Sicelo semphesheni yalabadzala

Ngesi
Yini lekumele uyente
Sikhatsi semsebenti
Ngabe kubita malini
Emafomu lagcwaliswako
Ngubani longamutsintsa

 

 

Ngesibonelelo sebantfu labadzala

Ungatfola sibonelelo kutsi sikusite ngesikhatsi sakho sebudzala. Sibonelelo sebantfu labadzala sibhadalwa kubomake labaneminyaka lengu-60 nobe ngetulu bese kuba ngemadvodza laneminyaka lengu-60 nobe ngetulu. Lesibonelelo besibitwa ngekutsi yimphesheni yebantfu labadzala.

Ngabe wati njani kutsi uyafaneleka?

Kumele:

  • ube sakhamuti saseNingizimu Afrika nobe umhlali walomphelo
  • uhlala eNingizimu Afrika
  • ungatfoli nobe ngusiphi sibonelelo setenhlalakahle ngekwakho
  • unganakekelwa esikhungweni sembuso
  • ungaholi ngetulu kwa-R86 280 ngemnyaka . Uma ushadile, umholo wenu lohlangene kumele ungabi ngetulu kwa- R 172 560 
  • ube netimphahla letibita ngetulu kwa-R1 227 600  uma ungakashadi kantsi umlingani wakho kumele angabi netimphahla letibita ngetulu kwa-R2 455 200.

Utawutfola malini?

Linani lelikhulu lemali lotawuyitfola ngenyanga yi-R 2 180. Nangabe ungetulu kweminyaka lenge-75 budzala, utawutfola i-R2 200.

Utawukhokhelwa njani?

I-Ejensi yekuCinisekiswa kweteNhlalakahle eNingizimu Afrika (i-SASSA) itawubhadala sibonelelo ngasinye kuletindlela letilandzelako:

  • ngakheshi endzaweni letsite yekubhadala ngelilanga lelitsite
  • kufaka nge-elektroniki ebhangi lakho, kufaka ekhatsi i-Postbank (libhangi lingabhadalisa ngalolusito)
  • kutikhungo (sib. likhaya lalabadzala).

Khumbula: Uma ungakhoni kutilandzela sibonelelo ngekwakho, ungatikhetsela umuntfu ehhovisi le-SASSA, nobe unikete lomunye umuntfu emandla lotawulandza sibonelelo sakho egameni lakho.

Ngabe sibonelelo sakho singabuyeketwa nini?
    
I-SASSA ingancuma kutsi sibonelelo sakho kumele sibuyeketwe. Umholo wakho lodzaluliwe ngalesikhatsi ufaka sicelo utawuba sisekelo salesincumo. Utawatiswa etinyangeni letintsatfu ngaphambilini ngelusuku lwekutawentiwa ngalo sibuyeketo nobe ngelusuku lekudzingakala ngalo sitifiketi sekuphila. Uma utfola imali yakho ngelibhangi, ngesikhungo nobe ngemuntfu lokulandzela imali, udzingakala kwekutsi ugcwalise sitifiketi sekuphila emahhovisi e-SASSA njalo ngemnyaka.  
    
Ngabe sibonelelo sakho singamiswa nini?
    
Lokulandzelako kungaholela ekuhlehlisweni kwesibonelelo:

  • uma timeko takho tigucuka
  • umphumela wesibuyeketo
  • uma wehluleka kutfobela ngalesikhatsi kubuyeketwa sibonelelo sakho
  • uma ukhwabanisa nobe utiphatse kabi
  • uma kube khona liphutsa ngalesikhatsi kwemukelwa sibonelelo sakho.

Ngabe sibonelelo sakho sitawupheliswa nini?
    
Sibonelelo sitawucedvwa uma wena:

  • ushona
  • ufakwa esikhungweni saHulumende
  • ungasitsatsi tinyanga letintsatfu letilandzelanako
  • ungekho eveni.

Uma lona lozuzako umukelwa kusakhiwo lesinenkhontileka nahulumende kute simnakekele bese sigcina loyo muntfu, lolusekelo mali lutawuncishiswa liye ku-25% kulemali laniketwa yona kusukela kulenyanga yesine ngemuva kwekumukelwa kwaloyo lozuzako kuleso sakhiwo. Lolusekelo mali lutawubuyiselwa kusuka ngalolusuku lona lozuzako akhishwa kulesakhiwo.

