Thušo ya bogole

Ka ga
Seo o swanetšego go se dira
Lebaka
E dira tshenyagelo ya bokae
Diforomo tšeo di swanetšwego go tlatšwa
Dintlha tša boikopanyo

 

 

Ka ga thušo ya bogole

Ge eba o na le bogole bja mmele goba monagano bjoo bo dirago gore o palelwe ke go šoma, lebaka la go feta dikgwedi tše tshela, go ra gore o ka dira kgopelo ya thušo ya bogole. 

O hwetša thušo ya go ya go ile ge eba bogole bja gago bo tla tšwela pele go feta lebaka la ngwaga gomme o hwetša thušo ya bogole ya motšwaoswere ge eba bogole bja gago bo tla tšwela pele lebaka la dikgwedi tša ka fase ga tše tshela gomme e se go feta dikgwedi tše lesomepedi. Thušo ya bogole ya go ya go ile ga e re gore o tla amogela thušo bophelo ka moka, eupša e ra gore e tla tšwela pele go feta dikgwedi tše 12.

Ke tseba bjang gore ke a dumelelwa go hwetša thušo? 

Go hwetša tumelelo, o swanetše:

  • o be modudi wa Afrika Borwa goba moagi wa go ya go ile goba mofaladi gape o dula ka Afrika Borwa ka nako ya kgopelo
  • o be magareng ga mengwaga ye 18 go fihla go ye 59.
  • go ba o sa hlokomelwe ka lefelong la mmušo 
  • o be le pukwana ya boitsebišo ya go khoutiwa ka dinomoro tše 13
  • go ba ga o gole go feta R86 280 ge eba ga wa nyala goba R172 560 ge eba o nyetše.
  • Dithoto tša gago ga tša swanela go feta R1 227 600 ge eba ga wa nyala goba R2 455 200 ge eba o nyetše.
  • o tliše direkoto le dipego dife goba dife tša peleng malebana le maphelo ge o dira kgopelo gape le ge kelo e dirwa.

Ngaka e tla tlatša pego gomme ya fetišetša pego go SASSA (South African Social Security Agency).

Pego e dumeletšwe lebaka la dikgwedi tše tharo go tloga ka letšatšikgwedi leo o etšwego ka lona.

Ela hloko: Ge eba o ka fase ga mengwaga ye 18 gomme o nyaka tlhokomelo ya go ya go ile bogoleng bja gago, mohlokomedi wa gago wa motheo a ka dira kgopelo ya Thušo ya Thekgo ya Tlhokomelo. Ge eba ga o na pukwana ya boitsebišo, o tla swanela ke go tlatša bohlatse gomme o fane ka bohlatse bja gore o dirile kgopelo ya tokumente go Kgoro ya Merero ya Selegae. Ge eba ga se wa dira kgopelo ya tokumente, o tla swanela ke go dira kgopelo le Merero ya Selegae mo nakong ya dikgwedi tše tharo ya go dira kgopelo ya thušo. 

Otlo lefelwa bokae?

Otlo lefelwa tekanyo yago lekana le R2 090 ka kgwedi.

O tla lefelwa bjang?

Thušo e tla lefelwa go wena ka ye nngwe ya ditsela tše di latelago: 

  • tšhelete lefelong le le itšego la tefelo ka letšatši le le itšego
  • peo ya elektroniki ka gare ga akhaonte ya gago ya panka, go akaretšwa le Postbank (panka e ka go lefišetša tirelo ye)
  • lefelo leo le sa thekgego ke Mmušo ka matlotlo – mohlala, legae la batho bao ba nago le bogole.

Thušo ya gago e ka fegwa neng?

Tše di latelago di ka dira gore thušo ya gago e fegwe: 

  • ge maemo a gago a fetoga
  • dipoelo tša tekodišišo
  • ge o ka hlolega go dirišana ge thušo ya gago e lekodišišwa 
  • ge o dira botsotsi goba o sa ikemele bonneteng 
  • ge eba go bile le phošo ge thušo ya gago e amogelwa.

Thušo ya gago e ka fetšišwa neng?

Thušo e tla fetšišwa ge o:

  •  hlokofala
  • ka amogelwa lefelong la mmušo
  • ka se amogele thušo ya gago lebaka la dikgwedi tše tharo tša go latelana 
  • ka se be gona ka mo nageng.

