Ge e le gore dipampiri tša gago tša boitsebišo di tšwa Afrika Borwa ebile di tla šomišwa ka nageng ye nngwe sa mathomo di swanetše di "tiišetšwe" goba di "tsenywe molaong". Ye ke tshepedišo yeo e lego gore ditempe tša mehutahuta di bewa godimo ga dipampiri tša boitsebišo gore di kgone go tsebja bjalo ka dipampiri tša boitsebišo tše di lego molaong ka dinageng tše dingwe.
Lefapha la Go tsenya dipampiri tša boitsebišo molaong la Kgoro ya Dikamano le Tšhomišano ya Boditšhabatšhaba le ka aba Setifikeiti sa maleba sa Tumelelo ya Dipampiri bjalo ka tše di lego molaong go latelwa melawana ye e latelago:
- Ge dipampiri tšeo di sa le molaong.
- O swanetše go eletša Lefapha la Go tsenya dimpampiri tša boitsebišo molaong ka nageng yeo dipampiri tšeo di tlogo šomišwa gona go dumelela lefapha leo go tseba ge eba Tumelelo ya Dipampiri bjalo ka tše di lego molaong goba ge eba Setifikeiti sa Tiišetšo se a nyakega.
- Go eya ka mohuta wa dipampiri tšeo, sa mathomo o swanetše go kgopela gore dimpapiri tšeo tša boitsebišo di tempiwe/di saenwe ke kgoro ya maleba goba ke sehlongwa sa maleba; ke Maseterata, ke Maseterata wa tlaleletšo goba ke Motlatšamaseterata; goba ke Mongwadiši goba Motlatšamongwadiši wa Kgorotshekokgolo ya Afrika Borwa pele ga ge Lefapha la Go tsenya dipampiri tša boitsebišo molaong le ka fa Tumelelo ya maleba ya Dipampiri bjalo ka tše di lego molaong goba Setifikeiti sa Tiišetšo.
Dipampiri tše di latelago ga di dumelelwe:
- Dipampiri tše di ngwadilwego ka boripana goba dikgatišo tša go tšwa khomphutheng.
- Dikhopi tše di setifailwego tša lenyalo, tša matswalo, tša lehu goba disetifikeiti tše di tiišeditšwego ke maphodisa.
- Dikhopi tše di setifailwego tša Maemo ka ga Lenyalo (tša go hloka thibelo ya lenyalo) goba Bohlatse bja Bodudi.
- Dikhopi tše di setifailwego tša dipampiri tša maeto goba dipampiri tša boitsebišo.
- Dipampiri tše di tsentšwego molaong ke Bakhomišenare ba Boikano go ba dikhopi tša mmakgonthe tša dingwalwa tša mathomong, di ka se amogelwe gomme di swanetše go išwa go Ramolao wa Setšhaba (ramolao yo a ngwadišitšwego Kgorotshekokgolo).
Bala tše ntši ka ga go tsenya molaong ga dipampiri tša semmušo, ikgokaganye le Lefapha la Go tsenya dipampiri tša boitsebišo molaong mo nomorong ye ya mogala ya 012 351 1726 goba emeileng ya legalisation@dirco.gov.za.
