Kgopelo ya thušo ya tšhelete go ya ka lenaneo la Kabelo ya Naga ya Tšweletšo ya tša Temo

Lenaneo la kabelo ya Naga ya Tšweletšo ya tša Temo (LRAD) le hlamilwe go thuša badudi bao ba bego ba phaetšwe thoko ba ditšhaba tša ba Baso, baMmala le maIndia go reka naga goba didirišwa tša temo ka go medirong ya temo.

Go akaretšwa, o swanetše go

ba leloko la sehlopha seo se bego se phaetšwe thoko (ba Baso, baMmala le maIndia)
ba le mengwaga ye 18
ikemišetša go šomiša naga mo mabakeng a temo fela
ikemišetša go lema ka dinako tšohle
se be ka sekgobeng sa mošomo wa dihlangwa tša mmušo
ikemišetša go tšea karolo ka go lenaneo la tlhahlo morago ga go hwetša naga
go ba mo maemong a go ka tsenya seabe
ba setho seo se kopanego ge e le gore le kgopela bjalo ka sehlopha
go ba le akhaonto ya panka.

Balemi bao ba tšwelelago bao ba nyakago go godiša mediro ya bona, ba ka kgopela thušo ye ngwe ya ditšhelete, fela palomoka ya thušo ya (LRAD) ya mokgopedi o tee ga ya swanela go feta R100 000. Tšhelete ye nngwe ya go thoma goba go tšwetša pele porotšeke ya temo e swanetše go hwetšwa pankeng.

Thušo ya (LRAD) ga e nlefelwe morago bjalo ka kadimo. Go šomišwa mokgwa wa go bala wo o beilwego (fomula) go hwetša gore motho o tla fiwa bokae. Kgotsofatšo ya go ka thušwa ka R20 000, o swanetše go tsenya R5 000. Tsenyo ga se ya tšhelete – e ka nna ya ba didirišwa tša temo, diruiwa le tše dingwe tša temo. Le wona mošomo wo o ka o tsenyago ka go porotšeke o tla balwa bjalo ka tsenyo ya motheo.

Tsela e latelwago

Hwetša naga yeo o nyakago go e reka. Nakong ye nngwe, o ka be o šetše o na le naga, bjalo ka naga ya setšhaba.
Ikopanye le Kgoro ya Merero ya Naga goba mohlankedi wa selegae wa tšweletšo ya temo go kgopela thušo ya tšhelete.
Iša tšeo di latelago ga mmogo le kgopelo ya gago:
- tšhišinyo ya tšhomišo ya naga goba peakanyo ya polase (tšhišinyo ya porotšeke)
- kgetho ya go ekiša ka theko yeo e kwanetšwego, ge o hira ka maikemišetšo a go reka
- maina a maloko a lapa goba maloko a sehlopha, ge tšhišinyo e le ya sehlopha
- netefatšo ya gore kwano ga e na mathata, ga se naga ya pušetšo go beng, e ngwadišitšwe ka leina la morekiši le gore tšhelete yeo e kwanetšwego ga e fete boleng bjo bo dumelelegago bja mebaraka
- bohlatse bja gore tshelete yeo e šetšego ya tefelo e gona (tšhelete ya gago goba konteraka ya kadimo ya mohlamobe)
- pego ya hlahlobo.

Nako ya tšweletšo ya mošomo

Tshepetšo e tla tšea bonnyane dikgwedi tše nne fela ge porotšeke e le mararankodi, e ka tšea sebaka se se teletšana.

Tefelo

Tšhelete ya ka tlase ya go lekana R20 000 e tla nyaka tšhelete ya seabe sa gago ya bonnyane bja (tshelete goba ka mokgwa wo mongwe) wa R5 000. Tšhelete ya ka godimo ya R100 000 e tla nyaka tšhelete ya seabe sa gago ya bonnyane bja R400 000. Magareng ga bonnyane le bogolo bja tšhelete, go na le difarologano tša ditšhelete tša thušo, go e ya ka seabe seo se tsenywago ke motšeakarolo.

Diforomo tšeo di tlatšwago

O tla fiwa foromo go e tlatša mo kantorong ya porofensi ya Kgoro ya Merero ya Naga goba kantorong ya tšweletšo ya tša temo ya selegae.

Mafelo le diatrese

Department of Rural Development and Land Reform