1. Phethagatšo ya Mananeo a Bohlokwa a Mmušo
1.1. Kabinete e amogela diphihlelelo tše di laeditšwego ke Mopresidente Jacob Zuma nakong ya ge a etetše Boemakepe bja Port Elizabeth ka Kapa Bohlabela, go sekaseka kgatelopele ye e dirilwego mabapi le go tsenywa tirišong ga lesolo la Operation Phakisa: Ekonomi ya Lewatle. Mmušo o kgontšhitše dipeeletšo tše di fihlago go R17 pilione ka go lesolo la Ekonomi ya Lewatle. Go tloga mola le thomišwago, mešomo ye e fetago ye 4 500 e hlomilwe ka mafapheng ao a fapanego.
Diketswana tše pedi go tše senyane tša go goga dikepe tšeo di agwago ke Tirelo ya Bosetšhaba ya Mafelo a Maemakepe a Transnet a Borwa bja Afrika (TNPA) ka Boemakepeng bja ka Durban di hlamelwa go tla go šoma ka Boemakepeng bja Port Elizabeth. Mopresidente Zuma o tsebagaditše semmušo seketswana sa mathomo sa go goga dikepe ka Port Elizabeth, seo se filwego leina la Mvezo, e lego leina la lefelo leo Mopresidente wa peleng Nelson Mandela a belegetšwego gona.
TNPA e abile tšhelete ye e fetago R7 pilione go kaonafatša maemakepe a rena. Mopresidente o ile a bogela lefelo la go theogela ka meetseng leo le tsošološitšwego le go agwa leswa le leporogwana la go tsena ka meetseng ka gare ga Boemakepe bja Port Elizabeth leo le tlago kgona go rwala diketswana tše 12 ge go bapetšwa le la bjale leo le kgonago go rwala tše pedi.
1.2. Kabinete e leboga balefamotšhelo ka moka bao ba dirišanego le mmušo ka ngwageng wa ditšhelete wa 2015/16 ge ba kgonne go dira gore kgoboketšo ya rena ya motšhelo e fihle go R1 trilione la mathomo. Se ke taetšo ye e lego molaleng ya ekonomi ya rena ye e golago le ka fase ga maemo a boima.
Ke ka lebaka la maAfrika Borwa ao a obamelago go lefa motšhelo le go kgona go kgoboketša metšhelo ga Tirelo ya Metšhelo ya Afrika Borwa fao e lego gore mmušo o kgona gabotse go aba ditirelo tše di hlokegago kudu tšeo di nago le seabe go kaonafatša maphelo a maAfrika Borwa.
1.3. Kabinete e amogela tsebišo ye e dirilwego ke Mopresidente Zuma ka la 3 Phato 2016 bjalo ka letšatšikgwedi leo go tla swarwa Dikgetho tša Mebušoselegae tša 2016 ka lona. Mmušo o thabile ge mafelelo a beke a mabedi a go ingwadišetša dikgetho a la 5 – 6 Hlakola le la 9 – 10 Moranang go bile le palo ye kgolo ya batho bao ba nago le maswanedi a go kgetha ba ile ba etela diteše tša go kgetha, kudukudu bao e tlo bago la matho ba kgetha le bao e lego bafsa.
Kabinete e leboga ka moka bao ba arabetšego boipiletšo bja go ingwadiša le go lekola dintlha tša bona mananeong a bakgethi. Ke ka lebaka la go kgatha tema ga rena ka moka fao e lego gore temokrasi ya rena e maatlafalago le go feta.
Kabinete e ipiletša go badudi ka moka bao ba sego ba hlwa ba ingwadiša goba ba lekola dintlha tša bona go etela dikantoro tša Khomišene ya Dikgetho ye e Ikemego ka mebasepaleng ya bona ya selegae gomme ba mpshafatše dintlha tša bona lenaneong la bakgethi (ba fe diaterese) le go ingwadišetša go kgetha ka dikgethong tša la 3 Phato. Bakgethi gape ba ka romela nomoro ya bona ya Pukwana ya Boitsebišo ka SMS go 32810 goba ba leletše lefelo la megala go 0800 11 8000 go tiiša maemo a bona a boingwadišo.
