Imali yesibonelelo sokukhulisa umntwana

Okuphathelene 
Okufanele ukwenze
Isikhathi esibekiweko 
Kubiza malini
Amaforomo ekufanele uwazalise
Ungathintana nobani

 

 

Malungana nesibonelelo somrholo wokukhulisela umuntu umntwana

Thola isibonelelo somrholo wokukhulisela umuntu umntwana. Umntwana okhuliselwa omunye mntwana ikhotho emnikele ezandleni zakho kobanyana umkhulise ngenca yokuthi umntwana loyo: 

  • Uyintandani
  • Ulahliwe
  • Usengozini
  • Uyakhahlunyezwa
  • Uliselelwe

Wazi Njani Ukuthi Ukulungele Ukuthola Isibonelelo Sokukhulisela Umuntu Umntwana?

Ukulungela ukuthola isibonelelo sokukhulisela umuntu umntwana:

  • Kufuze ube sisakhamuzi seSewula Afrika, namkha ube mumuntu ohlalele futhi eSewula Afrika namkha ube mphalali ohlalele futhi eSewula Afrika;
  • Wena nomntwana ofunelwa isibonelelo kufanele ibe nihlala eSewula Afrika nobabili;
  • Umntwana omkhulisako kufuze afakwe ngaphasi kwetlhogomelo lakho, ahlale ngaphasi kwelawulo netlhogomelo lakho;  
  • Umntwana ofunelwa isibonelelo kufuze abe ngaphasi kweminyaka eli-18 ngobudala.

Uzakuthola Malini?

Uzakuthola R1 180 ngenyanga umntwana ngamunye.

Uzakubhadelwa Njani?

I-Ejensi yeeMbonelelo zeSondlo noMhlalaphasi kaRhulumende yeSewula Afrika (i-SASSA) izakubhadela isibonelelo sakho sokukhubazeka ngenye yaleziindlela ezilandelako:

  • Uzakuthola imalakho yesibonelelo endaweni ethileko eliziko lomndende, ngelanga elithileko;
  • Izakufakela imali e-akhawundini yakho yebhanga namkha ye-Postbank (ibhanga ingahle ikubhadelisele umsebenzi ekusiza ngawo wokwamukela imalakho evela kwa-SASSA).
  • Ngokudlulisela isibonelelo sakho esijamisweni esithileko esisebenza njengomlawuli wesibonelelo (isb. ihlangano yezehlalakuhle namkha ehlalisa abalupheleko namkha abentwana).

Tjheja: Nakufumaniseka ukuthi awukghoni ukuyozithathela imali mathupha, ungazikhethela isiphathimandla sezeemali e-ofisini yakwa-SASSA ukuthi sikurholele, namkha unikele omunye umuntu amandla wokukurholela isibonelelo sakho.

Singabuyekezwa Nini Isibonelelo?

Isibonelelo somrholo wokukhulisela umuntu umntwana sizakubuyekezwa nakuphela isikhathi somlayelo wekhotho. Njenganje lokhu kwenzeka qobe ngeminyaka emibili. Uzakwaziswa kusasele iinyanga ezintathu ngesidingo sokubuyekezwa kwesibonelelo somrholo.

Nayibe uthola imalakho yesibonelelo ebhanga, ezikweni leemali namkha ngomjameli, kufuze uzalise isitifikethi sobufakazi bokuphila (umtlolo ofakazela ukuthi usaphila) ema-ofisini we-SASSA, qobe mnyaka.

Kukunini Lapho Isibonelelo Somrholo Wokukhulisela Umuntu Umntwana Singajanyiswa Khona?    

Lokhu okulandelako kungabangela ukuthi sijanyiswe isibonelelo sakho:

  • Lokhuya ubujamo bakho nabutjhugulukako;
  • Umphumela wokubuyekezwa kwesibonelelo;
  • Nayibe awusebenzisani kuhle neemphathimandla nakubuyekezwa isibonelelo somrholo;
  • Nawukhwabanisako namkha nawudunga namkha wethula imitlolo engasiliqiniso ngawe;
  • Nayibe kukhona lapho kwaba nomtjhapho khona nakuphasiswa isibawo sesibonelelo somrholo.

Sivalwa Nini Isibonelelo Sakho?

Isibonelelo sivalwa lokhuya:

  • Umntwana nakabhubhako namkha nakubhubha umbelethi osaseleko okhulisela omunye umntwana;
  • Umntwana nakayokuhlaliswa esijamisweni sombuso (iziko elitlhogomela iintandani);
  • Nakudlula iinyanga ezintathu ngokulandelana ungamrholeli umntwana loyo isibonelelo sakhe;
  • Nawungekho eSewula Afrika;
  • Nayibe umntwana akasese ngaphasi kwetjhejo nelawulo lakho lokumkhulisa;
  • nawungasese mphalali (obuya elizweni langaphandle). 