Ge mohlokomelwa a amogelwa institšušeneng ye e nago le kontraka le mmušo malebana le go hlokomela motho yoo, krante ya leago e fokotšwa go fihla 25% (R285) ya palomoka ya tšhelete ka moka go tloga ka kgwedi ya bone mola mohlokomelwa a amogelwago institšušeneng yeo. Krante ye e fokoditšwego e tlo oketšwa go tloga ka nako yeo mohlokomelwa a sa hlwego a dulago institšušeneng yeo.

Sesotho sa leboa: disability grant

Seo o swanetšego go se dira

  1. Tlatša foromo ya kgopelo ya thušo ya bogole kantorong ya Tirelo ya Tšhireletšo ya Leago ya Afrika Borwa (SASSA)  kgauswi le wena  pele ga mohlankedi wa SASSA
  2. Romela tše di latelago:
    • Pukwana ya gago ya boitsebišo ya go khoutiwa ka dinomoro tše 13.  Ge eba ga o na pukwana ya boitsebišo:
      • o swanela ke go tlatša bohlatse godimo ga foromo ya molao ya SASSA pele ga Mokomišinare wa Boikanyo yoo e sego mohlankedi wa SASSA
      • o swanetše o tliše setatamente seo se netefaditšwego gomme se saenilwego ke motho wa maleba (go swana le mokhanselara, moetapele wa setšo, modiredi wa leago, tonakgolo ya sedumedi goba hlogo ya sekolo) yoo a ka netefatšago leina le mengwaga ya gago
      • mohlankedi wa SASSA o tla tšea dikgatišo tša gago tša menwana. O tla romelwa go Kgoro ya Merero ya Selegae go dira kgopelo ya ID le ge kgopelo ya gago e tšwetšwapele. Ge o sa hwetše pukwana ya gago ya boitsebišo, thušo ya gago e tla fegwa
    • pego ya maphelo le kelo yeo e šomago tšeo di netefatšang bogole bja gago
    • bohlatse bja maemo a lenyalo (ge eba bo gona) 
    • bohlatse bja madulo 
    • bohlatse bja letseno, dikamogelo (ge eba di gona) 
    • bohlatse bja dithoto, go akaretšwa le boleng bja mmasepala bja thoto ya gago 
    • bohlatse bja phenšene ya gago ya poraebete (ge eba bo gona) 
    • ditatamente tša kgwedi tše tharo tša panka ya gago 
    • pukwana ya boitsebišo ya go khoutiwa ka dinomoro tše 13 
    • tumelelo ya maemo a bofaladi le pukwana ya boitsebišo ya dinomoro tše 13 ya bofaladi
    •  Sekhwama sa Inšorense ya go se šome (‘plukhate’) goba setifikeiti sa tokollo go tšwa go modirelwa wa gago wa peleng ge eba o be o šoma 
    • khopi ya wili le mekitlana ya mathomo le ya mafelelo ge eba molekani wa gago o hlokofetše mo mengwageng ye mehlano ya go feta.
  3. Ka morago ga go romela kgopelo ya gago o tla fiwa setlankana seo o tla se swarago bjalo ka bohlatse bja kgopelo.  

Go direga eng ge kgopelo ya gago e se ya dumelelwa? 

Kantoro ya tšhireletšo ya leago e tla go tsebiša ka go go ngwalela ge eba kgopelo ya gago e tšweletše goba aowa. Ge eba thušo ya gago ga se ya dumelelwa, kantoro ya tšhireletšo ya leago e tla go fa mabaka a gore ke ka lebaka la eng e se ya dumelelwa gomme o ka lebiša ngongorego ya gago go Tonakgolo ya Tšwetšopele ya Leago ka go ngwala, o hlaloša gore ke ka lebaka la eng o sa dumele.

Dira ngongorego mo nakong ya matšatši a 90 ge o se no amogela tsebišo ka ga dipoelo tša kgopelo ya gago. 

Lebaka

  • E ka tšea lebaka la go fihla dikgwedi tše tharo go sepediša kgopelo ya gago.
  • Ge eba thušo ya gago e dumeletšwe, o tla lefelwa go tloga ka letšatši leo o dirilego kgopelo ka lona.  

E dira tshenyagelo ya bokae

Tirelo ga e lefelwe.

Diforomo tšeo di swanetšwego go tlatšwa

  • Foromo ya kgopelo
  • Lengwalo la thomelo 
  • Pego ya maphelo.

Diforomo tše di hwetšagala kantorong ya kgauswi le wena ya tšhireletšo ya leago (SASSA).

Dintlha tša boikopanyo

Tirelo ya Tšhireletšo ya Leago ya Afrika Borwa (SASSA)

 

SASSA Toll free: 0800 60 10 11
Email:  GrantEnquiries@sassa.gov.za  

Share this page