Isibawo sokuletha ngenarheni namkha sokukhambisa imikhiqizo yenyama esetjenziweko ukudlula eSewula Afrika

Okuphathelene nokwenza isibawo sokuletha namkha sokudlulisa imikhiqizo yenyama esetjenziweko ukungena nokuphuma eSewula Afrika

Nayikuthi ufuna ukuletha ngenarheni inyama esetjenziweko (efana nephekiweko, ebilisiweko, namkha eyomisiweko) eSewula Afrika namkha ukukhambisa imikhiqizo enjalo idlule eSewula Afrika, kufuze wenze isibawo bewufumane imvumo yokuletha ngenarheni iinlwana enikelwa mNqophisi wezokuPhila kuhle kweenLwana. Kufuze ufumane imvumo le ngaphambi kobana umthwalo uphumela ngenarheni ethumelako. 

UmNqophisi wezokuPhila kuhle kweenLwana eSewula Afrika uzakukhupha imvumo yokuletha ngenarheni kuphela namkha yokuthutha imikhiqizo yenyama esetjenziweko eenarheni lapho imisebenzi yeenlwana nobujamo beenlwana buhlolwe bebavunywa.

Kunemithetho ehlukeneko yokuletha ngenarheni esebenza ngokuya kwemikhiqizo nobujamo bamaphilo weenlwana enarheni ngayinye. Njengombana ubujamo bezamaphilo butjhuguluka njalo, sibawa bona uthintane nobuNqophisi bezokuPhila kuhle kweenLwana.

Ukwenza isibawo seemvumo zokuletha ngenarheni imikhiqizo yenyama elethelwe ukwenza imali, kufuze kube ibuya emakhamphanini angaphakathi kweSewula Afrika namkha kumsebenzeli oseSewula Afrika okhethwe yikhamphani yeentjhabatjhaba. Iimvumo zokuletha ngenarheni zisebenza isikhathi esithileko kwaphela begodu nemthwalweni munye kuphela. Ipahla engena ngenarheni ebuya eenarheni zesithathu ayizukwamukelwa.

Imikhiqizo yenyama engeemumathini ezivalwe zangangenisa ummoya, nayo kufuze ifumane imvumo ebuya kwa-South African Bureau of Standards (SABS).

Okufanele ukwenze

1. Zalisa iforomo lesibawo sokuletha ngenarheni iinlwana namkha imikhiqizo ingene ngeSewula Afrika (i-Application to Import Animals or Animal Products Into South Africa).
2. Nayikuthi imikhiqizo ithuthwa ukudlula eRiphabhligini yeSewula Afrika, kufuze ulethe ikhophi yemvumo yakadorhodera weenlwana ebuya enarheni ekuzakuphelela kiyo umkhiqizo nesibawo semvumo yokudlulisa eSewula Afrika. 
3. Dibhozida imali yemvumo e-akhawuntini yebhanka:
   Igama lebhanka: Standard Bank of South Africa
   Igama lomnikazi we-akhawunti: National Department of Agriculture
   Inomboro ye-akhawunti: 011219556 International Band
   Igatja: 010845
   I-IB brand 0001982 Centre Code
   I-Swift Code: SBZA-ZAJJ
   Igama legatja: Arcadia.
4. Godu ungabhadela ema-ofisini womNyango wezokuLima, amaHlathi neenHlambi.
5. Ireferensi kufuze ibe ligama nesibongo somuntu oletha ngenarheni.
6. Thumela iforomo elizalisiweko nobufakazi bokubhadela ku:
   The Director: Animal Health
   Import Export Policy Unit
   Private Bag X138
   Pretoria
   0001
   South Africa.
7. Akunasibawo esizakusetjenzwa ngaphandle kobufakazi bokubhadela. Ubufakazi bokubhadela kufuze bufekselwe enomborweni ethi: 012 329 8292, buqaliswe ku: Ina Labuschagne.
8. Sibawa utjho eforomini lesibawo ukobana ingabe uzakuza uzokuthatha imvumo namkha ufuna iposwe na.  
9. Ukulandela ukufunyanwa kweforomo lesibawo elizalisiweko nobufakazi bokubhadela, imVumo yokuLetha ngenarheni iinLwana kanye nesiTifikethi sokuPhila kuhle kwesiLwana izakukhutjhwa iposelwe wena.
10. Kufuze ufumane isitifikethi sezamaphilo sesilwana esibuya eemphathimandleni zezeenlwana enarheni ethumelako ngaphambi kobana umthwalo uthunyelwe. Isitifikethi lesi sezamaphilo kufuze sikhambisane nobujamo obubekwe emvumeni yokuletha ngenarheni iinlwana yeSewula Afrika kanye neyenarha ethumelako. Nayikuthi ufuna elinye nelinye ilwazi ngeemfuneko zamakhophi womkhiqizo othileko, ungafumana amakhophi womfanekiso wemVumo yokuLetha ngenarheni isiLwana kanye nesiTifikethi sezamaPhilo sesiLwana e-ofisini elikhupha iimVumo. 
11. Kufuze ulethe okulandelako esiPhathisweni seSewula Afrika sokuLethwa ngenarheni esangweni lokungena:
    • imVumo yamaMbala yokuLetha ngenarheni isiLwana.
    • isiTifikethi samaMbala sezamaphilo sesiLwana.
12. Yoke imithwalo yemikhiqizo yenyama kufuze ihlolwe kwenye yeendawo ezitjhiwo emvumeni yokuletha ngenarheni:

• Durban - Tel. 031 337 4346/7
• Cape Town - Tel. 021 551 2050
• City Deep (kuphela nawubuya eenarheni ezibomakhelwana) Umtato 011 613 1636 

Nguwe ozakubhadela iimali zebhanka kanye neemali zebhanka yangaphandle. UmNyango awuzukukhupha imvumo nayikuthi imali epheleleko eyi-R120 ayikafunyanwa. (Ibuyekezwa unyaka nonyaka begodu ikhutjhwa eGazedini yomBuso).

Isikhathi esibekiweko

Nasele udorhodera weenlwana e-ofisini lesitjhaba avume imvumo yokuletha ngenarheni, kuthatha amalanga wokusebenza amathathu ukuya kwamahlanu ukukhupha imvumo.

Kubiza malini

R220

Amaforomo ekufanele uwazalise

Application to Import Animals or Animal Products Into South Africa

Ungathintana nobani