Mundende wa thikhedzo wa vhana

Ngaha

Zwine vha tea u ita

Tshifhingambekanywa

Zwi ita vhugai

Fomo dzi no tea u ḓadzwa

Vha kwama inyi

Nga ha mundende wa thikhedzo wa vhana

Arali vha tshi shaya, vha nga wana mundende wa u vha thusa u alusa ṅwana ane vha khou mu ṱhogomela.

Vha zwi ḓivha hani uri vha a tea nga u wana mundende?

Vha fanela :

• Muṱhogomeli muhulwane wa ṅwana (tsumbo, mubebi, vhomakhulu kana ṅwana wa miṅwaha i fhiraho 16 a ṱhogomelaho muṱa). Tsivhudzo: Arali vha si mubebi, vha fanela u ṋetshedza phurufu ya uri vha muṱhogomeli muhulwane wa ṅwana nga u ṅwala afidafithi u bva kha muofisiri wa mapholisa, muvhigo wa mushumeli wa tshitshavha na afidafithi ya mubebi wa vhukuma kana luṅwalo u bva kha ṱhoho ya tshikolo tshe ṅwana a dzhena khatsho.
• U vha mudzulapo wa tshoṱhe wa Afrika Tshipembe.
• Vha sa holi muholo u fhiraho R52 800 nga ṅwaha arali vhe mubebi muthihi. Arali vho malana, muholo wavho woṱhe wo ṱangana a u faneli u fhira R105 600 nga ṅwaha.

Ṅwana u fanela:

• u vha nga fhasi ha miṅwaha ya 18
• a sa khou ṱhogomelwa nga tshiimiswa tsha muvhuso
• a tshi khou dzula na muṱhogomeli muhulwane ane a sa khou badelwa u ṱhogomela ṅwana.

Vhone na ṅwana vha fanela u vha vha tshi dzula Afrika Tshipembe.

Tsivhudzo: Vha nga si wane mundende uyu wa vhana vha fhiraho rathi vhane vha si vhe vhavho vhe tou vha beba kana vhana vho unḓiwa nga nḓila ya mulayo.

Vha ḓo wana vhugai?
       
Vha ḓo wana R530 nga ṅwedzi ya ṅwana nga muthihi nga muthihi. (Top-up R530 + R260)

Vha ḓo badelwa hani?

Dzhendedzi ḽa Tsireledzo ya Matshilisano ḽa Afrika Tshipembe (SASSA) ḽi ḓo badela mundende kha vhone nga kha iṅwe ya maitele a tevhelaho:

• kheshe kha vhupo ha u holela mundende nga ḓuvha ḽo tiwaho
• kha akhaunthu ya bannga kana ya Bannga ya Poswoni (bannga i nga vha badelisa tshumelo) 
• tshiimiswa tshi shumaho sa mulanguli wa mundende.

Tsivhudzo: Arali vha sa koni u yo dzhia tshelede nga vhone vhaṋe, vha nga ta dzhendedzi kha ofisi ya SASSA, kana vha ṋea muṅwe muthu maanḓa a mulayo uri a vhe ene a yaho u vha holela mundende.

Mundende wa ṅwana u nga sedzuluswa lini?

SASSA i nga dzhia tsheo arali mundende wavho u tshi tea u sedzuluswa. Muholo wavho zwa zwe wa sumbedzwa musi vha tshi ita khumbelo ya mundende u ḓo vha tshipiḓa tsha mutheo ya tsheo iyi. Vha ḓo ḓivhadzwa miṅwedzi miraru phanḓa nga ha datumu  ya  uri ndi lini hune tsedzuluso ya ḓo itwa kana datumu ine ṱhanziela ya vhutshilo (ḽiṅwalo ḽa u sumbedza uri vha kha ḓi tshila) ḽa ḓo ṱoḓiwa. Arali vha tshi wana tshelede yavho nga kha bannga, tshiimiswa kana dzhendedzi  vho tiwa uri vha ḓadze ṱhanziela ya vhutshilo ofisini dza SASSA ṅwaha muṅwe a muṅwe.

Ndi lini hune mundende wa ṅwana u nga imiswa?

Zwithu zwi tevhelaho zwi nga itisa uri mundende u imiswe:

• musi nyimele dza ṅwana dzi tshi shanduka
• mvelelo dza tsedzuluso
• arali vha kundelwa u vha na tshumisano musi mundende wa ṅwana u tshi khou  sedzuluswa
• musi vho ita vhufhura kana u sa imela ṅwana nga nḓila i si yone.
• arali ho vha na vhukhakhi musi mundende wa ṅwana u tshi phasiswa.

