05 Dec 2013
1. Maemo a Kabinete ka ga merero ye e lego ditabeng ka seemong sa bjale
1.1. Kabinete e lebogišitše Kgoro ya Thuto ya Motheo, dihlogo tša dikolo, barutiši le Baithuti ka ga go ruma ka katlego ditlhahlobong tša Setifikeiti sa Bosetšhaba sa Marematlou sa 2013.
Kabinete e amogela tokollo ya Diteko tša Bosetšhaba tša Ngwaga ka Ngwaga tša 2013 lehono, 4 Manthole 2013, yeo e lego seelo se se botse seo se thušago Kgoro ya Thuto ya Motheo go ela hloko kgatelopele ya dipoelo tša go ithuta le go kaonafatša boleng bja thuto.
Kabinete e tumiša Kgoro ya Thuto ya Motheo le Khomišene ya Mopresidente ya Peakanyo ya Mananeokgoparara (PICC) ka ga kgato ye e gatetšego pele ya kabo ya dipuku tša go bala, dipukutšhomo, thoto ya ka phapošing, le go neelana ka sekolo se setee ka beke go tloga ka 22 Mosegamanye 2013, bjalo ka Lenaneo la Mananeokgoparara a Bosetšhaba.
1.2. Kabinete e amogetše thakgolo ya Moepo wa Kepo wa Stanley Nkosi wa Khamphani ya Mankanese ya Kgalagadi Hotazel, Kapa Leboa, woo e lego polante ye kgolokgolo ya tšhilo ya mankanese lefaseng. Se se bopa karolo ya sehlopha sa diprotšeke tše di sepetšwago ke PICC, ye e etilwego pele ke Mopresidente Jacob Zuma. Ka protšeke ye, Kapa Leboa e bile le letseno la go ka ba R6,5 bilione, mo mengwageng ye mene, ka mešomo ya thwii ya go balelwa go 3 000 ye e hlotšwego, le mabokgoni a a hlabollwago magareng a baswa ba ka gare ga naga.
1.3. Mopresidente Jacob Zuma o tla etapele Letšatši la Poelano ka la 16 Manthole go la Meago ya Pušo ka fase ga kgwekgwe ye e rego: “Go aga setšhaba, Kamano ya Leago le Poelano.”
Moketeko o lebane le segopotšo sa mengwaga ye 100 ya Meago ya Pušo bjalo ka tulo ya mmušo. Sehlwaseeme sa Mopresidente wa maloba Nelson Mandela, mogale tokologong le poelanong ya naga ya rena, se tla bulwa Meagong ya Pušo bjalo ka karolo ya segopotšo. Kabinete e dira boipiletšo go maAfrika Borwa go šomiša letšatši le go laetša dikgato tša go makatša tše re di tšerego bjalo ka setšhaba gore re phedišane le go šomišana.
1.4. Motlatšamopresidente Kgalema Motlanthe o tla eta pele Kopano ya Bobedi ya Boetapele bja Mmušo kua go Senthara ya Dikopano ya Boditšhabatšhaba ya CSIR, Pretoria go tloga ka la 10 go fihla ka la 12 Manthole 2013. Kopano ye e tla kopantšha balaodibagolo go tšwa maemong a mararo ka moka a mmušo, ka maikemišetšo a go kaonafatša kwešišano ka ga karolo ya Tirelo ya Setšhaba go kgotsofatša dinyakwa tša motheo tša maAfrika Borwa le go eta pele tlhabollo ya ekonomi ya rena.
1.5. Mopresidente Jacob Zuma o etelwa ke Kgoši ya Federešene ya Malaysia, Tuanku Abdul Halim Mu'adzam Shah, ka Ketelo ya Semmušo kua Meagong ya Pušo ka la 10 Manthole 2013. Ketelo ya Semmušo e tla matlafatša dikamano tša rena tša ekonomi le sepolotiki tša dinaga ka bobedi, le go ba bjalo ka sebaka sa go tšwetša pele Morero wa rena wa Afrika.
1.6. Kabinete e boletše ka polelo ya Tona ya Mešomo ya Setšhaba ka pego ya Sehlophatšhomo sa Ditona ka ga dikaonafatšo tša tšhireletšo lapeng la Mopresidente la Nkandla. Kabinete e amogetše ditšhišinyo gomme e laetše gore pego e lokollelwe setšhaba. Ditona tša Sehlopha sa Tšhireletšo le Tona ya Mešomo ya Setšhaba ba tla swara kopano ya bobegaditaba ka Labobedi, 10 Manthole 2013.