Go ingwadiša go bea leina la gago godimo ga lenaneo la bakgethi gore o kgone go kgetha. Kabinete e ipiletša go badudi go phethagatša tokelo ya rena ya temokrasi ya go kgetha ye re e fentšego gaboima ka go kgetha ka Dikgethong tša Mebušoselegae tša 2016 ka la 3 Phato 2016.
1.4. Kabinete e amogela go tsebagatšwa semmušo ga Protšeke ya Lebakanyana ya eChannel ya Kgoro ya Merero ya Selegae (DHA) ka Mopresidente Zuma. Lesolo le leswa le la boithomelo le dumelela badudi go dira dikgopelo tša dikarata tša boitsebišo inthaneteng le go efoga methaladi ye metelele.
Tirišano ye le dipanka tše nne tše kgolo – e lego ya ABSA, FNB, Nedbank le Standard Bank – e tsebagatša sefala sa go dira dikgopelo tša karata ya boitsebišo le diphasephote inthaneteng gomme e tla kgontšha badiriši go etela mafelwana a go thetha a Kgoro ya Merero ya Selegae go romela dikgatišo tša menwana le diswantšho tša bona ka morago ga go dira dipeelano le go lefa inthaneteng.
eChannel ke karolo ya leano la kakaretšo la go tsenya tirišong tshepedišo ya sebjalebjale la huduša ditirelo go tloga go tša dipampiri go ya go tša titšithale, e lego tshepedišo ye e tlago akaretša go hlwekišwa ga lenaneo la ngwadišo ya setšhaba.
1.5. Kabinete e amogela katlego ya Beke ya Nepišo ya Dikopano tša Imbizo ye e sa tšwago go swarwa mo nakong ye e sa tšwago go feta ka fase ga morero wa ‘Mmogo re tšwetša pele Afrika Borwa’, e lego seo se dirilego gore bahlankedi ba mmušo ba boledišane le ditšhaba nageng ka bophara.
Kabinete e leboga maAfrika Borwa ao a kgathilego tema ka mananeong a go feta a 36 nageng ka bophara, ao a netefaditšego gore mmušo o arabela dinyakwa tša ditšhaba tšeo di kgethilwego. Beke ya Nepišo ya Dikopano tša Imbizo e maatlafaditše ditšhaba ka tshedimošo ya mabapi le mananeo a mmušo.
1.6. Kgoro ya Madulo a Batho e swere khonferentshe ye e atlegilego kudu ya Mokgatlo wa Dinagakopano (UN) ye e bego e bolela ka ga madulo a batho, e tiišetša taba ya dipalopalo tše di golago tša batho bao ba lebago metseseteropong le go gola ga mafelo a mekhukhung. Mo lebakeng le batho ba pilione e tee ba dula mafelong a mekhukhung. Go tloga ka 1994 Afrika Borwa e agile dintlo tše dimilione bjalo ka karolo ya go netefatša gore batho ka moka ba hwetša bophelo bjo bokaone.
2. Melaokakanywa
Kabinete e dumeletše Melaokakanywa ye e latelago ye e thadilwego:
2.1. Molaokakanywa wa Tšhireletšo ya Mananeokgoparara a Bohlokwa wa 2016 wo o tlago gatišwa ka gare ga Kuranta ya Mmušo go tla go swayaswaywa ke setšhaba.
