Thušo ya tšhelete

Ka ga
Seo o swanetšego go se dira
Lebaka
E dira tshenyagelo ya bokae
Diforomo tšeo di swanetšwego go tlatšwa
Dintlha tša boikopanyo

 

 

Ka ga thekgo ya thušo

A o phela ka thušo ya leago eupša ga o kgone go ihlokomela? O ka hwetša koketšo ya thušo go lefela motho yo a o hlokomelago dinako ka moka.  

O tseba bjang gore o a dumelelwa?

O swanetše go ba e le gore: 

  • o šetše o hwetša thušo ya bogole, thušo ya beng ba ntwa goba thušo ya batšofadi
  • ga o kgone go ihlokomela ka lebaka la bogole bja gago bja mmele goba bja monagano, gomme ka fao o hloka tlhokomelo ya dinako tšohle go tšwa go motho yo mongwe 
  • ga o hlokomelwe lefelong leo le amogelago thušo go tšwa go mmušo ya tlhokomelo goba bodulo bja gago.  

O tla amogela bokae?

Thušo yeo o tla e amogelago ke R500 ka kgwedi.  

O tla lefelwa bjang?

Tirelo ya Tšhireletšo ya Leago ya Afrika Borwa (SASSA) e tla lefela thušo go wena go ya ka ye nngwe ya ditsela tše di latelago:

  • tšhelete lefelong le le itšego la tefelo ka letšatši leo le itšego
  • peo ya elektroniki ka gare ga akhaonte ya gago ya panka goba panka ya poso (panka e ka go lefišetša tirelo ye) 
  • lefelo leo le dirago bjalo ka mongwadiši wa thušo (mohlala, lefelo la bohloki).

Thušo ye e tla lefelwa gotee le thušo ya gago ya leago. 

Ela hloko: Ge eba o hlolega go amogela tšhelete ka bowena, o ka šupa mongwe yoo e tla ba go moemedi wa gago kantorong ya SASSA, goba wa fa mongwe maatla a molao gore a kgone go amogela tšhelete yeo legatong la gago.

Thušo ya gago e ka lekodišišwa neng?

Thušo ya gago e ka lekodišišwa ge thušo ya leago yeo e amanago le yona e lekodišišwa. 

Seo o swanetšego go se dira

  • E ya go kantoro ya Tirelo ya Tšhireletšo ya Leago ya Afrika Borwa (SASSA) kgauswi le moo o dulago gomme o tle le tše di latelago:
    • pukwana ya gago ya boitsebišo ya dinomoro tše 13
    • bohlatse bja maemo a gago a lenyalo le boitsebišo bja molekane ge a le gona 
    • pego ya maphelo goba pego ya kelo (ya go se fete dikgwedi tše tharo ka bokgale) yeo e laetšago gore o hloka tlhokomelo ya dinako ka moka.  

Ela hloko: Ge eba o tšofetše kudu goba o lwala kudu moo o palelwago ke go etela kantoro go dira kgopelo, moleloko goba mogwera a ka dira kgopelo legatong la gago. Motho yoo o swanetše a tšee lengwalo go tšwa go wena le/goba tsebišo ya ngaka yeo e rego o ka se kgone go etela kantoro.

  • Tlatša foromo ya kgopelo pele ga mohlankedi wa SASSA (ela hloko gore ke wena fela bjalo ka moputseletšwa goba mohlankedi wa SASSA bao le ka tlatšago foromo ya kgopelo). Mohlankedi o tla go botšolotša gomme a go botša ge eba o a dumelelwa go amogela thušo.  
  • O tla fiwa setlankana. Se boloke bjalo ka bohlatse bja gore o dirile kgopelo.  

Go direga eng ge eba kgopelo ya gago ga se ya dumelelwa?

Ge eba kgopelo ya gago ga se ya dumelelwa, SASSA e tla go tsebiša ka lengwalo gore ke ka lebaka la eng e se ya dumelelwa. 

Ge eba ga o dumelelane le sephetho, o ka lebiša ngongorego go Tonakgolo ya Tšwetšopele ya Leago.  O swanetše o dire ngongorego mo matšatšing a 90 ge o se no tsebišwa gore kgopelo ya gago ga se ya dumelelwa. 

Lebaka

  • E ka tšea lebaka la dikgwedi tše tharo go sepediša kgopelo ya gago. 
  • Ge eba thušo ya gago e dumeletšwe, o tla lefelwa go tloga ka letšatši leo o dirilego kgopelo ka lona.  

E dira tshenyagelo ya bokae

Tirelo ga e lefelwe.

Diforomo tšeo di swanetšwego go tlatšwa

Diforomo tša kgopelo ga di hwetšagale inthaneteng, eupša o ka di hwetša kantorong ya kgauswi le wena ya (SASSA).

Dintlha tša boikopanyo

Tirelo ya Tšhireletšo ya Leago ya Afrika Borwa (SASSA)

 

 

SASSA Toll free: 0800 60 10 11
Email:  GrantEnquiries@sassa.gov.za  

Share this page