1.7. Kabinete e amogela dipoelo tša Foramo ya Bobedi ya Toropofatšo ya BRICS le Foramo ya Boraro ya Tšhomišano ya Pušoselegae le Segwera sa Ditoropo. Foramo e lebišitše kudu go nyako ya maemo a go fapana a mmušo go matlafatša poledišano le tšhomišano ka mafelong a mananeokgoparara, tlhabollo ya setšhaba, ekonomi ya polokego ya didirišwa, dineelano tša setšo, peeletšo le phetišetšo ya theknolotši.
1.8. Kabinete e amogela ditšhaba tša maAfrika tše 16 le bathekgi ba bona ba ba kgathago tema ka go Phadišano ya Boraro ya Bosetšhaba ya Dinaga tša Afrika ya Bodipa gare ga 11 Pherekgong le 1 Dibokwane 2014 mo Afrika Borwa. Go ba monggae wa diphadišano go tla dumelela Afrika Borwa go tšwela pele go aga bohwa bja Sebjana sa FIFA sa Lefase sa 2010 le Sebjana sa Afrika sa Ditšhaba, gape le go matlafatša kamano ya leago le boikgantšho bja setšhaba.
Phadišano gape e tlišetša maAfrika Borwa dibaka tša go laetša naga ya rena bjalo ka lefelo la peeletšo, kgwebo le boeti tše di thabišago.
1.9 Mo sehleng se sa maikhutšo, mmušo o eta pele molokoloko wa masolo a go fapana ka tšhomišano le Makala ka moka a setšhaba go netefatša go ba gona ga maikarabelo le maitshwaro a go bolokega. Se segolo gare ga tše ke Masolo a Mekgwaphelo ya go loka, Fihla o Phela, Matšatši a 16 a Twantšho le Letšatši la AIDS la Lefase.
Mo lebakeng le ponagalo ye e oketšegilego ya bahlankedi ba phethagatšo ya molao maphekong a tsela le masolo a phuruphutšo nageng ka bophara a tla netefatša gore maAfrika Borwa a bolokegile. Badiriši ba ditsela ba gopotšwa go se nwe le go otlela ka nako e tee, goba go nwa le go sepela ka nako e tee. Bao ba bonwago molato wa go se obamele melawana ba tla lebana le molao ka botlalo.
1.10 Kabinete e dira boipiletšo go maAfrika Borwa ka moka go leka ka gohlegohle go netefatša gore bana ba rena ba hlokometšwe ebile ba kgole le kotsi. Ke mošomo le maikarabelo a batswadi, bahlokomedi le setšhaba go netefatša polokego ya bana ba rena, kudu mo lebakeng le le tlago.
1.11 Ka ge ye e le kopano ya mafelelo ya Kabinete ya 2013, maloko a Khuduthamaga a lakaletša maAfrika Borwa ka moka sehla sa keresemose sa maikhutšo, khutšo le polokego. Kabinete e dira boipiletšo go rena ka moka bao re ka kgonago, go pethagatša Botho ka go thuša batho le malapa ao a sa kgonego go iphepa, le go laetša kwelobohloko bjalo ka setšhaba seo se hlokomelanago le go hlomphana.
2. Diphetho tša bohlokwa tša Kabinete
2.1 Kabinete e amogetše Pholisi ya Bokgontšhakgokagano ya Bosetšhaba, Leano le Peakanyo tše di bitšwago Afrika Borwa Kgokagana. Se se tla kgatha tema ye kgolo kgolong ya ekonomi, tlhabollong le tlholong ya mešomo. Maikemišetšo a kakaretšo ke go fihlelela lebelo la go taonelouta la palogare la lefase lohle la 100 mbps ka 2030. Go fihlelela tebanyo ye ka mokgwa wa kgatelopele, go na le ditebanyo tše di sekasekwago go thoma ka modiriši wa magareng yo a itemogelago lebelo la 5 mbps le le tlago fihlelelwa ka 2016 gomme le hwetšagala go batho ba 50% le go 90% ka 2020. Ditebanyo gape di a bewa bakeng sa dikolo le dikliniki le bokgokagano bja lekala la setšhaba. Tlhabollo ya lebelo ya theknolotši ya sekgontšhakgokagano e ra gore ditebanyo tše di tla sekwasekwa ngwaga ka ngwaga.
