Misava ya mfumu (misava leyi lawuriwaka hi mfumu wa rixaka kumbe wa xifundzhankulu kumbe masipala) na misava leyi nga va vanhu vo karhi yi nga ngheneriwa swi nga ri enawini.
Mfumu wu na ntirho wa vumbiwa ku tiyisisa – laha swi nga fanela na hi switirhisiwa leswi nga kona – leswaku vaaki hinkwavo va tiphina hi timfanelo ta vona ta masungulo to kuma misava na tindlu. Laha minghenelelo ya hlaya yi humelelaka kona, mfumu wu na ntirho wo yelana wo pfuneta vinyi va misava ku sirhelela misava ya vona.
Laha vatshami lava tshamaka swi nga ri enawini lava timfanelo ta vona ta masungulo ti nga ri ki enghozini leswaku va nga hlongoriwa, n’winyi wa misava u fanele, handle ko heta nkarhi, ku tshinelela khoto ku ya lava xileriso xo va hlongola hi ku ya hi Nawu wo Sivela ku Hlongoriwa swi nga ri eNawini na ku Tshama eMisaveni swi nga ri eNawini, 1998 (Nawu wa vu 19 wa 1998). Nawu lowu sweswi wu lawuriwa hi Ndzawulo ya Vutshamo bya Vanhu naswona wu ta yisiwa eka Ndzawulo ya Nhluvukiso wa Makaya na Vumbo wa Misava hi Vuntshwa (DRDLR) loko nkarhi wu ya wu famba.
Loko misava ya wena u ri wexe yi ngheneriwile, u nga tshinelela:
- khoto handle ko dya nkarhi ku kuma xileriso xo va hlongola hi ku ya Nawu wo Sivela ku Hlongoriwa swi nga ri eNawini na ku Tshama eMisaveni swi nga ri eNawini, 1998.
- hofisi yin’wana ni yin’wana ya DRDLR ku pfuneka loko ku ve vangheneri va nghenile hi kwalaho ko lava ku fikelela misava ya vurimi.
- masipala wa le mugangeni kumbe, loko swi fanerile, Ndzawulo ya Vutshamo bya Vanhu ya xifundzhankulu kumbe ya rixaka loko vangheneri va lava tindlu.
DRDLR yi ta:
- pfuna vatshami lava tshamaka swi nga ri enawini emisaveni ya mfumu kumbe ya munhu, lava va lavaka no va va pfumala misava ya vurimi ku kuma mfikelelo wa misava yo rima eka yona
- ku pfuna vulawuri bya mfumu byin’wana ku kumela vatshami lava nga ri ki enawini ndzhawu yin’wana yo tshama eka lava lavaka ku aka tindlu
- laha swi fanelaka na laha ku nga na swiyimo swo hlawuleka, yi ta pfuna vinyi va misava ya vurimi lava misava ya vona yi nga ngheneriwa hi ku rhurhiseriwa ka vanhu swi nga ri enawini lava va lavaka misava ya vurimi ku ya eka misava yin’wana leyi lulameleke.
Vanhu lava pfumalaka misava ya vurimi va nga tshinelela Ndzawulo ya Nhluvukiso wa Makaya na Vumbo wa Misava hi Vuntshwa ku pfuniwa hi ku kuma misava ya vurimi leyi lulameleke.
Vanhu lava va lavaka tindlu va nga tshinelela masipala wa le mugangeni kumbe, loko swi fanerile, Ndzawulo ya Vutshamo bya Vanhu ya xifundzhankulu kumbe ya rixaka ku pfuniwa.
Ku kuma swo tala hi mhaka yo hlamula eka ku ngheneriwa ka misava tihlanganisi na Ndzawulo ya Nhluvukiso wa Makaya na Vumbo wa Misava hi Vuntshwa.