Sibonelelo sebantfu labadzala

Yini lekumele uyente

  • Yani ku-Ejensi yekuCinisekiswa kweteNhlalakahle eNingizimu Afrika (SASSA) edvute nalapho uhlala bese ufika naloku lokulandzelako:
    • Umculu wamatisi (i-ID) wakho lonemagabelo lanemadijithi langu-13. Uma ungenayo i-ID:
      • kumele ugcwalise i-afidavithi ngelifomu le-SASSA leletayelekile phambi kweMfungisi longesiso sisebenti se-SASSA
      • kumele uletse sitatimende lesifungelwe lesisayinwe ngumuntfu lohloniphekile (njengekhansela, umholi wendzabuko, sisebenti setenhlalakahle, umfundisi welisontfo nobe thishelanhloko) longafakazela ligama lakho nebudzala
      • sisebenti se-SASSA sitawutsatsa iminwe yakho. Utawutfunyelwa kuLitiko Letasekhaya kuyewufaka sicelo se-ID nanobe kusasetjentwa sicelo sakho. Uma ungatfoli i-ID, sibonelelo sitawumiswa.
    • bufakazi besimo semshado (uma bukhona)
    • bufakazi bendzawo yekuhlala
    • bufakazi bemholo kanye/nobe emadividenti (uma akhona)
    • bufakazi betimphahla takho, kufaka ekhatsi linani lemphahla lonayo
    • bufakazi bemphesheni yangasese (uma ikhona)
    • sitatimende sasebhangi setinyanga letintsatfu
    • uma ngabe bewucashiwe, Sikhwama seMshuwalensi wekuPhelelwa nguMsebenti (UIF) ('blue book') nobe sitifiketi sekukhishwa emsebentini lesikhishwa ngumcashi wangaphambilini
    • uma umlingani wakho ashone kuleminyaka lesihlanu lendlulile, ikhophi yencwadzi yemafa kanye nekutsengiswa kwetimphahla kwekucala nekwekugcina nema-akhawundi ekwaba lapho kudzingeke khona.

Khumbula: Uma umdzala kakhulu nobe ugula kutsi ungahamba uye ehhovisi kuyofaka sicelo, lilunga lemndeni nobe umngani angafaka sicelo egameni lakho. Lomuntfu kumele ahambe nencwadzi lephuma kuwe kanye/nobe linothi ladokotela lelisho kutsi kungani wehluleka kuya ehhovisi.

  • Gcwalisa lifomu lesicelo phambi kwesisebenti se-SASSA (khumbula kwekutsi nguwe kuphela njengemzuzi kanye nesisebenti se-SASSA leningagcwalisa lifomu lesicelo). sisebenti sitakubuta imibuto futsi sikutjele uma ngabe ufaneleka kutfola sibonelelo.
  • Utawuniketwa irisithi. Yingcine njengebufakazi bekutsi ufake sicelo.

Kwentekani uma sicelo sakho singemukelwa?

Uma sicelo singamukelwa, i-SASSA itakwatisa ngekubhala kwekutsi kungani sicelo sakho singakabi yimphumelelo.

Uma ungavumelani nesincumo, ungafaka sikhalo kuNdvuna Yekutfutfukiswa KweTenhlalakahle kuLitiko Lavelonkhe Lekutfutfukiswa KweTenhlalakahle. Kumele ufake sikhalo ngekhatsi kwemalanga langu-90 ekwatiswa kwekutsi sicelo sakho asikaphumeleli.

Sikhatsi semsebenti

  • Kungatsatsa tinyanga letintsatfu kusebenta sicelo sakho.
  • Uma sicelo sakho sivunyiwe, utawubhadalwa kusukela ngelusuku inkantolo ifake umntfwana etandleni takho.

Ngabe kubita malini

Lolusito lwamahhala.

Emafomu lagcwaliswako

Lifomu lesicelo alitfolakali ku-inthanethi, kodvwa ungalitfola ehhovisi lekucinisekiswa kwetenhlalakahle (le-SASSA) lelisedvute nawe.

Ngubani longamutsintsa

I-Ejensi yekuCinisekiswa kweteNhlalakahle yaseNingizimu Afrika (SASSA)
 

SASSA Toll free: 0800 60 10 11
Email:  GrantEnquiries@sassa.gov.za  

Share this page