2.2 Kabinete e amogetše go ngwalwa ga Sengwalwa sa Ditšhišinyo tša Mathomo sa Bosetšhaba sa Pholisi ya Theknolotši, Dikgokagano le Tshedimošo (ICT) ye e Kopantšwego ka kuranteng ya mmušo go boledišana le setšhaba. Sengwalwa sa Ditšhišinyo tša Mathomo se šogana le nyakego ya go fetola dipholisi le melawana go akaretša diphetogo tša lebelo tša ICT mengwageng ya lehono. Magareng a ditabana tše e di lebantšego ke dikgokagano tša mogala, ditirelo tša kgašo le poso. Ditheeletšo tša setšhaba di tla swarwa mathomong a ngwaga wo o tlago.
2.3 Kabinete e amogetše diphetošo tša Pholisi ya Khudušo ya Kgašo go ya go Ditšitale tša go amana kudu le ge e ba Lepokisi la Phetošo ya Kgašo (STB) (didekhouta) e swanela go ba le mokgwa wa taolo goba aowa. Magareng a mabaka ao a šomišwago go tšea sephetho godimo ga se e bile a a latelago:
• nyakego ya lebelo khudušong ya ditšitale, kudu go lokolla spekteramo sa maphoto a radio;
• go netefatša gore sapsiti ya mmušo e šomišwa botse;
• go hlohleletša intasteri ya di-elektronike ya selegae le go hlola mešomo;
• go hola borakgwebo ba ba golago;
• go fokotša kgonagalo ya mmaraka wa Afrika Borwa gore o phophome ka di-STB tša go se ture tšeo di sa šomego ka botlalo;
• go šireletša dikgahlego tša SABC;
• o hlokomela diphetogo tša lebelo lekaleng la kgašo le la ICT ka bophara;
• go fokotša bogolo bja bogwebanoši le go hlohleletša phadišano ka go hlolela dibapadi tše diswa sebaka ka papatšo ya thelebišene ya go lefelwa ntle le go holelwa ke sapsiti ya mmušo;
• go fokotša kgonagalo ya kgato ya semolao go tšwa go bagaši le borakgwebo yeo e tlago swarelela tshepetšo ya khudušo.
Go tšea tše le mabaka a mangwe gotee, Kabinete e tšere sephetho sa gore tšhomišo ya mokgwa wa taolo e swanela go ba ka kgapeletšo. Fela, diSTB di ba le mokgwa wa taolo go šireletša peeletšo ya Mmušo mmarakeng wa STB wo o filwego sapsiti le diintasteri tša seilektroniki, gomme ka diphetogo tša theknolotši tša lebelo, le tšhomišo ya ka moso ka bagaši yeo ba ka no se nyakego go e šomiša bjale.
Go thibela bagaši ba ba ngwadišago go holega ka tshwanelo go tšwa go mokgwa wa taolo, peeletšo ya mmušo ka go Mokgwa wa Taolo ya STB e tla utullwa go tšwa go bagaši ba ba ngwadišago bao ba kgethago go šomiša mokgwa wa Taolo ya STB.
Kabinete e hlohleletša batho ka moka go tlogela diphapano tša bona tša maloba le go šomišana le mmušo go thakgola khudušo ya ditšitale ka lebelo la ka pelapela le go kgonagala ka dikgahlegong tša naga.
2.4 Kabinete e amogetše magato a go ikemišetša go thuša malapa ao a nago le dikoloto tše ntši le matlafatša go tia ga matlotlo.
Ditona tša Matlotlo, le Kgwebo le intasteri ba be ba dumeletšwe go phethagatša magato a kgalemo go fokotša kotsi ya go ba le dikoloto tše ntši go feta ka dikadimo tša ka moso. Se se akaretša lenaneo la mohlakanelwa la dikgato tše di botse tša go thuša ka se sebaka malapa ao a nago le dikoloto tše ntši, gape le go thibela malapa go ba le dikoloto tše ntši ka moso.