Molaokakanywa wo o phumola Molao wa Mafelo a Bohlokwa a Bosetšhaba, wa 1980 (Molao wa bo 102 wa 1980), gomme o nyaka go nyalantšha sthepedišo ya go tseba le go bega mananeokgoparara a bohlokwa ka mokgwa wa go hloka sephiri le wa boikarabelo. O tla tšwela pele gape go netefatša gore mananeokgoparara a bohlokwa ka moka a tšhireletšo ya bosetšhaba a ka nageng a a kgethwa le go šireletšwa ka maleba.
Molaokakanywa wo o hlagiša gore go hlangwe lenaneotheo la go hlokomela le go sepediša tšhireletšo ya mananeokgoparara a bohlokwa. O tšwela pele go hlaloša mešomo ya sehlongwa seo se tlago eletša Tona ya Maphodisa ge go kgethwa mananeokgoparara a bohlokwa.
2.2. Molaokakanywaphetošwa wa Mekgatlo ya Dithoto tša Setšhaba wa 2016 wo o tlago gatišwa gore o tle o swayeswaywe ke setšhaba. Molaokakanywa wo o fetoša Molao wa bjale wa Mekgatlo ya Dithoto tša Setšhaba, wa 1996 (Molao wa 28 wa 1996).
Molaokakanywa wo o tla maatlafatša tshepedišo ya pušo ya temokrasi ya Mekgatlo ya bjale ya Dithoto tša Setšhaba goba dihlongwa tša bjale tša Dithraste tšeo di hlokometšego naga ya setšhaba. Molaokakanywaphetošwa wo o hlagiša gore go hlangwe Retšistara ya Kgoro ya Tlhabollo ya Dinagamagae le Peakanyoleswa ya Naga, ebile o hlaloša mešomo ya kantoro ye. Ka morago ga ge Molaokakanywa wo o fetišitšwe go ba molao, o tla maatlafatša Taolo ya pušo ya dihlongwa le go maatlafatša thekgo ya Mmušo go tšona.
O tla kgontšha ditšhaba go hwetša, go ba beng le go laola dithoto ka go diriša dihlongwa tša tshepedišo tše di šomago gabotse tšeo di hlomilwego ka semolao tša go thekgwa ke mmušo.
2.3. Go tsebagatšwa ga Molaokakanywa wa Poelanyo wa Boditšhaba wa 2016 ka Palamenteng. Tshepedišo ya poelanyo ya boditšhabatšhaba ke setlabelo se bohlokwa sa go dira kgwebo go putlaganya mellwane ya naga. E tla kaonafatša phihlelelo go ditirelo tša toka go dikhamphani tše di dirago kgwebo ka ntle ga naga le dikhamphani tša dinaga tša ka ntle ka Afrika Borwa.
Molaokakanywa wo o phumola Molao wa Temogo le Phethagatšo ya Difoka tša Poelanyo tša Dinaga tša ka ntle, wa 1977 (Molao wa bo 40 wa 1977) gomme o fetoša gape Molao wa Tšhireletšo ya Dikgwebo wa bjale, wa 1978 (Molao wa bo 99 wa 1978). Molaokakanywa wo o šišintšwego o sepelelana le Molao wa Mekgwa ka ga Poelanyo ya tša Kgwebo wa Boditšhabatšhaba, wo o amogetšwego ke Khomišene ya UN ka ga Molao wa Kgwebišano wa Boditšhabatšhaba.
2.4. Go gatišwa ga Molaokakanywaphetošwa wo o thadilwego wa Setheo sa Dinyakišišo sa Bosetšhaba wa 2016 ka gare ga Kuranta ya Mmušo go o tle o swayeswaywe ke setšhaba. Molaokakanywa wo o fetoša Molao wa Setheo sa Dinyakišišo wa Bosetšhaba, wa 1998 (Molao wa bo 23 wa 1998).
