tšhomišano le temogo ya bokgoni bja bangwaladikanegelo tša ditaba, babegaditaba ba Afrika Borwa ba laletšwa go tsenela Phadišano ya Difoka tša Babegaditaba tša SADC tša 2019 pele ga la 28 Dibokwane 2019. Difoka tše di mo magorong a dikgatišo, seyalemoya, thelebišene le bangwaladikanegelo ba go tšea diswantšho.
E. Melaetša
Mahloko
13.2. Kabinete e bile le Mopresidente Ramaphosa le maAfrika Borwa ka moka go lebiša mahloko a yona go malapa le bagwera ba barutwana bao ba hlokagetšego morago ga gore leporogwana la maoto ka sekolong le phuhlame kua Hoërskool Driehoek gola Vanderbijlpark ka Labohlano, 1 Hlakola 2019. Kabinete e lakaletša gape barutwana ka moka bao ba gobetšego fao go fola ka lebelo.
14. Ditebogišo
14.1. Kabinete e lebogišitše bao ba latelago:
- Khwaere ya Soweto Gospel Choir ka go dira gore Afrika Borwa e ikgantšhe gape morago ga go thopa difoka tša Grammy ka baka la albamo ye kaonekaone ya mmino lefaseng. Sehlopha se se thopile ka albamo ya sona ya Freedom – renditions of well-known liberation struggle songs. Se ke sefoka sa boraro sa Grammy sa go hwetšwa ke khwaere ye.
- Panka ya Tlhabollo ya Borwa bja Afrika (DBSA) ka go thopa Sefoka sa Afrika sa Lenaneo la Enetši ye Mpshafatšwago go tšwa setheong seo se ikadilego kua London ebago Project Finance International. DBSA e hlaotšwe ka baka la thekgo ya yona ya ditšhelete yeo e gatetšego pele ya diprotšeke tše 14 tša enetši ye mpshafatšwago mo Lenaneong la naga ye la Enetši ye Mpshafatšwago ka Batšweletši ba Mohlagase ba go Ikema ka noši.
- Ba babedi ba boramahlale bao ba thopilego Difoka tša go hlomphega kudu tša AU Kwame Nkrumah ka baka la go šoma gabotse kgatišong ya merero ya Saenthefiki ya 2018 gola Addis Ababa, Ethiopia ka la 11 Dibokwane 2019:
- Moprofesara Aletta Schutte o thopile sefoka sa selete sa Ramahlale wa Mosadi sa go bitša US$20 000 bakeng sa legoro la Mahlale a Bophelo le a Lefase. Yena ke Moprofesara wa Thuto ya tša Mebele kua Yunibesithing ya Leboa Bodikela. Moprofesara Schutte o nale mangwalo a SARChI a Temogo ya Mathomong le Thibelo ya Bolwetši bja Pelo mono Afrika, diphatišišo tše di thekgwa ka mašeleng ke Kgoro ya Saense le Theknolotši (DST). Diphatišišo tša gagwe di lebeletše kudu bolwetši bja madi a magolo le ka fa obo agelago ka gona gare ga ditšhaba tša Afrika.
- Moprofesara David Mark Richardson o thopile sefoka sa kontinente sa US$100 000 legorong la Mahlale a Lefase le a Bophelo. Yena ke Moprofesara wa go hlomphega kudu wa Ekholotši Yunibesithing ya Stellenbosch, ebile gape ke Molaodi wa Senthara ya Bosetšhaba ya Metheo ya Diphatišišo ya DST ka baka go tšwa pele ga gagwe ka Thuto ya Diphedi tše Šele. Diphatišišo tša gagwe di mabapi le go kwešiša merero ya go amana le mehuta ya dimela tše šele tša go šwahlela.
- Sehlopha sa Afrika Borwa sa kgwele ya maoto sa ba mengwaga ye ka fase ga 20, Amajita, ka go khwalifaela Mogopo wa Lefase wa FIFA 2019 wa ba ka fase ga mengwaga ye 20, wo o tlo swarwago kua Poland ka Mopitlo 2019. Amajita ba ikhweleditše monyetla wo morago ga go fihlelela dikamakgaolakgang tša Mogopo wa Ditšhaba wa Liki ya Kgwele ya Maoto ya bao ba lego ka fase ga mengwaga ye 20 yeo gabjale e kgatlampanago kua Niger.
Dipotšišo:
Mohumagadi Phumla Williams – Seboleledi sa Kabinete sa Motšwaoswere
Mogala: 083 501 0139