Tona ya Matlotlo gape e tla tšea magato go hlohleletša bengmošomo go thuša bašomedi ba bona ba ba nago le dikoloto tše ntši go fetiša ka go nyakišiša ditaelo tša kholo ya kgomagano ya bokgonthe tša bašomi, le go fa bašomi mekgwa ya go ba ba kaone go tša matlotlo.
2.5 Kabinete e amogetše Sengwalwa sa Ditšhišinyo ka ga Taolo ya Bosetšhaba ya Tikologo ya Pholisi ya Lewatle. Pholisi e laetša mokgwa wa taolo wa lekala woo o beakantšwego go taolo ya tikologo. Se se tla dumelela Afrika Borwa go šogana le ditlhohlo tše di oketšegago tšeo di hlolwago ke dikhuetšo tše botse go fetiša tša batho go tikologo ya lewatle, mola ka lehlakoreng le lengwe di oketša go fihla magomong kgonagalo ya tlhabollo ya ekonomi yeo e tlišwago ke lewatle.
2.6 Kabinete e amogetše Maemo ka Pholisi ya Bosetšhaba ya Meetse ya mafalelo gape e amogetše ditshepetšo tša dipoledišano tša setšhaba tše di dirilwego go fetša Tshekoseko ya Pholisi ya Bosetšhaba ya Meetse ya mafelelo.
Maemo a Pholisi ya Meetse ye mpsha e amogela maemo a taolo ya meetse a go hlabolla, yeo e šoganago le dikamano tša diphegello gare ga taolo ya meetse le ya hlabollo le phetogo ya mmušo. Se se ama tšhaene ya boleng bja meetse ka moka mabapi le ka moo meetse a kgathago tema go fihlelela tlhabollo ya go swarelela, mohola le go lekana go kgabaganya naga.
2.7 Kabinete e amogetše tshepetšo ya peakanyoleswa ya Diboto tša Meetse ka Ditirelo tša Meetse tša Selete tše senyane.
Mošomo wo mogolo wa Ditirelo tša Meetse tša Selete e tla ba go hlabolla le go laola mananeokgoparara a mantši a selete (kabo ya meetse le mothopo wa meetse) go akaretšwa thekgo ya ditšhelete, tlhabollo ya diprotšeke le ditshepedišo le tlhokomelo tša ka mehla. Se se tla kgontšha kabo ye kaone ya thekgo go pušoselegae, yeo e lego senyakwa se segolo sa phetogo ya Lekala ka kakaretšo.
2.8 Kabinete e amogetše phethagatšo ya kalafi ya Twatši ya Papiloma ya Batho, yeo e tlago dirišwa ka go kgaogana ka dikgwedi tše tshela, ka 2014, go basetsana ba mengwaga ye 9-10 ka Lenaneo la Maphelo le le kopantšwego la Dikolo. Se se sepetšana le tšhišinyo ya Mokgatlo wa Maphelo wa Lefase.
Maikemišetšo ke go fokotša kotsi ya basetsana ya go swarwa ke kankere ya molomo wa popelo moragonyana mo bophelong, gomme e tla kgatha tema kaonafatšong ya boleng bja bophelo bja basadi le go oketša paka ya go phela bja bona, gape le go fokotša kudu go ata ga malwetši a go se alafege ao a sa fetelegego.
3 Melaokakanywa
3.1 Kabinete e amogetše go ngwalwa ga sengwalwa sa Molaokakanywa wa Afrika Borwa wa Kwano, 2013 ka kuranteng ya Mmušo le Memorantamo wa Diteng tša Molaokaknywa gore setšhaba se dire ditshwayotshwayo.
Sengwalwa sa Molaokakanywa se dumelela temogo ya Kwano ya Afrika Borwa, bjalo ka setheo sa setšhaba. Boto ya Kwano ya Afrika Borwa e filwe maatla a go, magareng ga a mangwe, sekaseka kgotsofatšo ya morero ya mekgwa goba ditšweletšwa tša go amana le kago tše di sego tša lekanetšwa go šomišwa ka intastering ya kago, gomme yeo tekanetšo ya yona ya bosetšhaba e sego gona.
Se se tla kgatha tema tlholong ya intasteri ya kago ya boithomelo le phetogo yeo e huetšago tlholo ya mešomo botse mola e kgatha tema dipeakanyong tša mananeokgoparara a Mmušo.