Molaokakanywa wo o tla kaonafatša bokgoni bja Afrika Borwa ka tlhabollo ya dinyakišišo le boithomelo ka go diriša Taolo ye e šomago gabotse, ya maleba le ye e kgokagantšwego ya go rerišana le setšhaba ka ga mahlale, le kabo le phihlelelo ye e kaonafetšego ya mananeokgoparara a dinyakišišo. Otla kaonafatša gape go arabela le go šoma gabotse ga tlhabollo ya dinyakišišo le kabo ya boithomelo, go kaonafatša boleng bja bophelo bja maAfrika Borwa ka go amantšha bokaone le dilo tšeo mmušo o di beilego pele.
3. Diphetho tše bohlokwa tša Kabinete
3.1. Kabinete e amogetše Sengwalwatšhišinywa ka ga Phethagatšo ya Mošomo ka Maphodisa. Sethalwa se sa Sengwalwatšhišinywa se gatišitšwe la mathomo gore se tle se swayeswaywe ke setšhaba ka Hlakola 2015. Sengwalwa se se hlagiša gore tirelo ya maphodisa yeo e tšeago lehlakore go go kgatha tema ga badudi ka mafolofolo ebile se arabela seemo sa bjale sa go phethagatša mošomo wa maphodisa.
Se hlagiša gape Tirelo ya Maphodisa ya Afrika Borwa le ya maphodisa a ka ditoropong yeo e nago le boikarabelo le ya sephrofešenale. Sengwalwatšhišinywa se se ipiletša gape gore go hlongwe Lekgotlataolo la Maphodisa la Bosetšhaba leo, gareng ga mešomo ye mengwe ya lona, le tlago rwala boikarabelo bja go hloma dinyakwa tšeo di nago le maikemišetšo tša go goketša, go kgetha le go thwala bašomi ba baswa ka go tirelo ya maphodisa.
3.2. Kabinete e amogetše Sengwalwatšhišinywa ka ga Polokego le Tšhireletšo. Sengwalwatšhišinywa se, seo se šetšego se phatlaladitšwe go tla gore go tle go rerišanwe ka sona le setšhaba ka Dibokwane 2015, se lebeletše kudu mokgwa wo o kopantšwego le wa tlhabollo ka ga polokego go feta mošomo wa maphodisa.
Se nyaka go fa tlhahlo ka ga magato a polokego a thibelo ya bosenyi go ditšhaba. Sengwalwatšhišinywa se se bolela ka ga dikgoro ka moka tša maleba le mekgatlo ya setšhabeng yeo e tsenyago letsogo ka polokegong ya ditšhaba.
3.3. Kabinete e dumeletše Molawana wo o thadilwego ka ga Tiro ya Setlwaedi sa Lebollo ka Afrika Borwa gomme ya dumelela Kgoro ya Merero ya Setšo go thomiša go ngwala sethalwa sa molao wa bosetšhaba ka ga lebollo. Molawana wo o šetše o sepetše ka tshepedišo ye e tseneletšego ya ditherišano le setšhaba le bakgathatema ba maleba.
Molawana wo o hlagiša ditlhahli tšeo di netefatšago gore go ba le tšhireletšo ya ditlwaedi tša setšo tša lebollo la bašemane ba bannyane leo le swarwago ngwaga ka ngwaga ka ntle le go bea polokego ya bona kotsing. Se se bopa karolo ya dikgato tšeo mmušo o di tšeago go maatlafatša leswa ditlwaedi tša maleba le tšeo di amogelegago. O bušetša sekeng maemo ao a amogelegago a boikarabelo go bao ba sepetšago dikoma tša lebollo le go batswadi bao ba romelago bana ba bona mo dikomeng tše.
3.4. Kabinete e dumeletše ditšhišinyo tše di dirilwego ke Komiti ya Diphatišišo ka ga kgonagalo ya kgwebišano ka manaka a ditšhukudu bjalo ka ye nngwe ya dikgetho tša go boloka ditšhukudu tša ka mo nageng.
Ditšhišinyo tše di ile tša thekgwa ke Komitikeletšo ya Lebakanyana ya Dikgoro gomme go ile gwa thwalwa Komiti ya Dikgoro tše mmalwa go nyakišiša kgonagalo ya go bea molaong kgwebo ya kgwebišano ya boditšhabatšhaba ka manaka a ditšhukudu.
