O ka mpshafatša laesentshe ya gago ya thelebišene inthaneteng, Posong ya kgauswi le wena goba ka dikantorong dife goba dife tša selete tša Tirelokgašo ya Afrika Borwa (SABC) le mafelong a go lefela ditirelo. Laesentshe ya thelebišene e mpshafatšwa ngwaga o mongwe le o mongwe. Mekgatlo, go akaretšwa dikgwebo, di swanetše go ba le laesentshe ya thelebišene go thelebišene ye nngwe le ye nngwe ye di nago le tšona. Malapa a swanetše go ba le laesentshe e tee ya thelebišene fela go dithelebišene ka moka tše di lego ka ntlong, ge fela e le gore ka moka ga tšona ke tša motho o tee.
Matšatšikgwedi a go mpshafatša dilaesentshe tša dithelebišene a beakantšwe ka dikgwedi tše 12. Kgwedi ya go mpshafatša laesentshe ya thelebišene e laolwa ke tlhaka ya mathomo ya sefane sa gago goba, ka go le lengwe, e ka laolwa ke kgwedi yeo o rekilego thelebišene ya gago ka yona.
Hwetša dintlha ka botlalo mabapi le go mpshafatša laesentshe ya thelebišene go Tirelokgašo ya Afrika Borwa (SABC) goba ikgokaganye le SABC go 011 330 9555.
E-mail: tvlic.info@sabc.co.za