3.2 Kabinete e amogetše tsebišo ya Molaokakanywaphetošwa wa Panka ya Tlhabollo ya Borwa bja Afrika wa 2013 ka Palamenteng. Molaokakanywa o fetola Molao wa Borwa bja Afrika wa Panka ya Tlhabollo wa 1997.
Nepišo ya leano ya Molaokakanywaphetošwa ke go kgontšha katološo ya ditshepedišo tša Panka ya Tlhabollo ya Borwa bja Afrika go mollwane ofe goba ofe wa bosetšhaba mo kontinenteng ya Afrika le dihlakahlakeng tša yona tša lewatle. Se se tla kgontšha Panka go kgatha tema ka mananeokgoparara a mošomo wo mogolo le diprotšeke tše dingwe tša maano ka ntle ga selete sa Dinaga tše di Hlabologago tša Borwa bja Afrika yeo e nago le kgonagalo ya go kaonafatša kgwebo le kgolo ya ekonomi mo kontinenteng le go thekga dikhomišene tša Afrika Borwa tša dinaga tše pedi le maikgafo kopantšhong ya selete.
3.3 Kabinete e amogetše gore sengwalwa sa Molaokakanywa wa molawana wa Lekala la Matlotlo se swanetše go lokollwa gore setšhaba se dire ditshwayotshwayo go phethagatša maikgafo a Afrika Borwa go G-20.
Maikemišetšo a Molaokakanywa ke go dira gore Lekala la matlotlo e be le le bolokegilego ka go phethagatša mokgwa wa taolo wa ‘katlegopedi’, k.g.r tlholo ya balaodi ba babedi: maikarabelo a motee ke polokego le seemo se se botse sa diinstitšhušene tša matlotlo gomme maikarabelo a yo mongwe ke tsela yeo diinstitšhušene tša matlotlo di sepetšago kgwebo ya tšona ka gona.
4 Bao ba thwetšwego mešomong
4.1 Kabinete e amogetše go thwalwa mošomong ga Mohumagadi Esther Sarah Makau maemong a Mohlankedimogolo wa Matlotlo wa Kgoro ya Bokgabo le Setšo
4.2 Kabinete e amogetše go thwalwa ga batho ba ba latelago mošomong wa Kgoro ya Dikgokagano:
a) Reneva Fourie maemong a Motlatšamolaodipharephare: Tlhabollo ya Tshedimošo ya Setšhaba le Dinyakišišo;
b) Tinyiko Moses Ngobeni maemong a Motlatšamolaodipharephare: Tlhabollo ya Mananeokgoparara a ICT;
c) Sibongile Vulikhaya Makopi maemong a Motlatšamolaodipharephare: Tlhabollo ya Kgwebo ya ICT le Tekolo ya Dikhamphani tša Mmušo.
4.3 Kabinete e amogetše go thwalwa mošomong ga Siyakhula Paradise Simelane maemong a Mohlankedimogolo wa Matlotlo wa Kgoro ya Tlhabollo ya Dinagamagae le Peakanyoleswa ya Naga.
4.4 Kabinete e amogetše go thwalwa mošomong la bobedi ga Siyabulela Thomas Tsengiwe maemong a Mokhomišenaremogolo wa Khomišene ya Tshepedišo ya Kgwebo ya Boditšhabatšhaba.
4.5 Kabinete e amogetše go thwalwa mošomong ga Mohumagadi Thezi Rosemary Mabuza maemong a Motlatšamokhomišenare wa Khomišene ya Bosetšhaba ya Badiriši.
4.6 Kabinete e amogetše go thwalwa mošomong ga Morena Themba Thomas Cyril Dlamini maemong a Mohlankedimogolo Phethiši (CEO) wa Boto ya Bosetšhaba ya go Kempola.
4.7 Kabinete e amogetše go thwalwa mošomong ga Ramolao Solomon Makhosini Msibi maemong a Mohlankedimogolophethiši wa Koporasi ya Taolo ya Sephethephethe Ditseleng.