Ditšhišinyo tše di thekga mokgwa wa Afrika Borwa wo o kopantšwego wa taolo ya togamaano mabapi le go rarolla go tsoma ditšhukudu le go gweba ka manaka a tšona fao go sego molaong. Komiti ye e šišinya gore mokgwa wa bjale wa go ba le maemo a dipalopalo tša ditšhukudu ka mo nageng o tšwetšwe pele kgahlanong le go gweba ka manaka a ditšhukudu. Mokgwa wo wa togamaano wa ka mo nageng o ra gore go be le tšhireletšo; maatlafatšo ya setšhaba; taolo ya diphedi; ditlhagišo tša melao tše di arabelago tšeo di tsenywago tirišong ka maleba le go phethagatšwa; le Taolo ya nyakego.
3.5. Kabinete e dumeletše ditlhamo tše di latelago tša ditšhelete tša tšhipi tša segopotšo tša 2016:
a) Molokoloko wa Ditšhelete tša Tšhipi tša Diphedi tša Bosetšhaba – Lesolo la Dikatse tše Kgolo: ‘Lengau’.
b) Molokoloko wa ditšhelete tša tšhipi tša korone ya silibere le tša diteke ka ga ‘Ditlhamo tša Afrika Borwa –‘Dolosse’.
Ditlhamo tše tša ditšhelete tša tšhipi, gammogo le ditsebagatšosemmušo tša tšona, di tla gatišwa ka gare ga Kuranta ya Mmušo, gomme go tloga fao di tla dirwa le go rekišwa ka go diriša ditshepedišo tše di tlwaelegilego.
4. Ditiragalo tše di tlago
4.1. Mopresidente Zuma o tla re gareng ga la 18 le la 22 Moranang 2016 a tšea maeto a mošomo go leba go dinagamaloko tša Selekane sa Mabapi le Metšhelo ya Dithoto sa Dinaga tša Borwa bja Afrika (SACU) tše di akaretšago Namibia, Botswana, Lesotho le Swaziland. Diketelo tše di tla maatlafatša tema ye bohlokwa yeo SACU e e ralokago go tšwetša pele kopanyo ya ka seleteng le tlhabollo ya ekonomi ya maloko ka moka.
4.2. Mopresidente o tla tsenela Ketelo ya Semmušo go la Rephabliki ya MaIslamo ya Iran ka la 23 le la 24 Moranang 2016 go maatlafatša ditherišano tša sepolotiki le tša ekonomi magareng ga dinaga tše ka bobedi.
4.3. Mopresidente o tla eta pele meketeko ya Letšatši la Tokologo la Bosetšhaba ka la 27 Moranang 2016 ka Limpopo, Lepatlelong la Giyani ka fase ga morero wa: “Mmogo re aga ditšhaba tše kaone – Mmušo wa Selegae ke taba ya motho yo mongwe le yo mongwe”.
Kabinete e ipiletša go maAfrika Borwa ka moka le mafapha go bontšha go rata naga ya bona ka go kgatha tema ka ditiragalo tša mehutahuta tša go keteka segopotšo sa Kgwedi ya Tokologo.
4.4. Mo dibekeng tše di tlago, Palamente e tlo swara Dipolelo tša Ditekanyetšo tša dikgoro. Dihlogophethiši tša maleba tša dikgoro di tla hlagiša dipeakanyo tša phethagatšo ya mošomo ka ngwageng wa ditšhelete wa 2016/17. Maloko a setšhaba a tla tsebišwa ka ga mananeo a mmušo a kabo ya ditirelo.
