Inarha yombuso (inarha elawulwa mbuso ophakathi namkha wesifunda namkha umasipala) nenarha yangeqadi ingahlalwa ngokungasi semthethweni.
Urhulumende unesibopho somthethosisekelo sokuqinisekisa – lapho kudingeka khona neensetjenziswa zikhona – kobana zoke izakhamuzi zithabele ilungelo lazo lokufumana inarha nezindlu. Lapho abantu bazibeka endaweni ngobunengi, urhulumende unomsebenzi ofanako wokusiza abanini benarha yangeqadi ukuvikela inarha yabo.
Lapho abantu bazibeka ngokungasi semthethweni begodu amalungelo wabo angakhahlumezeki kufanele baqotjhwe, kufanele umninindawo wangeqadi aye ekhotho msinyana ayokukhombela incwadi yokubaqotjha ukuya ngokomThetho wokuVikela ukuQotjhwa ngokungasi semthethweni nokuHlala eNarheni ngokungasi semThethweni, ka-1998 (umThetho we-19 ka-1998). Umthetho lo kwagadesi ulawulwa mNyango wezokuHlaliswa kwabaNtu begodu ngokukhamba kwesikhathi uzakudluliselwa emNyangweni wokuThuthukisa iiNdawo zemaKhaya nokuBuyekezwa kweNarha.
Lokha inarha yakho yangeqadi nayithethwe ngeemphanga ungaya:
- Ekhotho msinyazana wenzelele ukufumana incwadi yokuqotjha abantu labo ngokuya komthetho wokuVikela ukuQotjhwa okuNgasi semThethweni nokuHlala eNarheni ngokungasi semthethwenio, ka-1998.
- Nofana ngiyiphi i-ofisi yemNyangweni wezokuThuthukisa iiNdawo zemaKhaya nokuBuyekezwa kweNarha uyokufunyana isizo lokha inarha nayithethwe ngeemphanga ngombana abangenileko labo bayithethe ngomnqopho wokulima.
- Kumasipala wendawo namkha nakunefuneko umNyango wokuHlaliswa kwaBantu wesifunda namkha welizwe lokha abangene endaweni leyo bafuna izindlu.
UmNyango wokuThuthukisa iiNdawo zemaKhaya nokuBuyekezwa kweNarha uzaku:
- siza abahlali abangene ngekani labo bananyana ngiyiphi indawo yombuso namkha yangeqadi abadinga indawo yokulima ukuthi bafumane indawo efaneleko yokulima
- siza ezinye iinkhulu zombuso ukufumana indawo efaneleko yabazihlomele ngokungasi semthethweni abatlhoga izindlu
- nakunesidingo begodu kunabonobangela abakhethekileko, kusizwe abanini babasimu abathathelwe indawo ngabazihlomeleko ukobana bafumane indawo yokulima efaneleko.
Abantu abanganayo indawo yokulima bangaya emNyangweni wokuThuthukisa iiNdawo zemaKhaya nokuBuyekezwa kweNarha ukobana bafumane indawo yokulima efaneleko.
Abantu abadinga izindlu bangaya kumasipala wendawo namkha nakunefuneko baye emNyangweni wokuHlaliswa kwabaNtu wesifunda namkha welizwe bayokufumana isizo.
Nawufuna ilwazi elinabileko mayelana neendaba zokuthathwa kwenarha, thintana nomNyango wokuThuthukisa iiNdawo zemaKhaya noBuyekezwa kweNarha.