4.8 Kabinete e amogetše go thwalwa mošomong ga batho ba ba latelago bao e sego Malokophethiši go Koporasi ya Taolo ya Sephethephethe Ditseleng.
a) Mohumagadi Thembeka Mdlulwa
b) Morena Ike Nxedlana
c) Mohumagadi Nalini Maharaj
d) Morena Rowan Graham Nicholls
e) Mohumagadi Morwenyane Maria Mathabathe
f) Morena Zola Malvern Percival Majavu
g) Morena Sam Ledwaba
4.9 Kabinete e amogetše go thwalwa mošomong ga batho ba ba latelago maemong a Balaodi ba e sego Malokophethiši go Boto ya Kantoro ya Poso ya Afrika Borwa:
a) Morena Templeton Mageza
b) Morena Sihle Joel Ngubane
c) Mohumagadi Selebaleng Primrose (Boitumelo) Mothelesi
d) Morena Sathiaseelan Gounden
4.10 Kabinete e amogetše go thwalwa mošomong ga batho ba ba latelago go Thakgolo ya Boto ya Institshute ya Bosetšhaba ya Tahlo ya Ditšhila tša Kediso:
a) Profesa Gordan Sibiya (Modulasetulo)
b) Clive Douglas Kneale
c) Eric Peter McDonald
d) Queen Nothando Gopo
e) Mathews Mateo Mathebe
f) Ngaka Margaret Msongi Mkhosi
g) Nolwazi Zandile Cobbinah
h) Justin Daniel
4.11 Kabinete e amogetše go thwalwa mošomong ga batho ba ba latelago go Baemedi ba go Hlaolwa ke Mongmošomo go Sekhwama sa Phenšene ya Bašomi ba Mmušo:
a) Morena Stadi Mngomezulu (Matlotlo a Bosetšhaba)
b) Morena Bhekithemba Thabo Gamedze (Tona ya Matlotlo)
c) Ngaka Renosi Mokate (Tona ya Matlotlo)
d) Ngaka Malcolm Barry Kistnasamy (Kgoro ya Maphelo)
e) Mohumagadi Gladys Modise (Kgoro ya Thuto ya Motheo)
f) Mohumagadi Esther Euphane Aletta (Barbara) Watson (Kgoro ya Tirelo le Taolo ya Setšhaba)
g) Morena Nkhangweleni Seth Makhani (Kgoro ya Tšhireletšo )
h) Mohumagadi Moira-Anne Moses (Koporasi ya Peeletšo ya Setšhaba)
Kabinete e amogetše go thwalwa mošomong ga batho ba ba latelago Baemedi ba go Emela Bahlaolwa ba Mongmošomo:
i) Mohumagadi Lindy Ann Bodewig (Matlotlo a Setšhaba)
j) Ramolao Lindiwe Grace Nkosi-Thomas (Tona ya Matlotlo)
k) Morena Abel Sithole (Tona ya Matlotlo)
l) Ngaka Thamizhanban Pillay (Kgoro ya Maphelo)
m) Ngaka Mogenthiran Shunmugam (Morgan) Pillay (Kgoro ya Thuto ya Motheo)
n) Ngaka Lesiba Alex Mahapa (Kgoro ya Tirelo ya Tirelo le Taolo ya Setšhaba)
o) Brigadier Johan David Griesel (Tirelo ya Maphodisa a Afrika Borwa)
p) Mohumagadi Rejane Woodroffe (Koporasi ya Peeletšo ya Setšhaba)
4.12 Kabinete e amogetše go thwalwa ga Morena Andrew Zaloumis la bobedi maemong a Mohlankedimogolophethiši wa Lekala la Phaka ya Mohlaka wa iSimangaliso.
4.13 Kabinete e amogetše go thwalwa ga batho ba ba latelago la bobedi ga Molaodi wa Bosetšhaba wa Mabaka a Kgapeletšo.
a) Morena Jeff Molobela (Modulasetulo)
b) Morena Nico Vermeulen (Yo e sego Lelokophethiši)
c) Mohumagadi Funzani Asnath Melato (Yo e sego Lelokophethiši)
d) Mohumagadi Susanna Elizabeth Moolman (Yo e sego Lelokophethiši)
e) Profesa Sadhasivan Perumal (Yo e sego Lelokophethiši)
f) Mohumagadi Dora Ndaba (Yo e sego Lelokophethiši)
g) Morena Paul Serote (Yo e sego Lelokophethiši)
h) Morena Sipho Reginald Zikode (Yo e sego Lelokophethiši)
Dipotšišo: Phumla Williams (Seboleledi sa Kabinete sa Motšwaoswere)
Mogala: 083 501 0139
Issued by: Government Communications