5. Maemo a kabinete go merero ye bohlokwa seemong sa bjale
5.1. Kabinete e amogetše phetolo le go kgopela tshwarelo ka moragonyana fao go dirilwego ke Mopresidente Zuma go kahlolo ya Kgorotsheko ya Molaotheo mabapi le go obamela dikgato tša kimollo tše di beilwego ka gare ga Pego ya Mošireletši wa Setšhaba.
Kabinete e sa lekodišiša kahlolo ye go tseba ge eba go na le magato afe goba afe ao a ka tšewago go maatlafatša mošomo wa Tirelo ya Setšhaba.
Kahlolo ya Kgorotsheko ya Molaotheo e maatlafatša leswa le go tiišetša temokrasi ya molaotheo ya Afrika Borwa.
5.2. Kabinete e lemogile dikgato tše di tšerwego ke dipanka tše nne tšeo di filego tsebišo ya go tswalela akhaonte ya khamphani. Le ge Kabinete e lemoga melawana le dipeelano tša dipanka tše, ditiro tše di ka šitiša babeeletši ba ka moso bao ba ka nyakago go dira kgwebo ka Afrika Borwa. Kabinete e kgopetše gore Tona ya Ditšhelete, ya Bašomi le ya Methopo ya Diminerale di swanetše go thomiša ditherišano tše di kwagalago le dipanka tše go hwetša tharollo ya go ya go ile ka ga taba ye.
5.3. Kabinete e lebogišitše Tona ya Maphelo, Ngaka Aaron Motsoaledi, yo a amogetšego sefoka sa boditšhabatšhaba sa USAID-TB sa go lemoga boetapele bja gagwe ka ntweng ya lefase ka bophara ya go lwantšha bolwetši bja mafahla (TB) gammogo le ge a etile pele masolo a Afrika Borwa le a ka seleteng mabapi le go lekodišiša, kalafo le thibelo ya TB; phetetšommogo ka TB/HIV le ka ga TB ya go šita diokobatši tše ntši.
5.4. Kabinete e amogela go šišinywa ga Afrika Borwa bjalo ka moamogedi wa 2016 wa Sefoka sa Tirelo ya Botseta bjo bo Hlomphegilego ke Lekgotla la Merero ya Lefase ka Washington, DC. Bjalo ka naga ya mathomo ya Afrika go amogela sefoka se, se lemoga boikgafo bjo bo kgahlišago go thuto ya lefase ka bophara, go merero ya boditšhabatšhaba le go dikgokagano tša lefase ka bophara go tšwetša pele dikgahlego tša rena tša bosetšhaba.
Kabinete e reta Tona ya Dikamano le Tirišano ya Boditšhabatšhaba, Mohumagadi Maite Nkoana-Mashabane, go seabe sa gagwe go ditherišano tša Afrika Borwa maemong a boditšhabatšhaba, tšeo di hlohleletšwago ke nepo ya “khonthinente ya Afrika ye e kopanego ye e nago le khutšo, ya temokrasi, ya go hloka kgethologanyo ya semorafe, ya go hloka kgethologanyo ya bong le ye e atlegilego, le yeo e tsenyago letsogo go lefase la toka leo le nago le tekatekano.”
5.5. Kabinete e amogela go thwalwa ga Moatbokheiti Jan Lekhoa Mothibi ka Mopresidente Zuma, bjalo ka Hlogo ya Lekala leo le Kgethegilego la Dinyakišišo, gomme e mo lakaletša mahlatse ka mešomong ya gagwe ye meswa ya go lwantšha bomenetša le taolompe.
5.6. Kabinete e lebiša mahloko a yona go ba lapa la Makwetu le go Pan Africanist Congress ka ga lehu la Morena Clarence Makwetu. Morena Makwetu o tla gopolwa ka ga seabe sa gagwe se segolo le ditšhitelego tše a bilego le tšona mabapi le boikgafo go lesolo la go tokologo le ka go hlomeng ga Afrika Borwa ye mpsha ya temokrasi. Mopresidente o begile gore go tla swarwa Poloko ye e Kgethegilego ya Semmušo ya Profense ya go boloka mogale yo wa go lwela tokologo.
