Loko matsalwa ya wena ya tumbuluka eAfrika-Dzonga kutani ya ta tirhisiwa etikweni rin’wana va fanele ku ma “tiyisisa” kumbe va ma “pfumelela”. Lama i maendlelo lama ma mifungho yo hambanahambana leyi yi vekiwaka eka tsalwa ku endlela leswaku ya kota ku tiveka tanihi matsalwa lama ma nga enawini eka matiko man’wana.
Xiyenge xa Nawuhato eka Ndzawulo ya Vuxaka bya Matiko ya Misava na Ntirhisano xi nga ha nyika Setifikheti ya Apositille kumbe Setifikheti ya Ntiyisiso mayelana na milawu leyi landzelaka:
- Matsalwa ya ha ri ya nkoka.
- U fanele ku tsundzuxa Xiyenge xa Nawuhato eka tiko leri matsalwa ya nga ta tirhisiwa kona ku pfumelela xiyenge ku kuma loko Setifikheti ya Apositille kumbe Setifikheti ya Ntiyisiso yi laveka.
- Ku ya hi muxaka wa matsalwa, u nga ha sungula u kuma matsalwa lama ma nga na xitempe/sayiniweke hi ndzawulo leyi yi nga fanela kumbe xiyenge; hi Majisitarata, Majisitarata wo engetela; kumbe munhu loyi a tirhaka hi tirhekhodo kumbe Mupfuni wa munhu loyi a tirhaka hi tirhekhodo wa Khoto ya le Henhla ya Afrika-Dzonga Xiyenge xa Nawuhato xi nga si humesa Setifikheti ya Apostille kumbe Setifikheti ya Ntiyisiso leyi faneleke.
Matsalwa lama ma landzelaka a ma pfumeleriwi:
- Matsalwa yo komisiwa kumbe swiphephana swo kandziyisiwa hi khomphyuta.
- Tikhopi to tiyisisiwa ta vukati, ta ku velekiwa, ta rifu kumbe tisetifikheti to basisiwa hi maphorisa.
- Tikhopi leti ti tiyisisiweke ta Xiyimo xa swa Vukati (to hava nsirhelelo) kumbe Vumbhoni bya Vuakitiko.
- Tikhopi leti ti tiyisisiweke ta matsalwa ya tendzo kumbe mapasi.
- Matsalwa lama ma pfumeleriweke hi Vakhomixinara vo Hlambanyisa ku va tikhopi ta ntiyiso to sungula, a ma nga amukeriwi naswona ma fanele ku yisiwa eka Munhu loyi a Pfumelelaka Vaaki (gqweta leri ri tsarisiweke eka Khotonkulu).
Hlaya swo tala mayelana na nawuhato wa matsalwa ya vatirhelamfumo, u tihlanganisa na Xiyenge xa Nawuhato eka nomboro ya foni ya 012 351 1726 kumbe eka imeyili ya legalisation@dirco.gov.za.