Ekufuze ukwenze

  1. Khamba uye e-ofisini le-Ejensi yeeMbonelelo zeSondlo noMhlalaphasi kaRhulumende yeSewula Afrika (i-SASSA) langekhenu/eliseduze nalapho uhlala khona, uphathe nakhu okulandelako:
  • UMazisakho (i-ID) oneenomboro ezili-13 one-bar-code kunye nesitifikethi sokubelethwa somntwana.
  • Nayibe umphalali, iza nemvumo yakho etjengisa ukuthi umphalali kunye ne-ID yakho yobuphalali;
  • Nayiube awunayo i-ID namkha isitifikethi sokubelethwa komntwana:
    • Zalisa i-afidavithi eforomeni lakwa-SASSA elijayelekileko phambi komFungisi ongasisiphathiswa sakwa-SASSA;
    • Iza nesitatimenede esifungelweko esitlikitlwe mumuntu othembekileko ( njengekhansela, ikosi, isisebenzi sezehlalakuhle, umfundisi namkha uphrinsipali wesikolo) onazi nobabili ninomntwana;
    • Isiphathimandla sakwa-SASSA sizakugadangisa iminwakho bese sikuthumela emNyangweni wezangeKhaya kobanyana uyokwenza isibawo sikamazisi/se-ID, nawusalindele isibawo sakho esisasetjenzwako kwa-SASSA. Nayibe awuyitholi i-ID, isibonelelo sakho sizakujanyiswa.
    • Ubufakazi bokuthi wenze isibawo sokuthola i-ID/namkha isitifikethi sokubelethwa emNyangweni wezangeKhaya;
    • I-ID yesikhatjhana ekhutjhwe mNyango wezangeKhaya (nayibe unayo);
    • Isitifikethi sokubhabhadiswa, nayibe unaso
    • Ikarada lemTholapilo, nayibe unalo
    • Isitifikethi sesikolo, nayibe umntwana usesikolweni.
  • Isitifikethi sokubelethwa komntwana namkha iintifikethi zokubelethwa kwabantwana namkha ama-ID wabo ababuya nawo elizweni lekhabo;
  • Umlayo wekhotho owalayela ukuthi umntwana abe ngaphasi kwakho, atlhogonyelwe nguwe;
  • Ubufakazi bokuthi uthethe/wendile namkha awukathathi/awukendi.
  1. Zalisa iforomu lesibawo phambi kwesiphathimandla se-SASSA (tjheja ukuthi nguwe kwaphela umfakisibawo namkha isiphathimandla se-SASSA abangazalisa iforomu lesibawo).
  2. Bazakunikela isitlankana. Silonde, ngoba sibufakazi bokuthi ufake isibawo.

Kwenzekani-ke Nakufumaniseka Ukuthi Isibawo Sakho Saliwe?

Nayibe isibawo sakho saliwe, u-SASSA ukutlolela incwadi akutjele ukuthi kwenziwe yini singakaphumeleli isibawo sakho.

Nayibe awuvumelani nesiqunto se-SASSA, ungadlulisela isililo kuNgqongqotjhe wezokuThuthukiswa komPhakathi e-Ofisini yeliZweloke yomNyango wezokuThuthukiswa komPhakathi, uhlathulule ukuthi kubayini ungavumelani nesiqunto sakhe sokwala isibawo sakho.  Kufuze udlulise isililo sakho kungakapheli amalanga ama-90 ukusukela ngelanga owaziswe ngalo ukuthi isibawo sakho azange sibe yipumelelo.

Kuthatha isikhathi esingangani?

  • Kungathatha isikhathi esingabe sifike eenyangeni ezintathu ukusebenza isibawo sakho;
  • Nayibe isibawo sakho sokuthola isibonelelo somrholo siyaphumelela, uzakubhadelwa ukusukela ngelanga ikhotho emfake ngaphasi kwetjhejo lakho umntwana.

Kubiza malini

Wenzelwa simahla lomsebenzi wokufaka isibawo.

Amaforomu ekufuze azaliswe

Awakho ku-inthanethi amaforomu wokwenza isibawo, kodwana ungawathola e-ofisini yakwa-SASSA yangekhenu namkha eseduze nalapho uhlala khona.

Uthintana nobani

Uthintana ne-Ejensi yeeMbonelelo zeSondlo noMhlalaphasi kaRhulumende yeSewula Afrika (SASSA)

 

SASSA Toll free: 0800 60 10 11
Email:  GrantEnquiries@sassa.gov.za

Share this page