5.7. Kabinete e lebiša mahloko a yona go ba lapa la Naidoo ka ga go hlokofala ga Morena Kumaran Naidoo. Morena Naidoo e be e le Molaodipharephare wa Motšwaoswere wa Kgoro ya Tlhabollo ya Ekonomi. Mo lebakeng leo le fetilego o šomile bjalo ka Mohlankedimogolo wa Ditšhelete wa Kgoro ya Kgwebišano le Diintasteri.
Morena Naidoo o tsentše letsogo kudu ka taolong ya ditšhelete ka gare ga Tirelo ya Maphodisa.
5.8. Kabinete e hlagišitše tebogo ya yona ka ga seabe seo se dirilwego ke Morena William Smith, yo a šomilego bjalo ka Mongwaledi wa Kabinete. Morena Smith o rotše modiro mafelelong a Hlakola ka morago ga go šomela Tirelo ya Setšhaba mengwaga ye 27. Kabinete e mo lakaletša mahlatse nakong ya ge a rotše modiro.
6. Kabinete e sedimošitšwe ka ga Pego ya Khomišene ya Diphatišišo ka ga Dikgonono tša Tsogolekobong, Bomenetša, Maitshwaro a go se amogelege goba Ditiro tša go se obamele melao ka go Lenaneo la Togamaano la Go reka Dibetša tša Tšhireletšo ya Naga (Khomišene ya mabapi le go Reka Dibetša) yeo e lokollotšwego ke Mopresidente mesong ya lehono.
Pego ye ga se ya hwetša bohlatse bja go dira diphošo, bja pipamolomo, bja tsogolekobong, bja bomenetša ka tshepedišong ya go reka dibetša. Bjalo ka Mmušo re amogela dikutollo tša Khomišene. Re lokollotšwe go dipharomolato ka ge re be re bolela mo mengwageng ye mentši gore ga go na phošo ye re e dirilego le gore go reka dibetša go be go dirwa ka mekgwa ya maleba ye e swanetšego.
Re holofela gore dikutollo tše di tla tswalela taba ye e lego kgale go bolelwa ka yona.
Re ba le Mopresidente Zuma ge a leboga Moahlodi Willie Seriti le Moahlodi Thekiso Musi, dihlatse ka moka, go akaretšwa Mopresidente wa peleng Thabo Mbeki, baetapele ba bohlatse, dihlopha tša baboleledi ba molao, bašomi le bao ba tsentšego letsogo go dira gore mošomo wa Khomišene o atlege.
7. Bao ba thwetšwego mešomong
Batho ka moka bao ba thwetšwego mešomong mangwalo a bona a dithuto a tla tiišetšwa le go netefaletšwa ka maleba.
7.1. Morena Siyabonga Gama bjalo ka Molaodiphethiši le Morena Garry Pita bjalo ka Mohlankedimogolo wa Ditšhelete wa Transnet.
7.2. Morena Lufuno Leslie Nevhutalu bjalo ka leloko la Lekgotlatlhabollo la Intasteri ya Boagi.
7.3. Morena Andile Nongogo bjalo ka Mohlankedimogolophethiši wa Setheo sa Lefapha la Tirelo ya Thuto le Tlhahlo.
7.4. Balaodiphethiši bao e sego ba dinako ka moka go Lekgotlataolo la Setheo sa Dinamelwa tša Tseleng tša go Putla Mellwane:
a) Morena Raymond Dennis Baloyi;
b) Mohumagadi Keitumetse Mahlangu;
c) Mohumagadi Ignatia Dikeledi Sekonyela;
d) Morena Mosoenyane Ramathe;
e) Moprofesara Jan Havenga; le
f) Morena Lucky Lempiditse Thekisho.
Dipotšišo: Liezil Cerf
Mogala: 076 778 2380
