Lusito lwalabasesimeni lesibucayi

Ngesi lusito lwalabasesimeni lesibucayi

Lusito letenhlalakahle lwalabasesimeni lesibucayi kuniketwa kwelusito lwesikhashana lwebantfu labanesidzingo loluhlose bantfu labanesidzingo lesikhulu ngendlela yekwekutsi bayehluleka kuhlangabetana netidzingo letisisekelo temindeni yabo.

Ngubani longatfola lusito lwekuba sesimeni lesibucayi?

Ungatfola lusito lwekuba sesimeni lesibucayi kuhulumende uma usesimeni lesibucayi.

Simo lesibucayi singabakhona ngenca yekutsi:

• udzinga lusito ngesikhatsi usesemele hulumende asebente selekelelo sebantfwana
• uvelelwe tinkinga letibucayi nobe umonakalo, njengekushelwa yindlu
• awukafaneleki kutfola selekelelo, futsi usesimeni lesesabisako
• awukwati kusebenta ngobe awuphili kahle engcondvweni – loku kusho kutsi sikhatsi lesingaphansi kwetinyanga letisitfupha
• awukhoni kutfola sondlo kulolomunye umtali wemntfwana/bantfwana
• lokunguyena ondla likhaya ushonile
• lowondla likhaya uvalelwe ejele kwesikhashana (ngaphansi kwetinyanga letisitfupha)
• utsikametwe ngumonakalo,kepha indzawo lohlala kuyo isengakamenyetelwa njengaleyo levelelwe ngumonakalo.

Yini loyitfolako?

Lusito Lwalabasesimeni Lesibucayi lungaba ngemaphasela ekudla nobe ivawucha yekutsenga kudla. Letinye tifundza tiniketa lolusito ngesimo semali. Lusito lwalabasesimeni Lesibucayi luniketwa kwesikhashana kuphela – kuvamise kuba tinyanga letintsatfu, ngalesinye sikhatsi tinyanga letisitfupha.

Yini lekumele uyente

• Faka sicelo selusito lwalabasesimeni lesibucayi ehhovi leTekutfutfukiswa kweteNhlalakahle lelisedvute nawe.
• Ngenisa lifomu lakho kanye nalemiculu lelandzelako:
• • Matisi wakho lonetinombolo letingu-13 lonemagabelo netitifiketi tekutalwa tebantfwana bakho.
  • Lemiculu lelandzelako itawucelwa kulabafaka ticelo lapho matisi kanye/nobe sitifiketi sekutalwa kungekho:
    • i-afidavithi lekhishwe yi-Justice of the Peace. I-afidavithi kumele icukatse umshwana lokhombisa kwekutsi kuniketwa kwemniningwane longesilo liciniso longakapheleli kutawuholela ekushushisweni ngekulandzelwa kweSigaba 21 seMtsetfo Welusito Lwetenhlalakahle
    • isitatimende lesifungelwe ngumuntfu lohloniphekile lekati lomuntfu lofaka sicelo kanye nemntfwana wakho. Lesitatimende singaphuma kukhansela, kumholi wendzabuko, kusisebenti setenhlalakahle nobe kumfundisi wetenkholo
    • bufakazi bekutsi sitifiketi sekutalwa nobe matisi siceliwe kuLitiko Letasekhaya
    • lapho kufanele khona, matisi wesikhashane lokhishwe Litiko Letasekhaya
    • sitifiketi sekubhabhatiswa
    • likhadi lasemtfolamphilo 
    • iriphoti yasesikolweni.
  • Khumbula: Kute sicelo lesitawusetjentwa ngaphandle kwesitatimende lesifungelwe/i-afidavithi.
  • Nangabe ute matisi netitifiketi sekutalwa, i-afidavithi levela esiteshini semaphoyisa, esikhulwini, kukhansela nobe kumfundisi ingaba bufakazi lobenele.
• Khombisa bufakazi bekutsi:
• • ufake sicelo seselekelelo
  • ube nesimo lesiphutfumako (sibonelo, niketa umbiko wemaphoyisa wekutsi indlu yakho ishile)
  • wetamile kutfola sondlo
  • ute lolunye lusito
  • ushadile, wente sehlukaniso semshado, nobe awukashadi
  • ute imali lengenako
  • ukhubateke kwesikhashana.

Sikhatsi semsebenti

• Sicelo sakho silungiswa ngekushesha.
• Nangabe sewufake sicelo sakho, sitawuhlolwa kutsi siyafaneleka yini nesidzingo sakho sangempela selusito.
• Nanobe ute yonkhe lemiculu, utawulitfola liphasela lakho lekudla, ivosha, yenyanga yekucala ngaphandle kwayo.
• Khumbula kuyisa yonkhe imiculu esikhulwini ngenyanga yesibili uma ukhokhelwa. Uma ungenti njalo, kungenta ungalitfoli liphasela lakho lekudla, ivosha nome imali ngenyanga yesitsatfu.
• Uma ngabe kute tingucuko kulesimo sakho ngemuva kwekutfola selekelelo tinyanga letintsatfu, ungafaka sicelo sekwelulelwa selekelelo sakho tinyanga letintsatfu futsi.

Ngabe kubita malini

Lolusito lwamahhala.

Emafomu lagcwaliswako

Ucelwa kutsi utsintse lihhovisi lakho lelitiko lelidvute.

Ngubani longamutsintsa

South African Social Security Agency (SASSA)