• Arali ṅwana a si tsha ṱhogomelwa nga vhone.

Mundende wavho u ḓo fhela lini?

Mundende u ḓo fheliswa musi:

• ṅwana a tshi lovha
• ṅwana o ṱanganedzwa  kha tshiimiswa tsha muvhuso
• muvhuelwa ane a vha muṱhogomeli a sa iti mbilo ya mundende lwa miṅwedzi miraru nga u tevhekana
• ṅwana a nnḓa ha shango iḽi
• mafhelo a ṅwedzi une ṅwana a fara ṅwaha wa 18.

Zwine vha fanela u ita

1. Kha vha ye kha ofisi ya Dzhendedzi ḽa Tsireledzo ya Matshilisano ḽa Afrika Tshipembe (SASSA) ya tsini na hune vha dzula hone vha ḓe na zwi tevhelaho:
   • Basa (ID) ya baakhoudu ya nomboro dza 13 yavho na ṱhanziela ya mabebo a ṅwana. Arali vha si na ID kana ṱhanziela ya mabebo:
     • vha fanela u ṅwala afidafithi kha tshivhumbeo tsha ya tshitandadi tsha SASSA phanḓa ha Khomishinari ya Muano ane a si vhe muofisiri wa SASSA.
     • Vha ḓe na maṅwalo a tevhelaho
       • tshitatamende tsha muano tsha nga muthu a ṱhonifheaho (u fana na mukhantseḽara, murangaphanḓa wa sialala, mushumeli wa tshitshavha, minista wa vhureleli) ane a ḓivha ṅwana na muthu ane a khou ita khumbelo 
       • phurufu ya uri vho ita khumbelo ya ID na/kana ṱhanziela ya mabebo kha Muhasho wa zwa Muno
       • ID ya tshifhinga nyana yo ṋetshedzwaho nga Muhasho wa zwa Muno (arali i tshi ṱoḓea)
       • ṱhanziela ya ndovhedzo arali i hone
       • garaṱa ya ṅwana ya kiḽiniki arali i hone
       • ripoto ya tshikolo arali I hone.
   • Phurufu ya ṱhogomelo iṅwe na iṅwe ine vha i wana ya ṅwana.
   • Phurufu ya muholo wavho.
   • Ṱhanziela ya mbingano (arali zwi tshi ṱoḓea).
   • Arali vho ṱala, ndaela ya khothe ya uri vha na pfanelo ya vhuunḓi ya ṅwana.
   • Arali muthihi wa vhabebi vha ṅwana o lovha kana o ngalangala, ṱhanziela ya lufu ya mufu kana phurufu ya uri mubebi o ngalangala, tsumbo, muvhigo wa muthu o ngalangalaho u bva mapholisani.
2. Kha vha ḓadze fomo ya khumbelo phanḓa ha muofisiri wa SASSA (vha dzhiele nzhele uri vhone kana muofisiri wa SASSA fhedzi vha nga ḓadza fomo ya khumbelo).
3. Vha ḓo fhiwa risithi. Vha i vhulunge sa phurufu ya uri vha ita khumbelo.

Arali khumbelo ya vho I songo phasa?

Arali khumbelo yavho i songo phasa, SASSA i ḓo vha ḓivhadza nga u tou ṅwala uri ndi ngani khumbelo yavho i songo phasa.

Arali vha khou hanedzana na tsheo, vha nga ita aphiḽi kha Minisṱa wa Mveledziso ya Matshilisano kha ofisi ya lushaka ya Muhasho wa Mveledziso ya Matshilisano, u ṱalutshedza uri ndi ngani vha tshi khou hanedza. Vha fanela u ita aphiḽi hu sa athu fhela maḓuvha a 90 vho ḓivhadzwa uri khumbelo yavho a i ngo phasa.

Zwi dzhia tshifhinga tshi ngafhani

• Zwi dzhia miṅwedzi miraru u khunyeledza khumbelo yavho.
• Arali mundende wavho wo phasa, vha ḓo badelwa u bva kha datumu ye vha ita khumbelo

Ndi vhugai

Tshumelo ndi mahala.

Fomo dzine vha tea u dzi ḓadza

Fomo ya khumbelo a i wanali kha inthanethe, fhedzi vha nga i wana kha ofisi dza tsini (SASSA).

Hu kwamiwa nnyi

South African Social Security Agency (SASSA)