Ngwadiša sehlongwa sa thuto ya godingwana sa phraebete

Naa o nyaka go aba thuto ya ka morago ga marematlou (ya godingwana) ka Afrika Borwa? Sa mathomo o swanetše go ingwadiša bjalo ka sehlongwa sa thuto ya godingwana sa phraebete le Kgoro ya Thuto le Tlhahlo tša Godingwana (DHET) gore o be le maatla a semolao a go aba dithuto tša godingwana.

Dihlongwa tša thuto ya godingwana tša phraebete di aba magato a thuto (Legato la bohlano go fihla go la 10) go swana le a Tlhako ya Mangwalo a Dithuto a Bosetšhaba (NQF) (Legato la bohlano go fihla go la 10) bjalo ka diyunibesithi tša setšhaba goba diyunibesithi tša theknolotši.

Maikemišetšo a ngwadišo ye ke go netefatša gore:

• dihlongwa tša thuto tša phraebete di aba thuto ya boleng bja godimo
• setšhaba se a šireletšwa kgahlanong le beng ba dihlongwa tša thuto ba bofora le ba go šomiša batho bošaedi
• baithuti ba hwetša mangwalo a dithuto ao a sepelelanago le Tlhako ya Mangwalo a Dithuto tša Dihlongwa tša Thuto ya Godingwana (HEQF) le gore ba ngwadišwe go NQF
• lenaneo la thuto le fihlelela dinepo tša go fetoša Afrika Borwa go latela melawana le melao ya mmušo
• dihlongwa tša thuto tša phraebete di obamela Molao wa Thuto ya Godingwana, wa 1997 (Molao wa 101 wa 1997).

Dithuto tša dihlongwa tša thuto tša phraebete di swanetše go ngwadišwa le DHET, gomme di dumelelwe ke Komiti ya Boleng bja Dithuto tša Thuto ya Godingwana (HEQC) ya Lekgotla la Thuto ya Godingwana (CHE) gomme di ngwadišwe go NQF ke Bolaodi bja Mangwalo a Dithuto bja Afrika Borwa (Saqa). Dithuto tše di swanetše go tsebja nageng ka bophara le gape maemong a boditšhabatšhaba.

Bonyane dikgwedi tše 18 pele ga ge sehlongwa sa gago se nyaka go aba dithuto o swanetše go romela kgopelo ya ngwadišo go Mongwadiši wa Dihlongwa tša Thuto ya Godingwana tša Phraebete. Kgopelo ya phetošetšo e swanetše go romelwa ka letšatšikgwedi leo le beilwego ke Mongwadiši (Molaodipharephare (DG)).

Se o swanetšego go se dira

1. Tlatša fomo ya dikgopelo ye e beilwego.
2. Romela fomo ya dikgopelo go Mongwadiši wa Dihlongwa tša Thuto ya Godingwana tša Phraebete.
3. Romela dingwalwa tše di latelago le fomo ya dikgopelo:
   • ditatamente tša ditšhelete tša ngwaga le ngwaga tšeo di lekotšwego ke balekodi ba dipuku tša ditšhelete goba dikakanyetšo tša ditšhelete tšeo di lekotšwego ke balekodi ba dipuku tša ditšhelete
   • leano la kgwebo
   • tumelelano ka ga tiišetšo ya tšhireletšo sebakeng sa ge o ka hloka ditšhelete
   • dingwalwa tša ngwadišo ya khamphani
   • dipego tša tlhakišo ya khamphani tša go obamela melao ya maphelo le polokego mošomong
   • setifikeiti sa ngwadišo ya kgwebo
   • boikano bja kgopelo ya tumelelo
   • tshepišo ka ga bokgoni bja sehlongwa seo sa thuto
   • boikano ka ga tekodišišo le tshekatsheko
   • ditumelelano gareng ga dihlongwa tša thuto, ge di le gona
   • dipukwana tša mangwalo a dithuto tša sehlongwa, khalentara goba pukwana ka ga sehlongwa seo
   • difomo tša ngwadišo, dikonteraka le baithuti le melawana le melaotshepetšo.
4. Bakgopedi ba dinaga tša ka ntle ba swanetše go tliša dilo tše di latelago:
   • boikano ka ga tekatekano ya mangwalo a dithuto
   • bohlatse bja tumelelo ya mangwalo nageng yeo sehlongwa se se tšwago go yona
   • bohlatse bja tumelelo ya mangwalo a dithuto ka nageng yeo sehlongwa se se tšwago go yona
   • setifikeiti sa tumelelo go tšwa go HEQC le ngwadišo go tšwa go Saqa
   • boikano bjo bo saennwego bja gore sehlongwa seo se ka se kgetholle batho ka mokgwa ofe goba ofe
   • sebakeng sa ge go ka ba le diphetošo, dintlha tše di ngwadišitšwego tše di swanetšego go fetošwa
   • boikano ka ga tekodišišo le tshekatsheko, gammogo le tshepišo ye e lego godimo ga pampiri ye e nago le hlogwana ya dintlha tša sehlongwa sa thuto, yeo e ngwadilwego letšatšikgwedi ebile e saennwego.
5. Lefa tšhelete ye e beilwego.

Hlokomela: O kgopelwa go ikgokaganya le Mongwadiši ka ga diphetošo dife goba dife tše le nyakago go di dira ka nakong ya tshepedišo ya dikgopelo.

Go tšea lebaka le lekaakang

• Ngwadišo ya mathomo: dikgwedi tše 18 pele ga ge sehlongwa se bulela baithuti go ingwadiša.
• Go phetošo: dikgwedi tše 12 pele ga ge phetošo e phethagatšwa.
• Go phetošetšo: ka ge go beilwe ke Mongwadiši.

Go bitša bokae

R500

Difomo tše o swanelago go di tlatša

Difomo di a hwetšagala go Kgoro ya Thuto le Tlhahlo tša Godingwana:

• Kgopelo ya boingwadišo bjalo ka Sehlongwa sa Thuto ya Godingwana sa Phraebete, fomo ya APX -01
• Kgopelo ya Phetošo, fomo ya APX-02
• Kgopelo ya Phetošetšo, fomo ya APX-03

Dintlha tša boikopanyo